السلام عليكم..كيف حالكم..
ان شاءالله بخير..
=========================

مشكلتي بدأت من منتصف ليل البارحه!!

البارحه كنت معزومه في بيت اهلي.. على العشا
ورزوجي من دخل علينا الشتا وهو كل يومين ثلاثه يروح البر علشان الصيد وخلافو... المهم امس كان بالبر وعل الساع 10 الصبح دزيت له اذكره اني اليوم بروح لاهلي!! قال اوكي بس اول ما تطلعين اتصلي علي واذا مافي تغطيه دزي مسج قلت اوكي... بعد المغرب جهزت انا والعيال ركبت سيارتي وقبل ماامشي ارسلت له المسج اني طلعت من البيت...!! عادة وانا رايحه لبيت اهلي امر محل سويت آخذ معاي شي حلو ( جريا على عادة سموي مثل مايقولون بالاخبار)
المهم هالمره ماقلت له نسييييت..... !!!(كفرت ياناس ولا طلعت عن المله)!!
للحين كل شي عادي... رحت وتعشيت وعلى الساعه 11 رجعت بيتي!!! بعد ساعه بالضبط الا موبايلي يرن..!!!فلان يتصل بك!! فلان هذا زوجي..!! مامداني قلت الوو الا قذايف الار بي جي وصواريح سكود:14:(شخباااري قديييمه) متى طلعتي ومتى جيتي وليش ماقلتي لي انج رايحه الجمعيه (سوبرماركت يعني) وكلها اسئله وماعطاني فرصه اجاوب!! وختم المكالمه ..!! انا جايك الحين واعلمك!!!
جاا زوجي المصون ونفس اللي قاله بالتلفون عاده عالهواء مباشره !!
بعد حوار طويل عريض ملاحظه زوجي اذا عصب مايسمع الا صدى صوته حتى لو رديت عليه رد منطقي يرجع يلف ويدور!!! لين يطلعني غلطانه!!
اخرتها قال اخذي اغراضج وابي اوديك بيت اهلك!!
انا لحظتها مصدوومه مادري شقول !!! عبالي يمزح ... يعني ماتوصل لهالدرجه اشدعوه .. اشسويت عشان هذا كله!!
وجاب لي الشنط تخيلوا..!! وطلع !!! قال اذا خلصتي قوليلي !!!
جهزت الشنط ..!! وجا الساعه 2 حط راسه ونام بدون ولاكلمه!!! ..... وعلى الساعه 5 المغرب اليوم قال لي جهزتي اغراضك قلت اي!! .. قال اتصلي على واحد من اخوانك يجي ياخذك!!! قلت اخواني مالهم شغل!! مثل ماخذتني من بيت اهلي توديني!!! قال لا ماني فاضي لك قلت اذا فضيت انا ناطرتك!!!! وطلع كانت الساعه 8 مساءا!!!! وللحين ماشفت رقعة وجهه!!!

هل انا غلطانه في شي؟؟
هل غلطت لما قعدت ومارحت بيت اهلي لما قالها ؟؟

والله اني حزينه ومقهوره وعزت علي نفسي مابي الناس الفاضين يتكلمون فينا وانصير فرجه للي يسوا واللي مايسوا ..!!! ويشمتون فينا الناس!!
نسيت اقولكم قبل مايطلع قال انتي مالج شغل فيني اطلع البر اقعد
اروح يمين يسار مالك شغل فيني!!
قلت له الحين الفيلم هذا كله عشان البر!! لابو البر لابو...!!!لكن اعتبر قلبي من هالحظه مااات!!!!

صج دنيا دنيه ماتصفا لأحد

شاركوني همي ولو بالدعاء

__________________
اللهم احفظ لي زوجي وسخره لي واحفظ لي اولادي

طيب ما صار شي الله يهديك ..



الموضوع عادي جداً , يعني هو زعل عشانك ما دقيتي عليه يوم رحتي للسوبرماركت , خلاص كان المفروض تخلينه لين يروق ويهدا وتعتذرين منه ويا دار ما دخلك شر , وصدقيني بترجع الامور تمام بس هو مو مروق ومرتفع ضغطه ..




كان المفروض انه يوم صحى من نومه وسألك , اعتذرتي منه وقلتي آسف وصدقني ما تكرر يا تاج راسي ونظر عيني وهليتي دمعتين على الطاير ..



بس هذي مو نهايتك , يعني لا تكبرين الموضوع , ألحين دزي له مسج فيه كلام حلو واعتذار وتبرير لموقفك على شوي مدح , وصدقيني بترجع الامور تمام , وبعد كذا تكشخي وانتظريه لين ما يرد واذا تأخر نامي في الصاله علشان يفكر انك كنتي تنتظرينه ..



