فاكهة مافهمت !؟

ايش هي ردة الفعل المقصودة ؟

.
.

بيتا

كان موقف بسيط ..
تسلميييييييي ..

.
.

ماكملت ردي على اخوي ابو حكيم و ردك
لاني افكر في كلامكم من زمان و كل يوم

اخوي ابو حكيم ..

بعد الي حصل ببريطانيا .. و بعد مانقلنا و قررت التركيز بدراستي ..
كنت باسترد قوتي مع نفسي و كنت بداخلي مقررة مع نفسي اني اعتبر
زوجي خلاص كأنه ( انتهى من حياتي ) عشان اقدر اعيش ..

مثل الي صاير دحين بين توفي و زوجها .. لما يقولها اعتبريني جزء من حياتك
بس كان صعب اخد اي قرار .. لاني ماكنت فاضية عشان احقق بالمواضيع الي حصلت ببريطانيا و كتبتها هنا لاول مرة
و كنت افكر بمرض امي وماعرف راح تعيش و تتعافى و لا كيف وضعها بيكون ؟ و ماقدر اشغلها معاي .. و كان لازم انجح هذيك السنة عشان ارجع

بس كنت ناوية في الحقيقة بيني و بين نفسي .. اني ما راح استمر معاه ..

في الوقت الي بديت فيه استرد ثقتي بنفسي و انشغل بحالي ..
زوجي كان يثبت لي انه تغير بالفعل .. كان يحاول و يفعل .. و كنت اشوف .. بس ماكنت اثق فيه .. بسبب الي انقال عنه من صحباتي
و كنت كل ماشفت صحباتي بعد كم شهر .. يرجعوا يفكروني و خاصة الي تحب الهرج الكثير ..
مع انه زوجها الصراحة اسوا من زوجي بكثيييييير ..

اقصد زوجي افضل من زوجها بكثيييييير .. بس هي كل مرة كنت الاحظ عليها تقلل من مقدار زوجي ..
وصارحتها من زمان .. بس هي تخلي الموضوع هذا حجة لها .. انه زوجي شخص سيئ

طيب انا افتكرها زمان قبل لا اتزوج و اول ماتعرفت عليها و هي بيني و بينها 15 سنة و زوجها
اكبر منها.. يعني هما اكبر من زوجي كمان

قبل زواجي .. افتكرها كانت تحكي عن زوجها وتشتكي من افعاله و هو وقتها كان عمره تقريبا 40 و عنده منها 5 اطفال
و انا زوجي كان بالعشرينيات و لسى تونا عرسان .. يعني لو اقارن بين زوجي بعد سنوات لما يصير بعمر 40 مع زوجها
اكيد بيكون زوجي الافضل بملايين المرات

المهم ..
انا الحياة علمتني كيف افكر .. و لا وقتها كنت اعتبرها قدوة و اخت كبيرة لي .. و كنت اصدقها ..
بس تعلمت بعدين و بعد ما ابتعدت عن صحباتي بسبب الحكايات هذه .. تعلمت دروس كثيرة بالحياة ..
اولها .. اني ما اثق باقرب صديقة لي ..
تاني شي .. ما احكي لصحباتي عن زوجي اي شي ..
ثالث شي .. اني اثق برايي ... و اني انا الي اقرر مصيري بيدي ..
رابع شي .. زوجي مو كل شي بالنسبة لي ..

.
.

تكملة

بالفترة هذيك .. زوجي مثل ماقلت كان يحاول يثبت لي انه غير ..
مو لانه الي انقال صحيح ..

لانه افعاله سابقا .. كانت تسمح لاي احد انه يتكلم و يتدخل بحياتنا و حياتنا تنهدم..
مثلا .. زوجي مايقول لاهله فين بيروح .. و لا يقولهم اي شي .. و يخرج و يدخل بالوقت
الي يبغاه .. و لما يسالوه .. يكذب عليهم ..

