السلام عليكم ورحمة الله وبركاته

أحب هذا المنتدى وتعجبني ردود بعض الأعضاء وهذا الشي خلاكم ملجأ لي بعد الله عشان أحكي مشكلتي يمكن أحصل عندكم حل قبل ما أسوي الحل اللي أفكر فيه !!

أولا أنا متزوجة من 3 سنوات وشوي وما عندي أطفال .. حبيت زوجي وتعلقت فيه لأنه إنسان طيب وحنون وكريم .. رغم حدوث بعض المشاكل منها الصغير ومنها الكبير وبالتغاضي والتفاهم تنطفي نار المشكلة غالبا ..

ساكنة بعيد عن أهلي في منطقة تبعد عنهم حوالي 1000 كيلو بسبب ظروف عمل زوجي

كنت بداية زواجي اروح لأهلي فترات طويلة بحكم إنهم بعيد والروحة لهم مو سهلة .. وكنت أروح بناء على طلب زوجي وبرضاه يقول أحسن لك من القعدة لوحدك ومن ذا الكلام بس ماكانت المدة أطول من شهر .. بعد 6 شهور من زواجي كشفت بالصدفة إن زوجي يتكلم مع وحدة كان يكلمها وهو جنبي ومسميها اسم انجليزي متوقع اني ما بأنتبه .. وصارت بيننا مشكلة كبيرة وقال انها زميلة عمل وكانت تطلب مني خدمة ومن ذا الكلام - بحكم أن عمله مختلط - مع ان الجزء االي شفته من المحادثة كان بعيد عن العمل ومع ان العلاقة من قبل يعرفني بوقت طويل بس لينت راسي وقلت خلاص كشفته بيتوب ويعقل وحملت نفسي الخطأ قلت يمكن روحاتي لأهلي هي السبب وشعوره بالوحدة واقنعت نفسي بهذا الشي .. وعدت المشكلة بخيرها وشرها مع اني مافتحت جواله ولا لمسته .. بس صرت حذرة وانتبه بزيادة

بعد هذا الموضوع بحوالي سنة سوى زوجي نفس الحركة كان يراسل وحدة وهو جنبي وكان رقم وبدون اسم بس قلب المرأة يحس ..

قام يتجهز على أساس بنطلع وفتحت جواله وبحثت عن الرقم طلع لوحدة سجلته عندي وطلعنا وطول الوقت مو على بعضي .. نزل من السيارة واتصلت انا على الرقم علطووووول ماحد يرد كررت الإتصال ومافي رد ..

رجع السيارة قلت بسألك مين فلانه؟؟ قال مين ؟؟ ولما وريته رقمها واسمها ماعاد تكلم ولا قال أي معلومه وكنت أكلمه وأنا في كامل عصبيتي .. وبدل ما يجاوبني ويريح بالي قلب الموضوع علي أن ليش افتح جواله صار نقاش طويل وبقت المشكلة بيننا شهر واتفقنا انه مايكلمها لا هي ولا غيرها وطلبات احذف رقمها واحضرها بنفسي وقفلنا ع الموضوع بس لسى جواتي مليون سؤال مالها اجابه وتناسيت الموضوع وحاولت ماعاد افكر فيه .. بس ماقدرت اثق بزوجي بعدها وبقي جواتي قلق وعدم الاحساس بالأمان

المهم الحين وأمس بالليل تحديدا نسي جواله الجديد اللي طلعه من كم شهر وللأمانة فتحته وفتحت الواتساب وكنت متأكدة أن زوجي بطل خرابيط بس كنت ابي اتأكد أكثر قلت يمكن أحس بالأمان من جديد .. في البداية شفت كل شي طبيعي ولفت نظري محادثة لرجل مكتوب اسمه بس حاط صورة عرض غالبا يحطونها بنات .. فتحت المحادثة مستغربه لقيت كلام قليل دليل أن المحادثه تنمسح أول بأول .. بس من خلال الكلام عرفت انها وحدة وانها نفس اللي صارت بيننا مشكلة بسببها من قبل واللي انا حضرتها بنفسي تتكلم من رقم جديد وزوجي يكلمها على أساس أنها رجال بس وااااضح انها بنت واسلوب بنت ..

بحثت عن الرقم وطلع نفس الإسم الاول .. انا انجنيت .. يعني مر على هذاك الموقف سنتين تقريبا وهو لسى يكلمها ويتواصل معاها !!

