طليقتي تزوجت - منتدى عالم الأسرة والمجتمع
logo

الملاحظات

المطلقات والأرامل والمتأخرات يعتني بالمطلقات والأرامل والمتأخرات عن الزواج

موضوع مغلق
قديم 06-08-2017, 01:54 PM
  #1
ساري الليييل
عضو نشيط
تاريخ التسجيل: Mar 2017
المشاركات: 184
ساري الليييل غير متصل  
طليقتي تزوجت

السلام عليكم ورحمة الله وبركاته
آسف آسف آسف عالإطاله . ولكن حبيت اطرح موضوعي ليستفيد الجميع من تجارب الحياه . فالدنيا تجارب ،الأغلبيه من الأعضاء والمشرفين يتذكرون موضوعي الأول وهو بعنوان زوجتي تبغى الطلاق ، وموضوعي الثاني زوجتي بعد الطلاق ، واعطيتها طلقه واحده يمكن تندم وترجع ولازالت رافضه الرجوع لأسباب مشاكل عاديه وتافهه وهذا الحين هو موضوعي الجديد والأخير بعنوان(زوجتي بعد الطلاق تزوجت) ، الموضوع ومافيه حاولت وحاولو اقاربي وحاولو جميع اسرتها ان يرجعو لي طليقتي قبل طلاقها
اولاً/ على شان ولدي عم ١١ سنه وطالع رابع ابتدائي وبنتي طالعه اول ابتدائي عمرها٦سنوات وبنتي طالعه للروضه الأهليه قبل اول ابتدائي وعمرها ٥ سنوات والمهم الطليقه رافضه الرجوع بحجة مشاكل تافهه وعلى كلامها لأهلها ولأهلي اني قلت عدد مرات اثناء المشاكل قلت لها انتي اخس الحريم وبعض امزح معاها اني بتزوج عليك ومااقوله عند المشاكل . واني قلت لها ساعديني فقط بإيجار الشقه وهي تقول لأهلها طليقي يقول ادفعي معاي الايجار . انا ماجبرتها ... انا قلت ساعديني . لاني انا من شجعها ان تواصل الجامعه انتساب . وهي تخرجت من الجامعه
وأنا طلعت لها تمويل ٦٠٠٠٠ ووقفت معاها وبدأت مشروعها ولكن هي اللي تقسط للشركه
ونجح المشروع . والايجار قايلها ادفعي فقط الف ريال لاني مستأجر الشقه ب١٣٠٠ وساعديني . ورفضت . شقتي اللي مستاجره رغم تواضع الشقه ماشاء الله رووعه بالنظافه والفرش والاثاث وماعمري قصرت بالبيت ولاعمري قصرت على اولادي . انما من بداية زواجنا حتى طلاقها ماعمري اعطيتها مصروف شهري . انما اذا طلبت حاجه اعطيها في الاعياد رغم الظروف اعطيها ٢٠٠٠ ملابس العيد وهذا من غير مصاريف اولادي . بداية المشكله قبل سبع شهور هي عدد مرات قالت غير غرفة النوم صارت قديمه اكثر من خمس سنوات قلت الحين ماعندي امهليني ٤ شهور قبل رمضان وابشري لان جمعيتي ٢٠٠٠ بتنتهي . والحين مااقدر عندي جمعيه وعندي ايجار وقسط سياره وراتبي مضغوط . مع العلم هي صار لها سنه تكلمني في تغيير الغرفه . وانا قايلها اصبري الظروف تحكم . وألحت علي . قلت والله ماااااقدر بعد اربع شهور وابشري . طبعاً قبلها باسبوعين لما يصير سوء تفاهم بيني وبينها تقول ترى لي شهرين في قرار براسي ابعد عني احسن لك قبل ماانفذ قراري. وماكنت اعطي لها بال . المهم بعدها الحّت علي بتغيير غرفة النوم . قالت طلقني ولي شهرين وأنا افكر في الطلاق . ولكن اقول لنفسي يابنت الناس لعل الظروف تتعدل . لكن الى متى بظروفك . قلت الناس كلهم عليهم ضروف . والحياه صارت صعبه
وزادت المشكله وقالت انت ماعندك كرامه طلقني . قلت ابشرك عندي كرامه . لكن انتي لو عندك كرامه ماجلستي قدامي . قالت طلقني . قلت ماعندي طلاق . قالت بتغير غرفة النوم ولا لا . قلت بعد اربع شهور وكلمتي ماتنكسر . وأخذت اغراضها واتصلت بالسواق حق اهلها وقالت تعال خذني وودني عند اهلي ومع العلم المسافه ربع ساعه . وحاولت اثني رأيها قالت والله مااجلس بروح عند اهلي . قلت يابنت الناس كلها ٤ شهور وابشري بشتري لك غرفة النوم ولاتهدمين بيتك بالطلاق ورانا اطفال . راحت عند اهلها . وبعد مرور خمس ايام . انا رحت لأبوها وقال ابوها بنتي تشتكي منك وماغيرت غرفة النوم وأنت ماتعطيها مصروفها في رمضان عشان ملابس العيد . قلت بالنسبه لملابس العيد انا رغم الظروف كنت اعطيها بالسنوات الماضيه . والحين هي عندها مشروع والدنيا مساعده يعني تقدر تشتري لنفسها . وأنا اعرف بأن النفقه واجبه على الزواج ولو راتبها ٦٠٠٠٠ . النفقه واجبه من الزوج . قال بنتي تشتكي من لسانك . قلت الخطأ يحصل وابشر ماراح يتكرر الخطأ ، وأبوها رجّعها عندي وقال ابوها ضبط وضعك يارحيمي وغير الغرفه . ورجعت البيت وبنفس الليله . قالت تعال نتفاهم . قالت وهي تبكي انا ابغى الطلاق . وقالت اقسم بالله ماابغى اضلمك ولاابغى اعيش معاك وأضلمك . انت طلعت من قلبي . احاول اسامحك وماقدرت . خلاص القلب طاب . وجالس اهدّيها وتعوذي من الشيطان وهي تبكي وقالت كأنه باب مقفل بقلبي . انا تحملت ضروفك سنين طويله وأنا صبرت عليك وتحملت وتحملت وتحملت وتحملت وأصبحت في تراكمات بقلبي وكلها بسببك . طلقني . وهي تبكي ، قالت اقسم بالله كأنه باب مقفل بقلبي
وبعد مرور اسبوع . انا اجيها بالطيب . واداريها بقدر المستطاع لعيون اولادي واراضيها . قالت والله ثم ووالله كأنه باب مقفل بقلبي . وكلامك هذا اللي تراضيني فيه كأنك تدق في صخره . خلاص ابغى الطلاق . خلاص هذي تراكمات تجمعت بقلبي . معاد اقدر اتحمل . وهي تبكي . وراحت عند اهلها
وكلموها اهلها وهي تبكي بكاء ودموع تذرف . لدرجة قبل طلاقها ارسلت لها صورها وهي بحاله يرثى لها وعيونها دموع . تقول ابغى ارجعلك لكن كأنه باب مقفل بقلبي وماابغى ارجعلك واضلمك . لكن نفسي ارجع لكن مااقدر. وقالت لأهلها والله لو تقطعوني مارجعت له . وجميع اسرتها لاموها بأن المشاكل في كل بيت . وكيف تهدمين بيتك واطفالك بالطلاق لأسباب تافهه . قالت خلاص ابغى الطلاق منه وأنا كرهته وكرهت شقتع وكرهت الطريق اللي من المشروع حقي لشقته. ومع العلم اقاربي قالو يمكن عندها عين او سحر بسبب مشروعها الناجح . قلت ياناس هذي ام عيالي . انا اعرف معدنها . متزوجين عشر سنين كانت تموت فيني وماعمري سمعت منها كلمه مو حلوه . لكن على قولها عشان انا قلت لها انتي اخس الحرين او انا بتزوج عليك عن طريق المزح او عشان انا مااصرف عليها . هي تبغى الطلاق؟
هذا دلع . وطلاق ماعندي . المهم بعد فشلت جميع المحاولات وهي عند اهلها . قلت باخذك وعلى شيخ يقرأ عليك عشان اتأكد ومااضلمك . وان طلعتي مريضه وتشافيت من العين او غيره . فخير وبركه . وان ماطلع فيك شي فأبشري بطلقك . وقالت انا ماني مريضه وجالسه تذكر لي السلبيات التافهه . ورفضت تروح عند شيخ . وبعد اكثر من محاوله مني وافقت . واخذتها من بيت ابوها وعلى الشيخ
وطلعت معاي السياره قالت سلام عليكم . قلت عليكم السلام . ولاعاد تكلمنا ابد . حتى تعدينا مسافة ١٤٠كيلو ووصلنا للشيخ وقرأ عليها واعطانا لها علاج وقال تعالو بعد ١٠ ايام .والشيخ يقول عندها حسد . ونزلنا من عند الشيخ فوالله والذي بسط الأرض ورفع السماء تغيرت للأفضل وماكأن فيها شي ابد واخذنا قهوه وسواليف وضحك بالطريق وعلى انني فهمت منها انها مريضه وقلبي حن لها وقدّرت وضعها المرضي . وصارت امها تعطيها العلاج وانقلب وضعها زي اول كارهتني وتبغى الطلاق . وبعد اربع ايام اتصلت بالشيخ وقلت وضعها اصبح اسوأ وقال جيبها . وطبعاً ابوها بالذات مو مقتنع انها مريضه وقال بنتي وأنا اعرفها ماهي مريضه وهي تبغى الطلاق ووصلتها عند الشيخ ومعاي ابوها . وإحنا ماشين بالطريق كلامها مع ابوها فقط . ومابيني وبينها اي