بسم الله الرحمن الرحيم*
والله مادري وش مشكلتي بالضبط اجتماعيه مادري نفسيه ...المشكله أني ماعاد اثق بالناس زي قبل ..حتى علاقتي بصحباتي خليتها سطحيه اموووت من الضيقه ولا اشكي لاحد ...قلبي ومادري وشلون صاير موب قاسي بس ماعاد يهمني احد وش مكان * *يعني اللحين لي فوق 3 شهور ماكلمت صديقاتي اللي قريبات مني ووحده زعلانه مني ولا فكرت أكلمها ولا أراضيها ... صايره شراره على اي شئ اقب
&&&&&
السبب ؟؟
صدمتي اللي هزتني في اقرب انسانه كانت بالنسبه لي ..
بالاول ابقول علاقتي مع صديقاتي اللي بمدرستي الاولى كااانت علاقتي فيهم مادري وشلون اقرب ماكون انا اللي متمسكه فيهم يعني يغلطون ويجرحوني صح أزعل واضيق بس من ثاني يوم اجي ولاكنه شئ صاار كنت اقول بنفسي صديقتي ومثل اختي وماتقصد تزعلني صح احيااان كثيره ماكنت احسهم يعزوني وكنت مثل المهرج بالنسبه لهم * لاني من اللي كثير يمزحون ويغلطون علي فانا اكتمها بنفسي ولا قد قلتلهم انا أتضايق من كيت وكيت منهم >>> هذا وضعي بالمدرسه اللي قبل*
ونقلت من مدرستي اشان النسبه*
المهم تعرفت ع بنت وحبيتها وصارت مني قريبه حيل ...
البنت فرفوشه زيي وزي كذا وصارت تكلمني بالثانيه وتقول انها تعلقت فيني وكانت تقول اخاف أني اتعلق فيها انا ماني عارفه وش قصدها بالتعلق وقتها فاقول لا عادي*
*بعدين *صار شئ مستحيل اصحا ماتكلمني أنام ماتكلمني احيان اذا صحيت القا 32 مكالمه .. وكانت تقولي قبل لاتنامين لازم اسمع صوتكِ انا كنت اتضايق واطنش ومره قلتلها مابغا اكلمكِ كل يوم فجلست تبكي*
وتقولي انا ماقدر وانتِ معتبرتكِ زي عمتي اللي كانت متعلقه فيها وكانت تقولي انها ماتت .. فانا اجلس ابكي ع طول*
وزعلت علي وجلست ترسلي رسائل تشاؤميه لأبعد الحدود *وانها بتموت وانها ضاايقه وكل مالها تنصدم بالناس ...وانا ع طول بكي ودقيت عليها وهي ماتبي تكلمني وكلمتني أمها وخليتها تكلمني وكااااانت راااايقه واانا ابكي لانها حسستني انا الغلطانه >> *
وبعدين صدق تعلقت فيها وصرت اتضايق لو ماكلمتها من غير المكالمات وربي كنا نسولف بالوسائط ماتقل عن 3 شرايح*
المهم ابقول الاشياء الاجابيه وبعدين الصدمات*
1- وقفتها معي يوم صابني ورم حميد وهي اللي كانت تشجعني *
2-وقفتها معي بفرحتي وضيقتي*
قصتها...*
البنت كانت من عرفتها كل اربعاء الساعه 7*
مناحه لانها كانت تقولي ان بهاليوم ماتت عمتها تخيلوا كم اربعاء بالسنه كل اربعاء كذا *قسم اجلس أكلمها من 7 لين 10 بس اجلس أهديها يعني كل اربعاء تجلس تحكيني عن معاناتها كانت تقولي ان اخوها كان دايم يضربها وانه كسر جوالها ومره كب عليها الزيت وشوهها انا وقفت معها بكثير وكنت أحاول اقويها قد ماقدر حتى ماكانت تبي تكمل دراستها وووقفت معها لين تخرجت ..
وكرهتني بكثير ناس كانوا معاي وكانت تقول على وحده انها فرقت بينها وبين اعز صاحباتها وكنت اتحاشا البنت ذي وكانت تقولي بسبتها صارت وتعالج عن دكتور نفسي وتقول انه بالجوال مو بعياده وتعلقت فيه وصارت تحبه انا كنت اهاوشها وربي كنت أدق عليها واذا لقيته انتظار اجلسسس بكيييي لين ماترد كنت اخاف تكلمه ..*
