السلام عليكم ورحمة الله وبركاته

قبل اسبوعين تقدم لخطبتي شخص واتى هو وابوه وامه لخطبتي وطلب من عمي رؤيتي لكن انا رفضت لأنني كنت غير مستعده نفسياً أبداً وكنت خائفة جدا ورفضت , وعمي أصر علي انو انا ادخل وايضا ام العريس قالت على الأقل افتح الباب ويمر ويشوفك وماراح أخليه يطول كمان رفضت وانا رفضت لأنو بصراحه كيف أطلع بواحد انا ماأعرف عن اخلاقه شي ولا أحد سأل عنه لسى المهم انا طلبت من عمي أنو يقول له لازم نسأل عنكم وبعد اسبوع نرد لكم (بأنه يجي يشوفني ) سافرنا جده مكان إقامتنا وهو ماقصر سافر معانا بنفس اليوم وطلب من عمي موعد لجيته وحددنا بعد ماسأل عمي عنه وسمعنا عنه بأنه شخص سمعته طيبه ومايتفوت طبعا أنا وافقت والله قبل مايأتي كنت بالمره فرحانه بشكل مو طبيعي لانو انا بصراحه عمري 26 سنه وكل إلي بسني وإلي أصغر مني من عائلتي تزوجو وانا مثل ماأنامحلك سر على انو يجوني خطاب بس سبحان الله مايصير نصيب , المهم انا وامي واخواتي رتبنا البيت من وإلي وبخرنا البيت وجهزنا القهوة والعصير وكلو وتعبنا بس كان على قلب امي واخواتي زي العسل المهم يفتكو مني وانا اهتميت بنفسي وتشيكت ولبست لبس محترم كم طويل وتنورة طويلة وشيك كانت دق على عمي جوال وقال انا العريس جايين افتحو الباب فتحنا الباب وشفت العريس من العين السحريه إلي عند الباب دخل وجلس مع عمي نصف ساعة من دون ماء ولا قهوة وياحسرة عمي شكلو مايعرف الواجب ولا عندي أخ يروح يجيب القهوة خفنا ندق عليه جوال ويقول العريس هذولا مستعجلين المهم بعد نصف ساعة دقيت على عمي دقه وقلت علي وعلى اعداء خليه يفهمها زي مايبغى المهم نقدمله شي بارد لانو تعرفو الجو هنا بجده حااااااااار بشكل مو طبيعي وكمان هو جاي بالعصر بعز الشمس وكان عمي يوصفله البيت يعني العريس كان بحوسه

جى عمي وقال قدميله عصير وقلت انا لعمي أوكي بقدمله واطلع على طول مااقدر أجلس أستحي قال عمي أوكي دخل عمي المجلس ودخلت انا وراه ولما دخلت شفت العريس يطالع فيني من فوق لتحت قدمت له العصير وبعدين قدمت العصير لعمي وقلت لعمي خلاص أروح قال روحي

بعد ربع ساعة او اقل خرج العريس وطلعت شفته من الشباك دخل سيارة صاحبة ورمى العقال على صاحبه ورمى شماغه وراه وانا عرفت بأنو انا مااعجبته
دق علي عمي وقال تعالي المجلس جيت عنده وقال عطوني طلبات رمضان اروح اجيبها انا انصدمت وعرفت انه رفضني العريس وعمي مابغى يحرجني

انا والله العظيم مو ناقصني شي وانا لما كنت بالمتوسطة والثانويه والكليه والمعهد وبمدرسة الأهليه إلي ادرس بيها كثير بنات يعجبو بيه بشكلي وشخصيتي وحتى امه لما شافتني قالت ماشاء الله تبارك الله قمر الله يحفظك لأهلك بس ليه هو هرب ومارد على اهلي إلا بعد يومين وقال مالك نصيب من جد انا انقهرت وبكيت على حظي والله ماناقصني شي ليه يرفض ؟؟

صحيح انا مليانه حبتين بس مو كثير بس مااعتقد هذا السبب

إلي قاهرني انو في ناس تقدمولي وماطلعت اشوفهم ليه يوم طلعت أشوفه رفضني والله انا مقهورة ومتفشله من عمي لأنو اكيد علم زوجته وبناته وكمان من اهلي وامي الله يهديها نشرت الخبر لخالاتي وخيالاني وانا عاتبتها وقلت لها المفروض يكون سر بيننا واذا احد سألك من خالاتي قولي نصيب ماتقولي انو العريس رفضني والله ياامي مو حلوة بحقي وهي زعلانه مني وقبل كم يوم جلست تدق بالكلام لين صارت بيني وبينها مشكله واخواتي الصغار واقفين بصفها ويقولو لي أنتي عانس وكل مايجيك احد يرفضك وهم صغار المفروض مايتجرئو يقولو كذا بس امي الله يسامحها ماتخليهم يحترموني وتفضل الصغار على الكبار

ساعدوني لو بنصيحه وإيش المفروض أسوي اخلي عمي يكلم ابوه ويهزئه ترى أنا مقهورة يمكن لو كنت بشعه ممكن اتحمل وانسى إلي صار