كلام . وأثنا اثناء الطريق وإحنا ماشين . أنا قررت قرارين ومافيها رجعه ابد هالقرارين . اولاً/ ان طلعت مريضه فمستحيل اتخلى عنها وماراح اطلقها لانها مريضه ، وإن قرأ عليها وماطلع فيها شي . راح اطلقها . والشيخ قبل القراءه جالس ينصحها وقالت ياشيخ لاتتعب نفسك بالقراءه انا ماني مريضه وماراح ارجعله وابغى الطلاق لانه قال لي كذا وكذا وجالسه تذكر سلبيات تافهه وغير مقنعه ان توصِّل نفسها للطلاق . قلت يابنت الناس . انا ماني حق حريم واخاف الله ومااترك الصلاه ولاني حق مخدرات اوغيره . وحتى دخان انا ماادخن . ولاني خاين . ولاعمرك كشفت معاي بحوالي او اشفتي مني مايرضى الله ورسوله . وجالسه تعيد نفس السلبيات التافهه . والشيخ قرأ عليها ومااااطلع فيها شي . ونزلنا من عند الشيخ ووصلتهم بيتهم وبعد اسبوع قررت اعطيها طلقه واحده فقط .ورحت المحكمه واعطيتها طلقه واحده وهدفي انه لعل الجنان اللي برآسها يروح وتندم وترجع . واثناء العِدّه اهلها حاولو وحاولو ورافضه الرجوع . لانها تعتبر زوجه رجعيه . وانتهت العده . واخوها الكبير كلم زميله بالعمل بخصوص ان يتزوج اخته . لان زميل اخوها مطلَّق وعنده خمس اطفال هههههه استغفرالله وأتوب اليه . المهم تقدم لخطبتها واشترطت عليه ان طليقتي تآخذ اطفالها معاها . فوافق . وقبل اسبوع سمعت انها تزوجت . ورحت كالعاده اسلم على اولادي عند اهلها . وجاء ابوها وسلم علي وقال لي . ياابو ؟ ترى الحرمه تزوجت واشترطنا على زوجها ان بنتنا بتآخذ اولادها معاها فوافق . قلت له . خلاص الله يستر عليها . تقهوى معانا . قلت الله يستر عليكم . والله والله والذي بسط الأرض ورفع السماء ان بهذيك اللحظه طاحت من عيني وقلبي وكأنها كاسه انكسرت . لاني عدد مرات قبل طلاقها وبعد طلاقها بالذات قلت لها مستحيل اكرهك وماتطيحين من عيني وقلبي إلّا إذا تزوجتي . فوالله العظيم انها طاحت من عيني وقلبي . وسبحان الله لعلها خيره لي . ولعله شر والله صرفه عني . لأنها اقدار مكتوبه ، نهاية كلامي
انا الحين كرهتها كره العمى ونزلت من عيني وقلبي وماني زعلان ابد ، وقررت بعد سنه
إن شاء الله بتزوج . ومع العلم خواتي لقو لي مديرة مدرسه . ولقو لي معلمه . ولقو لي موظفه رسميه اداريه . وقلت لأخواتي وأنا اضحك . لااااا أحد يكلمني في الزواج إلّا بعد سنه إن شاء الله . ابغى ارتاح . وبالرغم انا كرهتها وقلبي معاد يحن لها . صح اتذكر الذكريات الحلوه اللي كانت بيننا . وأتذكر عشرة العمر وهي ١٠ سنوات . لكن انا اللي الحين كرهتها وأكره سيرتها . فما هو من المعقول اتزوج على طول . حرام اضلم الجديده ونفسيتي مااستقرت . ابغى سنه وهي كافيه ان اخرجها من حياتي . ومع العلم نفس انا احرقت صور الملكه وصور الزواج وغيرت شقتي لشقه جديده وساكن عزوبي . وحذفت صورها من جوالي ورسايلها وكل شي يذكرني فيها . وانتقلت لشقتي الجديده وماعندي شي يذكرني فيها ابد . فالحمدلله لعله شر والله صرفه عني . انا مااخفيكم نفسيتي تأثرت شوي . والحمدلله ماتحطمت نفسياً بزواجها . تدرون ليش ؟ لأن من فضل الله سبحانه هي طاحت من عيني وقلبي ومعاد لي قيمه في قلبي . وبعد سنه إن شاء الله راح اتزوج صاحبة الدين والجمال وتكون موظفه . هذا هو شرطي . فالدنيا تجارب . والزوجه لاخير فيها إن ماوقفت مع زوجها على الحلوه والمُرّه . فالحمدلله على كل حال
وأقسم بالله ان بنسبة ٨٠ في الميه ارتحت نفسياً بعد ان أكد لي ابوها انها تزوجت . لعله شر والله صرفه عني . وأنا راضي بما كتبه الله لي . فالحمدلله على كل حال

