السلام عليكم و رحمة الله و بركاته
بييكم من الاخر بصراحة انا سويت عزومة لاهل ريلي و هالعزومة كانت اول مرة اسويها لهم بحكم اني توني معرسة من شهرين المهم حتى يوم عزمتهم كانت من باب انهم بيردو علي انشاالله بنييج في يوم من الايام لكن تفاجات بقبولهم و طبعا خبرت اختي قلت لها ام ريلي و اخته و مرت اخوه بييون يتعشون عندي بعد بكرا و انا مب عارفة شو اسوي قالت لي خدي خدامتي تساعدج و سوي اللي تعرفينه و تقدرين تسويه... و يا يوم العزومة سرت بيت اختي عشان اشل الخدامة و يوم نحن طالعين الا و الخدامة تقول حق اختي مدام انتي مابتروحي معانا ردت عليها انا ماحد عزمني بصراحة حسيت باحراج كبير و اختي هاي وااااااااااااااااااااااااااايد حساسة من ابسط شي و لها في المجاملات وااايد .. انا ساعتها قلت لها اووه سوري والله الحين يله ويانا قالت لي هي روحي روحي يله يله تلحقي شغلج..
و سويت العزومة و اهل ريلي استانسو و الحمدلله و يوم طلعو طبعا لازم ارد الخدامة لاصحابها و قلت في نفس الوقت احط حق اختي شوي من الطبخ اللي سويته و المصيبة اني يوم وصلت عندها بس شافت الكيس اللي فيه الاكل قالت لي شو يايبة حقي فضلات اهل ريلهج ولا شو حلفت لها انه ما لمسه حد قالت لي ولو هذا يبتيه بعد ما خلصو و تم عندج باقي الاكل في الجدر حتى لو نضيف و قلتي اوديه حق وحدة مسكينة....
اليوم الصبح اتصلت فيني الا و اتفاجا انها طرشت الكيس هذاك مع الدريول و قالت لي مشكوووورة الغالية ما قصرتي بس انا الخير في بيتي وايد....
و بعدين عرفت من كلامها انها زعلانة اني ما عزمتها مع اهل ريلي خاصة يوم درت ان مرت اخوه موجودة يعني اكيد هو ما بيكون موجود و قامت تعصب علي و انا ادري اني غلطانة بس مب عارفة شو اسوي انا وااايد احبها :"(
اسفة على الاطالة بس لو سمحتو ممكن تنصحوني بشي اسويه لها او اقوله لها مع العلم اني اعتذرت مها بس ما نفع تقولي انتي تعرفيني بس في المشاكل لكن يوم انتي فرحانة ما تسويلي وجود...
ابغي اراءكم الله يخليكم :"( انا وايد تعبت نفسيا من هالموضوع
مشكورة اختي رونقها غير على نصيحتج و اهتمامج
انا قلت لها انتي تعرفين ان العزومة يت فجاة و لو انا ما عزمتج كان انتي قلتي لي انا بعد بسير وياج اذا انا نسيت شو فيها عادي عصبت علي و قالت لي ماعاش اللي انا اترجاه عشان اسير بيته شو انا ما عندي نفس
حيرتني و المشكلة انها تشيل في قلبها الحين لازم اتحايلها عليها يمكن شهر يله يله تعفو عني :"(
حليلكم والله .. الله يخليكم لبعض ويرجع المياه لمجاريها
سويلها عزيمه على شرفها او خذيها واعزميها بره أنتي أدرى بأختك وشو الي يرضيها المهم الصقيلها كل يوم كل يوم كل يوم خليها تحس انك ندمانه ومو قصدك
اعرف انك ماغلطتي بس تعالي على نفسك انتي تعرفين انها حساساه وتحب المجاملات فمن الحين ورايح انتبهي على كل تصرف معاه انتي الحين صار عندك بيت وزوج وهي بتعاملك من هالمنطلق
صباح الخير عليكم اخواني اخواتي جميعا و مشكووووووورين واااااااايد على كلامكم الطيب و نصايحكم
بخبركم عن اخر اخباري عن اختي انا بصراحة ازعجتها اتصالات طول الويك اند و هي تردني و مرات اتصل على تلفون ريلها و اطلب منه يحولها علي و البارحة (السبت) اتصلت فيها بعد و قلت لها اذا اتني في البيت ابغي ازورج قالت لي لا انا شوي و باطلع على القرية العالمية قلت لها فرصة انا بعد خاطري اسير القرية و بتكون احلى يوم انتي معاي قالت لي شوفي ريلج شو بيقولج و خبرته ووافق... المهم وسرت بيتها طلبت اني اوديهم بسيارتي ريلها ما عارض و هي وافقت سرنا القرية و استانسنا و اتعشينا و رديتهم بيتهم و انا وصلت بيتي ساعة 1 بعد نص الليل و بدت مشكلتي اليديدة مع ريلي الله يستر بس بخبركم بالبقية في الحلقة القادمة مع انه بعده زعلان مني....!!!
__________________
سبحان الله وبحمدهِ عدد خلقهِ ورضى نفسه وزنة عرشه ومداد كلماته
أستغفر الله وأتـوب إليه
التعديل الأخير تم بواسطة amitafflower ; 12-12-2010 الساعة 10:21 AM