اااااااااااااهههههه ياربي .. الهمني الصبر على هالانسان

ادري ازعجتكم بموضوعي بس شو اسوي مالي غيركم اطلعله اللي في قلبي و اشكيله همي

كالعاده زوجي ما جاني مع انه الصبح اكد علي انه بيقضي اليوم معانا .. كان وعده معاي الخميس بعدين الجمعه بعدين السبت و الحين صارت الساعه 8 و هو للحين لا حس و ا خبر ..حتى ما كلف نفسه يتصل يقول انه جاي و لا لاء .. الصبح اتصل و قال انه جاي عالغدا (مثل كل مره) و اترييته و لا جانا .. و من العصر رسلتله مسج اساله اذا كان بيجي اليوم و لا غير رايه و ما رد علي .. اتصلت فيه كم مره بعد ما رد .. و للحين انا مو عارفه شو اللي صار

كل شوي اقوم اتعدل و اضبط مكياجي و اقول يمكن في الطريق.. و ساعه بعد ساعه و لا حس و لا خبر

انا من العصر جالسه في حجرتي ما طلعت مالي وجه اشوف اهلي .. مادري اذا اليوم بعد ما جاني شو اقولهم .. كفايه نظرة ابوي الظهر يوم حطيناله الغدا بعد ما كنت مخبرته من الصبح ان زوجي بيتغدا عندنا و تميت طول النهار اطبخله

و الله انا اكثر اللي مخوفني ان اهلي هم اللي ما يتحملون الوضع و يسوون مشكله مع زوجي .. خاصة ان ابوي من النوع العصبي وااااااااااااااااااااااااااابد و ما عنده تفاهم بس اللي مسكته طول هالسنين اني انا اللي اقوله ما عليه خليه على راحته نحن متفاهمين و انا راضيه .. مع ان اتقطع من داخلي بس بين نارين

يا ليته عالاقل كان اتصل و قال ما بيجي اليوم عالاقل كنت عرفت و لا اني اتم طول اليوم اترياه و انا مو عارفه هو وين و لا شو ناوي

يا بعد قلبي ...

كسرتي خاطري..

موقفج مع اهلج محرج وايد ..

اسمعيني يالغلا طرشيله مسج قوليله .. في شي ضروري ابي اكلمك فيه .. يمكن يخاف ويتصل.. لان وضعج لا يطاق الله يعينج ..

ومافي داعي كل مايقولج بيي اتقولين لاهلج خصوصا انج اتعرفين انه كلمته كل شوي تتغير.. بس عشان ماتحطين نفسج بهالموقف

__________________
ربنا هب لنا من أزواجنا و ذرياتنا قرة أعين واجعلنا للمتقين إماما

أرجوكم ادعو لي ..بإن ربي يجمع بيني وبين زوجي على خير

إلى زوجي ..إلى مقلتي.. إلى فؤادي...إلى بسمتي... إلى دمعتي... إلى حياتي وروحي... إلى عشيقي، حبيبي، فارسي، أميري، إلى القلب والكيان... والحب والهيام...

الـعزيـــــــــــــــز بو وداد..

أحبــــــــــــك ...

كان الله في عونك اختي الحبيبة و قلبي معاك و ربنا يوفقك لما يحب و يرضى و لا املك لك سوى الدعاء و اصبري فان الله مع الصابرين

__________________
[/size]

خلص اليوم و اكيد دام انه للحين ما جانا يعني اليوم ما بيجي .. الساعه صارت 10 خلاص يعني

و ما كلف نفسه حتى يتصل او يرسل كلمه مع انه عارف اني اترياه و صارلي اسبوعين الحين ما شفته الا الساعتين اللي مر علي فيهم يوم العيد

انا عارفه اني السبب و انا اللي استاهل كل اللي يصيرلي .. لو من الاول احترمت نفسي و مشاعري كان هو بعد احترمني

انا صرت بلنسبه له اقل من عشيقه .. و الله لو معاشرني بالحرام كان خاف على مشاعري اكثر من الحين .. بس انا اللي رخصت نفسي من الاول فكيف اتريا انه يغليني

انا بالنسبه له مو اكثر من وحده يسيرلها يرقد و ياها و يمتع نفسه يوم له مزاج في الجنس و زوجته ما تتجاوب معاه .. مو من حقي الومه انا اللي سويت جي بنفسي

إللي حذرتك منه سابقاً قد حصل

ها أنت ترددين بعض المقولات التي وردت عليك من قبل

( انا بالنسبه له مو اكثر من وحده يسيرلها يرقد و ياها و يمتع نفسه يوم له مزاج في الجنس )

أنا أدري إنك زعلانه ومن غضبك بترتاحين وبتفضفضين هنا

ولكن أحذري أن تقتنعي بهذا الكلام ويصبح له أساس في قلبك

يسر الله أمورك وأصلح بالك ورزقك السعادة والمحبة مع زوجك

توه ابوي طالع من عندي .. يسالني شو سالفته ريلج و مقتنع اننا زعلانين بس انا ما ابا اخبره