انا علطول مسحت الاسم من الجوال وخليت الرقم يبين وصورت المحادثة وارسلتها لنفسي من نفس جواله وفتحت كذا محادثة ولقيت بنت ثانية بس واضح أن العلاقة لسى جديدة ونفس الشي صورتها وصورت كم جزء منها وارسلتها لجوالي وتعمدت اخليها وأخلي تعديلاتي اللي سويتها وخليت الجوال مفتوح ع المحادثة واتصلت عليه قلت جوالك الثاني هنا تعال خذه ..

جاء وانا في غرفتي شاف الجوال اخذه وطلع علطول وهو معصب ما اخذ دقيقة حتى .. اتصلت حوالي ١٠٠ اتصال ابي اقول له ودني لأهلي بس مارد .. ارسلتها واتس ونمت

صحيت اتصلت يمكن ٥ مرات رد قلت ابي اروح لأهلي
قال إذا صحيت اوديك قلت طيب عطني سبب قال ماعندي سبب عطيته كم كلمه وسكرت ..

أنا جديا أفكر أكلم والدته احكي لها اللي صار قبل ما اروح .. وججدا مصرة على الروحة لأهلي ..

وش رايكم في اللي سويته واللي أفكر أسويه .. ولاتبخلون علي بالمشورة والحلول جزاكم الله خيرا..

أعتذر عن الإطالة بس ابيكم تفهمون كل شي

الله يعينك نفس الموال صار معي اعتقد انه انتهى بعد ما اخذت موقف قوي هزه وخلاه يصحى من ممارسات المراهقة

لا تقولين لاحد من اهلك او اهله .. تقدرين ان شا الله تحلينها بدون تدخلات

كملي روحي لاهلك .. لا تتناقشين معه لو وش ما قال .. قولي ما ابي اتكلم بالموضوع ماعندي رغبة اتناقش فيه
يمكن ما يسمح لك تروحين
لو خلاك بالبيت ازعلي لا تكلمينه كم يوم

خليك حازمة وبيني الالم بدون دموع وبكا ..

اجلسي كم يوم بدون ما تردين

ولو اصر عالكلام قوليله انك ما تقدرين تعيشين معه بدون ثقة وانه صدمك بهدم الثقة اللي عطيتيه اكثر من مرة
لا تجيبين طاري الصبر وانا ماعاد اقدر اتحمل لانه يعطي ايحاء انك عارفة ومتعايشة

الخيانة صدمة وهي امر غير مقبول ابدا ولا لها اي مبررات

خليه يحس انك بتاخذين قرار مصيري حسسيه انه ممكن يفقدك


وطبعا كل شي تسوينه ما يغير ولا شي بدون التوكل على الله والثقة بان الفرج من عند الله

الاستغفار الاستغفار الاستغفار
وصلاة الليل وقراءة القرآن هي مفاتيح الفرج

__________________

الله يصبر قلبك كأنك تتكلمي عن قصتي مع زوجي نزلتها قبل كم يوم انا خرجت لبيت اهلي ورضاني ووعدني ماتتكرر وعشان ولدي بس قررت اكمل معاه
انتي تاكدي من علاقته بالبنات ايش نوعها اول انصحك لاتسيبي الموضوع كذا لانك حيجي يوم وتنصدمي من جديد

بكل مره تكتشفين شي هزيه هزه عنيفه..ردود فعلك صحيحه لمواجهة الخيانه..مع الوقت بيخسب حساب للزعل والنكد وبيكره هالشي..

قرأت جميع ردودكم بتمعن ..

أشكر لكم احساسكم بمعاناتي فكلماتكم لامست قلبي وبكيت وأنا اقرأها

الحين أنا عند اهلي وصلتهم قبل ساعة تقريبا ولم أشعرهم بشيء أبدا

وجاءت في بالي فكرة جديدة وهي إني اكلم عمي ابو زوجي اشتكي له من ولده بس بدون تفاصيل يعني .. بالرغم اني ما اضمن ردة فعل ابوه ولا اضمن ردود زوجي وش راح تكون

صراحة أشعر بخوف واحس اني اتخذت خطوة قوية وجريئة

ردود وافعال زوجي في السيارة لا تبشر بخير أبدا .. ما ادري هو فعلا مو مهتم باللي يصير أو يتصنع هذا الشي

