السلام عليكم

عندي صديقه مقربه متزوجه واحد متعود يضرب اخواته وللاسف خبو عنها انه يحب يضرب النسوان وتزوجته وجلست سنه ماقد مد يده عليها لانه صديقتي هاديه ومطيعه لكن مع وجود الاولاد تعبت نفسيتها وسارت تطلبه بعض الاشياء لاولادها من راتبها ويرفض لانه مستولي ع راتبها ثله له والباقي اقساط ماتاخذ الا جزء بسيط منه ع انه البطاقه معاها واذا اخذت زياده يضربها والمشكله اهلها ماوقفو معاها اخر مره تسبب لها بكسر واخذوها للمستشفى جبرو يدها وقالو لها لا تكلميه وخذي منه فلوس وماادري ايش كله عشان عندها ثلاث اطفال وحامل ومايقدرو عليهم

انا حبيت اتدخل طلبت رقم ابوها وقلت لها بقله يساعدك وكذا
وانا في بالي اقله انا مستعده اساعد بنتك تشتري شقه لكن بشرط تاخذ بطاقتها وتاخذ قرض وانا اكمل الباقي وتعطيني مبلغ شهري من راتبها والبطاقه تكون عندك ماتعطيها ولا تعطي زوجها وهذا الكلام ماقلته لبنتك عشان مااعطيها أمل فقلت اكلمك قبل مااكلمها وبعدها اذا شافت انه العشره معاه ماتطاق تتطلق وعندها بيت خاص فيها ولاولادها المهم سويت كل هذا وكلمت ابوها وقالي مااقدر تكون بنتي مطلقه في شقه لوحدها قلت ماهي لوحدها قال الناس تاكلني بالكلام ومافي مطلقه جلست لوحدها في شقه الا اذا ماعندها أهل

حاولت اتمالك غضبي قلت طيب الشقه خلوها بجنبكم او حتى في نفس سكنكم قال هذي المصيبه يقولو مايبغو بنتهم بينهم ورموها في شقه لوحدها
قلت ماهي لوحدها
قال تصبر حتى يكبرو اولادها ويسوقو سياره وذاك الوقت نطلب مساعدتك
قلت طيب اتمنى ماتجيب سيره لبنتك لو قلت لها رح اقلها ع كل كلامك الي معناه عيشي العذاب 10 سنوات وبعدها كوني حره اذا وصل عمر ولدك 16 سنه وقفلت الخط



قولو لي ايش الحل انا ماخبرت صديقتي بالي سويته من وراها لاني خايفه تحرجني أساعدها رغماً عن اهلها وعن زوجها وبعدين تحصل امور فوق طاقتها وياخذو عليها البطاقه وتروح فلوسي

نفسي تتعدل حياتها كل ماضربها تدق علي وتقطع لي قلبي حتى لما اشوف اتصالها ماارد الا بعد مرور ساعاات تكون هديت

وليش ثلاث اولاد ؟ و حامل ؟!!
وهى تعرف سوء اخلاقه ..!
مدرى كيف تفكيرهم هذولا اللى تشوف سوء خلقه و تروح تجيب اولاد
وبعدين تقول مين يشيل اولادى !!

لا أظن أن تدخلك سيكون إيجابي

أحتويها و انصحيها

و ادعي لها

وجزاك الله خير على سمو أخلاقك

__________________
أنا جنتي وبستاني في صدري أين رحت فهي معي لا تفارقني إن حبسي خلوة وقتلي شهادة وإخراجي من بلدى سياحة
إبن تيمية

وليش ابوها ما عنده بيت؟؟ وشو له الشقة؟؟ بيت ابوها هو بيتها بعد طلاقها .

عايشةمع رجل غير مرتاحة له ومازالت تنجب المزيد من الضحايا !!!
والله مافهمت هذي النوعية من النساء!!!

هي كذا قاعدة تعقد حياتها أكثر وقاعدة تتورط أكثر وأكثر

ساعديها بالنصيحه والتخفيف عنها فقط ..الخوف اذا بتساعديها وبتلاقي لها شقه وبعدها زوجها يراضيها وترجع له... بتطلعي انتي الشريرة اللي تبي تفرقي بينهم..اتركيها تحل أمورها بنفسها ..

فليكا وRealgirl : تعبت وانا اقولها جابت الاولين توأم بنت وولد قلت لها يكفوك وانا بوفر لك الحبوب لانها هي الوحيده الي تضمن معاه ماتحمل بإذن الله بس مااعرف ليه تحس انه مع الاولاد بيتعدل
والمدرسات في مدرستها يشجعوها تحمل وعذرهم إنه لا أهل ولا زوج بيشيلك ع الاقل ارلادك يشيلوك


محب السنه ؛ شكراً لك المشكله موضوعها مأثر سلباً ع حياتي مااقدر اطنشها ومااقدر اساعدها عادتي مع صديقاتي مااسمح لهم يخربو قعدتنا بسواليف سلبيه عن حياتهم لكت هذي معنفه طلبت منها تكلم اي شيخ او حتى عمدة حارتهم وكلمت امام المسجد قالها أنا فقط أقدم لهم النصيحه مااستطيع بأكثر من كذا وبتتعنف زياده لو امام المسجد كلم زوجها وخايفه تبلغ ومااحد يوقف معاها

ياسر ؛ ابوها يقول اذا هو طلق بنفسه باخذها في بيتي زي كلامك لكن الزوج مايبغى يطلق ومايبغى يعاملها كويس ليه الاب مايسعى لطلاقها وهو عارف انها معنفه ؟ لأنه مايبغى يربي ويشيل هم اطفال بنته

زينب؛ تعبتني يازينب بضعفها اوقات افكر اتركها لانها تقلب مزاجي ونفسيتي

مشكورين ع الرد جميعكم

لا تتعبين نفسك لو تبي تساعد نفسها كان عرفت كيف تنهي مشكلتها من اول
وعندها حلول كثيره وتقدر تاخد حقها لو تبي
وما الوم ابوها صراحه اذا هي بهذا الاستسلام اكيد ما راح يقدر يسوي شي
وش يردها تخلعه مثلاً وتعيش عند اهلها لحد ما يكبرون عيالها وتستقل بسكن خاص معهم ؟
فيه نوعية من الحريم انهزاميه بشكل يرفع الضغط
واحس ان وضعهم يكون عاجبهم او مدري كيف عجزت افهمهم بس يبون يتشكون ويدورون من يطبطب عليهم
بدون ما يسعون لحل نهائي ينهي المشكله من اساسها
وجد ما تضمنين كلمه منا وكلمه منا ترجع له وتطلعين انتي بالشينه
الله يعينك صراحه 😔

لا تورطي نفسك وبدل ما تحلي مشكلة تجيبي مشكلة لنفسك. تكلمي مرة أخرى مع والدها. قولي له بماذا سينفعك كلام الناس اذا ضربت ابنتك حتى الموت. هل ستسامح نفسك حينها. المشكلة يا أختي ليست في تفكير أهلها فقط ولكن في تفكير البنت، هي من جرأت زوجها على معاملتها بهذه الطريقة والحل يبدأ من عندها إن أرادت ذلك.

اتفق مع هذا الرد
والتدخل بشؤن الغير منقصة

__________________
سبحان الله وبحمده سبحان الله العظيم