طريقة عمل القطايف ناجحة و مضمونة - منتدى عالم الأسرة والمجتمع

29-12-2012, 09:03 PM

ماريا

عضو المنتدى الفخري

تاريخ التسجيل: Jul 2006

المشاركات: 10,538

طريقة عمل القطايف ناجحة و مضمونة

السلام عليكم اخواتي

بعد سنين رجعت اعمل القطايف و بعد عدة محاولات اخيراً نجحت معي و طلعت افضل من الجاهزة حتى

أي فيكن تقولوا اني اكتشفت أسرار نجاح القطايف : )

وحابة شارككم فيها تمنياتي لكم ان يرضى عنكن المسيو

الطريقة بسيطة بس لازم الانتباه للملاحظات
ببرامج الطبخ ما بيعطوكي مقادير و بتشوفي الشيف آخد عالنظر

هي المقادير مضمونة ان شاء الله

لكل كوب طحين ، كوب و ربع ماء ، رشة ملح ، م ص سكر ، م ص بيكيغ باودر

هالكمية انتجت لي 26 قطعة متوسطة الحجم

اخفقيهم بالخفاق او البراون اي food processor

اتركيهم يختمروا على الاقل ساعة و اكثر شي ساعات بمكان عادي او دافي

الي بقلك خميرة و ما خميرة ما تسمعي لأني جربت الخميرة ولقيت انه الـ بيكنغ باودر أفضل للقطايف

لطهي القطايف لازم يكون عندك تيفال او ما يشبهها المهم يكون القعر سميك والوجه لا يلتصق فيه العجين

انا وجدت انه التيفال الي شكلها مربع افضل شي لوما عندك ، المدورة جيدة لا بأس بها

اتركيها تحمى على النار

ابدئي بصبّ العجين بالمغرفة افضل من الصبّ العادي من ابريق لأنك بتحددي تماما الكمية بحيث كونوا بنفس الحجم

نص المغرفة كافي لتعملي قطايف صغار و حلوين للضيوف اما اذا مستعجلة فيكي تعمليهن كبار

ملاحظة مهمة : النار متوسطة إلى عالية ، صبي العجين على المقلاية في المركز و كل مرة قطعة وحدة فوق مصدر الحرارة
لو صبيتي عجين على الاطراف الي مافي تحتها غاز لن تكون ناجحة (بامكانك تجربي على كل حال)

كل مرة قطعة واحدة (لا تستعجلي)
استخدمي الكفكير لرفع طرف القطيفة لتشاهدي لونها من تحت لما يكون صار بني فاتح ارفعيها بحذر على ورق زبدة انتبهي لو حطيتيها على اي شي تاني بتلزق

كرري ذلك حتى آخر قطيفة

احشيها بالحشوة الي بتحبيها و سكريها بشكل جيد قبل القلي بالزيت

حمي الزيت بشكل جيد على النار و اقلي القطايف

ملاحظة حول قلي القطايف
لا تستعجلي برفع القطايف لأنه بتطلع غير مقرمشة يعني مو متل قلي الخبز سريع جداً ولا هو متل الخضار
لازم تقلبيها على الوجه التاني و لما تحسي انه بدأ يصير لونها غامق ارفعيها من النار ، لازم يكون لونها تغير (بني) بس ما يصير على اسود انتبهى

اتركي القطايف المقلية تبرد شوي و حضري القطر (الشيرة)

لا تخافي اذا حسيتي انه القطايف صارت متخشبة رح ترجع رخوة بالقطر

القطر لازم يكون سميك شوي يعني كوب وربع سكر او اقل من الربع بقليل ، مقابل كوب ماء و ملعقة ماء زهر

اتركي القطر يبرد شوي لما يكون صار فاتر بحيث تتحمله اصبعك بدون ما يلدع حطي فيه القطايف مدة اقل من دقيقة و ارفعيها

ملاحظة مهمة

حتى يبقى القطايف مقرمش وما يصير رخو

لا تتركيه بالقطر زيادة ، و لا تحطيه بالقطر و هو حار

أخيراً
رشي عليها فستق حلبي مطحون و قدميها

وصحتين و عوافي

__________________
.
.

استودعتك أهلي في سوريا يا من لا تضيع ودائعه

التعديل الأخير تم بواسطة ماريا ; 29-12-2012 الساعة 09:12 PM

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه