السلام عليكم ورحمة الله ,,,,,,,,,,,,,تحيه طيبه للجميع

بداية اشكر كل من يدخل مضوعي ويفيدني بكلمه صادقه او دعوه في ظهر الغيب
في الحقيقه ماني عارفه كيف ابدأ مشكلتي بس بحاول اتكلم بالعاميه عشان تفهمون قصدي
طبعا لازم اعطيكم نبذه عن اهل زوجي وعن تعاملي معهم حتى تتضح الصورة بشكل افضل
انا انسانه متزوجه من 3 سنوات وعندي طفل والحمدلله موظفه وظيفه مرموقه وهذا من فضل ربي
زوجي انسان كغيره من الناس له سلبيات وايجابيات..هو الابن الكبير وانا بالضبط البنت الكبيره في عائلتي
اهل زوجي ناس طيبين ولاانكر هذا الشي برغم ماحصل منهم ..
ابو زوجي رجل متعلم وفاهم الحياه وشخصيته جدا هزليه ولايهمه شي ودائما ياخد الامور بضحك وبساطه
ام زوجي ذكيه وداهيه برغم عدم تعلمها وفيها مراوغه كثير بس ماتبين للناس الا الوجه الحسن والحقيقه انها ماقد ضايقتني بشي في وجودي والله اعلم بقفاي مااحكم علىها الا بالظاهر
عندهم 2 بنات مطلقات وشخصياتهم غريبه محد يقدر يفهمهم او يتعامل معهم والحقيقه اني اتعامل معهم بشكل اكثر من السطحيه
ولزوجي 2اخوان اصغر منه يدرسون بتخصصات ممتازه وبرضه اعتبرهم مثل اخواني الصغار ولابيني وبينهم احتكاك لانهم اصغر مني ب 10 سنين ولااحب اتعامل معهم بشكل مباشر ومابيننا غير تحية السلام الشرعي فقط
طبعا انا والله يشهد احب اهل زوجي وبالذات عمي ابو زوجي اعتبره ابوي الثاني واحب مزحه وسواليفه ومرونته بالتعامل اكثر من زوجي وكذلك ام زوجي اتعامل معها مثل ماعامل امي واهديها مثل مااهدي امي بالضبط وشخصيتي معهم عفويه كثير لااحب اكون قدامهم رسميه او منافقه بالعكس صريحه وواضحه حتى في حياتي مع ولدهم وفي شئوون اهلي كنت اعتبرهم اهل وقرايب ولااخبي عنهم اي شي سواء زين او شين ويمكن هذه غلطتي !!
عشت معهم 3 سنين في صراعات مع ولدهم ومشاكل عويصه ودايم عمي يحاول يهدي المشاكل ويحلها ويحاول قد مايقدر يرقع عن اخطاء ولده ويقنعني باستمرارية الحياه واني اشيل من راسي فكرة الطلاق خصوصا ان زوجي متعبني باشياء كثيره ومنها استهتاره بالصلاه وعدم تحمله المسئوليه واشياء كثير....مو وقتها الحين..
للاسف على طيبة عمي وشخصيته الحلوه الا انه مشبع عياله عواطف وماديات فوق اللازم لدرجة دلعهم الماصخ وعدم استقلاليتهم وتحملهم المسئوليه ومعاناتي مع زوجي كانت الشاهد تعبت اغرس فيه الشجاعه والقددره على تحمل المسئوليه واتخاذ القرارات الله يسامحهم بس
بعد الثلاث السنين هذه صارت المفاجئه والصدمه اللي الى الان مش مستوعبتها ومصدومه كثير كثير
تزوج حماي الصغير من بنت جماعتهم وبينهم كلام واتفاق طبعا من قبل حتى انا اتزوج وطبعا عايلة البنت هذي معروفين بالقوه والسيطره على الازواج ومن هالحكي ..انا قررت اتعامل مع السلفه الجديده كأخت لي ويشهد الله هذه نيتي لاني افتقد وجود الاخوات بحياتي انا وحيده بين اخواني الذكور...المهم تعاملت مع اهل زوجي مثل وحده من بناتهم وقفت معهم بحفله الزواج من الى وتركت حركات الغيره اللي بين السلايف والبنات عارفينها وطبعا اهديت سلفتي هديه نويت اكسبها اخت وابدأ معها بالمعروف ..بعد الزواج بفتره ماانكر البنت صارت تعتبرني صديقه مقربه لها وتكلمني وصار بينا اتصالات وكذا وكانت لما تجي بيت اهل زوجي تقعد معي وتسهر معي وندق حنك كعادة النسوان ...وانا فرحت بعلاقتها لانه ماعندي اخوات وبرضه ماعندي احد اتسلى معه من خوات زوجي لانهم يتجنبوني وكلامهم بالعدد وانا بعد ماحبيت افرض نفسي بالقوه عليهم واكتفيت معهم بالسلام ودايم جلستي مع ام زوجي بس برضه الوحده تمل تبي بنت من جيلها وعقليتها ومو كل سالفه تنقال يعني مع ام الزوج واكيد فاهميني