ملاحظه/لاأعلم متى انخطبت ، وعدتها انتهت وبعد شهر من إنتهاء العِدّه تزوجت . واللي حاب اضيفه . قبل زواجها بخمس ايام فكت عني الحضر من الواتس . وأنا استغربت وهي لها اكثر من شهرين حاضرتني من الواتس . وكلمت بنت اختي وأنا خالها وأستشرتها ان طليقتي فكت عني الحضر ايش الموضوع؟
قالت مدري يمكن تبغاك تراسلها وهي ندمانه وتكابر . قلت مستحيل اراسلها . وبعد مرور ٥ ايام وهي شايله عني الحضر . اختي اللي خطبتها لي قبل ١٠ سنوات اتصلت بها تعزمها لزواج ولد اختي . قالت الله يستر عليكم . واختي نصحتها ان ترجع وقالت والله مستحيل ارجع وجالسه تذكر السلبيات وقال طليقتي لأختي بأن زواجها بعد بكره
ملاحظه اخرى/في ذمتي انها انسانه تخاف الله وتصلي ومحافظه . والناس اللي من ديرتي بعد سمعت بموضوعها وبالذات موضوع زواجها . قالو كيف هي تطلب الطلاق وبعد ان انتهت العِدّه تزوجت . معناة اللي تزوجها يعرفها من اول ويعني الناس فهمو انها خاينه وتحب هذا اللي تزوجها والله المستعان . مايدرون الناس ان اخوها الكبير هو اللي عرض عليه الزواج

