السلام عليكم اعضاء المنتدى الكرام

انا لجأت لكم بعد الله ادور حل اسالكم بالله ساعدوني ووجهوني بصدق

انا متزوجة من متزوج لا احد يلومني ليش تزوجت متزوج لانه نصيبي وقدري وماحدني على المر الا الي امر منه ,, تعبت وتعب كل شى فيني جيت اتراجع القى البحر امامي تقدمت نار تحرقني

صارلي ست سنوات متزوجة ولا جاني عيال من كثر العلع والخوف الي عايشة مع هالادمي على طول تهديد بالطلاق بكل كبيرة وصغيرة اذا كانت لي ردة فعل لازم اكون جدا حذرة لين احس بالمر يكب باعماقي ويقطعني تقطيع

رجل غامض بكل المقايس تعبني صارحته جلست معه تكلمت معه برقي مافي فايدة يكون سعيد لاسباب انا اجهلها ويحزن ويتغير لاسباب انا بعد اجهلها كانت له علاقات في الماضي وحتى وانا متزوجته مسكت محادثات وخرابيط على النت ومشيت حالي وقلت ااذا في شى اعدله واسد النقص

مافي شى نفع وفجاة يتغير علي بدون سبب وفجاة يصير لين معي بدون سبب لاني حاسة انه في وحدة قاعدة تلعب بحسبته بمزاجه
وليته متغير علي عشان زوجته الاولى والله ما ازعل على الاقل اقول هذه حلاله صح انها ضرتي بس اتمنى يكون معها ولاهي معها ولا لاهي في بياعات الهوى

سافرنا برى السعودية وكانت له رغبة يروح دسكو وهذا شى خوفني وسالته قلت وش تبي تشوف بهالاماكن القذرة غير خمور وقلة حيا ,,قال ابي اتفرج بس!!!!

وفعلا سافر دبي على قوله عمل وبعد اللحاح مني عرفت انه دخل دسكو ويقول ماطول

امور كثيرة ماهي مريحتني يالعالم بمووت وربي دمعي على خدي لاني رغم كل البلا لازلت ابغاه على امل انه بيتغير

هالايام انا عندي اهلي مسافرة وصايرة اموره غريبة وطبعه اغرب صار قليل الكلام معى على وسيلة التواصل الخاصة بينا

ويكلمني وكنه قرفان ماله خلقي ,,لايقول احد يمكن ضغوط العمل ترى حتى الدوام يصكها نومة ولايداوم ويعقد سهران اتوقع على النت ويقول ماجاه النوم

وصارحته انه متغير علي يقول مافي شى مايرحني لا اذا سكت ولا اذا تكلمت عنده استعداد يطنش شهر واكثر

لا يقوووولي احد انه كل الرجال كذا تكفووووووون تعبت من هالكلام

لو وده يريحني ترى يعرف اشلون يرحني يكوت وغموض ماحب براحة نووووب

ست سنين ضاعت من عمري لا عيال ولا راحة ولا سعادة ولا حتى مادة بسسسسس الحمد لله على كل حال

سويت كل مابوسعي عشان يرتاح مافاد شى ,,,,,,,,,,,,,

ياخواني وياخواتي تعبت حاولت اسوي زيه واطنش مقدرت احس بنار تحرقني من داخل احس بموت بطئي يكاد يقتلني ويؤجل يومي

زوجته الاولى مطنشة ولا عليها من شى عادي عندها طلع راح جا مايهمها شى وانا الي عايشة بجحيم

اليوم بالصدفة ادق على امه واكشتف انه مو بايت في بيته الاول وراح يبات في بيتي الفجر

واليوم سبت يعني المفروض مداوم ادق مايرد واستغربت قلت وشفيه معقولة لا صحى للصلاة ولا دام

قلت ليه ماتعلمني انك راح تبات في بيتنا على الاقل اكون على بينة وين بايت

قال مو شرط وانا رحت الفجررر ليش اعلمك !!
وانا مو طفل عندك اخذ الاذن

ياربي انا مابيه يستاذن مني ,,ليش مايعلمني وانا عارفة انه ماودي اعرف انه سهران لاني اتوماتيك اربط سهره بالنت