المهم في وحده من الاجازات القصيره قررنا نقعد في بيت اهل زوجي وبرضه جات سلفتي وحماي وقضينا ايام حلوه بس انا ماكنت ملاحظه تصرفات عمتي ونظراتها ودايم احاول اتغاضي عن المقارنات خصوصا انهم اهتموا في زواج حماي اكثر من زواجي واختاروا له شقه افخم من شقتي واثاث افخم من اثاث شقتي وطنشت وقلت اهم شي الصحه ورضى ربنا وبديت الاحظ ان عمتي ماتفارق سلفتي في اي مشوار بالرغم انه لسه ماكملت شهرين من زواجها بعكسي تماما انا ماكان احد يستجرأ يلزق لي في طلعاتي مع زوجي البنت في الحقيقه شكت لي وهديتها وقلت اصبري يمكن فتره وتعدي ويمكن لان حماي الابن المفضل عند امه وابوه مو قادرين يستوعبون فكرة الانفصال وكذا ...طبعا البنت كأي عروس لابد تصطدم بثقافات جديده وعادات وكانت تتمشكل مع حماي وتشكيلي وانا الصراحه كنت اقولها عن حياتي واسراري وكيف كانت مع زوجي ابي اخفف عنها الين يوم من الايام حثلت مشكله كبيره مره بيني وبين زوجي والبنت من سوء حظي كانت تراسلني ع جوالي وتشكي من حماي وبصراحه انفعلت وانا خلقه منفعله وسبيت في زوجي وفي حماي وفي عمي وقلت هو اللي مدلعهم ومخلينهم معتمدين عليه طبعا زوجي ماصدق شافني ساكته ومسك الجوال وقراه وكحجه يلقها علي ضدي عند اهله ماصدق خبر راج وفرج اهل البيت كلهم على كلامي لانه من اول متضايق من تفضيل اهله لي وحبهم لي ودايم يوقفون بصفي وقت مشاكلنا ..وبرضه دخل عمي وهدانا وحل المشكله وقال اللي يتكلم يتكلم مايهمنا ياولدي وطلع ولاصار اي شي بالعكس من اليوم الثاني استمرت العلاقه ويكلموني عادي بالرغم اني اعتذرت بمسج لحماي ولكن اكتشفت انه منع سلفتي مني وقال اقطعي علاقتك فيها وهنا انصدمت كثير وحزنت برضه يعني ماصدقت القى من يسليني ويصير كذا؟؟ كرهت زوجي لانه هو سبب المشكله وظهورها خارح غرفتنا وكرهت الوضع ولاقدرت اتقبل الموضوع وكلمت عمتي واعتذرت واعطتني من الكلام الرخيص وعمي اعتذر له واشرحله وابرر له موقفي واسبابي وقت المشكله وعادي مو مهتم بالسالفه وبنفس الوقت انا مستغربه كيف الام والاب ساكتين وراضين بقرار القطيعه هذه وووجلست في حيره شهر كامل والبنت مازالت تواصلني بالخفى ومن ارقام غريبه وانا كنت خايفه تصير لها مشكله ونصحوني زميلاتي ابتعد عنها بس كنت احبها وماودي تنقطع علاقتنا واتفقت معي نتقابل في مركز نسائي وبالفعل وافقت وبهذاك اليوم صارت الاكشنات كلها اللي ماكانت في الحسبان راحت البنت قبلي ووصلت انا بعدها ونسيت ان حماي مايخبي شي على امه واكيد بيعلمها وين راحت زوجته وحتى هي مدري كيف غفلت عن هذا الامر بالرغم انها اتصلت علي قبل نتقابل وقالت ان عمتي ناشبه بتروح معها فاضطرت تعطيها كذبه عشان تروح لوحدها المهم مامدانا نتقابل ربع ساع هوانا كمان كنت مواعده صاحباتي يجوون الا طبت علينا حرمة متغطيه ويوم وصلت طاولتنا كشفت وجهها وكانت الصدمه انها عمتي!!!!! انا انصدمت وعلى طول ناظرت سلفتي لاني شكيت فيها لقيتها برضه منفجله عيونها حاولت ابين لعمتي ان الموضوع عادي واستقبلتها وعزمتها تتقهوى ورفضت وقلت لها صاحباتي بيجوون وهي ميته من القهر ووجهها احمر وباين انها تغلى طبعا سلفتي استاذنت لدورة المياه وانا سويت نفسي طبيعيه وعادي بالعكس ماشوف في الموضوع غلط ولاني جالسه مع شاب على غفله في هالوقت جت وحده من صاحباتي وسلمت عليها وعرفتها بعمتي وللاسف كلمتها بطريقه كان البنت كذابه وماهي مصدقتني او مصدقتها !!!! غمزت للبنت تمشي الموقف وبعدين افهمها شوي قالت عمتي وين فلانه تقصد سلفتي ويوم جات قالت يله فلان برى اللى هو حماي!!مع انها قالت لسلفتي انا جابني فلان حماي الثاني؟؟
