سلام عليكم ورحمة الله وبركاتة

مدري القسم صح ولا لا

المهم

بعطيكم نبذه عني عشان تكونو بالصوره

انا انسان بار في والدي ووالدتي ومحافظ على صلاتي ومرح بصوره ماتتصورونها احب الضحك والفله احب الوناسه احب كل شي فيه فله ووناسه ومن هوايتي السفر خارج او داخل المملكه و الصيد احب الرياضه بصوره غير طبيعيه الي يشوفني يقول مدمن رياضه ماشاء الله < العين حق


اخش في المووضوع

قبل فتره طويله كتبت موضوع اني اريد الزواج ومدري ايش من هالكلام وبصراحه ندمت اشد الندممم اني فاتحت اهلي بالموضوع


طبعا بقولكم الاسباب مع القصه الي حصلت كاملهه

جلست مع اهلي قلت اريد الزوواج وبرا عائلتنا قالو لا نبي نزوجك من عائلتنا

وبعد كلام طويل قلت طيب

المهم كان اخواني متجمعين وقال واحد من اخواني كيف الناس بترضى تزوجك ؟؟؟

انصدمت من الكلام قلت ليش وش ناقصني

صلاه والحمد لله محافظ عليها ومحرمات الحمد لله مبعد عنها ووظيفه من احسن مايكون ولله الحمد

قال لا ي حبيبي فيه كلام عنك كثير

قلت وش الكلام

قال انك تسافر كثير ؟

قلت طيب وش المشكله انا انسان احب اسافر من هوايتي السفر

قال السفر مو عيب بس العيب انك تسافر برا والناس يقولون ان ولد فلان < يقصدني

حق مخدرات ؟

قلت مهبول انت وش هالكلام عيب عليك انا اخوك

قال كلام الناس

قلت طيب ليش قالو كذا

قال لأنك تسافر خارج المملكه كثير

قلت طيب الي يسافر خارج المملكه ويحب يشوف الدول صار حق هالبلاوي؟

المهم قال فلان وفلان وفلان < جاب لي اسماء الي طلعو الكلام عني

قلت وش فيهم ؟

قال يقولون انك تسافر برا وتشرب محرمات . ؟

قلت اتقو الله في انفسكم وش هالكلام

كيف اكون انسان رياضي وصحتي عال العال الحمد لله وأكون حق بلاوي ؟

وكيف اكون حق بلاوي وبار في والدي ووالدتي ؟

لو انا حقها تحصلني حتى الصلاه ماصليها ولا تحصلني طيب وحنون مع اهلي ولا شي تحصلني نكدي وحالتي حاله

قال نصيحه لك لاتروح تخطب لن سمعتك الان تحت بالارض ؟

التفت لوالدي اطال الله عمره وعمركم قلت ي ابو فلان < ناديته ب اسم اخوي الكبير

قال هلا

قلت شرايك بكلام الناس عن ولدك ؟

ونا ولدك الي بار فيك ومحافظ على صلاه ربي واخاف ربي


قال ي ولدي الله معك لاتخاف من احد ولي كاتبه الله بيصير

يعني كلام الناس ي ولدي لا يودي ولا يجيب

قلت ي ابوي الناس تمشي على كلام الناس

قال ربك معك لاتخاف


قلت لهم اجل وقفو لاتخطبون لي لين اضع حد للموضوع


وبصراحه لحظه غصب اتصلت على واحد فيهم وتكلمت عليه وقلت كلام كثير

وبعدين يوم هديت وحسيت ان اعصابي هدت كلمته وتعذرت منه

والمصيبه جحد كلامه ؟

يقول ماقلت عنك شيي

ورحت لأخي قال اقسم بالله العلي العظيم ان هذا كلامه

واخي صادق اعرفه مايحب الكذب


المهم ي اخواني

ماذا افعل ؟

ماجيتكم الا ونا اعتبركم عائلتي وخواني

احس اني في كاثره من زمممان ولا عرفت عنها الا قريب ؟

__________________
* المقابِر مدُن ممتلِئه ، سُكانها غُلِفوا بَ الصمت الأبدي ، تُحكي مشاعِرهُم الوحده ، يُرقِبون دُعاءً يهتِفُ بَ اسماِئهم ، إياكُم و نسيانهُم . , !

ليش اخوك كان ساكت توه يقول لك عن كلام الناس.
وليش ما دافع عنك يوم سمع يتكلمون في اخوه!!

