السلام عليكم ورحمة الله

أولا أنا أشكركم علي التفاعل مع المشاكل وربنا يوفقكم في كل أمور حياتكم. أعذروني أنا كلامي هيكون كثير بس ده لإني مش عارف أول مشكلتي من آخرها

أنا ولد وحيد علي إخوات بنات والدي كان كبير في السن علشان كده كان بيخاف عليا جدا وماكانش ليا أصحاب غير في المدرسة وحياتي كانت من البيت للمدرسة ومن المدرسة للبيت. للأسف والدتي كانت صغيرة في السن وماعندهاش خبرة في الحياة وكل دورها في البيت تقريبا هو إنها تغسل وتطبخ ووالدي هو اللي كان مسيطر علي البيت وكان بيجيب كل حاجة بنفسه وهو اللي بيذاكر لنا ويربينا ويعلمنا الصلاة. كان شخصية قوية جدا وأنا كنت بأحترمه وبأخاف منه وبأحبه قوي وهو أكثر إنسان مثقف قابلته رغم إنه ماكملش الابتدائية

والدي إتوفي وأنا عندي 14 سنة وإخواتي البنات كانوا أصغر مني ومن وقتها وأنا حابس نفسي. مش عايز أضيع وقت في الخروجات والفسح وكل حياتي كانت هي المذاكرة وبس، وماما كانت طبعا بتوصل لي الإحساس ده أكتر وبتضغط عليا أكتر عشان أذاكر حتي وأنا بأذاكر والحمد لله كنت من الأوائل

ماكنتش عايز أفكر أو أرتبط بأي واحدة عشان أنا عندي حب يعني خطوبة وجواز ومش عايز أحب واحدة وتحبني وبعد كده ماأقدرش أتجوزها عشان ظروفي

طبعا بعد وفاة والدي ولإن والدتي مش بتشتغل ففيه ناس كانوا بيساعدونا ماديا. الموضوع ده كان مضايقني قوي وماما كانت بتقول لي إن هم بيردوا أفضال بابا عليهم. بابا الله يرحمه كان إنسان كريم جدا وبيحب الصدقات رغم الفقر. دايما كل أول شهر كان فلان أو علان من معارفنا يكلمنا في التليفون ويطلب إني أروح علشان آخد الفلوس، دايما كنت بأكره الإحساس ده ومش بأحبه لكن ماما كانت تقول إنه عادي ومش بيقلل مني

في الوقت ده برده كان عندي إحساس دايما إني أقل من الناس. يعني كان فيه موضوع إتكلمت فيه مع أختي أو أمي وألاقي بعد كده إن كل العيلة تعرفه وإنهم بيتريقوا عليا (يعني يسخروا مني) أو إن ابن خالتي يتقدم لأختي والعيلة كلها تبقي عارفة ويتكلموا قدامي علي الموضوع ده (بالتلميح مش بالتصريح) كل العيلة كبار وصغيرين وأروح أسأل ماما علي الكلام ده تقول لي لأ دي حاجة تانية خالص، ولما عرفت زعلت جدا لكن قلت لماما إن مش هينفع إنهم يتجوزوا عشان صغيرين في السن وعشان طريقة تفكيرهم مختلفة، لكن ماما ماسمعتش كلامي ده ولما سألت حد تاني من معارفنا أكبر مني ومنها في السن قال لها نفس الكلام اللي أنا قلته بالحرف الواحد - لأنه قال الكلام قدامي - لكن ساعتها الكلام بقي مقنع جدا لماما !!!!!