سحبتها وراحوا وانا جلست محتاره هل هو موقف صدفه هل هم الثنتين متفقات عجزت افهم واستوعب يالله قد ايش احترت وتعبت اعصابي ماقدرت افهم وبعد نص ساعه رحت للبيت وعلمت زوجي بالسالفه وماهتم اعتبرها سوالف حريم وكذا,,,طبعا اليوم الثاني كانت الصاعقه يوم اتصلت سلفتي وقالت لي ان حماي طلقها!!!!!انا بغيت انهب لماني مستوعبه ليش كل هذا وقالت لي انهم متحاملين علي واتهموني انا بخراب بيتها واني انا اللي سببت لها كل هذا يوم عصت زوجها وقابلتني ؟؟؟؟!!!!!!!!!!!!! لاتعليق من جد
المهم سلفتي كبرت الموضوع وكلمت اهلها وعلمتهم ورفضت تدخل عمي مثل ماكان يسوي معاي وتركت لهم البيت ومن اليوم اللي بعده تجيني مسجات على جوالي من عمي فيها سب وفيها اتهامات واني انا اخرب البيوت ومدري ايش وكلام يوجع القلب وكمان يعايرني بالهدايا اللي قدمتها لهم ويعايرني بالمواقف اللي وقفها معاي ...يالله يالله ماكنت قادره استوعب وربي اللي يصير ...واللي تعبني ان زوجي ماكان له موقف بالعكس كان مبسوط ويقول لاهله عشان ماعاد توقفون بصفها يعني جتى زوجي يشمت فيني ومن يومها صارت الكلمه على لسانه في أي خلاف يصير بيننا ..وانا اتقطع جواتي من الالم ..صح اتصلت على عمي ومارد ورديت على رسايله بس فيني قهر ليش الظلم ليش يتهم بدون مايسمع مني ليش وشفيني انا عشان كل هذا يصير وعشان المنع والقطع هذا كله يصير ليه وليه وليه؟؟؟ واشش معنى زعلوا من كلامي بعد طلاقها وهم بوقت المشكله ماقالوا شي ولازعلوا ولاغيروا تعاملهم ؟؟ّ!! كثير استفهامات براسي عجزت القى لها جواب ...المهم عدت الايام وكانت سلفتي متواصله معي وانا اخفف عنها وكانت هي واهلها ماخدين الموقف تجاهي انه سخافه وانه انا مالي دخل في اللي يصير بينها وبين زوجها وهي من اول في مشاكل معه ..الين كلمتني مره وقالت انا قررت ارجع من نفسي لانها حامل وخايفه ع مستقبلها خصوصا ان حماي ماسأل فيها من وقت ماراحت ورجعت له وانبسطت وكلمتني وقالت انها مبسوطه وفرحانه وانه ماعاد بيمنعها مني وان حماي زعلان من اهله لما دخلوني في السالفه لدرجة ان عمي حذر اخوانه مني وقال تراها بتخرب حريمكم ..ّ!!!!!!!!!!!!!!!!!!!!!! يالله مااقوى هالاتهام
ماقول غير الله ينصفني عاجلا غير اجل...
طبعا السالفه مرعليها 5 شهور وانا مقاطعه اهل زوجي بس تعبت من تغير سلفتي فجأه صارت ماترد علي ولاتراسلني ومو عارفه السبب ولاعطتني سبب حتى...فقلت في نفسي يمكن خايفه تتطلق مره ثانيه او منعوها مني الله اعلم!!
ومقهوره من تصرفاتهم صارت عندهم تجي كل اسبوع ولاكانه صار شي وانا اللي برى البيت وصارت معهم في كل طلعاتهم ومشاويرهم يعني بالمختصر صارت هي الحلو هوانا الكخه والخرابه بعد 3 سنين؟؟!!!
الموضوع متعبني كثير ومو قادره اتقبل وانسى الجرح وصحيح اني اذا شفت عمتي اسلم عليها لوجه الله بس في قلبي غصه ومجروحه منهم ومقهوره ليش كذا يصير وليش يظلموني هذا الظلم وليش ماعبروا حتى اهلي ولافكروا من عطى عمي الحق يتكلم في قفاي عند اهله وليش زوجي ماله موقف واذا عاتبته قال هذول اهلي تبيني اضربهم عشانك ....اه والله العظيم اني تعبانه من هالموقف بشكل أثر في حياتي بالرغم اني حامل الحين والله محد سأل عني او قال لي مبروك وصرت افكر بالمستقبل كيف بيصير وضعي ووضع عيالي وياترى ابقى في بيتي مازورهم او اروح لهم بالمناسبات ويارتى لو شفت عمي امد يدي واسلم عليه او تجاهله ...محتاره كثير وبنفس الوقت خذلني زوجي لاني كنت متعشمه انه يحل الموقف ويواجههنا ببعض ونحل الموضوع من وقته ولايبقى كذا معلق والقلوب مليانه ...مدري كيف اتصرف بصراحه خصوصا انهم مش ناس عاديين هذول اهل زوجي يعني اجداد عيالي وصعب االغيهم من الوجود ....
اسفه ع الاطاله بس اتمنى تساعدوني برأي حكيم ...والله يفرج هم كل من يرد علي ...امين

