أخواتي أقروا كل كلمه بتمعن
والله راح ترتاحين نوعا ما
عجبني الموضوع ونقلتـــــه لكم
قريته أكثر من مره

مساء الخير على جميع المحروقات المجروحات
إللي بداخلهم براكين لاتخمد
غضب و ألــــــــــم و حسره
أسئلة تحتاج لإجابات و إجابات
ليه تخون ؟
ليه تغازل ؟
ليه تكلم غيري ؟
أنا قايمة بكل واجباتك
أنا أعمل كل شي عشان أرضيك
أنا جميله ودلوعه
باطلع عنه أربيه
باطلب الطلاق
بابلغ أهلي
بابلغ الهيئــــه
باكلم البنات إللي يكلمهم
باتابع الأرقام إللي يتصل فيها
وبعدين ؟
بتنحل الأمور
لأ
لأ
حاسه بكل لحظة ألم تمــــــرون فيها
الغصه إللي تحرق حناجركم بالدموع
إللي تشهد عليها سجاداتكم و وسايدكم
بس خلونا نحكي بشوية عقل
كل وحده مجروحه تترك قلبها على جنب
وتحكم عقلها الزواج ماحيستمر وأنتي تتبعين مشاعرك وقلبك فقط
الزواج يحتاج لعقلك و ذكاءك و حكمتك
وأهم شي (( صــــــــــبرك ))
ولاتنسين قربك من الله
هو إللي يسمع نجوانا و يجيب دعوانا

أكتشفتي إن زوجك يلعب بذيله
أوكيه وش الجديد ؟
ليه الصدمه ؟
أغلب الرجال حالياً بهالشكل
نخرب على أنفسنا و لانحافظ على بيوتــــنا
ليه مخلين حياتكم الزوجية لعبة قط و فار
وسجين وسجان ؟
باصيده
باراقبه
باتابعه
بالعكس
الغباء نعمه في أحيان كثيره
أستغبي ماحتندمي إطلاقاً
لأن الرجل يكره المرأة إللي تتابعه
وتراقبه و تنتبه لكل شي
أنا لاحظت زوجي يرتاع لمايلاحظ مدى دقتي و نباهتي
فأصبحت أستغبي
لقيت أسهمي أرتفعت أكثر و أكثر
هذي هي طبيعة أغلب الرجال
يحبونــــك أضعف و أغبى منهم
وينفرون من ذكاءك
لأنه يحسسهم بالضعف
والرجل يكره هالخصله أمام زوجته
صدتيه يغازل
أعلنتي حالة الطواريء و الإستنفار
كنك ماصدقتي لقيتي عليه شي؟؟؟
وبديتي التخطيط للإنتقام
وجلستي عاد تجمعين الجديد
والقديم بتطلعينه على راسه
ولقى الشيطان مدخله لك
بدأ يثيرك و يستفزك أكثر
ويفتح لك أبواب شر لها أول مالها آخر
والنتيجه إنتي الخسرااااااااااااااانه صدقيني

الحلول ماحاطول عليكم
لأني حاسه بالبراكين القابله للإنفجار بأي لحظه
وهالكلام ماقلته إلا من تجربه شخصيه بحته
مايهمكم تعرفون مين صاحبتها
الأهم تعرفون النتائج
وإيش النتائج

الزوج مايكلم بنات نهائياً
جواله طول الوقت قدام زوجته
أي إتصال من بنت
أو رساله يوريها هي بنفس سامحه ومبتسم
تسوى عيونه
شايلها من عالأرض شيل
كل وقت و كل لحظه
يقول لها ماشفت أحد بحكمتك وروعتك
لوضعف بأي لحظه رمى الجوال عندها
أوقال لها كلمتني بنت اليوم
الماسنجر لماتجيه إضافه يبلغها و تضحك معه ويلغي الإضافه
لأن أحياناً ياخذون الإيميل من بعض مواضيعه
يحكي لها أي موقف يمر عليه ولوبالشارع أو بالسفر
صايرين مثل الأصدقاء مافيه حواجز أو أسرار أوغموض
هاه وش رايكم بالنتـــــــــــــايج ؟

بس ماجت إلا بعد صبر سنوات
وكفاح من هالزوجه و لحظات ألم مريرة جداً جداً كتمتها قدامه
ياما أستغبت
تعرف إنه يكلم بنت وتروح عنه
حتى ماينتبه إنها صادته
تجلس تلف تلف حوالين نفسها
وسكاكين تقطع قلبها
تنهار
تبكي
تروح لسجادتها وتناجي ربها

بس كانت تقرب من زوجها أكثر و أكثر تحاول تشغله
تشاركه بالنت
حتى يتعود يشاركها
تقول له شفت واحد طلب
إضافتي و أضفته طلع رجال وشته
طلع له قرون وينه هاتي إيميله
كنسلي مسنجرك
قالت له والله لويضيفني تريليون رجال غيرك مابي ولاأشوف

