.
.
.




اول قطعة لتتحلوا فيها قبل ما نبدأ بالوصفة

يسعدلي مساكن يا جميلات

متل ما خبرتكن قبلي الاخت العزيزة مؤيدة انها حلو ايطالي ومشهور باوروبا وبكل العالم ومحبوب من الجميع
واهم شي خفيف عالمعدة وطعمة السكر ما كتير قوية
وصار في تفنن وانواع كتير من التيراميسو ليناسب جميع الاذواق
بس هيدي بتبقى الوصفة الاساسية التقليدية للتيراميسو بايطاليا

بس لازم ننتبه اذا كنا باوروبا او اي بلد اجنبي وطلبناها من المطعم نسأل اذا فيها كحول لانو الاكثر بحطلها الروم وكمان بالسوبرماركت الجاهزة بتحتوي على كحول
هيدي الوصفة اتعلمتها من زوجة خال زوجي
زوجته ايطالية يعني بنت البلد
واول مرة اكلتها كنت بايطاليا وبشهر العسل وعزمونا اهل زوجة خال زوجي
يعني لازم تعرفوا انو لهالاكلة مرتبطة بذكرى جميلة بحياتي








اول شي متل ما شايفين بالصورة ما بدها كتير اغراض وبنفس الوقت سريعة التحضير


-باكيت اصابع البسكويت المحلى عبارة عنن 30قطعة (وهلئ موجود منو بالدول العربية)

-500غرام ماسكربوني (وهيدي اساسية للتيراميسو وهيي عبارة عن جبن كريمي مخصص للحلو مصنوع من الحليب والكريم وما فيه لا سكر ولا ملح وطعمته كريم يعني ما بيشبه اي نوع جبن وكمان صار في منو بالدول العربية )

-نصف ليتر كريم فريش (واللي بحب يقلل فيه يحط كوب)

-ظرف فانيل

-اربع ملاعق طعام سكر

-قهوة اسبريسو او نسكافيه


بودرة الشوكولا وبودرة الكاكاو

ملاحظة :اجمالا بايطاليا بيستعملوا تلات بيضات او خمس بالوصفة حسب الكمية
وشي بيستعمل بس زلال البيض وشي الصفار مع الزلال
وبيخفقوه مع السكر والفانيل ليصير شكل الكريما وبيضيفوه مع الماسكربوني

وشي بيستعمل تلات بيضات اضافة لكوب كريم فريش زائد الماسكربوني

وشي بيستغني عن البيض

وانا اكلتها ببيض وبدون بيض ونفس النتيجة والطعمة
وجارتي السويسرية عطول بتعملها مع زلال البيض وصديقتي التانية السويسرية بدون بيض
وانا قبل ما جيب اطفال كنت ساويها بزلال البيض مع الكريم والماسكربوني

بس كرمال الاطفال بفضل ما استعمل البيض لانو الطعمة ذاتها




اول شي بنصف الاصابع البسكويت المحلى في الطبق اللي بنستخدمه



بنكون مجهزين القهوة او النسكافيه وبنغمس اصابع البسكويت المحلى فيها او بنسقيها بالملعقة







وهون من بعد ما غمسناها بالنسكافيه (انا مرات بستعمل النسكافيه ومرات القهوة )




بنخفق الكريما مع ظرف فانيل لتتكاثف(انا استعملت ليتر كريم فريش كرمال شيل على جنب للاولاد بياكلوهن مع الفريز اي الفراولة )




هون بنضيف الماسكربوني مع السكر وبنحركها شوي بالملعقة وبنرجع نخفقها اقل من دقيقة





هون بنضيف قسم من الكريما على اصابع البسكويت المحلى المغمس بالنسكافيه او القهوة
وبنرجع نصف طبقة اصابع بسكويت محلى وكمان بنرجع نغمسها بالقهوة او النسكافيه




وهون بنرجع طبقة من الكريما






وهون رشة بودرة الشوكولا

وبنحطها بالبراد


وبس نقطعها ونقدمها اللي بحب يرش بودرة الكاكاو بضيف
وهيدي القطعة مع الصباح مناسبة لرفع المعنويات



ان شاءالله يكون الموضوع سهل الشرح وخفيف متل ما طعمة التيراميسو خفيفة وما بينشبع منها
وهيدول مني إلكن يا صبايا

__________________





اللهم إني أستودعك ديني و نفسي وأهلي وزوجي
وأولادي وأحبتي فاحفظهم يا من لا تضيع ودائعه