ومايدرون ان هذا يعتبر قذف في شرفها واللي يتهمها في شرفها هو ظالم لنفسه
ومايدرون ان قذف المحصنات الغافلات من كبائر الذنوب وهي من السبع الموبقات
والله المستعان . يقولو اللي يقولو
الله هو اللي يحاسبهم .
نهاية كلامي/ بعد زواجها بيومين سوت لي حضر بالواتس . فأنا كان عندي حب فضول ان مااحذف رقمها إلا بعد اسبوع بالذات . ابغى اشوف ايش حطت بالواتس ومادام انها شايله عني الحضر . وبالرغم ورب القرآن انها خلاص طاحت من عيني وقلبي وخلاص شيئ انتهى ومعاد تعني لي شيئ . فبعد ان سوت لي حضر . انا حذفت رقمها . وجالس اقول لنفسي . هي اصلاً معاد لي قيمه بقلبي وكرهتها . يعني جات على رقم جوالها . فحذفت رقمها . والحمدلله . معاد شيئ ابد ابد ابد يذكرني فيها . تخلصت من كل شيئ يذكرني فيها . فورب القرآن اني ارتحت نفسياً بنسبة ٨٠ بالميه تقريباً وكرهتها كره العمى

وأنا بعد سنه إن شاء الله بتزوج
والدنيا ماتوقف على شانها ، عطوني نصائحكم وتوجيهاتكم . فأنا قررت وبدون رجعه ماراح اتزوج إلّا بعد سنه وبدون جِدال وايضاً فرصه ان اخرجها من حياتي بالكااااااااامل
اعطوني نصائحكم وتوجيهاتكم . وأعطوني ايضاً بخبراتكم ايش تتوقعون انها رافضه الرجوع قبل زواجها . خذو راحتكم بالردود بمايرضي الله
فهي تظل محل إهتمام وتقدير ووسام على صدري .



تم تعديل العنوان ليتناسب مع المضمون

رابط الموضوع السابق



http://66n.com/forums/showthread.php?t=272716

التعديل الأخير تم بواسطة ويبقى الحنين ; 06-08-2017 الساعة 04:25 PM
قديم 06-08-2017, 02:05 PM
  #2
-مسك الليل-
المشرف الذهبي
 الصورة الرمزية -مسك الليل-
تاريخ التسجيل: Jun 2016
المشاركات: 2,661
-مسك الليل- غير متصل  
رد: زوجتي بعد الطلاق/تزوجت

قلت لك من قبل انت بريئ وعلى نياتك.. مادام تزوجت الله يهنيها ولا تتعب نفسك في البحث كيف تم الزواج بتتعب وبس وزواجها خيرة لك حتى تقدر تطوي الصفحة وتطلعها من قلبك.

الله يعوضك..
__________________
{قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ}

صدق الله العظيم
قديم 06-08-2017, 02:57 PM
  #3
تباااشير
عضو نشيط
تاريخ التسجيل: Jun 2016
المشاركات: 121
تباااشير غير متصل  
رد: زوجتي بعد الطلاق/تزوجت

الله يبرد على قلبك بالصالح اللي تملئ عليك حياتك

بالعكس انت ماقصرت دعمتها بمشروعها وساندتها
واهديتها اجمل هديه بالعمر الامومه
انت ماتركتها بقايا حطام

وانت انسان رائع الل قاعدت تنزها عن الكلام اللي ينقال
اسمحلي امثالك قليل

بالنسبه لزواجها عقب العده عطول انا انخطبت من ثاني يوم من طلاقي
واللي تخطب تقول اطلعي من العده وتملكي وحريهم
انا هدفي مااحر احد واقهر احد ابداً

يااخي احس كثير بالدنيا مظلومين 💔

نصيحة اخت للزواج القادم
الانثى تبغى فقط حاجتين اساسيات من الرجل

الامان ، والاهتمام اذا تزعزع هالشيين خلاص انتهت الحياة

حاول لو تاخذ دورات قبل زواجك القادم

انا ك انثى كنت متحمله ظروف طليقي والله مر شتاء بجامه شتويه ماعندي
لاني استحي اطلب وظروفه صعبه كانت تمر ليالي ماانام من البرد ومااطاب
اقول تحملي هو ظروفه صعبه
على انه يعزم ويكرم ويهدي اللي حوله بس ماابي اسبب له ضغط مادي ومعنوي
يمر العيد مااشتري الا من حسابي الخاص يعني شي معطيني اهلي
توقعت بحصل مقابل !