أرضت غروره
لما تلاقيه عالنت تجي تسولف معه حتى لومالها نفس
وماتتعمد النظر للجهاز غضي نظرك عن الجهاز هوبيحاول يخبي المحادثه
تجاهلي كنك ماشفتيها
أستمرت على هالحال

كان يطلع من عندها مشوار
وتعرف إنه طالع يكلم
ماتتصل عليه تتركه ياخذ راحته كنها مادرت
لوتأخر تتصل حبيبي وش فيك تأخرت
(ماتقول معاك إنتظار)
ويرجع يلاقيها بأحلى صورة

أكتشفت إنه مسجل بمواقع الزواج
لأنها أسهل طريقه لصيد البنات
جت قالت له بعد أيام
حبيبي فيه موقع سجلت فيه أسمــه كذا كذا
أنهبل يوم عرف إنها مسجله فيه
لاعبته لاعبته لاعبته

كره هالموقع نهائياً و ماعاد دخله

الصبر وطولة البال كل وحده تعرف زوجها ومداخله ومخارجه لاتقولون مانعرف
تعرفون وش يلفت إنتباههم وش يشدهم
بس يحتاج منكم لفترات طويلة وكفاح حتى تنتشلوهم


ممكن حتى تجي على نفسك وتقولي عادي تكلم بنات
بينهبل لوقلتي كذا

بينجن ليه ماتغارين علي
ردي عليه إذا ماخفت على مشاعري ليه أغار ؟

أجرحي و داوي
أجرحي و داوي

أسلوب الصراخ والمشاكل
والله يابنات ماينفع معهم النتيجه
جوالات ماتدرون عنها
مكالمات في أوقات طلعاتهم وحتى بالعمل
موكل مره زوجك بيكلم من جواله
ولاكل مره بتصيدي رقم ثاني
لهم طرقهم ومداخلهم
وأبواب الشر لين أنفتحت أنفتحت صدقوني

مكالمتك للي يكلمهم بتفتح لك أبواب
ليه تنزلين نفسك لوحـــــــده قذرة ؟
ممكن حتى تجرحك بالكلام
ممكن عناد فيك تتقرب له أكثر
أثقلــــــــــــــــــــــوا
إللي تبي تحافظ على بيتها و زوجها تثقل وتحكم عقلها وتقرب من الله
والله ماتندمون

بكره يجيبها لبيتك ماتدرين
بكره يسوي بلاوي مادرين
خلك نبيهه تابعي بحذر
حتى تكوني عارفه بكل الأمور
موتبقين على عماك
لين يدخل يابيده وحده متزوجها من علاقه
يامنومها في غرفتك
و أنتي عند أهلك مواعد بالعربي

لاإتصالكم بالهيئه بتنفعكم
أما بيرميك فبيت أهلك بحجـــة أتهمتيه و فضحتيه وشوهتي سمعته
والرجال لين حقد حقد
ولاطلعتكم لأهلكم بتنفع
ولاخناقك بينفع ممكن يطق بوجهك
ويقولك خلاص هذا أنا عاجبك هلا
ماعجبك طقي راسك بالجدار
(وأنتم أخبر ببعض هماجة الرجال وعنادهم وبجاحتهم)

أثقلوا و حلوا أموركم بذكاءكم وكيدكم
إللي تبي فعلاً تحافظ على زوجها وبيتها تتحمل وتصبر
حتى لوزوجك عاقل فيه بنات يبلونه في نفسه
إن زان الرجال مازانوا البنات
مايخلون أحد بحاله
والدليل روحي معه لأي سنتر
وشوفي كيف يحلى في نظرهم
لمايشوفونه مع زوجته وتبدأ حركات الإستفزاز
حنا يابنات يامجروحات في زمن الفتن و الشدائد كل يوم يمر نشوف أعظم
هل نخرب على أنفسنا و لانحل أمورنا

أنتي لما تطبخين طبخه ياترى بتطلع تمام لوعليتي النار عليها وطبختيها بدقايق ؟
ممكن تحترق ويروح تعبك وتخسرين

ولاتخليها تتسبك على نار هاديه
حتى لوميته من الجوع ؟
وتطلع زي الورد

العاقله بتفهم كلامي مضبوط
الله يعلم إني ناصحه لكم و متألمـــه للألامكم
موكل زوج ملتزم يخاف الله و يتقيه
ويوم مايلاقي إن زوجته ماتكفيه بيتزوج ثانيـه
ولاكل زوج بيراعي مشاعر زوجته
ولاكل زوج يعشق زوجته ومابيهون عليه يظلمها
حرقة قلبي عليكم
خلتني أكتب لكم اللي بخاطري
فهمتوني يابنات ؟
الموضوع منقــوول بعد ماشفتكم تشتكون من الخيانه