فكان يعاملني بالطريقة هذه ببداية الغربة .. و كان مقتنع بطريقته ..
بعد الي صار .. جلسنا و تكلمنا و قالي ماكنت اعرف الفرق بين اهلي و زوجتي ..
انا كنت كذا في بيت اهلي .. وماعرفت انه التعامل هذا غلط اني اتعامله معاك ..
الا بعد ماشفت انه بيتي كان بينهدم لاني ماكنت اقةل لك شي ..
فصار اي شخص يجي يقولك اي شي عني تصدقيه .. لانك ماصرتي تصدقيني
( طبعا انا رتبت لكم الكلام هنا .. و لا هو كان يقول نص كلمة و انا افهم الباقي ..
زوجي ماكان يعرف يقول كلمتين ورا بعض .. كان بداخله خوووووف مو طبيعي )

يمكن عشان كذا انا صدقت الكلام الي وصل لي عنه .. لانه كان يخاف حتى لو الحق معاه ..
بس الحمد لله .. اني تربيت تحت يد ام و اب قلوبهم رحيمة ..

بداخلي تعاطفت معاه .. و كنت ابحث و اقرا بالنت .. قريت وقتها عن بوصلة الشخصية ..
و شفت انه فيه ناس مثل زوجي .. يكون الحق معاهم لكن وقت المواجهة .. تحس انهم غلطانين و مذنبين
لانه ردات فعلهم توحي بالشي هذا ..

و تاكدت من الشي هذا .. لما مرة كنت انا الغلطانة و اشتكيته لامي .. و امي خاصمته ..
كان يحب يتكلم مع امي و انا كمان .. امي كانت تعامله كانه ولدها ( غير عن بقية ازواج اخواتي )
و قامت امي صدقت انه هو الغلطان .. بس بعدين اعترفت لامي و هزأتني .. ^^
و هو صدق انه غلطان و ما دافع عن نفسه .. بعدين علمته و قلت له .. اتكلم و دافع عن نفسك ..

من يومها صارت امي تحبه و توقف معاه ضدي
عشان كذا زوجي يقول انت غيرتيني و علمتيني كيف اعيش مع الناس ..

.
.

المهم ..

كنت وقتها رسخت بعقلي الباطن اني مجرد ما ارجع للسعودية ..
و امي تتعافى .. باتركه .. و رتبت وضعي من غير ما يدري ..
قلت لأمي .. لو بيوم تركت زوجي انا راح اعيش ببيت لوحدي مع ولدي
و اجيب شغالة و سواق ..

اعطوني من دحين قراركم .. عشان اخوي لا يتحكم فيا .. و التاني بالذات
مابغاه يتدخل فيا .. امي قالت لي ماحد بيتدخل بقرارك عشان لاتقولي بيوم
اجبرناك تعيشي مع زوجك .. و قلت لاخوانك ما يتحكموا فيك .. و قالوا طيب ..

.
.

اعطوني حرية القرار .. و انا لسى برة ..
كنت صح باكمل دراستي .. بس كنت برضو باشوف زوجي و اختبره ..
عشان لا اندم .. و ماكنت اعطيه هذاك الحب .. كنت احبه عشان نفسي ..
خلاص تعلمت وقتها ..

بس برضو و. ماكنت اقصر معاه .. و كنت اهتم بلبسه و اكله و بنفسي ..
بسسس .. نيتي كاتمتها بداخلي .. تظهر مرات وقت الغضب او الزعل ..
و بعدين لما نتصالح كنت اقوله بس كلام وقت الزعل ..

و انا فعليا .. كنت متأثرة بالاحداث الي حصلت .. و بكلام صحباتي و الي كتبته هنا ..
عشان كذا فتحت الموضوع .. عشاني تعبت و مابغى اجلس اسيرة للافكار الي بتهدمني و تهدم حياتنا ..

السنة الاخيرة .. زوجي كان يجيني الجامعة و يجيب لي عشا معاه ..
مرات و الله بعز البرد و الشتا .. يمشي برجوله 40 دقيقة عشان مامعاه قيمة الباص
او الوقت يكون تأخر و الباصات توقفت خلاص ..
كان يجيني للمكتبة المركزية و شايل عشا ليا ..