*المهم البنت قلبت نفسيتي برسايلها وكلامها يعني اقرب ماتكون لانسانه ماتملك شئ *وقفت معها ماكانت تبكي الا أني ابكي قبلها*
وبعد وفاه جدتي الله يرحمها تغيرت نفسيتي ماعاد لقيت شئ في نفسي لنفسي بسرررعه تلقوني منهاره ومتشأمه >>مو مني منها من كثر ماسمع تشاؤميتها وماكانت الا تزيدني بضيق بهالشئ وبدال مو هي تهديني انا أهديها*
فصارت تقولي انها بتبعد عني فتره لاني ماعاد صرت احسسها بقيمتها 
£££££
تصرفاتها اللي تضايقني أني احيان احسها مو سويه أني لما كنت أغيب كانت تقول انا رحت للفصل بس اشان اشم ريحتكِ وكانت تتضايق لو غبت ..
مره اخذت طرحتي وتجلس ترسلي انها لافتها ع رقبتها وتتخيلني نايمه جنبها كنت ابلم واحط نفسي مو مهتمه وأقولها طرحتكِ خبري فيها اول ماجيت رميتها بالدولاب ....
واحيان لما اسولف تجلس تسرح بعيوني بعدين تبتسم والله نظره ماهي زينه*
وكثييير اكون جالسه مادري الا هي طامره وتجلس تبوسني ع خدي بدون سبب انا كنت أقولها ان هالشئ يضايقني وقلتلها لأعاد تسويها ..
ومره كانت تقولي عندها عمليه خطره وبالظهر *يعني احتمال تنشل فانا شجعتها تسويها وزرتها بالبيت قبل لاتسافر فكنا نسولف وبكيت فضميتها بس البنت طووووولت ضامتني لدرجه الجوال دق وماردت كنت ابعد واقولها الجوال يدق بعدين ردت ولما رجعت ارسلتلي انها تتمنى بس لو تموت بحضني وانها غفت زي مايغفا البزر بحضن امه ماكنت اعبر كلامها هذا وماحبه لاني مو عارفه وش اسوي وكنت اقول هي عفويه وماتفكر قبل لاتتكلم*
ولما سافرت كان بيوم عمليتها نفس مواعيد مراجعتي وربي كنت ادور الممرات وابكي جلست اتذكر تعب جدتي بنفس المستشفى وعمليتها المهم دقيت ع المستشفى ووسالتهم وقالوا مافيه احد باسمها مره وثنين وثلاث انا انفجعت وكانت رافضه تعطينا رقم ممرضه او أبوها وكانت تقول ان أمها ماتدري انا ندري انها بتسوي عمليه فاستنيت لين مافتح جوالها وكان مع عمها انا ارسلت كيفها وأرسلي انها بالانعاش لانها حاولت تشيل المغذي وصار نزيف المهم رجعت للمدرسه فكنت أشيل اغراضها لها البسها العبايه امشيها مع الدرج اجيبلها فطورها ..
المهم تخرجت وصرت ادق وتطنشني باليومين والثلاث طلعت بدال الايميل 3 كانت تغلط وترمي علي الغلط ماتحملتها فقلتلها امسحي رقمي وكل شئ وتنساني فصارت تتلفض علي وتقول كلام وربي عيييب*
المهم بعدها عرفت انها كذابه لأسوت عمليه ولاشئ وماكان عندها عمه والناس اللي كرهتني فيهم طلعت هي اللي سوت المشاكل وقلبت الدور ..وطلعت تكلم اخوي لاني قد قلتلها ان اخوي غزلنجي ومره دقيت اصحيها ايام الاختبارات وهي اللي أصرت قالت من جوال اخوكي لان ماكان عندي شحن ومسحته من جواله بعد مادقيت ..*
ياااكثر اللي جاني منها صرت عصبيه ماعاد اثق باحد نحففففت وصرت قد ماضيق ماكلم احد وربي احيان اجلس ابكي بالحمام*
ماااعليش لو طولت بس هالسالفه خانقتني وياليت تساعدوني واقدر اتجاوزها