لما كنا نبقي في مناسبة - فرح مثلا - إخواتي كانوا يحطوا مكياج وأنا كنت أتخانق مع ماما عشان ده حرام حتي لو هم صغيرين ماينفعش يتعودوا علي كده، لكن ماما وخالي يقولوا إنهم عارفين إن ده حرام وإني بأتكلم صح لكن إحنا في فرح وخلينا نفرح وماتنكدش علينا وإحنا مابنصدق نفرح وكإني أنا اللي بأنكد عليهم

يعني حتي لما ابن عمي إتقدم لأختي (وكانت كبرت خلاص) قلت لها ياماما عايزين نتمهل في الموضوع ومش نستعجل عشان كان فيه مشاكل قديمة بيننا وبين عمي وبقالنا سنين مش بنشوف بعض ولا بنكلم بعض، ماما سافرت البلد عشان يتكلموا في التفاصيل - رغم إنهم المفروض ييجوا في بيتنا بس عيلتنا كلها في البلد وإحنا بس هنا - قلت لماما مش تستعجلي لقيتها تاني يوم بتكلمني أجيب إخواتي عشان هنكتب الكتاب !!!!!!!!!!!!!!!!!

واتجوزوا بسرعة قوي مالحقتش أعرف شخصية ابن عمي كويس ولا حد فينا لحق بس ماما كانت مستعجلة قوي حتي إن أخوه التاني خطب أختي، وبعد كده حصلت مشاكل كتير قوي وكبيرة قوي أضطريت ساعتها انا أتدخل وأفسخ خطوبة أختي التانية عشان مش تعيش حياتها في نكد، لكن للأسف أختي الأولي كانت اتجوزت وخلفت ولحد النهارده ضميري بيأنبني إني ماإتدخلتش بصورة أقوي عشان أنقذها من الوضع ده. دلوقتي كل ماأكلمها في التليفون وأسألها عن حالها وتقول لي إنها كويسة أحس إنها بتكذب عليا عشان مش عايزاني أزعل

بعد كده أنا اتقدمت لبنت صديقة لزميلتي في الشغل. عجبني تدينها وشخصيتها. كل اللي كنت عايزة من الجواز هو بنت متدينة باقتناع وأخلاقها عالية وعندها شخصية وخطبتها من أكتر من سنة ونصف وحددنا ميعاد كتب الكتاب والدخلة بعد أقل من شهرين. هي عيلتها كويسة جدا هي بنت وحيدة علي 3 شبان أبوها رجل متدين لكنه عصبي جدا وعندي لأقصي درجة لكن والدتها ست طيبة جدا وحنينة جدا تتحط علي الجرح يطيب

بالنسبة لشخصيتي فأنا متسامح جدا - ده اللي بأوصف نفسي بيه - ومش بأهتم بالماديات كل اللي يهمني إني أشوف كل اللي حواليا مبسوطين وبيحبوني. علشان كده استحملت طلبات أبوها المادية وقلت عادي طالما إني هأتجوزها

هي في الأول كنت بأحسها خجولة وده عادي طبعا في أول الخطوبة إنها مش تبقي متعودة عليا. كنت أنا دايما اللي أكلمها في التليفون وكنا بنتكلم كتير قوي في الفترة دي - بعلم وموافقة أهلها طبعا - وكلمتها عن حياتي وكنت بأتكلم معاها ببساطة مش بمنطق إني راجل البيت وهي تسمع كلامي ولكن بمنطق إننا شركاء في الحياة وأصدقاء

بس بعد كده حصلت شوية مشاكل وكلها كانت بتدور حوالين إني مش بأعرف في الهدايا والمناسبات (وأنا فعلا مش بأعرف في كده قوي) وإني مش مهتم بمظهري (ودي حقيقة) بس اللي كان بيضايقني إنها دايما كانت تقعد زعلانة أيام من غير ماتقول لي ولما أضغط عليها عشان أعرف كانت دايما تنفجر في وشي، وكل اللي عايزه إنها تقبلني وتتكلم معايا بهدوء

