|
رد : *. أرغب بالفضفضة عن شقيقاتي .*
اقتباس:
وظلـم ذوي القربـى أشــدُّ مضـاضـة على المرء من وقع الحسام المهند . . أنا اللي استفدته من مواقفهم ،، إنه ما صار يعني لي أي شي يحصل لي من الغريب .. صرت أقول إذا القريب عمل كذا ، فلازم أعذر الغريب .. هذه فائدة من الفوائد .. |
رد : *. أرغب بالفضفضة عن شقيقاتي .*
اقتباس:
عبرتي عن كل شي بجملتك ، و اختصرتيها علي .. . . نحن الأن علاقتنا تمام .. jk نحن الأن متماسكات و الحمد لله .. jk نحن الآن علاقتنا كويسة .. jk . . لكن كنا كذا ( زمان ) .. و رجعنا هكذا الآن .. لكن مريت بأشد فترات ضعفي و كانت ( فترة استراحة محارب بالنسبة لي ) .. لكن هم اعتبروه ( سقووووووط لي و انهيار ) .. فاكتشفت انهم يتصيدوا لي ( الزلة ) .. و مجرد ما أتت الفرصة ، اللي كشف وجهه الحقيقي من خلف القناع .. و اللي التزم الصمت و الهروب ، و اللي اظهر خناجره لي .. . . عشان كذا أنا ( اتكلم ) .. أنا لست بحاجة لهم الآن و لله الحمد .. لكن تمنيت انهم يفكروا فيا مثل ما كنت أفكر فيهم ، لكن وقت ( الشدة ) تخلوا عني .. و دحين وقت الرخاء .. إيش هي حاجتي لهم ؟ . . أنا عموما ما أثق و لا استند على أحد .. . . مبتعثة ، أخواتي يستندوا علي .. مو أنا اللي بحاجة لهم ( لإني جربتهم و فشلوا ) .. و هم لإنهم عارفين لو أحد غلط عليهم ،، إني الوحيدة اللي ممكن أواجه أي أحد و ما أخاف .. و عندي الجرأة لاسترداد حقوقهم بأي لحظة أحد يغلط عليهم .. و المواقف أثبتت للجميع إني أوقف معاهم و ما أتخلى عنهم أبدا .. |
رد : *. أرغب بالفضفضة عن شقيقاتي .*
اقتباس:
. و مين قال إني ما سامحت ؟؟؟؟؟؟؟؟؟؟ سبب تعبي ، إني ( أسامح كل مرة ) .. و أرجع اتلدغ منهم كل مرة .. و ارجع أسأل حالي ( طيب ليه ؟ ) لإني متأكدة إني ما أكون أسأت لهم .. . . و معليه ، الأخوان مو كلهم مثل ما قلتي .. كنت أحسب كذا .. لكن لما الأم و الأب يموتوا ، كل شي يتغير .. |
رد : *. أرغب بالفضفضة عن شقيقاتي .*
تعالي شوفي اللي عندي
ادخلي الفايسبوك عندي وشوفي حسبي الله ونعمى الوكيل |
رد : *. أرغب بالفضفضة عن شقيقاتي .*
معليه اولادي مسخنين و تعبانين و ماقدرت اكمل
بس ملاحظة .. انا مازلت احبهم .. لكن جمدت مشاعري تجاههم .. اختي لما انخطبت؛ كلهم تخلوا عنها و كل وحدة قالت مالي دخل .. و امي ميتة الله يرحمها يارب اخوي كلمني لانه مافي احد راضي ينسق مع اهل العريس و انا الي تفاهمت مع أهل العريس و الي تكلمت مع ام زوجها و صرت كأني ( ام العروسة ) ^_^ و ما شلت يدي .. لحد ما تطمنت انه تم عقد القران و خلاص هي و عريسها يرتبوا كل شي .. و الحمدلله .. فزعت لها بزواجها باللي اقدر عليه .. و يارب ما آكون قصرت معاها .. مع انه كلهم باستثناء الكبيرة .. قالوا مالنا دخل و كل وحدة تحججت .. ( الكبيرة شخصيتها شوي ضعيفة و ماتقدر تتحمل اي مسءولية .. و اخوي ما يقدر يوثق فيها و تصرفاتها .. و هي ماهي عندنا .. لكن كانت تنزل إجازات و ما تقصر الصراحة ؛ مرة حنونة ماشاءالله ) و الحمدلله تفاهمت مع ام العريس .. بالشكل الي يرضي امي الله يرحمها لو كانت عايشة بالدنيا .. على فكرة .. اختي هذه الي تزوجت .. وقفت قبل كذا مع الكل (لكن باستثنائي ما كانت توقف معايا) .. و شافت كيف كل وحدة تخلت عنها يوم خطوبتها و زواجها و قالوا مو ناقصنا مشاكل و مالنا دخل اختي الي تزوجت هي الي بعدي على طول .. يعني بدري علي أصير ام العروسة :p لي عودة بس اولادي تعبانين |
