وعليكم السلام ورحمة الله وبركاته
كل سنة وأنت طيب يا اخوي وكل أهلك وأحبابك
لا شك الإنفصال أمر ماهو سهل ولكن ردة الفعل تختلف من شخص لشخص
حسيت بمرارة في قلبي لما بدا الموضوع يتفكك فعليا ويتلاشى وأنتهى
وصحيح أنه بعد الفراق يغني الله كلا من فضله
لكن هذا ما يعني أنك أرسلت آخر رسالة قبل نهاية العدة وخلاص ...الموضوع احيانا له جوانب ثانية
احيانا الزوجة بعد إستلام ورقتها تصحصح
تفك السكرة بعد حدوث الطلاق فعليا وإنتهاء كل المحاولات ومرور بعض الوقت

أنت تقول ما بتفكر بالزواج إلا بعد سنتين ومعك حق .. يمكن خلال السنة الأولى هيه تبادر بالرجوع لك
أعرف أنك تقدر تتزوج غيرها بأسرع وقت ، ولكن من أجل العمر يلي عشتوه مع بعضكم ومن أجل العشرة والأطفال وكل لحظة حلوة ... أتمنى ما تقنع نفسك أنها انتهت من حياتك بمجرد إنتهاء عدتها

رحم الله والديك ، انت قلت اللي بقلبي
سنتين لااكثر من ذلك ، انا اعتبرها فتره كافيه للإصلاح مع نفسي ولطليقتي ايضاً
فإن هي ندمت ورجعت فحياها الله لجلها ولأجل اطفالنا ، وإن انتهت السنتين
فالدنيا ماتوقف على أحد وبتزوج ، يااخوان وياأخواتي عندي ملاحظه حاب اذكرها . فيه وحده من بناتي الله يحفظها عمرها ٦ سنوات والسنه الجايه بتدرس اولى ابتدائي ، تقول شفت صورتك يابابا بجوال ماما وأنت جالس بالحديقه ومعاك التكايه ( هي صورتني وأنا جالس بالحديقه بيوم من الايام بجوار البحر وزوجتي كانت معاي وقهوه وحلى وطلعنا للتمشيه ) وقالت بنتي شفت صورتك انا وانت واختي واخوي بالمجلس حق الرجال ، ( قلت في نفسي غريبه طليقتي مامسحت الصور ، هي ذاك اليوم بعد طلاقها لما راسلتها وقلت ارجعي فأنا السبب بزعلك ونادم ،وردت مني وتقول مستحيل ارجعلك وأنا مسحتك من حياتي ، ومابيني وبينك الا اطفالنا فقط ، وغريبه مامسحت صوري بجوالها اذا على قولها مسحتني من حياتها ) علامة استفهام والله اعلم . والتعليق لكم

حياك الله يا أخوي .. ياخي مستحيل تنساك مستحيل، حصل الطلاق صح ولكن النسيان صعب صعب صعب
ياخي أنت كنت عشيرها على الحلوة والمرة وبينكم أطفال وتعايش
وأنت لست شخص عابر في حياتها أو صدفة عشان تنساك بسهولة ياخي أنت محفور بقلبها وبذاكرتها وكل مرة تسترجع لحظاتها معك وتحاسب نفسها وتتألم على ما حصل وطبيعي تحتفظ بصورك
هيه التراكمات سبب الطلاق وليس إنعدام المحبة والمودة .. والناس مختلفين في ردود أفعالهم مابين مكابر مصمم ومابين متنازل متغاضي
أنت ياخي طول بالك وفترة سنتين هيه فترة كافية تراجع نفسها ويرجع عقلها يحدث نفسه من جديد .. يمكن بعد كم شهر من تصديق الطلاق تتغير المواقف وتتبدل القناعات
والله يختار لكم الخير .. تألمت بقوة عشان طفلتك صغيرة ومن حقها تعيش بين أب وأم مترابطين

الله يهديها وترد لبيتها.
وسبحان الله ماتعرف يمكن بعد فترة من الزمن يمكن تلين وتحن لك..
اهم شي يبقى بينكم الود والاحترام عشان عيالكم.
وماحد يعرف بكره ايش مخبي

مازلت تطعن بنفسك وتحمل نفسك اللوم على الطلاق.

