في بالي كم نقطة أبغى أكتبها ..
لكن ولدي الوسطاني ما يصدق يلاقي الجوال في يدي ، و يسحبه مني و يخلص بطاريته ..

فتحت اللاب توب ، جاء الصعنطوط اخر العنقود ، و يبغى يلعب بالأزارير
و يبكي ييبغاني اشيله

خليهم يناموا ، و أجي اكتب

جمانة أنا ما كنت كذا ، لكن كان عندي تأنيب الضمير هذا اللي بداخلك
و بإستمرار ..

و الحمد لله إني تحسنت كثييييييييير و جدا جدا ..

.
.

راح أكتب لك إيش عملت مثلا من أمس ، لحد اليوم ..
يمكن تستفيدي ..

معليه اكتب شوي و ارجع ، استغل الأوقات القصيرة قدر المستطاع .. ^_^
دحين اكتبها من الجوال ، عشن الكمبيوتر بيطفي

أول أسبوعين من بداية الدراسة ، كنت مرة ملخبطة ..
و أعطيت وقتي للعمل و البيت عشان أرتب أموري قدر المستطاع ..

و انضغطت عشان أنظم أمور الأولاد ، و ارتاح و يرتاحوا
الكبير سجلته بمدرسة مريحة له و لي ..
التاني سجلته في حضانة ، الثالث مع الشغالة و تطمنت خلاص إنها كويسة و علمتها كل شي

.
.

يعني أول شي ( التنظيم ) ..

أنا متاكدة إنك منظمة 100 %

بس أقول للتأكيد ، إنه تنظمي وقت أولادك مع وقتك ..
و تشغليهم بأوقات انشغالك بالأشياء المفيدة

مو أيباد ، و جوال ..

.
.

الوسطاني مستحيل اتركه مع الشغالة في البيت ..
لإنه عنيد و عصبي ، و هي ما تفهم له ,, و راح تقصر يا معاه أو مع الصغير ..

فاخترت إني اخسر فلوس و اسجله بحضانة عندنا في العمل و قدام عيوني ..
و لا اتركه في البيت محبوس ،.

الصغير يجلس في البيت ، تلعبه الشغالة و تشيله و تهتم فيه ..
أفضل له يجلس في البيت من الحضانة ، لإنه الحضانة للأطفال الي بعمره .. ماهم كويسين مرة ..

المهم إني تطمنت على الثلاثة و الحمد لله ..
انهم مستقرين كذا ، مرتاحين ..

.
.

خلاص اصحى الصبح يومياً ، قبل الفجر ..

الصغير يرضع طبيعي ، الكبير اعمل له ساندويتش اللي هو يحبه و ياكله ..
و الوسطاني اخده معايا العمل و افطره بنفسي ،، و أنا و هو أغلب الأحيان نفطر مع بعض ..

شوفي الوقت اللي أعطيه لأولادي الثلاثة ، في الأيام الحالية :


- الوسطاني يصحى قبل الفجر و يصحيني .. اعطيه أي شي ياكله أو يشربه و اتركه قدام التلفزيون
يلعب مع نفسه في غرفة الألعاب ( أدري إنه التلفزيون غير صحي ، لكن مستحيل أصير مثالية
معهم 100 بالمية ) و أصلا أسمعه يقاتل نفسه ، و يلعب مع حاله .. و لو يبغى شي ، يجي يقول لي ..


- خلالها ، الصغير يرضع و أحضنه وقتها و ألعب بشعره و خدوده و هو نايم ..
ما يهون علي أتركه و أروح العمل ، فأجلس معاه أطول فترة ممكنة قبل لا أقوم اصلي الفجر
و ابدأ أجهز الكبير للمدرسة و اجهز حالي و الوسطاني ..


- اصلي الفجر ، و الشغالة تقوم .. لو عندي وقت و صاحية من بدري ( أحمم و أروش الصغير بسررررعة ..
و أغير له حفاضته و أشوف ملتهب أو لأ .. و أعمل تشييك إنه كل شي تمام و خلاص أعطيه للشغالة
مع ملابسه و تلبسه و تشيله ..