اللـــــــــــــــــــــــــــــــــــــــــــــــ ــــــــــــه ع الكلام الجميل
تسلم ايادي لي كتبته

ويعطيج الف الف عافيه ع نقله لنا
لاننا صدق محتاجين لمثل هالمواضيع قبل لايطيح الفاس بالراس

كلام في الصميم يا غاليه،،والله الخيانة صعبه جدآآآ واحساس فضيع تحسه المرأة مسكينه والله..
الله لا يوريه لاي وحده يا رب
مشكووورة حبيبتي على موضوعك المفيد جدا،،بارك الله فيك

__________________
استغفر الله لي و للمؤمنين و المومنين ,, الأحياء منهم و الأموات الى يوم الدين

تسسسسسسسسسسسسسسسسسلم الايادي على النقل

بجد رووووووعه لاعدمناك كلام منطقي في الصميم

صحيح الخيانه مره والصبر امر بس مالنا غيره الله يفرجها على كل مسلم

__________________
..( أستغفرالله العظيم الذي لا إله إلا هو الحي القيوم وأتوب إليه )..

وااااااااو كلامها مـره نااايس ~

اعرف وحـده قريبـه لي زوجها كان يخووووونها بكل الطرق ~

بس هي من قلة وعيها وتفكيرها وغباائها الصرااحه ~

ماعرفت تحتويـه ولا تهدي الـوضع بالعكس سوووتله مشااااكل وطيرت عقله ~

وربي يااااما نصحنااها خليك عاقله خليك حكيمه .. افهمي زوجك

الصراخ ورفع الصـوت مايجيب فايـده ~

بس ماسمعتنــا ~

ولاراح تسمعنا ~ بس بالنهايـه ... الآن مطللقـه ..

واتوقع ومتأكده انها بتمـووووت من القهر .. وتقول ياليتني سمعت نصايح الي نصحوني

مع انه لما كنا ننصحها كانت تبكي تقول انتوا تكرهـوني وتحبوونه هذا خاين

وتسب فيه وتلعن فيه ~ لين اخر شي خلاها ..

والله فيه حريـم بجد مايعرفون شلون يحـلون مشاكلهم ولاعندهم خبـره بالحيااااه ~

ثاانكس على الموضوووووع جدا رااااااااااااااائع ~

__________________
{ احبــــ ـــكم بلا استثنـاء ~

الأخت الفاضله اسيرة ذكرياتي
أظن ان اغلب النساء اذا تعرضن للخيانه من ازواجهن , صعب عليهن تطبيق ما جاء في هذا الموضوع
ليس لأنهن يفتقدن الحكمه والصبر , ولكن لعظم الأمر قد لا تستطيع المرأه الصبر وتجاهل مشاعرها ومجاراة زوجها الذي ربما يمتد لسنوات من اجل اصلاح وضعه .
نعم المرأه عموما تتميز بالصبر ولكن في مثل هذه الحال , قليلات جدا من يستطعن الصبر والتحمل ولديهن القدره على الاصلاح .

الموضوع في المفضلة

الكلام هذا اقرأه من زمان..

وطبقته (وحصلت نتائجه ولله الحمد) .. وانصح به



الله يسخر كل زوج لزوجته .. ويهدي شبابنا وبناتنا ياا رب


راااائع بكل معنى الكلمه

__________________

يعطيك الف عافية على الموضوع وايد حلو صرح
وان شاء الله الحريم تصبر على ازوجه (( ليش الحريم يصبرو والرجال لا ؟؟)) اقصد مو الخيانه لكن شي اقل لا يوجد فيه صبر مثل العيوب لكل مو كلمل الكامل الله ..

طيب لو فرضنا ان زوجته فعلا غبيه ما تتغابى عليه

وتعاملت معاه مثل ما انتي تقولين بجهل منها وما تدري عنه انه يغازل او يكلم او على علاقات

اليس هذا النوع من النساء هو المفضل والمرغوب لدى كثير من الازواج اللي يغازلون ؟؟؟

ولو تغابت الن يعتقد انها فعلا غبيه ولم تكتشف امره وسيستمر في سخافاته

انا لا اعتقد انها قد حلت مشكلة الغزل

ولكني اعتقد ان الرجل قد مل من الغزل <<<<<< لانه قد تشبع على مدى سنين وطفش

ووقف بنفسه مو بسببها

اشكركم خواتي على المرور
بس انا اقول المهم في الموضوع عدم المشاده مع الزوج لان اغلب الازواج يسيطر عليهم العناد وكل ممنوع مرغوب
مع الالتجاء الى من هواقرب اليك من حبل الوريد وهو من ابتلاك وهو رب العالمين
ولنعلم انالمحنه التي تمر على المراة وتعيشها هي في الحقيقه منحه من الله ان لم تظهر جليه في بداية الامر سوف تظهر في نهاية الامر
الله لايضعنا في هذا الموقف