انا مدري وش اسوي ولا كيف اتعامل معه انا مو مرتاحة واموت موت جدا بطيئ فكرت بالطلاق ماقدرت على الخطوة وجالسة افكر الان اني اخذ فرصتي بالحمل في عملية الانابيب عشان اكون اخذت فرصتي في حالة اذا صار شى لا قدر الله

انا يتيمة ومالي غيره بعد الله وهو مو مقدر هالشى حطيت فيه كل امالي بس ماهو كفو لهالمكانة

لكن اقسم بمن احل القسم ان مسكت عليه هالمرة اي محادثة مع من لا تحل له اني ماجلس معه دقيقة وان جلست الله لا يبقيني لحظة واحدة في هذه الدنيا

ياررررربي ابي ارتاح

اعتذر عن الاخطاء الاملائية اكتب وانا ارجف

امس كتبت كلام مدري اشلون طلع مني والعبرة تخنقني
ودي فيااا يحس

انا ليتني ماعشت غربة الروح
وانا ليت اللي بين عيني والرمش ولو بكلمة يبوح
حكمت الاقدار وهذاني ياسيدي صابر على كل الجروح
يمكن السعادة تدورني دوارة والفرح من اعماقي يبوح
بين السهر وبين النجم وضوء القمر احتريت منك احساس يلوح
نزل دمعي ونزف قلبي وقلبك قالي لك انت مابروح
انا الي ضعت في بحر عيونه وانا الي انحرقت جمرة وسط حشاه ’’تعال خذ عمري ابي اشم انفاسك وابي عطرك باحضاني يفوح


واللله ماني شاعرة ولا اعرف للابيات الشعرية ولا لوزنها بس شى بداخلي طلع والدمعة بيعني
كتبت له قال يسلموو

قلت تقدر على هالاحساس
قال لا
قلت اسفة فاض بي شعوري بوقت مو وقته ثقلت عليك بمشاعري اعذرني ماهو بيدي

قال لا اقدر عليه ليش ثعبان احساسك مقدر عليه !!!!!!!

انا صراحة سحبت كل كلامي وتوقف شعوري
معقولة لا جا يعبر يقول عن احساسي ثعبان
طيب يقول اسعدني شعورك حبيتي ولا حرمني الله منك مع العلم انه كان يتمنى اني احبه حبا جما

اعذورني ودي اكتب ودي افضفض ضاقت بي الارض بما رحبت

الله يفرج همك ويطمن قلبك ويريح بالك
أختي الحبيبة
الحياة علمتني ما أعلق قلبي ببشر ولا أضع آمالي في بشر
اﻷمل في الله والخير في وجه الله
اللي يعلق قلبه بالله مايضيع
لا تراقبي زوجك ولا تلاحقيه لتتأكدي هو أين وماذا يفعل
اجتهدي في التقرب إلى الله واعملي جهدك لتقوية الوازع الديني لدى زوجك
ﻷن السهر والديسكو وعلاقات النت كلها ناتجة من ضعف الوازع الديني،،
واﻹخوة هنا إن شاء الله ينصحونك.
الله يفرج همي وهمك...

اختي مكلومة الحمد لله رديتي علي
كل شوي اشيك على موضوعي ابي احد يكلمني
انا كل يوم ابكي بصلاتي وطلب من الله انه مايعذبني فيه ولا يعلق قلبي بسواه
ابكي بحرقة اسال الله ان يستجيب لي
بالنسبة للنصح دوم انصح واللم وارسل رسائل ماقصر
وانا عندي قاعدة انه الرجل لي له علاقات حتما مالشي هذا ياثر على اهل بيته

انا من اسافر لاهلي مايجلس في بيته الاول يوميا طلعات وتاخر برى وعنده درزن عيال الله يخفظهم
قلت له انا مو عندك مسافرة وين تروح معقوله ماتجلس مع اهلك وعيالك

ايش سوى عشان يربيني صار كل وقته في البيت لدرجة انه لا جيت اكلمه يقول انا في البيت البيت البيت
قال مو انتي تقولي كذا!
طيب قلت لك اهلك اولى من لي تقابلهم برى وتقعد معهم لمنتصف الليل ماقلت لك لا جيت اكلمك جوال ماترد بحجة انك في البيت

