كيف اتغلب على ضعف شخصيتي ؟
السلام عليكم
انا وحده متزوجه من 3 سنين و عمري 23 و زوجي 27 سنه
مشكلتي اني ما اعرف اعبر عن رايي و عن اللي في نفسي و خاصه مع زوجي
زوجي من النوع المتسلط و شخصيته قويه و انا العكس شخصيتي واااااااايد ضعيفه و خاصة مع زوجي
ما اقدر اعبر عن اراءي معاه ..ما اقدر افرض اللي انا ابيه ...زوجي متحكم بكل شي في حياتي
متدخل في كل صغيره و كبيره حتى في الاشياء الشخصيه
يفرض علي كل شي حتى اللي انا ما ابيه و ما اقدر اقوله لا
في بداية زواجي كنت اعتقد ان اللي اسويه عدل و ان الزوجه المفروض تسمع كلام زوجها
و ما حسيت اني غلطانه الا الحين
بعطيكم مثال: في بداية زواجنا عزمتني وحده من قريباته (بس انا كنت في بداية حملي و كنت تعبانه و ما كان عندي شي حلو ألبسه كل اللي عندي ملابس عاديه ما تصلح للسهرات) و هي شكلها ما كانت تبي تعزمني بس اضطرت تعزمني.. المهم انا قلت ما بروح بس زوجي قال لا عيب لازم تروحين قلت له تعبانه قال معليه عشان خاطري (ما قدرت ارفض و رحت عشانه)
بعد اسبوع كانت امي مسويه عزيمه بمناسبة نجاح اخوي بالثانويه و لما قلت حق زوجي ما خلاني اروح (و سمعت كلامه)
الحين انا ابي حد منكم يساعدني و يعطيني طريقة تخليني اقوي شخصيتي خاصة مع زوجي لاني خلااااص شوي و بنتحر من المللل اللي عايشه فيه
يعني من اول ما تزوجت لحد الحين و انا ما اسوي شي على كيفي كل شي هو متدخل فيه
و الحين يقولي بعد الولاده ما تروحين بيت ابوج..بتكونين الاربعين في بيتج (و انا متضايقه من هالشي لان الاربعين بيكون في رمضان و بيتي وااااايد بعيد عن بيت ابوي يعني محد يقدر يجيني كل يوم خاصة في رمضان)
و الله تعبت مب عارفه شاسوي و شاقول حق زوجي عشان اقنعه بدون ما تصير مشاكل
(انا اتكلم معاه بهدوء و اختار الاوقات المناسبه بس زوجي ما يعطيني فرصه اتكلم على طوووول يقول لا قبل ما يسمعني و لما اقوله اسمعني لين ما اكمل كلامي يقول اوكي كملي كلامج بس اخر شي الجواب لا)
و الله ما ادري العيب فيني و لا فيه
ارجو مساعدتي
1- شلون اقوله لا و ارفض اراءه بدون ما ابين له اني اعانده؟
2- شلون امشي كلامي و اقنعه باللي انا ابيه؟
__________________