وفقك الله

__________________
يالله ياللي بيدك الضيق وافراجه .. يا خالق الخلق يا قاضي حوايجها
تفرج لعين الذي اغفت بسوهاجه .. تجهز عليها الطواري لين تزعجها

شكله خرج من عندك ، و واحد عبى راسه عليك .. لإنه خرج و هو معصب

و نتيجة للشئ هذا ، رجع و بيحط حرته فيك ، يعني القصد :

مو شرط يكون زعلان منك ، لكن عجبتيني يوم قال لك خلي أخوك ياخدك و رديتي عليه إنه إنت توديني

فاللي عليك دحين تعمليه ، قومي تحممي و كأنك بتجهزي حالك تروحي بيت أهلك ، و تمكيجي و ألبسي ملابس حلوة

و هو يوم يشوفك كذا ، بيخف غضبه ، و لو ما خف زعله ،، و قال لك يا الله روحي بيت أهلك

قولي له ، و ليييييه ؟؟؟؟ هذا بيتي .. إذا تبغاني أطلع ، إنت أطلع منه .. هذا بيتي ..

لا تعودي زوجك تطلعي من البيت وقت ما يزعل ، هذا بيتك و مملكتك ،، قوليها له بدلع مو بعناد و مضاربة

شكله الرجال كان متضايق من الاساس
وحب يطلع حرته فيك (((((((( او يمكن لما لقيته انتي معصب ماقصرتي معاه وقمتي سمعتيه كم كلمه من الي مايحبهم قلبه)))))))

سألتي هل هذه نهايتي؟؟؟

نهايتك عشان انك رحتي سوبر ماركت؟؟ صعبه
وحتى لو كان شي جايد(يعني شي مستعصي) مااتوقع انها توصل لهالمرحله

خذي نفس واكتبي له كلمتين حلوين وارسليهم
منتي خسرانه شي قبل لا يكبر الموضوع


والله يهديه ويهدينا جميع
ويرجعه لك بالسلامه

__________________
رب ارحمهما كما ربياني صغيرا

ول ول ول انتوا اش علامكم ؟؟؟؟
والله اقرا الموضوع كذا
شالسالفة .. لاكفرتي ولا طلعتي من الملة
س سؤال اش درااااااااااااه انك رحت للسوق؟؟؟؟؟؟
اتوقع احد شافك ويعرفكم ودق على زوجك وعبا راسه
وبعدين انت من صجج مرتبه الشناط؟!!!!
المفروض انك ركدتي وقتها
و وقت ماسألك عنها قلت : ليش ارتبها يالغلا؟؟؟؟؟
ما اعرف بهالدنيا غير هالبيت وهالوجه الحلوووو
ماعليه فاتت
الحين دزي له مسج
وقولي فيه حبيبي موقادرة انام لان فيني حرة لانك زعلان علي.. مو حقي توضحي ليش بس كل هالزعل؟؟؟؟

الله يهديكم ويصلح حالكم

وين الغلط اللي ارتكبتيه ؟؟؟؟

ماشوفك أخطيتي نهائي نسيتي يعني خلاص كفرتي !!

سمعي نصيحتي ياغلاتي لمن يرجع تفاهمي معاه بأسلوب حلو وتأسفي منه حتى لو ماغلطتي

بس عشان ترضينه وبعدين تذكري بأن الزوج وزوجته مابينهم كرامه ولا عزة نفس نهااائي

طيبي خاطره بكلمتين حلوين وقولي ماتنعاد أن شاء الله هذا شي غصب عني لهيت مع العيال ونسيت

وقولي كيف هنت عليك تقولي جهزي شناطك وروحي لبيت هلك عشان سبب تافه !!