عموما .. أفكر اخلي أبوي هو الورقة الأخيرة والحل النهائي واجرب قبلها مكالمة عمي .. إذا انحل الموضوع خير وبركة .. اذا صار العكس اخبر أبوي

وش رايكم ؟؟؟،،

صاحب الهوى وحب الشهوات صعب يتغير في يوم وليله مالفائده تكلمين عمك او ابوك بيكلمونه طيب وبعدين راح يرجع لنفس الشيء لازم هو يتغير هو بنفسه و بقناعه ويتوب لله الأفضل انتي تحاولين فيه تذكرينه بالله والاخره و الأهل تدخليهم في أشياء مشاكل بسيطه بينكم لاكن مشاكل زي كذا لازم الشخص نفسه يتغير عن قناعه منه وحتى لو تدخل احد من اهلك او عمك بيسلك له وبعد شهور او سنين بيرجع لنه غير مقتنع داخليا مثل الشخص الي مايصلي بتجي تصيح تقله صلي غصب بيصلي قدامك ولاكن من وراك مايصلي لاكن لو تجيه بهدوء تذكير بالله ادله يقتنع يصلي من قدامك ومن وراك زوجك مثله لازم تحاولين فيه انتي لين يقتنع ويتغير

__________________
لاتأسفن على غدر الزمان لطالما رقصت على جثث الأسود كلاااااب
ولا تحسبن برقصها تعلو على اسيادها ولاكن تبقى الأسود اسود والكلاب كلاب

ما انصحك تكلمي ابوه كلمي اهلك افضل وعن تجربه بس انا انصحك الحين تجلسي فبيت اهلك الين يبدأ يتصل عليك ويتكلم بالموضوع ولازم يصارحك وبينيله انك مشتريته ومانصحك انك تبادري بالاتصال
الله يفرجها لك زي مانفرجت لي

صارت مستجدات في موضوعي حبيت أخباركم بها

ثاني يوم من وصولي لأهلي حكى لي ابوي أن زوجي ارسل له أن بيننا خلاف وجبتها بناء على طلبها رغم أن الوقت متأخر شوي

وسألني ابوي عن الخلاف وحكيت بشكل مبهم ووعدني خير

وبالمناسبة .. اول ماصحيت لقيت الرقم اللي زوجي جايبة لي ملغي والواتس محمل في جهاز آخر !! ما ادري وش الغرض من اللي سواه بس الجوال نفسه مافيه شي مهم لأن عندي جوال باسم واحد من اخواني هو الأساسي .. ما اهتميت الموضوع وما خبرت ابوي عنه ..

في نفس اليوم اتصل ابوي على زوجي ومارد وبعد كم ساعة أعاد زوجي الاتصال وصارت بينهم مكالمه طويلة وكان زوجي جدا متأثر وخجلان كثيييير .. وبدأ هو وقال هي فتحت جوالي ولقت محادثات عمل مع اشخاص اتعامل معاهم من زمان وكذا .. وقال من ضمن الكلام وبدون مقدمات أن الجوال اللي معاها ملغي ما ادري ليش وانا اتواصل مع الشركة عشان يرجعونه « وكأنه يشير لنفسه انه هو من ألغاه.. قال ابوي له بكلم البنت واشوف وش عندها وتركه كم يوم ..

اتصل ابوي عليه اليوم وقال له البنت قالت لي عنك كلام صدمني فيك بدون مايبين له وش قلت .. اعتذر زوجي وصار كلام طويل بس فهمت أن زوجي اخذ الدرس ..

وأرسل لي رسالة يقول ماتوقعتك بتوصلين الموضوع لذا الدرجة وبتحكين لعمي اللي صار .. ويقول اهتزت صورتي في عينه وانحرجت منه وختمها بكلمة الله يسامحك ..

لحد الآن ما قدرت ارد على رسالته ولا لي رغبة أرد عليه

تعبانه كثييير ومجروحه منه

ما ادري لأي مدى وصلت خيانته لي ولكني اتوقع الكثير

احس في قلبي نار ماطفت وكل ما اتذكر المحادثة ابكي وانقهر أكثر

مو قادرة اتقبله واشعر بنفور منه

مشاعري متلخبطة ومشتته واشعر بخوف 💔