و انا كنت ابتسم و بالبغص ميوده دموعي و احلفله ما في شي بس مشغول .. حتى قلتله باكذب طبعا ان ريلي اتصل من المغرب و قال انه عنده شغل بيخلصه بعدين بيجي و انا اللي قلتله مافي داعي تسوق في الليل و تم هناك الليله

طبعا ابوي مو مصدق كالعاده بس عارف ما بخبره بالصدق و انا مو عارفه حتى لو بغيت اشتكي شو اقول؟؟
و لو خبرت ابوي و هو كلمه و اتغير ساعتها في كل مره يجيني بحس انه جاني مغصوب او منحرج من ابوي مو لانه صج مشتاقلي و يبغي يكون عندي

و الله كثر ما احبه بس مرات احس بكره لكي شي .. ما ابا افكر اني ندمانه على زواجي منه لاني لو بديت افكر جي في ااخر صج بكرهه او عالاقل بتتغير مشاعري من ناحيته

بس لين متى بيتم هاوضع؟؟ و لو انا اتحملت بنتي شو ذنبها؟؟ و اللي جاي في الطريق هذا شو ذنبه؟؟ بتم اجيب في عيال واحد ورا الثاني وبعدين شو؟؟ في الاخر هم اللي بيتعذبون و هو ولا سائل عن حد .. لا فكر انه يفرحنا بوجوده في العيد و لافكر يكون معاي و انا بعدني في بداية حملي و تعبانه و محتاجه كلمه حلوه منه ..

ما في فايده .. الوضع ما بيتغير انا عارفه .. يوم بيشتاقلي و يفضى بيجيني و انا باتظاهر اني خلاص رضيت و انتهت السالفه عشان هو ما يزعل و يمل .. و بتمر فتره باتحمل فيها الوضع و بعد كم شهر بتعب و برد لحالتي هذي .. نفس الوضع يتكرر صارله سنين و ما له الا حل من اثنين : يا اني اتقبل الوضع و اسكت و تتم حياتنا مثل ماهي او انه يطلقني و نرتاح نحن الاثنين ومثل ما يقولون تعب ساعه و لاتعب العمر كله

اخوي مهندس طائرات .. بسألك و بامانه يمكن انت كريال تقدر تفهمني الوضع اللي مو قادره افهمه من زوجي

انت شايف ان الوضع اللي انا فيه انا و عيالي عادي؟؟

تظن هو ممكن يرضى ان اخته او بنته زوجها يسوي فيها اللي يسويه فيني؟؟

سؤال اهم و ارجوك جاوبني بصراحه .. تظن اني انا الغلطانه لاني من الاول رضيت بهالوضع؟؟ انزين شو اسوي كيف المفروض اتعامل معاه عشان يعاملني كزوجه او حتى كانسانه لها احتياجاتها؟؟

اللي اطلبه انا وايد؟؟ وايد اني اتمنى ان زوجي يكون معاي حتى لو مو نص وقته ربعه انا راضيه هل هذا وايد؟

الله يكون في عونك اختي
ويفرج همك

__________________

بصراحة سألتيني أسأله ما أدري وش الجواب عليها بالشكل الصحيح
ولكن راح أقولك رأيي لو أنا متزوج بإثنتين
بصراحة إذا كنت أحب الأولى أو على الأقل مقتنع فيها كزوجة صالحة ولي منها أولاد
فلاشك أنها ستكون هي الأساس في حياتي
وأقصد من ناحية التعاملات وتلبية الرغبات
فلا أنسى أبداً أنها أول بختي وحياتي
وقد عشت معها سنوات من العمر ولي منها أول أبنائي
فليس من الساهل أن أتنازل عنها أو أتنازل عن بيتي
حتى ولو حدث خلاف بيني وبينها
بل وحتى لو حصل طلاق وعدنا بعده لبعض
فأنا أرى وبلاشك أنها تفهمني وتشعر بي أكثر من غيرها
أما بالنسبة للزواج من ثانية فهو يعتبر أمر طارئ وحادث كان سببه المرور بضروف معينة تقود الزوج للزواج مرة أخرى
وهذا لا يعني أني لا أحب الزوجة الثانية وأتعلق بها
ولكني أرى أن بيتي القديم والكبير هو يمثل موطني الأساسي الذي لابد للرجوع إليه والإطمئنان فيه
بل وربما يكون الأبناء ومصلحة بقائي عندهم عامل مهم كذلك في بقائي في البيت الكبير
أما من ناحية تعامل الزوج مع زوجتيه سواء الأولى أو الثانية
فهذا راجع كعامل أساسي أول إلى دين الرجل ومدى حرصه وخوفه من الله في مسألة العدل
ثم كعامل ثاني
وعي الرجل الفكري والقدرات الموجودة لديه
أما أنت
فأمتنع أن أبدي رأيي فيك حول تصرفك تجاه زوجك وهل أنت محقه أم مخطئة أم غيره من التصرفات

يعني في الاخر طلعت انا غلطه او نزوه في حياة زوجي .. وبيته الاول هو الاساسي

معاك حق و انا لو فيني ذرة عقل كنت فهمت هالشي من الاول ما اترييت 6 سنين

شكرا على الرد