السلام عليكم ورحمة الله وبركاتة

ابغى استشيركم بخصوص ديكور السقف والارضيه لان احنا تقريبا
في صدد البناء والتأثيث

فـ ارجو المساعده من ابداء اراء الى تجارب وخبرات

انا حاليا حطيت في بالي كذا شغله عجبتني وافكر اسويها ان شاء الله

اول شي فكرت اسوي السقف جبس وفيه اطار زي الخشب
مثل الصوره هذي



راح اسويه في الصاله وغرفة النوم ويمكن المطبخ

والارضيات راح تكون خشب غامق مره


وحبيت اسئل اذا فيه سراميك يشبه للخشب وشكله يطلع حلو ولا لا؟!

ووين احسن السراميك ولا الخشب؟ بالشكل والجودة

وهل راح تصير الشقة حلوه لما تكون الارضيه كلها خشب ولا التنويع احسن؟

انا سمعت انو الخشب يخرب من الماي والرطوبة وممكن يصير فيها خدوش بسهولة


انا في بالي فكرة ديكور للسقف شفتها بمطعم مره نعومه وكلاسك
بس مااعرف اشرحها

وافكر اسويها بالصاله هي نفس الصوره بس في الوسط فيها جزء غزير شوي على شكل
مموج وداخلها مصبوغ زي السما غامق مره وفيه لمبات صغيره زي النجوم تصير
وعليها بعدين اعمده خشبيه

فهمتوا علي؟!!

والله انا محتاره بقوه اتمنى تساعدوني بأي شي حتى لو صور لاشياء نعومه وموضه
وتناسب شقة


وشكراً

أختي أكره التعقيد ... المسألة بدون تعقيد الله يبعد عني وعنك التعقيد .. هي أني جربت الباركيه ( الأرضية الخشب ) وبصراحة جدا رائع في التنظيف والمنظر والديكور وخاصة الأصلي منه وفي السوق انواع تعبانه ... ولا تنسي التميز لأن أكثر الناس يحطون سيراميك أو موكيت أو رخام ولكن مازال الباركيه قليل ولكن مظهره روعه وخاصة لو راعيتم الإضائة الجيدة والإكسسورات الناعمة ... وبالنسبة لي ولزوجتي كان أفضل من السيراميك بمراحل
هذه رد من غير تعقيد وبصراحة اناا مستعجل ولي عودة بإذن الله لأني أحب الديكور كثير ..

إنسان غير

شكرا اخي على مشاركتك..

انا مقتنعه جدا بشكل الارضيه الخشب ومره عاجبني

بس اخاف انه مايدوم مدة طويلة ويخرب بسرعه

بس ممكن تقول لي انت وين حاط الخشب بكل البيت ولا بأماكن محدده؟!

هل تنصحني بنوع معين من الخشب؟ مثلا يقاوم الماء ومايجيب الحشرات

وانتظر رايك في ديكور السقف


يعطيك الف عافيه

الباركية رائع لغرف النوم والضيوف لأن مثل ماقلتي يتخدش إلا كان من غير عناية ولاتاخذي لون غامق بعدين تتعبين في تنظيفة اليومي لأن يبان في الغبار بسرعة

الصورة الي حطيتها للسقف جميلة جدا بس ماتصبح للمطبخ بإعتقادي

أما عن السيراميك الي يشبه الخشب في منه بس عن الجودة الله العالم على حسب المحل الي راح تتعاملون معاه...

تحياتي

__________________

اولا الله يبارك لك في البيت ان شاء الله

بالنسبه الى الخشب انا عندي بالبيت و النوعيه الي ناخذتها ممتازة بس دي بالك ان الخشب مع عوامل التعريه يتغير قياسه و شي ثاني ان االمكان الي راح تخلين فيه الخشب لازم دايم ا لمكيف يكون شغال ولا راح تظهر لك حشرات من الصراصير و البق...ولازمه صيانه دوريه... شكله جميل و انا معاك في هذا الشي لكن سلبياته بعد كثيره...