و مرات يخلي الشغالة تجهز لي الاكل و يمشي برجوله من البيت للجامعة
عشان اكل .. اكون مواصلة بمكتبة الجامعة و يجي يجلس معاي بالليل ..
و ياما نام
فوق الكنبة
ة بالمكتبة المركزية

و رجعنا البيت بعد الفجر !؟

وطبعا انا ما قصدت انه تعامله مع اهله صحيح .. بس الى الان اسلوبهم نفسه
و هو حر بتعامله معاهم .. بس مو ذنبي اتحمل نتايج افعالهم ..

اهله لما يسالوه انت فين .. مو عشان مصلحته .. عشان مصلحتهم
فكان زوجي يفهمني غلط و يحسبني ابغى اتحكم فيه .. كان يقولي بداية الزواج
اعرف تبغي تعرفي الجواب عشان تتحكمي فيا .. كنت استغرب كلامه و ماصرت اساله

بعدين هو لما قرر يتغير .. صار يقولي من حاله ..
انا اليوم رايح اسهر او راح اتاخر او زي كذا ..
بدات الحياة تتعدل .. مع وجود بعض المنغصات العادية ..

بس رجع يكذب كبات بيضا على قولتهم ..
مثلا رايح اصلي بالمسجد و رايح تحفيظ .. يعرف اني افرح ..
بس كذاب يروح يلعب بلياردوا ..

اقتنعت انها هوايته .. بس اشترطت عليه ..
بعد 9 ما يجلس بالبلياردوا .. برة طبعا..
لانه السهر برة عندهم يبدا بعد 9

.
.

المهم انه تحسن كثير عالاقل كان بيحاول

بدات حكاية الاحتيال معاه .. و يعلمني ..
كنت اقول له .. ربي مايبارك لك بالمال ..

يمكن الوضع اللي نحن فيه حاليا .. اثبت له صحة كلامي ..
الفترة هذيك .. كان قرش واحد مايجلس معاي و ماكنت اخد قرش حرام

زوجي اخذ قرض من شركة ربوية و زوجي من النوع الي يقنع نفسه باي
طريقة انه الي بيعمله حلال .. كنت بداية الزواج اصدقه لاني احسبه شيخ
و هو كان يضحك علي و يعطيني فتاوي و كنت هبلة اصدقه هو و اهله ..

المهم .. كلمته انه الشركة هذه ربوية و اصلا زوجي ضحك عليهم و مارجع لهم فلوسهم
قلت له ربنا ماراح يبارك لك بالفلوس و قلتله الاية ..
رجع اشترى جوال و يضحك عالشركات .. مايسدد لهم ..


للاسف .. اهله كذا يحللوا لنفسهم الامور ..

دحين فيه فلوس لحضانة ولدي باقية لهم عندي .. تقريبا 1500 ريال وعدتهم اعطيها لهم

لحد دحين جالسة بذمتي و راح ارجعها لهم بإذن الله لما اروح اقفل ملفي بالملحقية
طبعا زوجي لو عليه يقول طنشي .. بس بالقصد راح اخليه يشوف كيف فلوسهم بترجع لهم ..

القصد من الحكاية هذه ..
انه هو بحاجة لاعادة بناء من جديد .. و المصلحة بالاخير لاولادي ..

.
.

مثلا قبل اسبوع زوجي لقي كاميرة غالية قيمتها بالالوفات ضايعة لواحد من الحجاج
زوجي لقي بيانات الحاج و طلع واحد مايتكلم عربي
كلمه زوجي بالجوال بالانجليزي و راح له زوجي بنفسه و قابله و اعطاه اغراضه

يقولي زوجي .. شوي و يبوس رجولي من كثر ماهو طاير من الفرحة و مو مصدق انه اغراضه جاته و مانسرقت

قلتله .. شوف كيف دحين بيرجع بلده و يجلس يحكي لهم عن الامانة بأهل البلد هنا ..
قالي بجد .. زي مانحن نرجع من برة و نحكي عن برة و الغرب كيف عندهم امانة و نقول المواقف الي صارت لنا معاهم

.
.

