السلام عليكم
انا محبطة وحزينة
احتاج للإستشارة
نشأت في اسرة امي تصرف علينا
وابوي انسان مقتدر جدا لكن لايصرف
حاولت امي الطلاق لكن كان الرفض من اهلها
هذا كان قديما
حاليا امها وابوها متوفين الله يرحمهم
عشنا بحالة فقر حتى الجمعيات الخيرية رفضت تساعد
امي لانهم يجون لبيتنا فله دورين يقولون ماانتم محتاجين فلوس
مادري هل يكذبون امي والا الناس مالها الا الظاهر
وحتى ضمان امي ماقدرت تاخذ لانو لازم اثبات ان الاب مايصرف
عاشت امي على صدقات الناس من اكل والخ
حتى كبرنا وكبروا اخواني واتوظفوا والحمدلله
صار حالنا افضل شوي فتحوا بيوت واتزوجوا وامي فتحت مشروع لها صغير
يالله يسد احتياجنا
ابوي سيء جدا بالمعاملة بالكلام صرنا نتجنبه
المهم كتب لي الله ان ياتي انسان لخطبتي
كنت ادرس الجامعة
تمت الملكة ومااعرف عنه الا ان اهله ناس متدينين جدا
تزوجنا وسافرنا اسبوع ورجعنا ورجع لدوامه
حسيته انسان مايحب يصرف
قال بعطيك مصروف 300 مع ان راتبه تقريبا حول ال7000
انا حكيت لكم معاناتي مع ابوي وماحبيت اعيد التجربة
رفضت وقلت اقل شي500
كان على كل شي يدقق فاتورة المقاضي والخ واصلا وانا بالسوبر ماركت كان يطلعني بسرعه
ومصروفي الي اتفقنا عليه مااخذه
كان يغيب كثير من دوامه
ويخصمون مايبقى شي
مر شهرين وكان جدا جاف معي
مشاعره كانه مغصوب علي
وكانت تصير مشاكل اول شهر كان بيسافر لحاله ويتركني
كنت اقول تونا رجعنا وش فيك
وش بيقولون الناس تركتني بشهر العسل ورحت لحالك ليش
كان يحب يخليني انام عند اهلي كثير
كنت ابكي ليش كذا
حتى بحفلتي الي سووها اهله لما رجعنا من السفر خلاني ارجع مع اهلي
تخيلتوا راجعه لبيت اهلي بكشختي ولاسئل وش صار
سكت وبعدها انفجرت انت ماتحبني قلها وخلاص
بدا يتحجج ويقول اشياء وانو انا ليش افكر كذا
المهم قال احملي الا تحملين
انا ماكنت ابي وقلت له لا جلس يقنعني
قلت بنفسي بحمل يمكن يتغير
حملت بعد زواجي باربع شهور
فترة حملي التسع شهور
اجلت من الجامعة
وش شفت منه شفت اهمال وغيابه مره زاد ومايصرف وصار
احيان يقول اشياء غير معقولة
صرت اقول شكله مريض نفسيا
طول فترة حملي مشاكل وجوع وياخذ من اهله
لان اصلا الراتب مخصوم واذا طلع يروح للقرض الي اخذه
والفترة هذي اكتشفت انه دايم يتهاوش مع ابوه
وابوه قال لي اشياء تمنيت اني ماسمعتها عنه كيف هو كذا عاصي
وكيف اذا طلب شي لازم يتحقق
صرت اتمنى الي ببطني يطيح وادعي الله
لين جا موعد ولادتي وولدت بالسلامة
فترة النفاس كان يجيني يزورني
هادي جدا شكله غريب
قلت يمكن ربي هداه
مره ارسلت له ابي حليب للولد جب له قال واخوانك
وانفجر يهاوشني بالرسايل جت بخاطري انه كيف كذا ماطف بولده
وسكت جت على نهاية نفاسي
وكانت الصدمة لي
اعترف لي انه يتعاطى مخدرات
ويشرب وحشيش
وانه هذا بلاء من الله ومن سنين على هالحال هو
وان محد يدري وكل شوي كان يسافر
انا هينا انهرت معه
وقلت لازم تترك
قال احاول
على طلعتي من النفاس يعني كنت انتظر منه شي اي شي لو بسيط
واختلفنا قلت فرحني لو بكيك لو بورد عادي
هزئني وطلق
انفرجت صياح عند خواتي
على كل الي تحملته بسهولة يطلق
وكنت ساترة عليه انه يتعاطى مابي افضحه
رحت علمت امي
وامي كلمته
امي عجزت تصارحه بس قالت نبي العقل وبينكم مولود حرام
بعدها رجعني
طبعا ماعندي ابو ياخذ بحقي