طلقني وذمني بالمجالس وقال فيني اشياء موفيني حسب اللي سمعته وهو انكره لكن حسبنا الله ونعم الوكيل
قديم 06-08-2017, 03:01 PM
  #4
المتواضع305
قلم وفي
 الصورة الرمزية المتواضع305
تاريخ التسجيل: May 2008
المشاركات: 1,191
المتواضع305 غير متصل  
رد: زوجتي بعد الطلاق/تزوجت

المهم ياخوي عيالك ماهم ايتام يكد عليهم زوج طليقتك بناتك شعره من شعر وجهك اخذهم عندك
وانت احق بهم من امهم اذا تزوجت ...
__________________
رَبِّ أَعِنِّي وَلَا تُعِنْ عَلَيَّ، وَانْصُرْنِي وَلَا تَنْصُرْ عَلَيَّ، وَامْكُرْ لِي وَلَا تَمْكُرْ عَلَيَّ، وَاهْدِنِي وَيَسِّرِ الهُدَى إِلَيَّ، وَانْصُرْنِي عَلَى مَنْ بَغَى عَلَيَّ، رَبِّ اجْعَلْنِي لَكَ شَكَّارًا، لَكَ ذَكَّارًا، لَكَ رَهَّابًا، لَكَ مِطْوَاعًا، إِلَيْكَ مُخْبِتًا قَلْبِي
قديم 06-08-2017, 03:03 PM
  #5
ساري الليييل
عضو نشيط
تاريخ التسجيل: Mar 2017
المشاركات: 184
ساري الليييل غير متصل  
رد: زوجتي بعد الطلاق/تزوجت

اقتباس:
المشاركة الأصلية كتبت بواسطة تباااشير مشاهدة المشاركة

طلقني وذمني بالمجالس وقال فيني اشياء موفيني حسب اللي سمعته وهو انكره لكن حسبنا الله ونعم الوكيل

الحمدلله على كل حال
بالنسبه لي . الشاهدالله سبحانه اني مااذكرها إلّا بالخير . صحيح كرهتها كره
ولكن ماهي علومي اسب فيها . هي تزوجت والله يستر عليها
قديم 06-08-2017, 03:12 PM
  #6
ساري الليييل
عضو نشيط
تاريخ التسجيل: Mar 2017
المشاركات: 184
ساري الليييل غير متصل  
رد: زوجتي بعد الطلاق/تزوجت

اقتباس:
المشاركة الأصلية كتبت بواسطة المتواضع305 مشاهدة المشاركة
المهم ياخوي عيالك ماهم ايتام يكد عليهم زوج طليقتك بناتك شعره من شعر وجهك اخذهم عندك
وانت احق بهم من امهم اذا تزوجت ...
ماأقدر آخذهم ياأخي . هم صغار ومالهم إلّا امهم . ومصروفهم يمشي شهرياً ١٥٠٠ ، اقدر اخذ بناتي إذا وصلو ١٣ سنه . والحين مااقدر . حتى وإن أنا تزوجت . مااقدر . لانهم صغار . وأنا الحين ساكن عزوبي . ووراي دوام . وكيف اتركهم في الشقه وهم صغار والديره اللي انا فيها مااحد يقرب لي . مالهم إلّا امهم والوالده كبييييره بالسن . واخواتي ساكنين بعيدين عني وماراح يوافقون يآخذون اطفالي . وإن وافقو انا ماراح اوافق . فحرام احرمهم من امهم . والله مو مدح لنفسي . معدني طيب . فطليقتي تمثل نفسها وأنا امثِّل نفسي
قديم 06-08-2017, 03:30 PM
  #7
الخانم
عضو نشيط
تاريخ التسجيل: Jun 2017
المشاركات: 184
الخانم غير متصل  
رد: زوجتي بعد الطلاق/تزوجت

سؤال معليش وان كان ماضي

ايش كنت تتوقع ردة فعل طليقتك لما كنت تقول لها انتي اخس الحريم وبتزوج عليكي ؟

ايش تتوقع غير ان قلبها يقفل ؟!