ياخوي تراك ماسويت شي يستاهل الطلاق!

هي الي طلبت الطلاق وراحت وخلتك وانت ونعم الرجال حاولت الي عليك انك ماتتسبب في تفكك اسرتك لكن بالاول والاخير هي الي طلبت الطلاق.

انت ماسويت شي خطا افهم هالشي.

لا تعيش على امل انها ترجع لك. بكره بيرزقك ربي ان شاءالله بزوجه ثانيه تنسيك هي واهلها.

ياخوي خالد .. والله ماقدرت انساها . ليش اكابر . عشرتها الطيبه معاي منذ زواجنا حتى قبل طلاقها ماشفت منها الا العلوم الطيبه . وعشرتها الطيبه معاي هي الحين تشفع لها بقلبي . وماكرهتها .. فأنا السبب في زعلها حتى لو انها بالغت في زعلها . ومختصر الموضوع . اعطيت نفسي سنتين وعندها فرصه ترجع او او اني بعد انتهاء السنتين بتزوج والدنيا ماتوقف عليها . لكن ليش اكابر وأجامل . قلبي يحن لها كثير .. والذكريات تتجدد كل يوم وأتذكر اجمل وأسعد اللحظات معاها
عشان كذا سنتين كافيه ووافيه بالنسبه لي
والله يصلح الحال

آمين ... معاها سنتين تراجع حساباتها . وبالنسبه لي بعد مرور سنه بالضبط . يعني إذا جاء شهر رمضان القادم بإذن الله سنة ١٤٣٩ ببدأ اضبط وضعي المادي وأستخرج قرض جديد من البنك بشهر رمضان القادم وأجمع مصاريف اخرى من راتبي لتكاليف الزوجه الجديده ولااضيع عمري لانسانه ماتبغى ترجع .. ومع العلم اذا اخذت قرض من البنك وجمعت من مصاريف اخرى من راتبي وأصبحت أنا جاهز للزوجه الجديده . فبعطيها آخر محاوله وأكلم اخوها . وأقول اعط خبر لأختك تبغى ترجع ونفتح صفحه جديده . او انا قررت اتزوج . وحينها الجواب يكون واضح وأكون والحمدلله جاهز نفسياً ومادياً . انا ماامدح نفسي اعطيتها فرص كثيره لجلها ولجل اطفالي
. والمثل يقول ( كُل دقّه بتعليمه ) وهذا انا تعلمت الكثير من اخطائي وماراح تتكرر اذا رجعت لي طليقتي .. او تزوجت . ماراح تتكرر اخطائي . الدنيا علمتني كثير . وتعلمت منكم دروس كثيره . وأستفدت الكثير من نصائحكم بالمنتدى . وماانسى وقفاتكم رجال ونساء من اعضاء ومشرفين
وأغلبكم يتذكر موضوعي السابق بعنوان ( زوجتي تبغى الطلاق ) فالحمدلله على كل حال
فأسال الله يوفقكم لما يحبه ويرضاه




فعلاً / الدنيا ماتوقف على احد
ملاحظه / إذا صار شيئ جديد بموضوعي فبعطيكم خبر هنا بالمنتدى
ارجو من المشرفين اغلاق موضوعي بناء على طلبي
تحرير في ١٤٣٨/١٠/٤

يغلق.......

__________________




بيان إداري نأمل منكم الاطلاع

جديد المنتدى

هل تعرضتِ للابتزاز
هنا من ينقذك


مفضلة المتزوجين 2011-2014


مفضلة المقبلين على الزواج 2012- 2014