وصعب اجلس عند اهلي ويصير ضغط على امي
ورجعت
لما رجعت لقيته مجهز فيزا بيسافر اوربا عشان كذا طلقني
وبياخذ خويه ولا بياخذ قرض على حسابه السفره
بس الله ماكتبها له
مشيت الامور واسكت
وعشنا
وصاروا الدوام من كثرة غيابه
يوقفون عليه الراتب وعشنا من ابوه يصرف
لين جا وقت جا لمي وقال قدمت استقالتي خلاص
انا مسكت نفسي وماقلت شي ابدا
وراح
بعدها بوقت قلت ليش قال موقفين دوامي وهم وهم
وبدا يشتكي انهم ظالمينه
تركته لانه شايف الحق معه وماجادلته لاني اعرف ان الكلام ضايع
وجلس حول تسع شهور بدون عمل
وانا صابره
ومعاملته لولده زفت كنه عدوه كان مره رمى الولاعه بوجهه وهو عمره ماكمل سنه
وشلت ولدي ورحت الغرفة
لين رجعت الجامعه طبعا كله ااجل كنت حطيت ولدي عند اهلي
وماش مارتحت حولت عن بعد وجبت ولدي
طبعا كنت اروح لاهلي ازعل مرتين رحت
ثلاث اسابيع
وكنه خف وترك الخرابيط وبدا يعامل ولده احسن
بس متضايقة من جلسته بالبيت وعدم تحمله مسوؤليتنا وان ابوه يصرف
وكنت دايم اكلمه لازم تشتغل يقول مالقيت
قلت اي شي
وبصراحه ماكنت احسه يبي يشتغل
لين جا يوم انفجر ابوه بوجهي قال
قولي له يشتغل لين متى
قلت اقول له دايم قال لا الحي عليه وهاش
انا تضايقت وسكت
يعني انا ماارضى ان ابو زوجي يصرف
وحسيت ان ولده مصخها معه
بس وش بيدي
لين جا يوم وسجلت بماده
طبعا دراستي عن بعد مافيها روحه وجيه
وابوه الي دفع لي
وصار في ماده يبي لها تطبيق يعني اروح الجامعه
ثلاث ايام
وقلت له قال دبري لك سواق سيارتي ماتتحمل مشاوير بعيده
كانت الحامعه بعيده
قلت طيب السواق يبي فلوس
قال من وين لي
قلت كيف من وين لك انا وش اسوي
راح بعد اخذ من ابوه للسواق
ورحت اول يوم مع السواق
العبرة خانقتني حتى ماجا يشوف وش السواق
طلعت لحالي وولدي مخليته عند اهلي
ومقدر اقول لاخواني ودوني وهو موجود
جيت تعمدت ادق اقول افتح باب العماره لماوصلت تحت
فتح الباب حتى ماطلع ورجع فوق
وطلعت كان البيت شوي مو مرتب بحكم اني
انشغلت بالتطبيق
وانفجر علي انفجار عظيم
انتي وانتي وانتي ومانظفتي
انا هينا حسيت اني خلاص استوووب
انفجرت عليه وجا سحب جوالي من يدي
قال دايم هالجوال
قلت وش تبيني اسوي اربع وعشريين ساعه بالبيت انت
وتجلس على جوالك والعابك وخرابيطك تبيني اجلس كذا
ورفض يرجع الجوال قلت اوك اشبع فيه بس هات شريحتي اخوي مطلعها لي
والله لاروح لاهلي قال انقلعي
ورمى شريحتي
قمت اخذت جوال عنده قديم وركبت شريحيتي
كلمت اخوي قلت تعال
قال وش فيه قلت تعال وبس
رحت اهلي وثاني يوم جا وجاب
جوالي عطاه اخوي
وانا للحين عند اهلي هذا تقريبا
رابع شهر
اقول لهم بتطلق احس مايبون
حتى اخوي هذا يعرف بخرابيط رجلي
ومايبون انطلق يقولون يهديه الله ويشتغل وبتحسن
وهو يتصل كان اول شهر تقريبا ويبي ارجع وماكنت ارد
وكلم امي وقالت اشتغل وترجع لك
ومدري وش اسوي
اختصرت لكم قصتي بشكل جدا ملخص وماقدرت اكتب
الانبذه بسيطة
علما اني كلمته قبل اسبوعين
وقال انه متحسف وانه تغير وانه وانه
قلت تخليني مع غريب اروح وانت فيه
قال مضغوط لاني مااستغل
وارجعي قلت كيف ارجع وانت الحين مااشتغلت
من بيصرف
وقهرني هزئته وسكرت بوجهه وللحين ماكلمته
ولاهو راضي يطلق
طبعا انا مو انسانه شريره او مااحس
بس عيشته مع سنتين ونص
شفت ظلم منه
يكلم بنات ومخدرات ومايصرف ومواقف عجزت امسحها من بالي

