الله يشووف من حااالك يااارب زوجك انسان منيح حافظي عليه واصبري لحتي يطيح اللي براسو

جربي انك تسحبي عليه شوية خلاص بلاش دموع واعتذار قومي بواجبااتك لا تكلميه رح يحس انك تعبتي من قمعو وصدودو عنك ورح يتقرب منك شوي شوي

ياختي مابي اقسى عليك بس والله ما عرفنالك
ماعرف كيف
قلنالك ردي له اعتباره قدام اهلك

تغطسين فترة وتقولين قولوا اللي بتقولونه والله ياخذ غبائي
ثم ترجعين بنفس النتيجة
مادري كلامك مو متوافق مع مواقفك
حتى الحلول ما ناقشتيها مع الاعضاء

الموضوع تعدى من بينك وبينه
صار بين الرجال واحراج له قدامهم بتصرف ابوك

__________________
الحمدلله الذي بنعمته تتم الصالحات

الله يصلح حالكم يارب
بس فعلا زوجك مره مقهور ومجروح اقل شي وضحي لاهلك انك كنتي معصبة وظلمتيه مو تقولي بتسوي اي شي عشانه
الله يصلح مابينكم وترجعو مثل اول واحسن

__________________



هل تتعرضين للأبتزاز ؟؟ أدخلي هنا

مفضلة المتزوجين 2011-2014



مفضلة المقبلين على الزواج 2014

.

كيف بالله تريدين منا أن نرد عليك وأنت لا تتواجدين هنا أو تعطينا مستجداتك بشكل مستمر..
إن أحسست منك الجدية سأعطيك حلاً آخراً بإذن الله..

السلام عليكم ورحمة الله تعالى وبركاته

أقسم بالله العظيم ان زوجج إنسان ذكي جداً ، ورجل بكل ماتعنيه الكلمة!! قدر يعرف يحسسك بالندم وقدر يعرفك حجم غلطك بالطيب والمعاملة الطيبة وبحسن الأخلاق وحسن التبعل من غير لايستعمل معاج اي نوع من انواع التعنيف النفسي او الجسدي.

ووين الرجال اليوم يتعضون من هذه المعاملة وهذه الطريقة ف والله العظيم أنها تؤلم اكثر من الألم النفسي والجسدي ولها مفعول سحري وقوي!!

زوجج يا اختي حاشمج ، وحاشم أهلج واجد ، وسماعة لكلام ابوج والسكوت عنة من باب الحشيمة والإحترام لولد عمة الكبير!! حتى لما نزل على خشمة وحبة هالنزلة هاذي فيها حشيمة وطيب ، وهذا ان دل يدل على حسن تربيتة وعلى مرجلتة واخلاقة العالية.

والله يا اختي عبيق أن أطيب النساء اليوم تتمنى ربع زوجج بس مو كلة ، لأن من النادر انك تلقين احد من الرجال اليوم صدرة وسيع ويعرف يتعامل مع المشاكل بهدوء وبطيبة من غير لايرفع صوتة او يعنف او حتى يجرح!!

زوجج بسكوتة وبتغيرة عليج الحين يطلبج انج تردين اعتبارة!! رديلة اعتبارة ولا تقولين امي ماترضى او ابوي مايرضى ، روحي لبيت اهلج مسيرة عادي ، وادخلي على ابوج(لوحدكم) وبوسي راسة وأيدة وقوليلة يايبة انا عندي مشكلة وأبيك تحلها لي!! انا يايبة غلطت بحق زوجي واجد ومع هذا ماشفت منة إلا كل خير!! لارفع صوتة علي ولا هاوشني ولا حتى طقني!! بالعكس قام يعاملني معاملة طيبة اكثر واكثر بس متغير علي مهو مثل الأول!! وانا استاهل انه يتغير علي لأني ظلمتة!!

بيقول لج أبوج ظلمتية بشنو ؟؟ قوليلة بالموضوع اللي جتلك فيه أمي وقالتلك انه يبصيص للبنات وكذا!! وقوليلة والله يايبة اني ظلمتة لاني كنت محتاجة كلام من امي وخواتي يخففون علي وسوستي اللي مالها معنى وغيرتي اللي ذابحتني ، وإلا هو لايبصبص ولا يطالع إلا قدامة بس انا يايبة اغار وغيرتي تخليني اتوقع اشياء مو صحيحة!! وزوجي الحين حاس بالإهانة منك ومن امي ومع هذا ماقالي ، وحاس بالخذلان مني واني سببتلة كل هالإهانات ورضيتها له ، ف الله يرضى عليك يايبة أبي اصحح غلطتي بكل ود ورحمة وعقلانية ، وأبيك تتصل على زوجي وتخلية يحظر هنا عشان اعتذرلة قدامكم ، وانت يايبة زوجي يستاهل منك الكلمة الطيبة ، وأبيك أتكلم أمي كذلك اتكلمة واطيب خاطرة ، وغير كذا مابي منكم إلا الدعاء.

هاذي أفضل طريقة لج ، وتحملي المسؤولية ، وخلج قوية ، وردي زوجج بقوة ، ترى الرجال لابعد عن حضن زوجتة وتعود على هالشي تبدأ مشاعرة اتخف من ناحيتها وتصير عندة حاجة عادية ، ف إذا انتي تشتكين من غبائج استأصلية بالحركة الذكية هاذي.

