كانت ولا زالت اللحظات اللي اكون فيها عند جدتي من اجمل لحظات حياتي
وحكاياتها من زمان للحين وانا اتذكرها صحيح ان نصها من كيسبيديا بس كانت اطلدز شي بهاك الوقت
لأمانة النقل العلمية ما كانت تحكي لي قصص فيها حكمه او موعظة حسنه ابد تموت بالاكشن كله تروعني ما بقى شيطان ولا ذيب ولا حيوان مجهول الهوية ولا غول ولا عنقاء ولا قاطع طريق ما حكت لي عنه يقالها تبي تنومني البلا موب هنا البلا اني انام من الخوف واصحى تالي الليل ظلام وكلهم نايمين ويبدا مشوار انتظار الفجر يالله يا طول الوقت ما يخلص
وتشتغل الهلوسه اصير اشوف اشياء تمر من عند الدريشة
واصوات برا البيت والوحش اللي بياكلني قسم بالله ما اصدق يأذن الفجر زين ما مت

*

ويا سلام على البطولات اللي كله بهارات زمان اول كنا نعلق الدينصاور مع رجلينه ولا يقدر يعترض موب انتو
زمان كانت النفوس طيبه ولا انتو يا ضيق قلوبكم وهم كانو يتقاطعون على 3 سم من الارض وكانت النفوس طيبه 🙄
طيب وموروث الدعاوي اللي اقل ما يجي منها فقدان دائم لكامل وظائف الدماغ من وين جات

*

وفي المقابل فيه قصص حقيقة تدل على كرم ومروءة وصفات حلوة وقيم ما غيرتها صعوبة الحياة اللي كانوا عايشينها طبعاً لو بعطي نفسي وجه اكتب كل قصه ما خلصت
( طبعاًً كذابه ما اذكر شي محدد اللحين )
فعشان كذا بترك لكم المجال تتكلمون عن جداتكم وقصصهم المعقوله واللامعقوله ولا حددت قصه جيت كتبتها

*


من كثر ماني مشتاقه لجدتي صرت افكر فيها كثير و اتذكر كلامها وسوالفها ❤ الله يخليها لي ويطول بعمرها ويخلي لكم جداتكم ويرحم اللي ماتو منهم ويغفر لهم ...

ههههههههههههههه يموتن في قصص الذيب ما ظن وحده فيهن ما حكتها ، عاد ما يطوفش شركان شركون

له اربع عيون وتروح تقول بااااو وتكبر عينها وانا اعياااااط وين اعيط الا اضحك ، المفارقه يا اقحوان ان

بعد ما كبرت واشتد عودي كل هالقصص طبقتها صوت وصوره عليها الله يرحمها ويغفر لها

نظرها ضعف وما تشوف فيها ، وعاد انا استلمتها مره استوي جني ومره قطوه كله وانا ورى الشباك

ويوم لبست القناع رعب حكايه تانيه

__________________
وهل من مصير اخر ؟

هذا لا قالو لك
اعلمه الرماية كل يومٍ فلما اسْتٓد ساعده رماني
الله لا يطيحني بإيدك يا كوكي قولي امين
استاثمتي بهالمسكينة
اجل جني وقناع وبعد ما تشوف زين حسبي الله على ابليسك من بنت
مجرمه 😂😂😂

❤🌸 يا بعد عمري والله يا هاجر ..

والله اتكلم جد لا يطفونج صج كملي
وايد تأثرت باللي كتبتيه .. احس عشت معاكم
لما تركضون كنت واقفة بعيد اناظركم..
تكلمي عن جدتج... قولي قصصكم ..
والله اتكلم جد كملي

احبج 💕🌸

__________________

حاجة الناس إليكم من نعم الله عليكم ، فـ لا تملوا النِعم ☁✨

كنت دايماً اقول إن آنه عندي جداات وايد
وقعلاً كانوا وايد .. وكان لكل وحدة قصة مختلفة

من جهة أبوي : أمه و مرت ابوه و جدي
ومن جهة أمي : أم أمي و أمها و ابوها

اعتز بوجودهم ، احبهم..
كنت صغيرة عمري 5 سنوات يمكن
كان بيت ابوي عبارة عن بيت شعبي
فيه حوش وفي الحوش حوالينه غُرف وايد
كانت جدتي أم أبوي تقعد عند باب غرفتها بالحوش
وآنه كنت اغني اغنية تنرفزها بس في النهاية تضحك معاي
اقول لها ( يمه يالعودة ما لج حشيمة!!! قاعدة عند الباب چنج يتيمة )