الله يفرج عنك كل هم أختي
و يقومك بالسلامة
و أنا أقرأ الأحداث , حمدت الله أن زوجة حماك رجعت له و تعدلت حياتها
و هذا كان المفروض يعطيهم فكرة أنه لا سبب من قبلك بتخريب حياتها
و لا حول و لا قوة إلا بالله
العتب على زوجك اللي ما عرف يمسك العصا من النص
ويهدي النفوس بينك و بين أهله
,,
أعتقد أختي و الله الهادي بينكم , أنك لما تولدي بالسلامة
سيصلح الوضع , لابد أن يتواصل الأحفاد مع جدهم و جدتهم
وتكون هناك زيارة أسبوعية و مناسبات و سيزورونك في فترة وولادتك
استقبليهم جيدا , لا تتحدثي في فترة الأنقطاع أو تبرري أكثر من ذلك
فأنت اعتذرتي مسبقا و لم يخرب أي بيت , فلا داعي للحديث في هذا
و إن شاء الله يتحسن الوضع
أنت هدي نفسك و أريحي أعصابك لتولدي بنفسية مرتاحة
وركزي على سلامة جسمك و صحتك و البيبي
,,,

__________________

لا ونة عذاب ولا غيره
تفائلي بالله وأحسني الظن ولا يهمك أحد من البشر وأصلحي وضعك مع زوجك مستعينة بالله وهذا هو الأهم
فخروج زوجك بهذا الشكل وفرحه بهذه المشكلة أراه ينذر بالخطر.