اخوي ابو حكيم

زوجي اكتشفت انه بجد برئ و طفل ..
يفكرني بأبوي الله يرحمه ..

بس ماعرف كيف ممكن اقوي ايمانه بالله ..
كيف اخلي بداخله مراقبة لله ..

المهم ..
رجعنا من برة .. و كنا متفقين من برة قبل لا نرجع .. اننا اذا رجعنا ..
اني ماراح اكون مثل بداية زواجي اتحمل اي شي ..

يجيب لي شقة.. يأثثها .. يجيب سيارة . و وظيفة .. و يصرف علي و على ولده ..
و كان هذا الشي هو اللي بيثبت لي انه بالفعل متحمل مسئوليتنا ..
و كان هذا الشي الي بيخليني اتمسك فيه او لا ..

لانه برة الصراحة .. انا ما احتاج لزوجي ..
و سبب من اسباب تاجيلي للدكتوراة غير مرض امي ..

كنت ابغى اعرف قيمة زوجي بحياتي قبل لا اوصل لمرحلة اخد فيها شهادة الدكتوراة
و ما اشعر بقيمته ..

كمان زوجي لو باستمر معاه .. كان لازم يرجع السعودية و يدقدق على راسه عشان يعرف
فايدة الشهادة و يعرف قيمة السنوات الي ضيعها عالفاضي برة ..
كانت هذه النقاط براسي وقتها ..

.
.

المهم رجعنا ..

بس اللي خرب اموري .. مرض امي و حملي ..
امي الله يرحمها كانت تقسى كل مالها .. و انا كنت جنبها اغلب الاوقات ..
كنت اشوفها تموت قدامي .. حملت و كانت امي كل يوم توصيني ..
انا راح اموت و كنت اعطيها جرعات ايمانية

كنت يوميا افكر كيف افرحها .. كنت اجمع قرش فوق قرش على امل اني اسفر امي برة
لو اضطر الوضع و اعالجها باي طريقة .. زوجي عاش معايا هذه الايام ..

لو كان مثلا يفكر يخونني وقتها .. كان ممكن بسهولة ..
جواله كان جوال عادي .. ومن غير كلمة سر ..
كان يجي ينام عند بيت اهلي لو مافي اخواني .. و كان يقول عشانك ..
لانه فترة مرض امي كنت محتاجة لزوجي نفسيا ..

بديت أشم ريحة نقل الكلام بين اخواني و اخواتي و كلامهم عني من خلف ظهري
كانوا يحسبوا جلوسي الكثير مع امي اني اتكلم عنهم ؟
و انا جلوسي معاها عشان اعوض فترة الحرمان الي عشته بالغربة بعيد عنها
و لانه امي لو احتاجت لشي .. ماكانت تطلب من احد .. فكنت ادور و اشوف ايش نفسها فيه ؟
كنت احاول اقوي صلتها بربنا و تحمد ربنا عالمرض و انه ربي يحبها ..
عكس اختي كانت تقولها فلانة حاسدتك عشان كذا مرضتي و فيكي عين و لا سحر ووو الخ

طاقتي كلها اعطيها لأمي .. كنت اجمع قرش قرش عشان ماني عارفة متى الكيماوي تبان نتايجه ؟
هل فيه امل و لا كيف ؟
و مع كذا كنت ما ابخل على امي .. اي شي تشتهيه امي صارت تطلب مني و من غير ما تنحرج

.
.

كثر الهمز و اللمز من اهلي بس كنت اطنش
لاني ماتركت الغربة و دراستي و اهملت بيتي عشان اتفرغ لتفاهاتهم و قيل و قال و مشاكل
بالمقابل امي كان محبتها لي تزيد و محبتها لزوجي ..

طبعا نفسيا .. انا تأثرت ..
قلبي مات بموت أمي ..

.
.

امي من هنا ماتت .. و تونا راجعين من غسل امي ..
و اهلي يلاقوا فرصة عشان يقلبوا علي و راس الفتنة تطلع اشاعة و تنشر بين الكل
اني عاقة لأمي و اني و اني

ماعجبهم الكلام و المدح الي سمعوه من الناس .. لما يقولوا عصامية تركت دراستها عشان امها
و انا ماهمني اي احد .. كان همي امي و بس ..