يعني لو الزوجة قالت لزوجها كذا والله مايغفر لها وبيقول كسرتني وبيتعالج نفسيا والناس كللها بتوقف ضدها ووووو

عموما الله يستر عليك وعليها وخيره والله يوفقك يارب
قديم 06-08-2017, 03:35 PM
  #8
تباااشير
عضو نشيط
تاريخ التسجيل: Jun 2016
المشاركات: 121
تباااشير غير متصل  
رد: زوجتي بعد الطلاق/تزوجت

اقتباس:
المشاركة الأصلية كتبت بواسطة ساري الليييل مشاهدة المشاركة
ماأقدر آخذهم ياأخي . هم صغار ومالهم إلّا امهم . ومصروفهم يمشي شهرياً 1500 ، اقدر اخذ بناتي إذا وصلو 13 سنه . والحين مااقدر . حتى وإن أنا تزوجت . مااقدر . لانهم صغار . وأنا الحين ساكن عزوبي . ووراي دوام . وكيف اتركهم في الشقه وهم صغار والديره اللي انا فيها مااحد يقرب لي . مالهم إلّا امهم والوالده كبييييره بالسن . واخواتي ساكنين بعيدين عني وماراح يوافقون يآخذون اطفالي . وإن وافقو انا ماراح اوافق . فحرام احرمهم من امهم . والله مو مدح لنفسي . معدني طيب . فطليقتي تمثل نفسها وأنا امثِّل نفسي

لا انتبهه تاخذهم الام ماحد يعوض مكانها ابدا امهم اولى بتربيتهم
وبعد لو اخذتهم هذا شي بيعيق زواجك مافي وحده بتوافق تربي عيال الناس
يامربي عيال الناس ي زارع بغير ارضك

الام اولى بالحضانه واصبر واقدر
وزين انها مارمت عيالها لان ماشاءلله قلبها مبين قوي جدا
قديم 06-08-2017, 03:38 PM
  #9
ساري الليييل
عضو نشيط
تاريخ التسجيل: Mar 2017
المشاركات: 184
ساري الليييل غير متصل  
رد: زوجتي بعد الطلاق/تزوجت

اقتباس:
المشاركة الأصلية كتبت بواسطة الخانم مشاهدة المشاركة
سؤال معليش وان كان ماضي

ايش كنت تتوقع ردة فعل طليقتك لما كنت تقول لها انتي اخس الحريم وبتزوج عليكي ؟

ايش تتوقع غير ان قلبها يقفل ؟!

يعني لو الزوجة قالت لزوجها كذا والله مايغفر لها وبيقول كسرتني وبيتعالج نفسيا والناس كللها بتوقف ضدها ووووو

عموما الله يستر عليك وعليها وخيره والله يوفقك يارب

انا اعترف اني غلطت عليها . وأنا هذيك الأيام ندمت كثيييييييييير بغلطاتي عليها
وهي رفضت تغفرلي . والله يستر عليها
قديم 06-08-2017, 03:41 PM
  #10
ساري الليييل
عضو نشيط
تاريخ التسجيل: Mar 2017
المشاركات: 184
ساري الليييل غير متصل  
رد: زوجتي بعد الطلاق/تزوجت

اقتباس:
المشاركة الأصلية كتبت بواسطة تباااشير مشاهدة المشاركة
لا انتبهه تاخذهم الام ماحد يعوض مكانها ابدا امهم اولى بتربيتهم
وبعد لو اخذتهم هذا شي بيعيق زواجك مافي وحده بتوافق تربي عيال الناس
يامربي عيال الناس ي زارع بغير ارضك

الام اولى بالحضانه واصبر واقدر
وزين انها مارمت عيالها لان ماشاءلله قلبها مبين قوي جدا

نصيحتك عالعين والراس . وفعلاً الاطفال مالهم إلّا امهم
وايضاً كلامك صحيح .بأني فيما بعد لمّا اجي ابغى اتزوج ويعرفو ان الاطفال مع امهم راح توافق الزوجه الجديده . ولو كان العكس . مستحيل ترضى
موضوع مغلق

مواقع النشر

أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 03:05 PM.


images