حاولي التقرب من زوجك واللين معه ونصحه بالمعروف ، فإخراج مشاكلكما عند أهله لا أراه صائباً مهما كانوا الأهل طيبين خشية أن ينقلبوا يوماً ويعرفوا نقاط ضعفك وتبدأ مشكلة جديدة عميقة كعمق مشاكلك مع زوجك
والآن وقد حدث ما حدث فاحمدي الله على الضراء كما تحمدينه على السراء وبادري بالخير معهم ولا تيأسي
فرسالتك التي كتبتها تلك قوية جداً يا أختي وهي سبب كل ما أنت فيه. تركتي الجميع وانتقصتي أهم عضو في هذه العائلة، انتقدتي أسلوبه في التربية وكأنك تقولين له أنا لا أحفظ جميلك في نصرتي على ابنك. ودليل قوتها ما حدث بين حماك وزوجه، فالأم والأب خلف ابنهما مما جعله يستشيط غضباً ويطلقها.

اتهاماتهم لك باطلة ولا شك أن فيها ظلم ومبالغة في ردة الفعل وخروجهم بشكل مستغرب من قبلك على ما اعتدتي عليه من معاملة حسنة ولكن ماذا عساي أن أقول؟!
إنه طبع البشر يا أختي فحبل مودتهم قصير والأمان معهم مؤقت وكأنه درس لك عظيم لتتقربي من الذي لا يخذلك
ولا يصد عنك ولا ينقلب ضدك أو يسلبك الأمان والنعم
صدقيني إن استفدتي من هذا الدرس كان خير لك وسيكافئك سبحانه وقد يتغير الحال مع زوجك وأهله. المهم هو إحسان الظن والمبادرة المبادرة بالتقرب إلى الله.
وأهل زوجك استمري معهم بالحسنى من وقتٍ لآخر لله أولاً ثم من أجل ذريتك وسيعينك سبحانه طالما أن مقصدك الإصلاح والخير

ياحبيبتي ربي يكون في عونج
أنا مثلج علاقتي مقطوعه مع أهل زوجي للأسف..ومادري شلون أحل الوضع
في انتظار بقية الأعضاء الكرام

..اشكرك اختي على ردك الطيب ,, والان انا لي فترة مطنشه الوضع واعتبرتهم ناس مجنونه ماينشره عليهم عشان اريح اعصابي ونفسيتي خصوصا وقت حملي الان وادعي ربي انه يفرجها علي وعلى كل مسلم وانه يظهر الحق عاجل غير اجل

اشكر لك الرد الطيب ..واوضح انني ان كنت مخطئه في نظرهم فانا قد اعتذرت ومايقهرني ان الزعل لم يأتي في نفس حدوث المشكله وانما بعد شهر وقت حدوث الطلاق برغم من ان حماي قد اعترف لزوجته ولزوجي انه متضايق من ردة فعل اهله تجاهي واقحامي في طلاقهم وانه طلق لأسباب خاصه بينه وبين زوجته
والى الان انا اكن شعوور الحب لعمي ولكني مازلت مجروحه ولاانكر اني استفدت من هذا الدرس بالعكس اكثر شي اراحني هو اني تخلصت من عادة زوجي السيئه في نشر خصوصياتي لاهله واستدعاء والده في اتفه مشكله بيننا تحدث حتى لو كانت في وقت متأخر ...وكم تحدثت مع زوجي ان لايدخل اهله بيننا ولافائده وكان يحاججني وقتها لأجل ان يكون اهله على علم بكل شي حتى لايلام لو طلقني!! كنت اضحك في داخلي من هذا التفكير وادعوا الله له بالهدايه ولكن مصير الايام تثبت لكل شخص ماقدمه من خير او شر..

اختي امل اسأل الله ان يفرج همي وهمك وان يريح قلبك وقلبي..امين

خلي علاقتك مع سلفتك ، رسمية قدر المستطاااااااااااااااااااااااااااااااااااااااااع ..
هذا أهم شي ..

انصحك نصيحه لله

علقي نفسك بربك
ولاتجعلين في قلبك حب لغير الله

__________________
علـق القَلب بـ الخالق وأجعل الحُب اﻷ‌عظم له
أما البشر فـَ غداً ربما تبغض من أحببت وتحب من أبغضت
فﻶ‌ تبالغ بـ مشاعرك وﻵ‌ تعلق قلبك بهم | ♥"

شكرا لكل من دخل موضوعي وساعدني بنصيحه صادقه
اسأل الله ان يفرج همي وهم كل مسلم