لحد لما جه يوم ولقيتها بتقول ليا إن هي مش عايزة تكمل معايا وإنها عايزة فرصة تفكر. في الفترة دي أنا كنت كل يوم بأكلمها عشان أعرفها أنا بأحبها قد إيه لدرجة إني بكيت قدامها !!!! ورغم إنها قالت إن محدش في البيت يعرف أي حاجة عن الموضوع ده لقيت والدتها كلمتني في التليفون من غير ماخطيبتي تعرف وقالت لي ماتكلمهاش كل يوم إمسك نفسك وسيبها لحد لما تعرف قيمتك إنت إنسان كويس وإحنا قلنا لها إنها مش هتلاقي زيك. هي دايما كانت تقول لي إنها واثقة فيا وأي بنت تتمناني والكلام ده. سألتها "طب هو فيه أمل إنك تحبيني؟" ردت "ممكن" قلتلها "وأنا هأعيش علي الأمل ده وإن شاء الله أقدر أخليه حقيقة". رغم اللي حصل ده أنا حسيت إن كرامتي مجروحة من الموقف بالذات لما والدتها كلمتني كإنها بتقول لي "خلي عندك كرامة" وساعات بأتمني إني أكون فسخت الخطوبة ساعتها واستريحت

الفترة اللي بعد كده نزلت وزني وبقيت أهتم بمظهري بشكل أحسن وبقيت متفائل أكتر وهي كمان حسيت إنها مبسوطة قوي ساعتها وإنها بتحبني، حتي والدتها قالت لي إنها (خطيبتي) مبسوطة بيا قوي، لكن بعد كده أخوها خطب وبدأت مقارنة بيني وعيلتي من طرف وبين اخوها وعيلتها من طرف، من حيث الشبكة اللي جابها ومعاملة والدتها لخطيبة ابنها وتكاليف الخطوبة والكلام ده كله. ورجعت نغمة إنها مش طايقاني وعايزة تسيبتي والكلام ده تاني وساعتها فعلا حسيت إني مجروح لأني حاولت أعمل لها كتير قوي لكن رغم كده هي بتقارن بيني وبين أخوها مع إن أخوها مش دافع قرش من جيبه وأبوه هو اللي بيدفع وأنا لوحدي بأعمل كل حاجة من مرتبي حتي عندي 2 من إخواتي إتجوزوا جهزتهم من مرتبي وأختي اللي كانت مخطوبة برده كنا جبنا نصف جهازها تقريبا واللي باقي من ورث أبويا الله يرحمه مايجيبش ثلاجة وبوتاجاز

ده غير إن بعد خطوبتي بكام شهر الشركة اللي كنت بأشتغل فيها قفلت وومادفعوش مرتب شهرين والحمد لله لقيت شغل جديد بس ماكانش مستقر لكني كنت عايز أعوض فرق الفلوس اللي راحت واتنقلت مابين 3 شركات في سنة ونصف وده كان مسبب ليا ضغط نفسي كبير وخصوصا إني كنت بأشتغل 16 ساعة في اليوم أو أكثر

والشئ الثاني إن مستوي عيلتها المادي كبير علشان أبوها وأعمامها وأخوالها تجار كبار وأغنياء ماشاء الله لكن أنا عيلتي متنوعة يعني فيها موظفين كبار وفيها برده فلاحين وأول يوم اتقدمت لها قلت لهم إن والدي الله يرحمه كان سواق تاكسي ومحدش إعترض، لكن في مرة بعد كده كنا بنتكلم عن عيلتي قلت لها إن ليا زوج خالتي بيشتغل "عربجي" !!!!!! أنا كنت باتكلم عادي لكن هي شافت إن دي مشكلة كبييييييييييرة قوي وإزاي ماقلتلهاش من الأول وإني خدعتها!!!! قلت لها المهم هو أبويا وده قلتلك عليه من الأول قالت لي إنها قالت لي علي عيلتها من قبل الخطوبة وإني كده حطيتها قدام الأمر الواقع ولو قلتلها قبل الخطوبة كانت هتفكر تفكير تاني !!!!!!!!!!!!!!