كانت تهددني تقول لي ( آه يا زينبو ياللي ما تستحين الحين باقوم اكوفنج بالعسو )

اكوفنج : الضرب بشدة
العسو : المكنسة القديمة اليدوية

بس بعدين تضحك..
كانت تخوفني تقول لي لمن تقولين لي چذي بتروحين فوق وبتنامين بالليل
( كان ابوي عنده شقة فوق بيت ابوه شقة واسعة على كل البيت ومن كثر ما هي كبيرة تخوفني شوي )
المهم تقول لي راح تجي لج أم حمار
جسمها جسم انسان و رجلها رجل حمار
☺ طبعا كنت طول الليل ما انام

__________________

حاجة الناس إليكم من نعم الله عليكم ، فـ لا تملوا النِعم ☁✨

جاتني قشعريرة من وصف ام حمار 😰😰
ابحكي لك حكاية جدتي عن الغول بس مو اللحين بالليل
لزوم الاكشن وكذا اخوفك واخاف معك

مرحباً أختي

ماعندي أي قصة لواحدة من الجدات .. لأن واحدة ماتت قبل أن أولد والثانية كانت جدية ورسمية ومايتكلمون معها إلا الكبار

بس الحقيقة
أستمتعت بطريقة كتابتك وإستخدامك لمفردة بأتسلفها منك وأستخدمها على أرض الواقع

( كيسبيديا )


بارك الله فيك

هلا بالطش والرش ❤❤
هلا بشيخة البنات
يا بعدددد اللي راحو ولا جو

هذا ترحيب الجدات 🤗

.

اذكر جدتي الله يحفظها خواااااافه 😂😂
إذا احد يموت من الديرة لازم تخلينا نرقد عندها انه و اختي
( اول الحفيدات )...
فيه شيء ما انساه أبداً

كنت اعطش واتثيقل اقوم اشرب ماي قبل النوم
كانت تقول لي " زينبو ديري بالج اللي تنام واهيه عطشانه تحلم انها رايحة تشرب ماي من البير "البئر"
وتغرق وتموت )
ومن ذاك اليوم لين اليوم وانه ما ارقد بدون ما اشرب ماي
مع ان حاليا ادري انها سالفة ( چذيبووو )

..

تعرفون قصة الجدات الشهيرة ؟
( نتيف انتيفان يا اخونا الحقنا الحقنااا )
* ( لا انا اخوكم ولا انا ابوكم ولا ركابـ"ن" على خيولكم)

__________________

حاجة الناس إليكم من نعم الله عليكم ، فـ لا تملوا النِعم ☁✨

يا بعد عيني يا زين
يختي استحيت من الترحيب مرتين مرررتين تنقفل الصفحة والخبط بالبرنامج
ما عاد ركزت تقل اول مره احد يرحب فيني 🤗
يا شيخه جعل ما يرحب ولا يهلي غيرك

چان زيين تقولي اغرق واموت لا كانت تقول اذا نمتي وانتي عطشانه
تطلع روحك تدور مويه ولا ترجع واجلس افكر طيب اذا طلعت
وما رجعت انا بكون انا ولا انا بتروح مع روحي
واذا بتروح معها وين بنكون كيف بعيش
ووش بيصير واسئلة مالها اخر وكنت اتعمق بالتفكير ياخي كيف ياخي
تفكير بزران نسأل الله السلامه
والله يا زين يا قصص جدتي اللي تخوف لقبل سنتين وهي مسيطرة علي
من وانا صغيرة اذا رحنا عندها انا زي الدجاج انام بدرررري حتى ما اتعشى
واصحى بنفس التوقيت ولا اتحرك من مكاني اخذ وضعيت الميت لين الله يفرجها
وطبعاً كبريائي ما يسمح لي اعترف اني خفت او شي من هذا القبيل ابداً

ونتيفان ما اعرفه وش قصته 🤔

اجل فاتك نص عمرك ما عشت متعتة الحكايات والنصب
تدري شلون حلال عليك الكيسبيديا تعويض عما فاتك