أوري لها ، هنا السريلاك ، هنا الموز و البرتقال ، هنا الشوربة ، و أقول لها لا تستني لحد ما يبكي و يجوع ..
كل شوية أعطيه كذا و كذا .. و أعرف إنه أكل مضبوط الشغالة اهتمت فيه من ( كمية اللي يخرجه
الله يعزك )

قبل لا يجي السواق ، لو فيه وقت .. أشيل الصغنون و أطيره في السماء و ألعبه و أخرجه للحوش لو
دقيقتين عشان يتشمس و يشم هواء نظيف ..

و لما أرجع من الشغل ، أول شي اعمله .. أخده من يد الشغالة و اغسل وجهه عشان يتنشط و أرضعه
و أرقده فوق السرير ، و ألعبه .. بعدين الشغالة تاخده مني عشان ارتاح و اصلي و أشوف بقية الأشغال ..

.
.

الكبير ، لازم أعوده يعتمد على حاله خلاص .. علمته يتروش و يتحمم بنفسه .. لا يعتمد علي ..
أصحيه الصبح ، و اجهز له شنطته و ساندويتشه و مصروفه و حليب بالكاكاو ..

و أقول له ادخل اتروش ، و يصحى طبعا نعسان و متنكد ، أخاصمه و اصرخ عليه بعض الأحيان ..
بعد ما يرجع من المدرسة ، في السيارة يجلس يحكي لي عن المدرسة و عن أصحابه و عن الأساتذة
و عن حصة البدنية ، و أسأله أنا مرات لو كان ساكت .. إيش اشتريت اليوم ؟ شفت فلان ؟
الأستاذ إيش قالكم اليوم ؟ ... إلخ

ولدي هذا .. ماشاء الله بالع راديو ، كلامه كثييييييييييييير ..
مرات أقول له بس ( ايوة ، أهاااااا .. من جد ؟ طيب )
مرات لو مالي مزاج .. أقول له ( خلاص ، خليك ساكت شوي .. تعبانة ) ..

يتعبني في الأكل ، أحس إني مقصرة معاه لإنه وقتي مع اللي أصغر منه أكثر شي ..
يا دووووب وقتي معاه في السيارة و نحن راجعين ..

يساعدني في البيت الله يسعده لما اطلب منه أي شي ..
دايما أوصيه على أخوانه ، إنه يكون حنون عليهم و لا يضربهم ..

لما يناموا الصغار في العصر ، أقول له جيب الكتب و تعال أذاكر لك ..
أذاكر له في الوقت اللي أنا أكون جالسة و أخلص أشغالي حقة العمل ، أو أكون بأجهز الأكل ..
أو في الوقت اللي أبغى أجلس فيه شوي و ما اعمل اي شي ..

أخليه يحل واجب الرياضيات عالأقل ، و يكتب في دفتر ( لغتي ) ..
القران الصراحة ما يمديني أراجع له ، و ما عندي وقت ..

حريصة على مادة التوحيد و الفقه ..
و إني أشرح له الدرس قبل لا يروح حصة التوحيد و الفقه .. عشان يفهم مع الأستاذ ..
دحين صرت أخليه يصلي فرض واحد في اليوم ..

و من يومين صرت اهتم و أحرص .. و أخليه يشوفني أتواضأ و يصلي معايا المغرب ..
لما كان أولى بتدائي كنت بس بالكلام مرات ، أقول له ( متى تصلي ؟ )
( لما تصير سنة تانية تصلي 2 ، و سنة تالتة تصلي 3 ، سنة رابعة تصلي 4 و سنة خامسة تصلي كله )

.
.

الوسطاني ، متعب في كل شي ..
أخده معايا العمل ، نفطر أنا و هو سوى ،، أخليه يلعب شوي ثم أخده للحضانة ..
نرجع البيت ، أغير له ملابسه و حفاضته .. أنا أأكله ، و أجهز أكله ..

متعب و عنيد ، أحاول امسك أعصابي عليه .. يرفض إنه الشغالة تعمل له أي شي
كل شي يبغاني أنا أعمله له ،، ما يخليني أنام ، و لا أكل ، و لا شيييييييييي ..