الفترة هذيك .. كنت معتبرة اهلي كل شي بالنسبة لي ..

.
.

جيت حكيت للصائمة لله ..

صححت لي المفاهيم و قالت لي ..
اخوانك و اخواتك انت ما اخترتيهم ..

زوجك و اولادك دحين هما أهم شي بحياتك ..

.
.

ياربي ؟؟؟

امي ربتني انه اخواني و اخواتي هما اهم شي بحياتي ..
و انا كنت مهيأة نفسي اني اترك زوجي ..
اهلي تخلوا عني ..
زوجي وقف معاي..

.
.

كل شي تلخبط بمخي ..

ماصرت اعرف العدو من الصديق ..

.
.

مصدر الامان لي كانت امي ..

.
.

اللي عملوه اخواني و اخواتي .. فتح المجال للغرباء انهم يستغلوا الاوضاع للتفرقة بيننا ..
صاروا حريم الاخوان يستغلوا الاوضاع ..

حاولت اجمعهم .. انشغلت بهم ..

.
.

الفترة هذه اعترف اني قسيييييييت على نفسي و على زوجي ..
تقريبا 6 اشهر من يوم امي ماتت ..

.
.

نسيت اقول انه وقت ماكنت حامل بالشهر الخامس .. سافرنا برة انا و زوجي و ولدي
و شفته مرة سهران و كنت تعبانة من المشي ..
. استغربت سهره .. و تاني يوم شفته حمل برنامج شات و كان توه
بدأ يبحث عن احد يدردش معاه ..


لما شافني اكتشفت حركته .. حذف البرنامج ..
و زعلت منه لاني من قبل قلت له ماني مستعدة يخرب بيتنا بسبب الاجهزة هذه و البرامج الي فيها
وقتها قلت له .. ابغى الجوال .. انا ماعندي ايفون .. و حامل ماقدر اجلس قدام اللاب توب ..
يعني عقاب بطريقة غير مباشرة .. انه يعطيني الايفون

طبعا الايفون هذا هو مادفع فيه قرش واحد ..
ضحك على شركة برة و طلع الجوال ببلاش و سافرنا بعدها للسعودية
و مع كذا اعطيته الفين عالايفون ..

.
.

المهم بسبب الحركة هذه و تحميله لبرنامج الشات ..
كاتب الحالة الاجتماعية ( صعبة )
و كاتب بالانجليزي
Life without love is not life
Love without trust is not love

سالته ايش تقصد بها ..
جلس يكذب و يالف كلام ..

.
.

و كان تعود عالسهر في السعودية مع اصحابه ..
و مرة يقول معزوم على شبكة و مرة زواج ..
بس ما عمره نام بعيد عننا ..

.
.

الحمد لله من بداية الزواج فيه اسس عودته عليها و تعودت عليها
ما ينام زعلان مني او العكس ..
حتى لو اضحكه بالليل .. بس ارجع ازعله بالصبح عادي
المهم الملايكة ما تلعنني

حتى كان يقول مرة من المرات .. مو امس نمنا مبسوطين ؟
اقول له .. لا بس لسى ما تكلمنا عن المشكلة ..

.
.

طبعا نوم برة الغرفة وقت الزعل .. مرفوض ..
و لاعمري رحت بيت اهلي لو زعلت .. اول شي لانه صحبتي من يوم تزوجت نصحتني بكذا
و تاني شي ماعمري شفت وحدة من اخواتي جات بيت اهلي زعلانة من زوجها
و اخر شي لاني اصلا بالغربة كنت هههه يعني غصب عني

أختي الكريمة/ عصامية
1) أنتِ ماذا تريدين بالضبط؟
2) هل طبقت شيئاً أو فعلت أية خطوة للأمام؟
:::
إلى الآن نحن ندور في بعض الحلقات المفرغة..
أرجوك اخرجي منها وتقدمي بشيء للأمام على الأقل افعلي أي شيء وإن كان بسيطاً