انا صح وهو صح .. وبانتظاركم
السلام عليكم ورحمة الله وبركاته
انا هنا بعدما هداني الله لكم
اللهم اجعلني واياكم مفاتيح للخير مغاليق للشر
انا متزوجة من 10سنوات ولدي اطفال كلاقمار الله يحميهم
احب زوجي ومعجبة بجوانب شخصيته النظامية والمرتبة
واعلم انه يحبني جدا ومعجب بي ولله الحمد
مشاعري التالية ليست وليدة اللحظة او السنوات الاخيرة
هي افكار تراودني من اول ايام الزواج
كنت اشعر اننا لا ناسب بعض !
نختلف في منطقتين انا اعتبرها من اولوياتي في الحياة
وربما من اولوياته ايضا
اختلف معه في طريقة الحوار
وفي الشغف بالحياة
ورجاء اذا هالنقطتين ليست من اولوياتك اتمنى من كل قلبي
انك ما تستهجن تفكيري وطبيعتي
انا حواري ملغم بالحب ومغلف بالنعومة .. احب السلاسة والاقناع
احب المقدمات وربما المجاملات ... مرادفات وتلميحات ذكية استمتع بالحوار جدا
واعترف انني سماعية من الطراز الاصيل
انا اعشق تفاصيل الحياة .. استمتع بكوب القهوة .. فيلم مشوق ... كتب ..ارقص مع اطفالي
جدا منطلقة واكره الروتين والقيود
هو جدي .. منظم ... روتيني جدا .. لا يعيش بوعي بالتفاصيل .. علاقاته محدوده .. ايضا
اهتمامته محدوده
في الحوار غالبا احاول اجاريه كي لا نصطدم وينغلق الموضوع باحتقان
امرر له الافكار كي تكون له الكلمة الاخيرة
لو عارضته في اي موضوع ينتهي الحوار بدون ان يتقبل رايي
لا يفصح عن مشاعره ابدا
لا يتغزل وانا كما قلت سماعية
نواياه الجميله لا تصلني باسلوب لطيف
مثلا يريد قربي يقولي (تعالي دلكي رجولك انتي فاضية !)
مهما كنت اعلم هدفه الحلو ... اقرب منه وانا محبطه مهما
حاولت ان اجامله
تعبت من هالنقطة كثير و وضحت له اكثر واقوله بالضبط اش الكلمة
المناسبة .. لكن اشعر اني كلما لقنته ابتعد اكثر
كرهت في نفسي كثرة اخباري له بحاجاتي
اشعر ساعات باني اهنت نفسي له وانا استحق افضل من هذه المعاملة
وللمعلومية اهتماماتي كثير جدا واحاول ان الهي نفسي واشبع ذاتي بذاتي
لكن يعلم الله اني اتووووق لكلمة منه لاني متأكدة ان هذا حقي واننا لسى صغار
على هالجدية كلها والجفاف كله
على كثر جلسات الصراحة اللي انا احاول بجهد اختلاقها الا انا يتخذ موقف دفاعي ثم هجومي
اقصد ولامرة قالي اش يحب او اش يكره
ما اعرف اذا انا مقصرة او لا بس هو مش ضعيف شخصية ولا يضغط ع نفسه عشان كذا اعتقد انه راضي ...
بس بنفس الوقت ولا مرة اثنى علي في شغلة الا لما اطلبه رأيه !
صرت اعتبر هالشي تسول عاطفي مميت
هو هذا طبعه
وانا هذا طبعي
ساعات افكر اننا ننفصل لاني اخاف من جفوة عاطفية تصيبنا وانا طبعا اللي راح اتعب
اما هو عادي عنده
تصدقون اذا صار بيناتنا مشكلة وبطلنا نتكلم كم يوم
قد ما اتضايق الا اني لما افكر بعقل اقول انا اش خسرت خلال هاليومين ؟
ما خسرت كلام حلو .. ولا دعم .. ولا شي
طبعا لا انا ولاهو نفجر في الخصومة ولله الحمد
لكن حياتنا رااااكدة اذا ما حركتها تآسن
تعبت من هالمشاعر
اتمنى مرة هو يبدي راي او فكرة
يقولي تعالي نجرب هالشي سوا
انا صاحبة الاقتراحات والكلمات وكل شي
ولو فترت فترة تصير حياتنا كئيبة للاسف
يعني مهما جربت اثقل مثلا هو ماتفرق عنده
لدرجة ساعات اشك بحبه ولما اسأله يعصب علي ويعتبره
جحود
اتفهم موقفه ... بس مثل مالله خلقه بهالطبع خلقني بهالطبع
افكر بالانفصال وانا متأكدة انه كفو
بس والله ما احس بنفسي معه
ترا هذا شعور تعيس يخليك تعيشين مثل الجثة
ارحم نفسي ... احس ان بامكاني اعيش افضل
يارب تفهمون علي ...
الطلاق ابغض الحلال .. لكن الله شرعه رحمة فينا
لعلي الاقي رجل مثلي
ويلاقي حتى هو وحده تشبهه ويرتاح
بانتظار اراءكم ... نصايحكم .. هواشكم ..
اتقبل ترا 😅
28-06-2018, 04:03 AM
ضوابط المشاركة
العرض الشجري