الشئ الثالث إن بينها وبين والدتي "علاقات حذرة" يعني هم مش بيكرهوا بعض لكن في نفس الوقت مش بيحبوا بعض وخايفين من بعض. دايما بأحس إن أمي وأختي بيغيروا من خطيبتي وفي نفس الوقت خطيبتي حساسة جدا من ناحية أمي ومفيش بينهم كلام كتير غير السلام العادي مش أكتر. حاولت إني أكلم خطيبتي وأخليها تقرب من ماما وأكلم ماما عشان تقرب من خطيبتي. ماما تقولي الموضوع هييجي مع الوقت بس ماتعملش أي حاجة وخطيبتي كل شوية تسألني مامتك مش بتكلمني ليه فأنا أقولها طب ماتكلميها إنتي وتبدأي بالخير تقول لي أنا ياما اتكلمت ومامتك وماكانتش بترد عليا حلو. يعني في عيد الأم هي كانت عايزة تجيب لماما هدية لكنها كانت مشغولة وماعرفتش تجيبها في الميعاد. مامتي زعلت قوي وقالت هي مش مهتمة بيا ولو عي بتعمل لك حساب كانت كلمتني وجابت لي هدية (والكلمة الأخيرة دي وجعتني قوي) وخطيبتي فعلا قالت لي قبلها هي عايزة تجيب هدية لمامتي وطبعا لما قلت لمامتي كده ماصدقتش، ولما خطيبتي كلمتها في التليفون ماما قالت مش عايزة أكلمها هي ماإتكلمتش إلا لما إنا زعلت وإنت قلتلها !!!!
وخطيبتي لما سمعت الكلام ده اتضايقت قوي وقالت لي مامتك لو بتعمل لك حساب كانت ردت عليا كويس (وبرده الكلمة دي وجعتني)

وفي وقت التجهيز هي كانت بتبقي مترددة جدا في الاختيار. يعني مثلا أبوها ينزل معانا ويقول هاتوا دي وندفع مقدم ولما نروح تكلمني تقول لي لأ مش عايزة دي أسألها طب عايزة إيه تقول لي ماأعرفش !!! أنا مش فارق معايا شكل أوضة النوم أو أي ماديات المهم عندي الأنسانة اللي هأتجوزها وبس علشان كده فضلت صابر معاها في ترددها ده، للدرجة اللي خلت أمي وأبوها وأخوها كل واحد يقول لي إنت لازم ماتسيبهاش تتحكم فيك وإنت لازم توقفها عند حدها. هي فعلا كانت مترددة وكانت صعبانة عليا من خوفها من أبوها وأبوها أكتر من مرة يزعق لي قدامها وقدام الناس ويقول لي إنتم مش هتخلصوا بقي وأنا طبعا أستحمل كلامه عشان هو رجل كبير حتي لو كان بيكلمني بأسلوب مضايقني. بس فعلا في يوم ضايقتني جدا لإني قلت لها مالكيش دعوة بحد دي حاجتنا ولو شاورتي علي أوضة هنجيبها ومايهمش الفلوس تقول لي خلاص نجيب دي أروح عليها تقول لي لأ لأ بلاش خليها التانية دي أحسن أروح علي التانية ترجعني علي الأولي، كإنها بتلعب بيا !!!!!!!!!!!!!

الحاجة عايز أقولها إن أنا اتفقت إني هأجر شقة في بيتهم، ووالدها أصر إني أشطب الشقة ودفعت فيها مبلغ كبير لإنها شقة كبيرة وطبعا اتكلفت ساعة الشغل أكتر من المبلغ اللي اتفقنا عليه. أنا إديت لأبوها الفلوس وهو اللي اتفق مع العمال وهو اللي كان بيتابع معاهم وأنا كنت عايز أعمل كده بنفسي لكن ماكنتش قادر أولا بسبب إنشغالي في الشغل ثانيا عشان هم عايشين في مكان بعيد عني بيني وبينهم ساعة ونصف في المواصلات حتي لما كنت بأشوف حاجة عشان الشقة في محل قريب مني ألاقيهم راحوا يتفقوا مع حد قريب منهم وأنا طبعا بأوافق عشان أنا مش فارق معايا الماديات قوي وبأقول مش مشكلة، رغم إن نفسي أعمل كل حاجة لنفسي لكن قلت دي شقة تقضية حال علشان نتجوز وبعد كده إن شاء الله هأبني بيت خاص ليا ولأولادي بعون الله وساعتها هأعمل كل حاجة بنفسي وعلي مزاجي

التكملة في الرسالة القادمة