سلام عليكم ورحمة الله وبركاتة

اخباركم اخواني وخواتي


رجعت لكم بعد غياب طويل بسبب ظروفي

بحكي لكم قصتي من البداية لنهاية


قبل فتره طويلة نزلت لكم خبر اني بتزوجج وخطبت وتملكت


المهم فرحتي صارت كبيرهه جدآآآآآآآآآآآآآآآآ لدرجة ماتتصورونها

المهم بعد الملكة قدمت على دورة عسكرية معروفه اسمها الصاعقة وهي من هواياتي من قبل

وخطيبتي قالت لا مستحيل تروح لها خطرة وكذا قلت لها لاتحرميني من حلمي وكذا قالت طيب روح

المهم هذا كله كلام عادي بس حبيت ابدى لكم من البدايه القصه لنهاياتنا لتكونو بصورة

كلمت اهلها وقلت انا مسافر لتبوك باخذ الدورة وكذا قالو الله يستر عليك

رحت اخذت الدوره وفي منتصف الدورة كلمممت مدرب عندنا ماقصر قلت ابي جوالك بكلم اهلي

المهم كلمت اهلي وبالاصح الوالد قلت اخبارك طيب

قال بخير

وخذنا يمكن ثلاث دقايق نسولف ولا اعجبني صوته

قلت شفيك صوتك ولله ماعجبني يابو فلالان

قال شف ونا ابوك العلم وسلامتك

قلت يسسسسسسلمك ربي من عذابه شفيك تراك خوفتني

قال خطيبتك اتصلت على اختك وقالت لها ترا مابيه واتمنى اول مايرجع سالم من الدورة يطلقني

قالت اختي ليش شفيك ؟؟

قالت اخوك داخل دورة تخوف وجوني صديقاتي وقالو انتبهي منه وخليه يطلقك تراه بيرجع متوحش ولا همه احد

ونافخ ريشه وبيشوف غيرك وبيكون عصبي ومدري ايش قالت اختي طيب اخوي قالك انها حلم حياته واقنعك فيها

ونتي عارفه انه ماراح لين عطاك صوره كامله عن الدورة ونها حلم حياته وكذا

قالت قولي له وبس مابيه وخليه يطلقني

المهم جلس يكمل كلامه ابوي

يقول بعد هالسالفه بيومين مادريت الا وخوها داق علي ينافخ ومدري ايش

طبعا كل الكلام الي صار اخواني مادرو عنه نهائي وخواني

جاء اخوي الصغير سمع كلام ابوي يوم يتهاوش مع اخو البنت راح علم اخوي الكبير

اخوي الكبير عصب لأان مايرضى احد يرفع صوته على ابوي

راح وعلم اخواني كلهم

وراحو لأخو البنت وجلدوه وجات مشكله كبيرة ووصلت لشرطه

المهم بعد الكلام هذا قلت لأبوي وقف خلاص لاتكمل

لين اطلع من الدورة وراح اتفاهم معهم

المهم تخرجت قبل سبوع من اليوم هذا

ورحت ودقيت بابهم

طلع لي اخوهم قال امر

قلت ممكن اتكلم معك شوي ؟

قال تفضل المهم دخلت وقلت له انا ترا في دورة ووصلتني الاخبار ولا انا جاي للمشاكل جاي احل الموضوع ودي بيني وبينكم وبين اهلي

قال ي ابن الحلال الخطاء جاء من اهلك

قلت كيف من اهلي ونت داق على ابوي وتنافخ

قال انا معصب وقتها

قلت يابن الاوادم اول شي عيب عليك ترفع صوتك على واحد كبر ابوك ثاني شي تعرف اخواني مايرضون ولا احد يرضى ان احد ينفخ على ابوهم

قال صحيح

قلت كان انتظرت لين اتخرج من الدورة وقلت لي ي فلان طلقها البنت معاد تبيك ولله لطلق لن محد يرضى يعيش مع احد مايبيه قال صحيح وستعجلت

المهم قلت انا ان شاء الله بكرا بروح المحكمه وطلق

قال الله يعطيك العافيه رحت للمحكمه وطلقتها

بعد طلاقي لها كان قبل يومين امس جاني شكر وعرفان من دوامي وونق ذهبي لختام الدورة وحصولي للمركز الاول بالدورة وصوروها اهلي وحطوها على الواتس اب

شافتها الي طلقتها وكلمت اختي وعلمتها اختي والبنت قالت قهر ليتني ماقلت له يطلقني وبعدها دقت علي قالت مبروك وكذا قلت مشكوره بس ي اختي لو سمحتي جوالي لاتتصلين عليه

قالت انا شكلي مستعجله وكذا على الطلاق قلت ي بنت الحلال ان كان بدايتها كذا ينعاف تاليها

