صباح الخخخير جميعا ..
زوجي على وشك ينتهي من بناء البيت .. البيت اللي انا شريت ارضيته وشلت كامل مصاريفي ومصاريف اطفالي عشان يقدر زوجي يبني بيت الاحلام ..
في الوقت اللي هو مشغول عنا اغلب اليوم جسديا وذهنيا وكل تفكيره منصب ع البنا والديكورات والعمال انا شلت هم فوق مقدرتي .. صارت مسؤولية ادارة اسرتي الصغيره على كاهلي .. فوق دوامي .. وللاسف اهملت نفسي من ناحية التزيين وحسن التبعل .. اهتم بس بنظافتي وتعطير جسمي وخلاص وصار عندي نفور من العلاقه اللي اساسا ماتصير اﻻ مره او مرتين بالشهر .. واذا صارت اتهررب بالحيل واحيان ارفض الشي اللي خلا زوجي يلمح لي اكثر من مرة بزواجه الثاني بسبب تقصيري !
المشكككله اني ما اشوف هذا الشي مشكله ! حاسه اني زاهده بزوجي وبحقي فيه !!
قلت له رجع لي فلوسي كلها وانفصل عني جسديا وتزوج .. لكنه تراجع وقال انا احبك وﻻ راح اتزوج بس كنت ابيك تغيري من نفسك شوي .. الكلام هذا من ثلاث اسابيع وﻻ غيرت من نفسي وﻻ اصلا عندي استعداد ليه ماااا ادري !
وكل شوي اسرح بخيالي انه تزوج وانو انا وعيالي مستقرين بشقه لحالنا وانو يجيب اغراضنا ويروح .. وعادي جدا ما اتأثر .. احيان اقول بنفصل عنه عاطفيا واتنازل عن حقوقي الزوجيه اذا تزوج .. واحيان اقول ﻻ انا انثى ولي غريزتي راح اخليه بعدل بيننا .. كل هذا وانا ماحاولت اصلا امنعه مع اني اقدر بس مادري ليهه مع اني احبه وربي واخاف عليه واحس اني اغار عليه .. احس زواجه علي خيانه من ناحية تضحياتي عشان يوقف على رجليه ويبني بيته لكن خيانه لي انا ك أنثى ماحسبتها كذا واقول عادي يتزوج دام وقفت رغبته تجاهي ليه مايعف نفسه .. حاسه اني راح اندم لو فعلا تزوج وبنفس الوقت ما غيرت من نفسي وكل مايلمح اقوله تزوج ربي يسعدك ..
هل هذا الشي طبيعي .. طيب اعطوني اشياء تحمس للحياه الزوجيه .. احس خلاص مابي اكون زوجه يكفي اني اكون ام لاطفالي وصديقه لزوجي

هههههههه تعوذي من الشيطان يابنت الحلال لاتخربي بيتك
لو تزوووج بتتحمسي وبتتزيني وبتحاولي ترجعيه له
من اولها احسسسسسسن،،
بس جد ماالومك البيت والعيال وكمان الوظيفه تهلك الانسان وتهدر طاقته
اغصبي نفسك مره ومرتين ومع مدحه بيرجع لك الحماس
فضي يوم لنفسك صرفي الاولاد عند بيت اهلك ،،سوي قناع ودلكي جسمك وخذيلك دش وتزيني وسويلك كوب عصير والبسي احلي لبس مو عشان زوجك لا عشان نفسك وشوفي كيف تبداء نفسيتك تتغير

شكلك من الناس اللي ما تستوعب الصدمة الا متاخر

تري ان وافقتي او شجعتيه ع الزواج بتغير عليكي
شيلي من راسك سالفة كفايه اكون صديقه له
الحين هو تفكيره فيكي انتي ورغبته بااتجاهك لاتخلي هالرغبه تروح لوحده ثانيه
اعطي نفسك حقها انتي مو مربيه للاولاد وخادمه للمنزل وصديق للزوج بس
انتي انثي بالنهايه ولك احتياجات ،،لاتزرعي براسك هالكلام