وش اقول يختي وش اعيد نفسيتي تعبانة وانا ندمانة اني اقدمت على هالخطوة لكن مؤمنة انه شي مقدر ومكتوب

مؤخرا رحت افحص ولقيت كيس ذهني بالثدي
جاني خوف وكنت احتاج لمن يحسسني بالامان ولو بكلمة وخاصا له
ضليت طول اليوم من مستشفى لمستشفى واكثر من اربع دكاترة شافوا حالتي وقالوا عادي مو خطير
وسوست على صحتي وقلت مع نفسي اذا انا ااحين بعافيتي ولا متقبلتي وش مصيري معه اذا مرضت الله يكفينا واياكم شر المرض
مارجعت البيت الا عقب المغرب وقمت دقيت عليه قلت كل اقاربي ولي يعرفوني دقوا يطمنوا علي الا انت

طول النهار ماقلت خلني اشوف هالمسكينة لعلي اهدي من روعها شوي

قال كنت في البيت ونايم طول النهار وتوي اصحى
ليش انا اذا صار عليه شي اكون معه قلبا وقالبا وادعي الله مايصير عليه شي ويخليه لاهله وعياله ولي

لانه ماعندي غيره بعد العظيم

ليش مايهتم فيني على قدر اهتمامي فيه والله لو يصير بينا جدال خفيف مستعد طول اليوم والليل يطنش ولا يسالني ويني فيه بالمقابل اني ما اساله

حتى صحبته وربعه ما اثق فيهم لانه لو مصاحب اخيار ماتكلمت

انا بئر حرمان بس الحمد لله على كل حال

حبيبتي قلبي معاك وحاسة بإحساسك
أنصحك دربي نفسك ماتحبين زوجك أكثر من نفسك
ولا تهتمي به أكثر من نفسك
ياقلبي عليك إنت تستجدين منه الحب واﻹحتواء والحنان واﻹهتمام...
أحلى شي تنشغلي بنفسك واﻹهتمام بنفسك..
اهتمي بصحتك واعتني بجمالك وببشرتك وشعرك ووو.....الخ
كل شي سويه من أجل أن تمتعي نفسك وتسعدي نفسك
قومي بكل حقوق زوجك لا تقصري فيها ولا تنتظري منه الكثير حتى لا تنصدمي بالواقع...
لا تكثري من انتقاد زوجك ولومه ومعاتبته ومحاسبته ﻷنه ينفر زوجك منك..
سيلاحظ زوجك التغيير عليك وسترين اهتمامه بك بإذن الله..
أوصيك بالدعاء ثم الدعاء ثم الدعاء سترين مفعول السحر...

طنشييييييييه بيركض وراج

هالكلمة كل الناس قالوها لي ولا عرفتها الا لما طبقتها

او بالاحرى ربي هو اللي دبرلي وخلاني اطبقها

اذا قلتيله اي كلام حطي في بالج اسوا الاحتمالات مو احسنها

عشان اذا صار السيء الا انتي متهيأته له نفسيا واذا صار الاحسن فبها ونعمت

__________________
لا اله الا انت سبحانك اني كنت من الظالمين

ياالله خنقتني العبره
عسى ربي يفرج همك حبيبتي ويبرد على قلبك

__________________
《اللهم استودعتك أطفالي الذي لا تضيع ودائعه》

الله يجزاك الجنة اختي مكلومة
حياتي ربطتها فيه بكل شى معرف حتى اتقهوى بمزاج وهو مو معي حسبي على الظروف
وفي نفس الوقت ماهو بالشى السهل اني اشيله من تفكيري بوقت قصير
انا راح اصلح عملية الانابيب اذا ربي اراد لي ونجحت فالله من علي بفضله ورزقني بطفل يملى علي حياتي
اذا الله ماراد الحمد لله على كل حال ووقتها لكل حادث حديث
لاني قررت ماراح اتزوج في حالة لا قدر الله صار طلاق عشان كذا ودي اخذ اخر فرصة
لكن ياختي والله المر الي اذوقه بحركاته يقهرني ولا اتوقع اني راح اطول على هالوضع لانه ممكن تكون الضحية صحتي في الاخير ماهو بنافعني
الله يسعدك رديتي كل شوي اشيك احس ودي اكلم ناس ودي اطلع كل الي بخاطري مشتتة وتعبانة نفسيتي