وإذا انتي شايفة انج خوافة وماتقدرين اتواجهين ابوج وامج ، روحي حق واحد من اخوانج وبلغية بالموضوع كاملاً وخلية يقولة لأبوج، او وحدة من خواتج تمون على ابوج وقريبة منة ، وخلي ابوج يحل مشكلتج ، وصدقيني ابوج اذا قلتيلة كل شي بيكبر زوجج بعينة وبيقول بالرغم من أني بهدلتة وهاوشتة وماقمت له بالمجلس وانا ظالمة(من غير قصد) إلا انا عاملني بالبر والطيب وبحق الدم والنسابة ، وبتلقينة راح يقربة منة واجد بعد.

عفية يا اختي خليج عملية ، وأتركي البجي الحين لأن زوجج مو بحاجتة ، ولا أنتي بحاجتة ، زوجج محتاج كرامتة واعتبارة ، وانتي محتاجة انج تخطين هالخطوة.

البجي والتعذر والنحيب (أمسحيهم من قاموس مشكلتج الحين لأنهم مابينفعونج)

موفقة خير.

__________________
استغفر الله واتوب إليه

رد المتفائل بالله

عادي جداً انت انت لستي غلطانه

الحياة كذا أحلى اهم شي ارضيتي

شخصك الكريم

:*

زي ماكانت عندك الجراءة تحرجينه وتفضحينه عند أهلك وتكبرين السالفة
خلي عندك جراءة بالحق وعدلي الموقف إلي حطيتي زوجك فيه وردي له
أعتباره هذا إذا له أعتبار وغلا عندك

أنتِ متزوجه رجال بمعنى الكلمة وحاشمك وحاشم أهلك وموقفه مع أبوك
بعد كل إلي صار يدل أنه ابن عالم وناس ومتربي صح ولو خسرتيه فأنتِ خسرتي
إنسان ماراح يتكرر بحياتك زيه
مو كل يوم بتلاقي رجل بها المواصفات تراهم أنقرضوا

:*
وخليك شجاعه وتحملي مايجيك
وعلى ضمانتي ماراح يذبحونك


:*

__________________

أبشركم الحمدلله الحمدلله الحمدلله كلمت ابوي وكنت خايفة من ردة فعلة وايد ... بس الله يخلية لي اتفهم الموضوع بكل حنان ورأفة فيني ... وبدأ يوبخني شوية وقالي ليه تخليني اطلع بوية اسود مع ولد عمي وهو كبر واحد من عيالي .... قلتله المهم يبة الموضوع عندك وانا غلطت بحقة وبحقك وبحق امي وياية اصلح الموضوع كلة .... ف تكفا يايبة حل مشكلتي ... والله والله يايبة من ظلمتة وصار اللي صار ان زوجي لارفع صوتة علي ولا هاوشني ولا حتى خانقني وعاملني معاملة وايد طيبة .... قايم بكل واجباتة من ناحيتي .... حتى مصروف العيد عطاني بعد كل اللي سويتة فيه..... والحين يايبة زوجي وايد مجروح مني ومن اللي سويتة فيه ... ومجروح من كلامك القاسي علية .... وحتى من أمي .... وهو ماقالي بس انا حسيت فيه هالشي!!

قالي يابعد عينة عينة ابوي ولا يهمج واعتبري الموضوع منتهي .... الحين اتصل علية واحضرة .... اتصل علية وسلم علية وقاله مر علينا البيت .... بالفترة هاذي وقبل لا ايي ريلي ابوي راح حق امي وفهمها الموضوع كلة .... ومافيه نص ساعة او اكثر شوي وريلي وصل .... أستقبلة ابوي عند الباب وسلم علية وقعدو شوي مع بعض وبعدين ابوي ياني ويا حق امي قال تعالوا .... رحنا كلنا اهناك ..... وبعدين ابوي قال حق ريلي انه مايقصد الكلام اللي قالة وأبدى أعتذارة حقة وقال والله يافلان اني تسرعت وسامحني ياخوك كنت معصب وماني بوعيي ..... وبعدين انا لما شفت ابوي مستحي من ريلي تكلمت وقلت له يافلان هذا انا جدامك وجدام امي وابوي اعترف اني انا اللي غلطت بحقك وظلمتك وحقك على وانا اللي خليت ابوي وامي يضلمونك بعد ..... وامي قالت كذلك لريلي انه لو مو غالي علينا ما سوينا اللي سوينا حتى وان جاك ظلم من عندنا..........

ف قال ريلي ماصار إلا كل خير وأحنا أهل وأنا ولدكم وانتم مني وفيني الدم واللحم وأتحمل منكم اللي اكثر من جذي بعد .... ولمتكم جدامي تسوى عندي الدنيا ومافيها ..... وكلنا نخطئ ومحد فينا معصوووم ..... وانا والله مابقلبي عليكم إلا كل خير وكرامة.

بعدين عاد ابوي وريلي قعدوا يسولفون سوالف جانبية وطلعت انا وامي .... وطولوا مع بعض واتصل علي ريلي وقالي يالله جهزي بنروح حق بيتنا ...... والحمدلله الحمدلله ألف الحمدلله اني سويت جذي ..... احس روحي ردت لي والله.... وتووووبة ماراح اكررها بعد اللي شفتة من ريلي.


المتفائل بالله يزاك الله كل خير كلامك وايد ساعدني اخطي هالخطوة
البليغ مشكور وايد وسامحني والله كنت بلوية وحوسة وماقدرت اتواجد بإستمرار
شوشوتي ياحياتي ماقصرتي
وكل اللي شاركوا يزاكم ربي الجنة يارب.

الحمد لله
الحمد لله
فرحت لك ,,بجد بيضتيها هالمرة و برافو عليك
وأن شاء الله يكون درس تستفيدي منه و تستحضريه بأوقات مشابهة

الله يسعدكم

__________________