قالت انا سمعت كلامهم وكذا

قلت سبب سمعك لكلامهم سببتي مشكله كبيرة ويا بنت الحلال انا استاذنك ولا ابيك تتصلين مره ثانيه

سكرت ورسلت لي رساله موضوع الرساله

ي فلان انا غلطانه وابيك ونا كنت مستعجله على قراري ونا ماتوقعت ان عواقبها كذا بس تكفى تعال مره ثانيه انا ابيك

طبعا استنتجت من كلامها انها رجعت لي عشان الشهادة والتميز لن انا وضحت لكم ان جاني شكر وعرفان على الدورة بسبب حصولي على المركز الاول بالدورة وحصولي على الونق الذهبي لصواعق و المضليات

وتبي تهايط من هالشي


ونا قررت ان خلاص البنت هذي معاد ابيها وسببها وضحته لكم شرايكم بقراري

وهذي قصتي من البداية لنهاية

__________________
* المقابِر مدُن ممتلِئه ، سُكانها غُلِفوا بَ الصمت الأبدي ، تُحكي مشاعِرهُم الوحده ، يُرقِبون دُعاءً يهتِفُ بَ اسماِئهم ، إياكُم و نسيانهُم . , !

لو ولدي الذي حدث معه ذلك
لنصحته بحضرها وعدم السماح لها بالتواصل معه اطلاقاً
حتى لا تسبب له المشاكل مع من ستكون يوماً زوجة له

وعدم التفكير فيها او الرجوع إليها

هذا رأيي وقد يكون لغيري رأي افضل منه

وفقك الله

كان اخي مملك على فتاه
تسيرها صديقاتها
زادت المشاكل وطلقها
تزوج بأخرى نعم المرأه هي
خطيبته السابقه تزوجت وتطلقت لنفس الاسباب ( الصديقات وتدخلهم وافشاء الاسرار لهم )

:::
1) هل هي خرجت من العدة؟
2) هل تواصلت معك بعد الرسالة والإتصال الهاتفي؟
3) هل أجبت على رسالتها؟
4) أنت ماذا رأيك؟
5) ما هو رأي الوالد حفظه الله؟

الله يوفقك باللي افضل منها .. لا تعطيها مجال تكلمك .. ولاترد عليها نهائيا ..

استغفر الله العظيم ، صدقني صديقاتها الي خربو عليها ما يبونها تتزوج... استغفر الله العظيم .. ابي اعرف وش تستفيد يوم تخرب على صديقتها وتخليها تتطلق ! والله مسخرة، وهي بعد قليلة عقل من جد يعني مسخرة لهدرجة.. دورة المظليين واللبس حق القوات الخاصة بالبرية اكشخ لبس ولو كنت جسم منحوت والله بتكشخ فيك قدام العالم..

عموما نصيحتي ان تدز اختك تسألها وش سالفة صديقاتها وهل تحس هي ان هم خربو عليها..

وهي تبيك لأنها تبي تتزوج مو تبيك عشان صاعقة.. وحست بقيمتك بعد ما رحت .. يعني لا تفكر انها تبيك عشانك مظلي ..... هو يكون من الاسباب.. لكن السبب الاكبر انها تبي تتزوج وشافتك انسان مناسب..

مع هذا الرأي

__________________
🌾🌾 ! اللهم لا تعلق قلبي بسواك .. ولا تقربني ممن لا يخافك في ! 🌾🌾

تفكيرها غير ناضج حتى أهلها مثلها
ولا واحد فيهم موقف ويقول يا بنت شالسالفه!!!

إلا الحماقة أعيت من يداويها

لم تفشل يا أخي .. بل بالعكس.

وبإذن الله يعوضك بخيرٍ منها.

__________________


اللهم طِيبَ الأثر .. وحُسْنَ الرحيل.

1) لقد سألتك تلك الأسئلة لبيان حقيقة موقفك الحقيقي من الأمر.
2) إن كان الموضوع كما ذكرتَ فتصرفك صحيح تماماً.
3) إن كان هذا الحدث البسيط قد صنعت منه مشكلة وضخمتها ووصلت إلى طلب الطلاق فماذا سوف تفعل في الشهور الأولى من الزواج أو في السنة الأولى على أقصى تقدير.
4) انفذ من هذا البيت بجلدك.
5) أغلق دائرة التفكير والتحليل في أمرهم وفعلهم+انسَ أمرها+أغلق مسألة التواصل معها أو الرد على اتصالاتها ورسائلها.
6) أنتَ لم تفشل والله.. لكن الأمر فُرِضَ عليك فرضاً.
7) توكل على خالقك+ابحث عن الزوجة الكفؤ الصالحة حتى تجدها بتوفيق الله.
8) أما إن كان القلب معلقاً بها، وتود فتح صفحة جديدة معها فهذا يعود لك.