السلام عليكم

احتاج استشارة تساعدني اتخلص من هذه المشاعر السلبية
اللي للاسف اشك انها قامت تتحول للحسد

والله اني احزن جداً لما امر بهذه الحاله

اولا احب اوضح خلفية عن نفسي اني الحمدلله ملتزمه اخاف الله ومحافظه على فروضي و واجباتي الدينيه

قبل في بداية زواجي وخاصة ايام الملجه
لما كنت حاسه اني ملكه في قلب زوجي
كنت مرتاحه نفسيا ما اشوف فلانه وغيرها
ولا مره بعمري وحياتي فكرت اني احقد او احسد احد

الحمدلله على كل حال منذ سنين والمشاكل مستمره بيني وبين زوجي
هجران وحرمان وما احس اني متزوجه

لاحظت اعوذ بالله من الشيطان
انه الغيره قامت تدش قلبي
لما اشوف واحد مستانس مع زوجته وماسكين ايد بعض

يشهد الله لكل زوجين سعيدين
ما اتمنى لهم الشر
بس اينيي احساس خايس كريه
شعور الضيق لما اشوف مثل هالمنظر
هل هذا لا قدر الله حسد ولا غيره؟؟

للعلم بس ايي لي هالشعور من ناحية الحياة الزوجية والعاطفيه
اني اتضايق لو قارنت وضعي بغيري

اما النواحي الثاني
اذا وحده غنيه اكثر مني متعلمه اكثر مني ولا تسافر وايد
ابداااا مافي شعور غيره

بس اذا الموضوع يخص العلاقات العاطفيه
استغفر الله اقول معقوله في ناس جي حياتهم حلوه
خاليه من المشاكل ؟؟؟ ليش مع اني احسن من فلانه بالشكل والدين وغيره بس مالي حظ ( ادري والله انه غلط واكبر غلط هالكلام والقناعه كنز ومن سخط فله السخط ومن رضى فله الرضى )

بس انا قاعده احاول اصير قويه واتجاهل هذه المشاعر السيئه اليديده والدخيله على حياتي

انا ماكنت جذي
فعلا انا جداً حزينه
ماتوقعت المشاكل اللي امر فيها مع زوجي جي خلتني
احس اني امثل اني قويه
لكني من الداخل ضعيفه بسرعه انكسر واتأثر اذا شفت زوجيين سعيدين ازعل على وضعي

حتى في وحده اعرفها متزوجه معاي
دايماً تتكلم عن زوجها وحياتها المثاليه و زوجها الرائع
كنت بالبدايه عادي ما اهتم
لكن من كثر ماتصور ببرامج التواصل الاجتماعي وتستعرض حياتها المثاليه
ماقدرت اتحمل
ماعرف ليش يالي شعور حقد ومسحتها وخلال هذيك الفتره تميت اصيح
واصير عصبيه واتضارب مع زوجي

لانه هالشعور الخايس يالي
وانا اخاف الله واخاف انه يحاسبني على مشاعري
قلت احسن اني ابتعد عنها وعن اي وحده تستعرض ودايما تمدح حياتها وزوجها
يعني اقلل الاحتكاك وياهم وامسحهم من برامج التواصل مثل السناب
اللي كله استعراض

ارتحت جدا يوم ماقمت اشوف حياتهم
لكن للاسف هم يرجعون وبقوه مهما قللت احتكاكي
وانا كل ما يالي هالشعور اقعد استغفر واذكر الله واقول امر المؤمن كله خير
والله يبتلي اللي يحبه
لكن اعترف اني بلحظات انسى كل هذا
واقول ياليت حياتي نفسهم

واحب اضيف نقطه
لاحظت خلال هذه السنه بعد
اني لما اشوف اخوي طالع ويا زوجته بروحهم ومستانسين
اتضايق شوي >> ما اتمنى لهم الشر ربي الشاهد اثنينهم احبهم حب كبير
لكن هالشعور فجأه قام يمر علي
تزامنا مع مشاكلي الكبيره ويا زوجي
وانا والله العظيم قبل ماكنت اهتم
يوم كنت مرتاحه عاطفياً

حتى عقب ما اييلي هالشعور
اروح اقفل علي الغرفه واصيح وانهار
اقول اعوذ بالله معقوله الشيطان قدر يدخل قلبي
وصرت اركز على الناس وسعادتهم


يارب اجعل همي الآخرة

انا متضايقه بس لاني ماكنت جي
طول عمري وحياتي ماعرف معنى للغيره والحقد اعوذ بالله منهم

انصحوني ساعدوني اطلع من هذا الشعور
جداً متعب
لاحول ولا قوة الا بالله