حبيبتي اصحي
الفرصه ماتتكرر
والرجل ماطلب مستحيل
تزيني وحسيي نفسك عروس
كل الحريم موظفات ويشاركون ويعاونون
بس مازهدو باشكالهم
روحي السوق واشتري ملابس حلوه وماارخصها الحين
شموع
فواحات
هديه له
غيري مفرش السرير
اصبغي قصي حطي ممياج

طيب كيف .. احس اهانه لي اتزين عشان مايتزوج علي ! عجزت ابلعهاا ..
ع الفكره انا مو طول الوقت محيوسه تجيني اوقات لما اكون رايقه اكشخ بس لي مو له .. يعني يكون هو برا او بدوامه اكشخ مع نفسي بعدين انام ..
احس اذا بيتزوج عشان بس ماتزينت له بصراحه ماعنده سالفه

وبتحسين باهانه اكبر ان تزوج عليك بسبب عدم اهتمامك وقله انوثتك
اتركي الكلام وابليس الي يلعب عليك
لاتتزيني اهم شي كرامتك
هذا زوجك ان ماتزينتي له تتزيني لمين
حنا خواتك وننصحك
الله عطاك هالفرصه استغليها
وانتي معترفه مقصره معاه بعالنقطه
الرجال ان نالقى زوجه متزينه له وين يروح لازم يعف نفسه
حرام جهدك وتعبك يروح بسبب هالنقطه
حبيبتي تزيني واكسبي زوجك
شوفي الحريم هنا
الي تدخل دورات تبي تفهم زوجها
والي يخونها وصابره
واقري موضوع لمسه شارط عليها تتنازل عن حقوقها وبترجع لبناتها
ساعتها بتحسين بصغر مشكلتك وسهوله حلها
تزيني وانا اختك وغيري بنفسك
ترى واجد بنات تتمنى تتزوج بس لتززين لزوجها وترضيه

لاتفكرين ان الرجال اذا تزوج ثانية بيعدل ،،أبداً أنسي هالفكرة ،، اذا انت الان مو متقبلة فكرة انك تهتمين بنفسك عشان تحافظي عليه كيف راح تتقبلي فكرة انه عنده حياة ثانية أنت مو فيها عنده زوجة وأطفال وأسرة،، وطبيعي راح يميل للي تهتم بنفسها وتبرز مفاتنها عنده،، نصيحة خذي الموضوع من باب انك باهتمامك بنفسك راح تحافظي ع استقرار اسرتك وع استثمارك في بيت العمر ،،وشوي شوي مع الوقت راح يصير عادة عندك ،، لاتضيعي زوجك من يدينك بسبب كبرياء أعمى..

ياما حريم نكديات ماتعرف الكشخه و المكياج الا اذا كانت معزومه أو رايحه لعرس
أهم شي في حياتها أهلها و اولادها بس و هالزوج معتبرته ماكينة صرافه
لا تعرف تهتم و لا تدلعه و لا حتى تقوله كلمه حلوه تطيب خاطره
إذا أتصلت عليه تقوله بالامر جيب خضره و جيب حليب و جيب و جيب وجيب
وإذا دخل بيته يبغى يرتاح بس
يلاقيها تصررررخ على العيال و حايسه معهم و بدراستهم
لا جات تنام تقوله ترى تعبانه عيالك دوخوني و تبدأ تحن و تشكي
مشغوله عنه ماتدري عن الرجال و لا تسأل فيه

........................................


