المشاركة الأصلية كتبت بواسطة donss2004

وعلى سيرة المشاريع انا عندي مشروع صغير مع واحد من اصحابي وهوا اننا بنجيب فحمات الفرامل تبع سيارات اللكزس والتايوتا واغلب الشركات الاخرى لانو الفحمات الي بيبيعها الوكيل عبدالطيف جميل سيئة للغاية وما تعيش وتعمل سواد على الجنوط وتسبب رجة على السرعات العالية واحيانا صفير عند الاستخدام والاهم من داه كله انو عمرها الافتراضي قليل جدا

يعني انا احد الزبائن جاني مرة عنده لكزس ls 460l موديل 2012 يحلف انه ماسار له شهرين مغير الفحمات وطلعت صوت وكربون على الجنوط الرجال كان جدا مستاء من سيارته لكن ما الومه اهم شئ في السيارة الفرامل يعني بالله تخيلو لاي درجة من النصب وصلنا في السعودية الوكيل بيبيع سيارة قيمة فوق 350 الف ريال وفحماتها غصب عنك تغيرها كل شهرين عشان يكسب الوكيل !!!!!!!!!!

عموما احنا الفحمات الي نوردها شركة امريكة ولها اربع مصانع في العالم مصنع في الصين ومصنع في كوريا ومصنع في امريكا ومصنع في تايلند لكن خامات التصنيع امركية بحته وهي سيراميك مخلوط مع ربل بنسبة 80% سيراميك 20% ربل عشان تكون ناعمة على هوبات الوكالة وما تسبب خدوش او صفير واختلاف المصانع ما هوا الا توسع فقط لا غير للشركة نفسها

مميزات فحماتنا هي عمر اطول من فحمات الوكالة بثلاث اضعاف وعدم وجود كربون على الجنوط نهائي نتيجة احتكاك الربل مع الحديد وعدم وجود صفير او رجة وغيره من الاصوات والاهم من ذلك انو فرملتها اقوى من فرملة الوكالة واسعارنا رمزية غالبا ما تكون ارخص من سعر طقم الفحمات في الوكالة الا بعض الموديلات لان خامة السيرميك تكون مكلفة اكثر من قيمة الفحمات باكسسواراتها .

والحمد لله ماشين في الموضوع بنبيع حبة حبة الى ان يرزقنا الله ونفتح محل مع ورشة بحيث تكون بضاعتنا عليها ضمان غير باقي الوكالات الي ما يعطوا ضمان على القطع الاستهلاكية

والحمد لله الدخل الي بيجيني منها خير وبركة بيفك زنقة على قولهم

ونستفيد من خبراتكم في المشاريع ,,,

المشاركة الأصلية كتبت بواسطة المتفائل بالله

الله يوفقك يارب والله فكرة طيبة لكن لابد ان تكون عندك حملة اعلانية على مستوى منطقتك
فيه الآن في كل منطقة جوال "المنطقة" خاص بالاعلانات انصحك تعلنون فيه ..

وكذلك لاتنسى مواقع التواصل الاجتماعي خصوصاً اللي تهتم بأمور السيارات
وكذلك حمل موقع دوبيزل في الايفون والسامسونج بيخدمك في الدعاية وهو مجاني

وعندي لك اقتراح كذلك بما انك تحب تشتغل في امور السيارات

شركات زيوت المحركات كثيرة وذات جودة عالية ولكنها ماعندها شهرة خصوصاً الشركات الألمانية
ليه ما تشتغلون كذلك بزيوت المحركات بحيث تكونون انتم الوكيل لها ف السعودية ..

ولما تفتحون ورشة يصير جزء منها لتبديل الزيوت!!

ولاتنسى بعد البطاريات!! ترا الامور الاستهلاكية شغالة 100%

الله يوفقك يارب ...

المشاركة الأصلية كتبت بواسطة donss2004

والله يا غالي بخصوص اننا نمسك وكالة كاملة في المملكة صعب يبغالها راس مال عالي واحنا حاولنا اننا نمسك وكالة الشركة الي نطلب منها فحماتنا لكن قالو لنا اقل شئ تطلبو مننا 500 طقم بمبلغ ما يقارب 300 الف ريالاو اقل مش فاكر بالزبط فكنسلنا الفكرة وسرنا نشتري منهم بالجملة ونبيع فرادي اما بخصوص الزيوت هي فكرة حلوة لكن اتوقع انو استهلاكيتها مش مثل الكفرات ومافي عامل حافز للشعب انهم يبحثو عن بديل لانو الزيوت ما منها مشكلة مثل الفحمات ولو جيت في الحقيقة ترا مصائب قوم عن قوم فوائد يعني لو مو انها فحمات عبداللطيف جميل تعبانة ما كان احنا بعنا فحمات سيراميك مثلا سيارات الهوندا ما جاني زبائن قط لانو فحمات الوكالة ممتازة فالمستهلك ما يحتاج بديل احنا بس الله يخلي لنا عبداللطيف جميل

وعلى سيرة الاعلانات بالجوال هل هذة مجانا ولا بفلوس

انا حاليا معلن في مواقع التواصل الاجتماعي ومعلن في موقع حراج ومواقع البيع والشراء بس احس انه مو كفاية وحاولت اني اعلن في جريدة الوسيلة لكن اعلاناتها جدا غالية وما تخارجنا صراحة

والله يرزقنا وياك ,,,