الله يهدي قلوبكم ويزيح همكم

__________________
..( أستغفرالله العظيم الذي لا إله إلا هو الحي القيوم وأتوب إليه )..

يا نااني الله يهديكي هذا وقت السوبر ماركت الحين ....... لا حول ولا قوه الا بالله
هههههههههههههه امزح معك حبيبتي
ترى كأنك تتكلمي عن زوجي
بس يالله ما علينا
المهم يا حبيبتي ممكن هو يعصب بسرعه بس برضو بيرضى بسرعه كل عصبي حنووون
اسمعي اجلسي عبل ما يجي وبعدين اجلسي قربه او بغرفه ثانيه بس كوني متأكده انه صوتك واصل له
قولي الي قلته لك (عفى عليكي يا ناااني كان هذا وقت السوبر ماركت ... هيك تزعلين حبيبك والله ما يستاهل
طب بس معلش اعرف شو الي زعله حبيبي انا محتاره ابي احطه لغز بالنت بالكن حد عرف ماله .... وبالاخر روحي الغرفه الي هو جالس فيها رح تشوفيه منفجر على نفسه من الضحك ...بس ترى ان ضحك انتي عصبي ...هههههههههههههههه امزح معك (شفتي كيد النساء)الله يعينهم علينا يا رب
ان شاء الله ما بطول هالمشكله وبتخلص على خير هو قلك ضبي شنتك لانه كان معصب يمكن بينه وبين نفسه الان يقول يارب ما تكون ضبتهم وكبرت المشكله يارب
الله يعينك حبيبتي بدك تحاولي تصالحيه لحد ما يرضى لانه اكيد سمع عنك شي زعله والا ماكان درى بأنك كنتي بالسوبر ماركت اصلا
في حفظ الله ورعايته طمنينا ترى

__________________
سبحانك اني كنت من الظالمين

يووووووووووووه ذكرتيني

نفس حركات زوجي

لا يكون اخوه وانا ما ادري

لو ادخل محل ماقلت اني بأدخله ..يحقد

ولو اخربط في ترتيب المحلات اللي قلت ادخلها .. يقول ليش وش طرى عليك مو قلتي كذا كذا ليش تغيرين؟


وفعلا وش درااااااااااااااااااااااااااااااااه على قولة ام داليا


انتي مو غلطانه انك قلتي ما اطلع من البيت

انتي غلطانه انك اصلا ضبيتي الاغراض


اقعدي في بيتك ...ولا تطلعين وهو زعلان ... واكشخي واذا جا قولي حيا الله الزعول

واحلفي له بالله ماتدرين انه بيزعل وانه وافق ع الطلعه ما يوافق ع السوبرماركت؟

والله الله في الغنج والدلع وكم رساله انك مصدومه قبل لا يرجع وانك مو مصدقه للحين انه زعلان وانه طردك ..

وانه اذا هذا درس فانتي تعلمتي خلاص وتوبه .. ومستعده لاي عقاب الا اني انحرم منك يا شربيل

----- خربتها في الاخير


الله يصلح باله

الله يهديه ويصلح قلبه

انا مع رأي اخواني واخواتي كلهم


لا تطلعين من بيتك السالفة مو مستاهلة فديت قلبك


انتي بس هدي اعصابك .. واعتذري وخلك الكبيرة

معليش ادري انك نسيتي وكلنا ننسى ونسهى وانا ايضا يصير معي نفس الشي لدرجة صدقيني اذا رن الجوال وانا تكرمين بالتواليت وما رديت يقول وين كنتي! وخلاني ابد كني انا والجوال توأم سيامي !

طولي انتي بالك بس .. وباذن الله مافي إلا كل الخير

__________________

ناني مشكلتي اصدق من جد الرجال واحد

سبحان الله وانا اقول زوجي معقد طلعوا كل الرجال كذا

ناني حبيبتي اللي سويتيه صح انتي بس خليه شوي وبيرضى لحاله

او دقي عليه وكلميه بهدوء قوليله انا ماكنت اعرف انك بتزعل ولو اعرف انك بتزعل ماكان رحت السوبر ماركت

من قلت لزوجي اني بمر علشان اجيب هدية لصديقتي ولدت لها فترة وماجبت لها شي حددلي اسم المحل لكني مالقيت فيه شي عجبني دخلت المحل اللي جنبه واخدت الهديه والله زفني تقولي قتلت قتيل ايش فيه ليه ماقلتي يابن الحلال المحل اللي جنبه بينهم حيط ماحركت السيارة لاااااااااااااااااااااا وكلااااااااااااااااااااااا انت غلطانه كيف تتحركي بدون اذن والله راضيته واعتذرت بس حتى يخليني اروح للصديقتي لانها جاتني بيتي وكان لازم ارد الزيارة .. صحيح مصلحجيه لكن ايش بدنا نعمل لازم نمشي المواضيع ونعيش

حبيبتي لاتتركي بيتك ابدا الموضوع مابستاهل واذا رجع وقالك مره تانيه قوليله بيتي وانا مابترك بيتي مو عاجباك روح انت بيت اهلك انا زوجي لما احكيله هيك بيسكت بحس اني متمسكه فيه ..


وبعدين مسج فوفو <<<<<<< كتير حلو ابعتيه اله صدقيني بينسى زعله...

تحياتي

__________________
اللهم ياحنان يامنان ياحليم يامالك الملك بيدك الخير كله اسألك باسمك العظيم ان تشفي اخي شفاء تاما لا سقم بعده ..