يابنت الحلال
مابين الرجال و زوجته كرامه أو كبرياء
كل هذا حكي فاضي
أصلاً من طبع الأنثى التزين و التجمل
بس بعد الزواج يزيد اهتمامها بنفسها لزوجها
حلو زوجك يشوفك حلوه و كاشخه دايما و متمكيجه
مو إنتي تكشخين للدوام و لصديقاتك
ليش ماقلتي مو حلوه أكشخ للبنات و ماأكشخ لزوجي ؟!!
في النهايه كشختك لزوجك مأجوره عليها
راجعي نفسك
ليش معقدتها و ماخذه الحياة بتكلف و تعقيدات
الحياة أبسط من كذا بكثيرررررررررر

__________________

اللهم أكفني ما أهمني بما شئت و كيفما شئت إنك على كل شيء قدير

خارج النص :

سبحان الله قصتس ذكرتني ببنت خالتي و خالتي من الرضاعة -الله أعلم إذا مالخبطت بينه وبين أخته- :
هذي معلمة وجمعت و بنت بيت من راتبه لكن باسمه فتزوج عليه و تطلقت - لا أسقط وضعك و أقول طبق الأصل فقط من باب الاخبار- ، ثمن أخذت معدد مدري هي الأولى أو الثانية ..
المهم هي تجي أحيان تسير تسلم قهوة يعني و بس ،
فذيك المرة جتنا العصر كاشخة ومعه عياله و بناته ، وفي سياق الكلام المنقول لي تقول لأختي الكبرى
فيما معناه : الله يجزى أم فلان خير- تقصد جارته - لأنه اليوم دور جارته فهي ترتاح تروح تتمشى و تنبسط
لأنه أساسا مرتنا و هي بطريقه للحديقة .

و بنت خالتي من خالة ثانية غير ذي و تصير بعد خالتي من الرضاع هي معلمة وزوجه أخلاق مب زي الأولى ،
ومتدينة و يعني حليمة ماعمري تخيلت وجه إلا و ملامحه هادية ... المهم ذي بنت له من راتبه فلوس و عقارات و صارت الحمدلله موسرة ماشاء الله تبارك الله و لا حول و لا قوة إلا بالله ،
المهم ... يعني كلنا استغربنا تزوج رجله عليه ؟
و بعد ما مر وقت يعني على زواجه بجلسة قهوة كانت أختي الكبرى تحاول تواسيه زي كذا ، بينما
هي فاجأت أختي بكلامها فيما معناه :
"الحمدلله ..أنا مقدر أعترض أو أقول شيء لأنه حلال وهو مب مقصر معي ..ما أجحد إني مرة-أنثى- أضيق و أغار بس بنفس الوقت ما أشوف شيء غلط أو حرام عشان أعترض ".

زميلة لي ذكرت سالفة و هي تقوله بوجه شاحب ..
كانت تتكلم عن فترة اختبارات بمستوى فات عنده ظروف حزن وعزى وبكى و أمه وكل البيت فماذاكرت ولا حلت ،وهي تكمل كلامه طلعت المتوفاة هي " مرت أبوهم " ؟

فيه مسلسل ثقافة الممثلين قروية ..
كان الولد يزور "خالته " زوجة أبوه ؟ و يعطيه قروش و يسأل عن أخوه ، قامت الخالة تقول :
" أحتسب أجره - هذي الفلوس- لبييك و ميمتك ".
^
طبعاً ما أقول هذولي من زمن الطيبين لا إن شاء الله فيه نساء طيبات بالزمن الحديث ،
ولو كانت معظم قصص التعدد الجيد بضمير ودين سواء للرجال و النساء من الماضي ؟
لأن الرجال الحين مب زي أول يردعه عن الظلم دين و لا ضمير بنفس الوقت النساء الحين مب زي أول ،
إلا من رحم ربي ... وعاد يله جيبي طريقة امتحان أو اختبار تضمن الخبيث من الطيب الله المستعان .

يمكن من هنا كنت أشوف أن جانب الضمير بنفسك هو اللي متقبل فكرة التعدد .

__________________________________________________ _________________




داخل النص :
لازم تكتبين البيت و كل الحلال " باسمك " ،
و لا تقترحين الزواج من نفسك انتبهي ؟
وإذا تزوج من نفسه لا تطلبين الطلاق ولاتكدرين عيشته امسكي بيتك وحبيه و حبي عيالك،
بس كوني حريصة على مستحقاتك و عيالك المادية وهذا أهم شيء.



"سبحانك اللهم وبحمدك أشهد أن لا إله إلا أنت أستغفرك و أتوب إليك"