مدري وش اسوي جد مقهورة منه
اشوف خواتي رجالهم مو نفسي
كل واخد يخاف على عيالي
والله ان فيني حسرة
يعني اربع شهور بس مره امه جت وعطت ولدي
مصروف لايذكر
وامي ياعمري هي الي تشري له كل شي
بي قهر والله

ولا الحين اختي تقول عاجبتك عيشة ابوك ارجعي لزوجك
ابرك

هذا الي قدرت اكتبه
واتمنى انه وصلكم
وفهمتوا علي
احس من كثر ماانا متضايقة
ماعرفت اكتب

بالانتظاررر

^اسفة عالفيس حطيت حزين طلع معصب

بسم الله الرحمن الرحيم

السلام عليكم ورحمة الله وبركاته

اختي الفاضلة لا يمكن الحكم على تصرفات زوجك لأنه انسان مسلوب الارادة

وهو في محنة شديدة ويحتاج الى مساعدتك له ووقوفك بجانبه

هو يتمنى داخليا ان يتخلص من هذا الوضع ويستعيد طبيعته ويعيش كأي انسان طبيعي

وادمانه افقده من قبل عمله ومصدر دخله ويكاد حاليا ان يفقده بيته واستقرار اسرته

فمن يرضيه ان يصل الى هذه النتائج؟

لا احد صدقيني

ولكن كل هذا يحدث رغما عنه فكيف يمكن ان نلومه ونعاقبه على امور تصدر منه رغما عنه؟

اختي الفاضلة اتمنى ان تقفي بجوار زوجك وقفة امرأة قوية حريصة على استقرار بيتها واستمراره

لذا يجب عليك ان تذهبي لوالده وتخبريه ان ابنه اصبح انسان مدمر لكونه مدمن مخدرات وان المخدرات افقدته عمله وجعلته انسان هامشي لا فائده من وجوده

ولا رجاء لاصلاحه واعادته رجل حقيقي يعتمد عليه الا اذا تخلص من ادمانه

وانه ان عاش عشر سنوات اضافية مدمن فلن يتقدم خطوة ولن تقر عينه برؤية ابنه ناجح وله قيمة كباقي الرجال

وان الحل الوحيد ان يدخله مستشفى لعلاج الادمان

حتى يخرج منها انسان طبيعي قادر على مواجهة الحياة والعمل وسد حاجة بيته

واخبريه انه ان ترك ولده على هذا الحال فسيخسره ويكون هو المسؤول امام الله عن الحال الذي سيؤول اليه يوما ما

وانه يتمنى الخروج مما هو فيه وكالغريق الذي ينتظر ان يأتي انسان فيمد له يد العون وينقذه

وابذلي قصارى جهدك اختي الفاضلة ليتعالج زوجك ويستعيد نفسه وطبيعته

لأنك ان نجحتي لتحقيق هدفك هذا ستكونين اكبر مستفيدة من هذا بإذن الله

عندما يعود زوجك ليعمل وينفق عليك وعلى ابنك وتكونين بهذا قد حافظتي على بيتك من الانهيار وهذا بالطبع هدف اسمى بكثير من طلب الطلاق وتدمير البيت

واستعيني اختي الفاضلة بالله فليس كمثله معين واكثري من الاستغفار والدعاء ليخرجكي الله تعالى من هذه الازمة

واعلمي ان احترام الانسان لنفسه في المستقبل لا يتأتى الا بالمواقف القوية التي وقفها يوما ما والاهداف السامية التي سعى لها وحققها

في النهاية اسأل الله تعالى ان يشفي زوجك شفاءا لا يغادر سقما وان يظل بيتك مستقرا ومستمرا

في رعاية الله

__________________