كيفكم مع الجو الحلو (ما اقول بارد) بس الجو دي اليومين في جده الحمد لله لا بأس به و الحمد لله
ويشجع على الخروج من البيت و الجلوس على شاطئ البحر
عشان كدا انا اليوم جايبالكم صور لطلعة الشوي اللي طلعناها مع اهلي يوم الخميس الماضي كانت هي خلاصة ما تعلمناه انا و زوجي خلال طلعات الشوي اللي مرينا فيها يمكن 6 أو 7 مرات !!! قولو ما شاء الله
كل مرة نتعلم فيها شي و دحين الحمد لله الكل ينتظر ندعوهم على طلعة شوي بل و يترجونا كمان و لا نزكي انفسنا على الله و يتمنو يعرفو الخلطة السرية
حاولت اعمل خطة امشي عليها لاني كل مرة انسى شي و الحمد لله اخر مرة ما نسيت ولا شي و كله كان تمام التمام
و الخلطة اللي استعملتها يا سلام ولا اروع و اذا دقتوها ان شاء الله تدعولي و كأنها تتبيلة الطازج بل و اطعم
ما اطول عليكم لأن ورايا مشوار كلام و اتفضلو حياكم الله
اولا
شراء الدجاج :-
أنا كل مرة استخدم الوطنية 700 غرام و هي الأفضل للشوي و لكن تهورت هذي المرة و أخذت مثلج فقيه و للأسف ماهو بجودة الطازج و لكن ماشي حاله يعني صحيح هو ارخص الكرتون لكن الطازة افضل
المهم
اشتريت كرتون دجاج (بحساب دجاجة للشخص)
و هذي صورته
يترك طوال الليل بدون نقع خارج الثلاجة و يبدأ التقطيع ثاني يوم الصباح (لا يصل لدرجة حرارة الغرفة فقط يكون بارد)
يفتح الدجاج بالمقص و يغسل من الداخل و ينزع الجلد الزائد و يقطع ارباع (صدر و جناح – فخذ و ساق )
نستخدم في هذه العملية مقص الدجاج اسرع من السكينه و افضل و من الأفضل لبس القفازات لتجنب التلوث
هذي الادوات المستخدمة و حطي سفرة نايلون عشان الوسخ و البلل من الدجاج
ما صورت خطوات التقطيع زوجي ما كان موجود و لكن هذه صورة الدجاج بعد التقطيع و التشريخ (يلاحظ كيف الفخذ منفصل مع الجلد و الصدر مقطوع من المنتصف) و هذه العملية ضرورية لادخال اكبر كمية من النكهة الى الدجاج و لاسراع النضج كما و يجب عدم ازالة الجلد عشان لا يحترق و ينشف و اللي حابة تعمل ريجيم لو سمحتو تسيب الريجيم اليوووووووم
تجهيز التتبيلة السرية:-
التتبيلة لعشرة دجاجات عبارة عن
ثوم 3 رؤوس كاملة
بصل 2 كبار
زيت زيتون كوب كبير
ليمون و عصير ليمون كيس كامل او كيلو
اعصري الليمون و خذي 3 حبات بقشرها حطيها في الخلاط مع المكونات الباقية
لبن زبادي (علبتين)
ملح حسب الذوق
بابريكا فلفل حلو ملعقة كبيرة
فلفل أسود ملعقة و نص مطحون
كمون ملعقة و نص مطحونة
صلصة طماطم علبة صغيرة
ملح ليمون ملعقة حلى
اكليل الجبل(روزماري) ملعقة حلى و توضع مع المكونات في الخلاط عشان تتكسر لانها طويلة و مبرومة فلازم ننعمها و انا احطها مع كل المكونات في الخلاط
و هذي أسهل طريقة لتقشير الثوم (احطه في كيس و اديه على دماغه ) و يتفكك من القشر بسهولة
و هذا من مكوناتي السرية
زيتون شرايح يمكن 3 ملاعق حطيه كمان في الخلاط و كله يكون مطحون
حطي كلللللللللللللللل شي في الخلاط مع 3 حبات ليمون بقشرها و ضيفي عليها كوب زيت الزيتون و قلبيها و بكذا تكون التتبيلة جاهزة
مرخي (دهني) الدجاج قطعة قطعه و هذا شكله بعد المروخ
و في الكروانه حطي الدجاج قسمين
قسم صدور و قسم افخاذ و حطي فاصل بينهم عشان كل شي له مده على الفحم تختلف عن التاني
الصدور تاخذ وقت اطول من الافخاذ على الفحم
يوضع الدجاج لليوم الثاني في الثلاجة و بكذا نكون انتهينا من تتبيل الدجاج
و للهرجه بقية
تم تعديل العنوان ..
الإشراف..
__________________
رب لا تذرني فردا و انت خير الوارثين
التعديل الأخير تم بواسطة gawlp ; 19-02-2009 الساعة 10:36 AM
السبب: تعديل روابط الصور + شعار التميز