بالنسبه للأسقف الفكره جميله بالنسبه لغرفه النوم... لكن المطبخ انا ما انصح بس يكون على الحواف حلو تسوين السقف كله خشب و هذا الي انا سويته بالمطبخ و حطيت فيه سبوت لايت بالأضافه الى الأناره المخفيه...

اما فكره الرسم على السقف فهذي الفكره صارت قديمه...

اتمنى ان افدتك بشي...

__________________

الف مبروك على البيت الجديد بس من رايي انك ماحطين ارضيه من الخشب
لانه يتاثر مع الزمن بالماء والتراب قي في بعض المحلات مشمع للارضيات على شكل الخشب
بس يبيله تمسيح خفيف بحيث ان المويه ماتوصل للجدران
وعندي لك نصيحه انك تحطين سيراميك يكون لونه بني

شذرات نور
المشكله انو الا عاجبني بالخشب اللون الغامق
احس ان اللون الفاتح مو بفخامة الغامق
وكذلك لو حطيته بأماكن معينه بالشقه اخاف تصير مرقعه وغير متناسقه
لان المطبخ مفتوح على الصاله
صورة السقف ان شاء الله راح اسويها بغرفة النوم والصالة فقط

انا شفت مره سراميك يشبه للخشب يعني من النظره الاولى ماينعرف انو سراميك
بس كان فاتح مره يمكن عشان كذا ما اقتنعت فيه واجد

مشكورة على مشاركتك يعطيك الف عافيه..

نياز14
مشكورة عزيزتي..
افهم من كلامك انك متأذيه من الخشب وماتنصحيني فيه؟!
اما بالنسبة للمطبخ باين على الفكره حلوه لكن مو متخيله شكلها كيف بالضبط
ياليت لو عندك صوره تقريبية للشكل اكون شاكره لك
لاني بصراحه مستخفه على شي اسمه خشب

اقتباس:

اما فكره الرسم على السقف فهذي الفكره صارت قديمه

هي مو رسم ابدا.. انا مااحب الرسم بالجدران او الاسقف بتاتاً..
لان موضتها بسرعه تنتهى...
وعموما انا متردده مو اكيد راح اسويها اولا لانها ممكن تكون مكلفه
ثانيا ممكن تنتهي موضتها وماتدوم ..
اكيد افدتيني وحياك الله

اقتباس:

المشاركة الأصلية كتبت بواسطة شقران 55 الف مبروك على البيت الجديد بس من رايي انك ماحطين ارضيه من الخشب لانه يتاثر مع الزمن بالماء والتراب قي في بعض المحلات مشمع للارضيات على شكل الخشب بس يبيله تمسيح خفيف بحيث ان المويه ماتوصل للجدران وعندي لك نصيحه انك تحطين سيراميك يكون لونه بني

الله يبارك فيك
انا ابغا اعرف هذي الا على شكل الخشب تكون حلوه نفس الخشب الاصلي؟
مشمع الارضيات وشو؟

اقتباس:

مشمع للارضيات على شكل الخشب بس يبيله تمسيح خفيف بحيث ان المويه ماتوصل للجدران

مافهمت هالنقطه

مشكور على مشاركتك..

بالنسبة للأرضيات الخشب كذا وحده اسمع غنها تأذت .. يمكن يعتمد على المكان
ومدى جودة الخشب ومعالجته ضد الماء والحشرااات وووو ...

أختي مسوية شقتها سيراميك على شكل خشب كثير رووعة واللون غامق كمان .. إنتي أبحثي وراح تلاقي ..
من أول وهلة تحسي إنه خشب بس لما تدوسي عليه لا على طول ينعرف إنه سيراميك ..

بس الشغالة وهي تنظف ماانتبهت تسألني هذا خشب صح .. ؟؟!!
قلت لها لا .. سيراميك على شكل خشب ..

الله يهنيك ويسعدك ..