رد : ندمانة....الله ياخذ غبائي
السلام عليكم ورحمة الله تعالى وبركاته
أقسم بالله العظيم ان زوجج إنسان ذكي جداً ، ورجل بكل ماتعنيه الكلمة!! قدر يعرف يحسسك بالندم وقدر يعرفك حجم غلطك بالطيب والمعاملة الطيبة وبحسن الأخلاق وحسن التبعل من غير لايستعمل معاج اي نوع من انواع التعنيف النفسي او الجسدي.
ووين الرجال اليوم يتعضون من هذه المعاملة وهذه الطريقة ف والله العظيم أنها تؤلم اكثر من الألم النفسي والجسدي ولها مفعول سحري وقوي!!
زوجج يا اختي حاشمج ، وحاشم أهلج واجد ، وسماعة لكلام ابوج والسكوت عنة من باب الحشيمة والإحترام لولد عمة الكبير!! حتى لما نزل على خشمة وحبة هالنزلة هاذي فيها حشيمة وطيب ، وهذا ان دل يدل على حسن تربيتة وعلى مرجلتة واخلاقة العالية.
والله يا اختي عبيق أن أطيب النساء اليوم تتمنى ربع زوجج بس مو كلة ، لأن من النادر انك تلقين احد من الرجال اليوم صدرة وسيع ويعرف يتعامل مع المشاكل بهدوء وبطيبة من غير لايرفع صوتة او يعنف او حتى يجرح!!
زوجج بسكوتة وبتغيرة عليج الحين يطلبج انج تردين اعتبارة!! رديلة اعتبارة ولا تقولين امي ماترضى او ابوي مايرضى ، روحي لبيت اهلج مسيرة عادي ، وادخلي على ابوج(لوحدكم) وبوسي راسة وأيدة وقوليلة يايبة انا عندي مشكلة وأبيك تحلها لي!! انا يايبة غلطت بحق زوجي واجد ومع هذا ماشفت منة إلا كل خير!! لارفع صوتة علي ولا هاوشني ولا حتى طقني!! بالعكس قام يعاملني معاملة طيبة اكثر واكثر بس متغير علي مهو مثل الأول!! وانا استاهل انه يتغير علي لأني ظلمتة!!
بيقول لج أبوج ظلمتية بشنو ؟؟ قوليلة بالموضوع اللي جتلك فيه أمي وقالتلك انه يبصيص للبنات وكذا!! وقوليلة والله يايبة اني ظلمتة لاني كنت محتاجة كلام من امي وخواتي يخففون علي وسوستي اللي مالها معنى وغيرتي اللي ذابحتني ، وإلا هو لايبصبص ولا يطالع إلا قدامة بس انا يايبة اغار وغيرتي تخليني اتوقع اشياء مو صحيحة!! وزوجي الحين حاس بالإهانة منك ومن امي ومع هذا ماقالي ، وحاس بالخذلان مني واني سببتلة كل هالإهانات ورضيتها له ، ف الله يرضى عليك يايبة أبي اصحح غلطتي بكل ود ورحمة وعقلانية ، وأبيك تتصل على زوجي وتخلية يحظر هنا عشان اعتذرلة قدامكم ، وانت يايبة زوجي يستاهل منك الكلمة الطيبة ، وأبيك أتكلم أمي كذلك اتكلمة واطيب خاطرة ، وغير كذا مابي منكم إلا الدعاء.
هاذي أفضل طريقة لج ، وتحملي المسؤولية ، وخلج قوية ، وردي زوجج بقوة ، ترى الرجال لابعد عن حضن زوجتة وتعود على هالشي تبدأ مشاعرة اتخف من ناحيتها وتصير عندة حاجة عادية ، ف إذا انتي تشتكين من غبائج استأصلية بالحركة الذكية هاذي.
وإذا انتي شايفة انج خوافة وماتقدرين اتواجهين ابوج وامج ، روحي حق واحد من اخوانج وبلغية بالموضوع كاملاً وخلية يقولة لأبوج، او وحدة من خواتج تمون على ابوج وقريبة منة ، وخلي ابوج يحل مشكلتج ، وصدقيني ابوج اذا قلتيلة كل شي بيكبر زوجج بعينة وبيقول بالرغم من أني بهدلتة وهاوشتة وماقمت له بالمجلس وانا ظالمة(من غير قصد) إلا انا عاملني بالبر والطيب وبحق الدم والنسابة ، وبتلقينة راح يقربة منة واجد بعد.
عفية يا اختي خليج عملية ، وأتركي البجي الحين لأن زوجج مو بحاجتة ، ولا أنتي بحاجتة ، زوجج محتاج كرامتة واعتبارة ، وانتي محتاجة انج تخطين هالخطوة.
البجي والتعذر والنحيب (أمسحيهم من قاموس مشكلتج الحين لأنهم مابينفعونج)
موفقة خير.
__________________
استغفر الله واتوب إليه