اشتريت كتابين عشان اتعلم كيف أتعامل مع شخصيته ، لإنه المسكين ياكل ضرب مني بعض الأحيان
لإنه يستفزني كثيييييييييييييير ، و عنيد و متعب جدا .. و يعدم لي كل شي في البيت ..
كلمت اخصائية تربية و قالت لي ، هذا الطفل اهتمي فيه مضبووووووط ،، لإنه ذكي ماشاء الله
و إنه هو فاهمك أكثر ما انت فاهمته ، و الدليل إنه عارفك و عارف كيف يستفزك و إيش الأشياء اللي تشد
انتباهك له ، و قالت لا تضربيه ، و لو اهتميتي فيه ، بيكون له مستقبل رائع بإذن الله لإنه طفل ذكي جدا
ماشاء الله .. قلت لها يتعبني ، قالت لا تقولي كذا و تراه يفهممممم ..

.
.

ولدي الصغير صحي .. ^_^

بالنسبة للعمل ، أكتب إيش بأعمل في العمل .. و الوقت اللي أعطيه لنفسي ..

الله يسعدك يا روح ويحفظ لك عيالك يااارب
....
ما شاء الله عليك
انتي ام مكافحة ..
عشااان اسوي كل هذي لازم افصل العمل عن البيت
انا حاليا قعد اخطط اسوي مثلك في سالفة تخطيط وتنظيم اوقات عيالي
...
راجعة لك بتفاصيلي

__________________

تعرفي عزيزتي جمانة انا ايش ماسكة في العمل !؟
عشان لا تتوقعي انه عملي سهل .. و اقدر انظم وقتي مع أولادي : (

عندي تحضير مواد علمية و قراءتها باللغة الانجليزية
و عندي مشاريع تخرج و عندي لجان .. و تقارير ..
و احتاج وقت عشان ابدأ مشوار الدكتوراة .. و ماني لاقية وقت ..

لكن احاول أخطف الأوقات خطف سريع ..

.
.

قبل امس الخميس ..
من كثر الضغوطات و من كثر ما حسيت اني باحط حرتي في الاولاد و أعصبهم عليهم ..
تضايقت من حالي و قلت لنفسي ( استووووووب ) ..

رحت العمل .. و تركت كل الشغل من يدي ..
لأَنِّي جلست ثلاث أسابيع اكرررررررف بالعمل ..
و في البيت اكرف مع الاولاد

جلست مع الزميلات يوم الخميس .. ابغى اجدد نشاطي و عشان ارجع لأولادي بنفسية أفضل
دلعت حالي و اخدت فطور لنفسي و كل شي نفسي فيه ..

كله عشان ارجع لأولادي و انا نشاطي متجدد ..

و الحمد لله يوم الجمعة .. جلست معاهم و لعبت معاهم من الصبح لحد الليل
و في الظهر امس .. اخدت لي شااااااور محترم و حمام مغربي و ابغى ارووووووق خلاص ..

القصد ..
لاتنسي نفسك برضو ..
و انا برضو مرات اقصر مع أولادي و انضغط بالعمل


لكن ..
اعمل في شغلي الشي الي مطلوب مني ..
لكن الوقت الي أضيعه في الشغل الزيادة ..

بيتي و أولادي و نفسي ( أولى بالوقت هذا )

.
.

كمان تعلمت من الإنجليز في بريطانيا

انهم يشتغلوا طوال ايام الأسبوع .. و يدرسوا طوال ايام الأسبوع

لكن الويك اند هذا .. شي مقدس عندهم ..
يخرجوا لازم .. و اولادهم يخرجوا كمان و يتمشوا و يغيروا جو و يسافروا اي مدينة قريبة ..
المهم في الويك اند ما يشتغلوا و لا يردوا حتى عالايميلات ..

جمانة

ا
س
ت
م
ت
ع
ي

* بأمومتك *

.
.

استمتعي بأمومتك ..
استمتعي بأمومتك ..
استمتعي بأمومتك ..




إذا راحت لحظات الأطفال ، خلاص ما راح ترجع ..

هل راح تربي أحفادك ؟

.
.

استمتعي بأمومتك ..