انت واثق أنك ماسويت شي خلاص ليش يهمك كلام الناس عادي اي شخص ناجح محارب من اقرب ناسه.

__________________
( قال الله تعالى : يابن آدم إنك ما دعوتني ورجوتني غفرت لك ما كان منك ولا أبالي ، ياابن آدم لو بلغت ذنوبك عنان السماء ثم استغفرتني غفرت لك ولا أبالي ، ياابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة )كربي عظيم ادعوا لي (اللهم لا تكلفني من كرب الحياة ما لا أطيق)..

السلام عليكم ورحمة الله وبركاته ..
مرحباً أيها الأستاذ الكريم ..
تذكرت قول الرافعي ..
يقول الرافعي :
ما أشبه النكبة بالبيضة
تحسب سجنا لما فيها وهي تحوطه وتربيه وتعينه على تمامه،
وليس عليه إلا الصبر إلى مدة،
والرضى إلى غاية،
ثم تنقف البيضة فيخرج خلقا آخر.
بعد هذه المدة ,, ستمر جراحاتهم لك كالريح تذهب وتجيء وهي لا تكاد تلامس جبينك النقي
وما المؤمن في دنياه إلا كالفرخ في بيضته،
عمله أن يتكون فيها،
وتمامه أن ينبثق شخصه الكامل
فيخرج إلى عالمه الكامل...!
الله عزوجل يستطيع أن يرسل إلينا أشخاص ملائكة ولا يعجزه سبحانه عنده خزائن السماوات والأرض وقد قال "هو علي هين" ,, لكنه يبتلينا ليس فقط بالمرض هو تعالى يبتلينا بالناس ، لاتنسى الرسول صلى الله عليه وسلم قالوا عنه ساحر ومجنون لكن كان لايأبه بويلات البلاء التي أحلت به ..
دائما سنشعر بالسوء حين يخيب أملنا في الناس وهذا من حقنا كبشر .. وفي نفس الوقت لايهمنا كلام الآخرين مادام ليس فينا ..اعلم بأن رزقك بيد الله وليس بأيدهم اطمئن وقرّ عينا ..
وفقك الله ..

كلام ابوك عين العقل

دايما يعجبني هذا البيت

اذا صح منك الود فالكل هينٌ
وكل الذي فوق الترابِ تراب


طالما انت واثق انك ماسويت شي غلط ايش تبغى. بكلامهم

يا أخي الناس ما تركت أحد في حاله ، وإذا بتسمع كلامهم بتتعب، وصدقني الناس بالذات اللي يحبون الكلام بيطلعون فيك عيوب ولو كنت ملك.

ارمي كلام الناس وراء ظهرك ، وخل أهلك يخطبون لك ، ولعل الله أن يرزقك ببنت الحلال الطيبة اللي تنسيك الدنيا

طنش واخطب واخوك كيف ساكت ما دافع عنك الواثق من نفسه مايهمه كلام الناس

ياخي ما عليك من احد اذا الدشير صدق تزوجوا
جت عليك انت اللي بس كلام
اخطب واللي نصيبك بتوافق وبتمشي الأمور
ما يحتاج تأجل شي وانت مآ جربت اذا بيرفضون ولا لا
بعدين تعال هنا في ناس سمعتهم ولا احلى ومع ذالك يخطبون وينرفضون
يعني وضعك عادي انت بس توكل على الله ولا يهمك اللي يتكلمون
بما انك ما سويت شي غلط

قولوا وظنّوا بي ما شئتم فلا كأنني سمعت ولا كأنكم قلتم

اخوي حياتي
تتوقع الي انت فيه مشكله ؟؟؟
ابدا اطلاقا ماهي مشكله
تدري ليش لانك فقط من اخوك سمعت
ماارحت وخطبت وتم مواجهتك
لسى انت مارحت واحد قالها بوجهك
وبعدين بقولك حاجه الناس مالها الا الظاهر
وحنا في مجتمعنا نتخوف من الشاب كثر السفريات خارجيا واهله مو معاه
لو كنت اعرف ان زوجي كثير السفر لدولة شرق اسيا مافكرت لو دقيقه اوافق عليه
الي اقصده
انت مارحت وخطيت واحد قالك شي
يعني مافي مشككله
وبعدين البنات وش كثرهم لازم تتزوج من العائله اطلع ودور من خارج العائله
ومو لازم اهلك يوافقون انت اصر عليهم قول انا الي بتزوج وابي افتك من القيل والقال واريح مخي
الله يرزقك راحة البال ويسهل لك خطبتك يارب