ياختي ريحي بالك واقطعي علاقتك بها
واضح انها مو سوية
خصوصا انك تخرجتي من المدرسة ليش ترجعي تتواصلي معاها وانت شايفه كل بلاويها

الله يشفيها ويعينك على بلواك

اختي نصيحه اسراررك بس لاختك او امك بس الثاااانين نو مافي ثقه
والصديقات بس للوناسه مو لاسرارك وعادي اذا لقيتي مثل الاشباه ذي اتركيها ولا تتعبين نفسك ولا كانك صادقتيها انسيها ودوري صديقه ثانيه وبس اهم شي انتبهي ليودونك لداهيه مثل شباب والحرام كلها الي تشفينها ما تخاف الله انسحبي عنها ولا تتعبين نفسك بالتفكير
ان شاء الله افدتك

انا خلاص قطعت علاقتي فيها بس هي اللحين اللي رجعت تدق وانا كل مادقت هزاأتها
بس مو قادره اللحين اثق بالناس زي قبل خليت كل الناس علاقتي فيهم سطحيه

مشكوره اختي ام عمر ع المرور انا انهيت علاقتي فيها بس للحين ماتجاوزت كثيير اشياء سببتها لي ..
مشكوره اختي ام لمار ع المرور بس انا مو معاكِ باللي قلتيه ان الصديقات بس للوناسه مافيه ثقه مستحييل اختي أني اتقوقع ع أمي واختي وانظر للباقي انهم بس للوناسه والمصلحة انا اذا عاملتهم كذا هم بعاملوني بنفس الشئ .. واذا كل واحد عامل الناس بمصلحه وانهم بس للوناسه بنصير كلنا كذا ..وش ماصار الا مانحتاج احد بعمرنا بنفس اهتماماتنا ...أرجوكم اذا ماتقدرون تساعدوني لاتزيدوني باللي انا فيه

شكرًا اختي برنتيسا ع المرور واسعدني مروركِ ..
انا استنفذت كل ماملك أني اساعدها وربي يشهد أني بديتها ع نفسي ولا في يوم رديتها وماسمعتها بعز نومي لو لقيتها داقه او متضايقه اقوم اكلمها واهديها بس الضاهر ان فيه ناس يتلذذون باإستنزاف غيرهم وعطفهم عليهم ويشهد الله علي ان هذي اول مره انهي علاقتي باحد وحاولت قد ماقدر أني ابتعد عن هذا الخيار وهذا غلطي ..
وعلاقتها باخوي كذبت عيوني يوم شفت رقمها يدق ع جواله جلست اقرأ الرقم عدد عدد وبعدها قريت الرسائل 
بس خلاص هي الله يستر عليها ارتبطت واتوقع انها عاقله بما يكفي لتعرف مصلحتها

يسعدكم ربي ساعدوني انا مشكلتي ماعاد اثق بالناس واللي ذكرته فوق السبب ..
للحين ماحد عطاني حل فعلي وماحد عبرني الا الأخوات اللي ردن علي منتدى طول بعرض ماحد رد الا ثلاثه
وربي محتاجه حل المشكله صارتلي من سنه وللحين لااإراديا اجلس اقفل جوالي بالشهور وان شفت احد داق مارد الا بعد 4،5 مكالمات وان كلمتهن قسم أتكلم شويه واقفل جوالي بنص المكالمه واتعذر بالبطاريه وربي تجيني ضيقه لاكلمت احد وقبل اسوي اي تصرف اجلس اقول هذا بيخليني قريبه من الشخص اذا بيقربني منه أهون ....

الإنسان بطبعه كائن اجتماعي لا يستطيع العيش منعزلا عن الناس
عزيزتي توفي مبادرتك بالمصارحة والتغيير والوعي بالمشكلة هذا نصف العلاج وتغيير نفسك للأفضل.... الإنسان مدني بطبعه ولا بد له من أفراد آخرين يأنس بهم ويأنسون به ويتفاعل معهم ويتفاعلون معه، والعزلة عن الآخرين أمر غير طبيعي.
اما بخصوص صديقتك فا اقول لكي حل مشكلتك بيدك أنت وحدك، حاولي قدر الإمكان أن تتلاشي وأن تتجاهلي رسائلها وان تنهي علاقتكي بها
ثانيا انتي بحاجة إلى تدعيم ثقتك بنفسك, وتغيير طريقتك في التفكير حيال بعض الأمور, مثلا فقدتي الثقه بالناس وهذا كله لأنك صدمتي بمن كنتي تظنيها الصديقه الوفيه وهذه الطريقة في التفكير خاطئة لأن فيها تعميم مطلق في حين أن المشكلة الأساسية في نطاق صغير.
مهما يكن عزيزتي .. فإنك عندما تملكين شخصية قوية فإنك ستتغلبين على الخوف والوحدة وتصبحين أكثر قدرة على مواجهة المواقف والتحدث مع الآخرين والتعبير عن مشاعرك مما يجلب لك الأنس ويبعد عنك المشاعر السلبية وتذكري أنك وردة مقبلة على الحياة ينتظرها مستقبل مشرق فقط ساعدي نفسك للعيش في الحاضر واستقبال المستقبل بأمل ورضا ولا تجعلي لليأس عندك طريق.وتقربي إلي الله وابتعدي عن تلك الفتاه ولا تفتحي لليأس بابا حاولي تتقربي الي الله اكثر والي اهلك ولا تهتمي لأمر تلك الفتاه واذا لزم الامر غير رقمك وانصحكي بإنشاء شبكة من العلاقات الاجتماعية الإيجابية مع أفراد تثقين في آرائهم وإيجابيين يتمتعون بالصحبة الجيدة والممتعة
واتمني لكي التوفيق

حقيقة ما لازم الواحد يوثق كتير بكل الناس وفي ناس تقدملهم روحهم