على فكرة ،،

بعد وفاة أمي الله يرحمها ، و بالفترة اللي حصل فيه اختلافات مع أهلي ( لوجود فتن ) ..
طبعاً ، مع مرور الأيام هما راح يعرفوا بنفسهم ( لإني أثق بتفكير أهلي و ضميرهم ) ..

جلست كثير مع نفسي و فكرت ، لقيت إنه حتى انقلاب أهلي بالفترة هذيك عليّ .. كان خيــــــــــــــــــــــــــــــــــر عليّ من ربنا ..
لإنه خلاني اكتشف ( عيوب ) ، كنت أشوفها ( ميزة ) في عيلتي ..

مثلا ، هما ظلموني بإنهم اتهموني بإتهامات باطلة ، لإنه وصل لهم ( كلام عني غلط ) و أنا انظلمت ..
لإنه الإتهامات ، اتبنت على أسس ( اساءة الظن ) و أكون ممكن عملت شي و هما من عندهم حللوا و فسروه تفسير خاطئ

فصرت افتكر نفسي ، إني عملت مع زوجي نفس الغلطة .. يمكن أنا كمان ظلمته بتصديقي للإتهامات اللي جاته ؟

و مثلاً ، أهلي كانوا يدققوا و يسألوا و يحققوا بموضوع ( تافه بنظري ) و يبغوا يعرفوا مين الصادق و مين الكاذب ..
كم مرة شرحت لهم ، و يرجعوا يفتحوا السيرة من جديد ( و يصدقوا اللي براسهم ) ، لحد ما خلاص طفشششششت و انخنقت ..

شفت نفسي ، بأعمل نفس الشي مع زوجي .. بالأحداث السابقة ..

فالمواقف اللي حصلت من أهلي ، صح زعلت وقتها و حزنت و تأثرت مرة ..
بس ربي كانت له حكمة بالشي اللي حصل ،،

عشان أضع أعذار لزوجي .. و أعدّل أنا كمان من نفسي ..
و أنا ما بأعمل كذا غير مع زوجي بالمواضيع الخاصة بالأحداث السابقة ..

.
.

أنا بأعترف هنا بأي شي لي أو عليّ .. و ما بأحاول ألمّع صورتي ..

لإني بجد ، أبغى ( تغيير جذري ) ..

و بالعكس أخوي أبو حكيم ، كلامك مافيه قسوة و لاشي ..

يعني نصيحتك صح بالبداية ( استنكرتها و عارضتها ) .. لإنه مافي أحد ( يشوف نفسه ) ..
بس فكرت بها ( بعدين ) مع نفسي .. و ( اعترفت ) ..

و الشي هذا كثييييييييييييييييييير راح يساعدني و يساعد زوجي ..

اخوي ابو حكيم

انا ماني من الناس اللي أدقق.. بس الطبع هذا بأهلي
و مثل ما زوجي يكره طبايع في اهله.. لكن لاشعوريا مرات اجده يتصف بها
انا نفس الشي

فلما انقرصت من زوجي ومن اهله
بديت استخدم طريقة اهلي .. فما كان صعب علي موضوع التحري و التدقيق بالامر

انا اكره الطبع هذا و اتضايق منه
و حتى و انا باكتب هنا التفاصيل
مليت من نفسي ..

بس كان غصب عني.. لاني كنت مابين نارين
اتركه او لا ؟
فكان لازم ادقق بالبحث عن اجابات لتساؤلاتي
بما انه زوجي مايعطي لا حق و لا باطل

و حتى لا اندم بيوم

لكن الطبع هذا بالفعل مو عندي ..
بس سهل علي استخدامه اذا اردته.. بس ما احبه
لانه يتعبني قببل لا يتعب غيري

ماني قادرة اكتب شي حاليا
احس بانه النار خامدة بداخلي..

و بأمر بحالة سكون
و متوقفة عن التفكير ..

بس منشغلة حاليا بمحاولة الاهتمام بصلاة الفجر
و باحاول ارسم خطة تساعدني انا و زوجي عالعبادة


قلبي يوجعني ماني قادرة اكتب شي من امس
لكن متضايقة عشان صلاة الفجر مابنقومه غير متأخر

.
.

مرات كذا.. انعزل شوي مع نفسي عن الاخرين و امر بحالة صمت
افكاري ملخبطة شوي ..

ثقة فيه .. صفر%
لكن ثقة بالله 100%
وثقة بنفسي معتدلة

ماعرف ايش اقول

بس حاولت امسك حالي .. ماقدرت
ارسلت له:

قلبي يوجعني لما أشوفك كيف تعبان بدون راتب.بس كمان افتكر نفسي زمان كيف كنت احاول اوقف معاك واصبر نفسي وأتحمل..وبس لقيت لنفسك وظيفة..بعتني وصرفت بطايق شحن على بنات الحرام والشوارع.ووقتك عطيته لغيري..

لاتحسب بيوم أو بلحظة انه قلبي سامحك..غلطتك ما تتسامح أبدا طول العمر..

انت خيبت ظني فيك.وكسرت شي
كبير بداخل قلبي.وكسرت صورتك الشريفةوالعفيفة.

بس عشاني ماني خاينةللعشيرولأني بنت أصل.وأخاف ربي..ومتأكدةانه ربي رزقني زوج نقي تقي صالح زي ماطلبت منه.بس هذا الزوج موعارف مصلحةحاله ولاعارف ايش معنى(الله)وبيرمي حاله للهلاك بنفسه.ويحسب ربي خلقه عبثا..!

ادري انك تكلم من زمان..والدليل الصورةالي متصورها مع الحمارة..وغيره من أدلة..بس والله لوغلطةبسيطةلقيتها بيوم..تأكد انك بتخسرني (للأبد)

(( اقصد الصورة الي مع الاجنبية.. والي قالي كانت بالمعهد..
هو الصراحة ماكان لاصق جنبها و كان يطالع بالكاميرة
صح جالس عالكنبة بس مبعد يده و اليد التانية كاسة كولا ))

بس عشان ابغاه لا يستصغر الامور و يستهين بها
سواء بمعهد او غيره

و ارسلت كمان

ولاراح أسألك وقتها ولا أناقشك..بس راح ادعي وقتها عليك بالهلاك والامراض

.
.

لانه دايما لما ادعي شي.. ربي الحمدلله يستجيب دعواتي
فابغاه يخاف

بس ماني جادة بكلامي

هو يخاف اني ادعي بيوم

رد علي..

ياقلبي ايش ارد عليكي ماعندي رد الا اني ندمان وابغاكي واحبك بس لاتقولي من زمان لانة مو من زمان والله

.
.

كنت متضايقة شوي .. لانه الفترة هذه رجعت اتحمل المسئولية من جديد
و هو مامعاه نص هللة

نفس الوقت اعرف انه شخص مايستحق الواحد يوقف معاه