رد : *. أرغب بالفضفضة عن شقيقاتي .*
روح غاليتي
أنتِ مجروحة منهم كثير عشان كذا جرحك منهم يدفعك للكلام بحرقة والإنسان مايحترق من جواه وينقهر إلا من شدة حبه وغلاوة الإنسان إلي جرحه وتخلى عنه في عز أزمته روح مهما حصل منهم أبغاكِ تتذكري شيء واحد بس وأنتِ ماشاء الله فاهمة وواعية وماتحتاجي وصية تذكري أنك جالسة تبري في أمك من خلال علاقتك فيهم ووصلك لهم ومهما فعلوا بيضلوا أخواتك وعمر الدم مايصير ماء فلاتقطعي التواصل معهم إكراماً لله ثم لأمك وصدقيني راح تشوفي بركة هالصلة في توفيقك في حياتك أسأل الله أن يؤلف بين قلوبكم |
رد : *. أرغب بالفضفضة عن شقيقاتي .*
اخوة يوسف مالهم حل
سوى ان يظهرك الله عليهم يارب بعزتك وجلالك في هذه الساعة الكريمة وسماءوك تسقينا رحماتك اغنني واغني روح الطير عن خلقك قريبهم لنا وبعيدهم |
رد : *. أرغب بالفضفضة عن شقيقاتي .*
أعلم أنك اصيله وقدمت الكثير جزاك الله الفردوس الأعلى وأذكرك بقوله تعالى عن قصة يوسف ( من بعد أن نزغ الشيطان بيني وبين إخوتي ) أن شاء الله تهدى النفوس والخير فيكم أصيل مهما كان أن شاء الله أسال الله أن يصلح حالكم ويألف بين قلوبكم |
رد : *. أرغب بالفضفضة عن شقيقاتي .*
فضفضة مسموح بها لكن كوني كما أنت لاتغيري طبعك ولاشعور المحبة آتجاه إخوتك، آدفعي بالتي هي أحسن أولادك يحتاجون لعائلة ، أما الشماتة لا أظن فقط ظروفك جعلتك حساسة، إخوتك عزوتك مهما كان لحمك ودمك تتشاركون ذكريات الصبا الجميلة
جمع الله شملكم وألف قلوبكم محبة ورحمة وحنان على بعضكم البعض |
رد : *. أرغب بالفضفضة عن شقيقاتي .*
حين كبرت اصبحت اذكر اخواتي بشيء من الحنين عرفتهم اطفالا كنا نتسابق من يسرق القميص قبل الاخر كان الذنب ليس ذنبهم بل ذنب الفقر الذي جمع اخوة واخوات كثر بغرفة لا تزيد عن مساحة كف اليد الان اتمنى ان يأخذوا كل شيء ويكونوا بجانبي هذه اللحظة اخواتي ستمضي الايام شئنا ان أبينا وستتذكرون ظلم من ظلمكم من الاخوة والأهل وكأنه ورقة سقط عن شجرة توت بموسم خريف |
رد : *. أرغب بالفضفضة عن شقيقاتي .*
*. اعتذر عن التأخير .*
كريستالة .. كل الي قلتيه معاك حق ، لكن في وضعي أنا ( مختلف تماماً ) .. يعني أنا ما جيت هنا ، لأفرغ ما بداخلي .. إلا بعد ما عرفت الأسباب و توصلت للحلول المناسبة .. و استشرت الصائمة لله .. و بعد ما اختبرت و جربت جميع الطرق .. و بعد ما تألمت و عانيت و بكيت و انجرحت كثير .. . . أنا هنا ، حتى أحافظ على سلامة ( قلبي و عقلي ) .. لإني أخاف بسبب الكتمان ، إني لا شعورياً أتقمص شخصياتهم و تراكيبهم .. فأقوم بتقليد أفعالهم بدون ما أشعر ، حتى استطيع فهم نفسياتهم بشكل أدق .. ( نفسي و فاهمتها ) .. و لولا معزتي للمكان هذا ، لما رغبت بإفراغ ما واجهته .. حتى تنتهي هذه الصفحة بشكل نهائي و تنطوي من حياتي .. . . خليني اتفصل مع ردك بشكل أكثر تفصيلاً .. و لإنه فيه أشياء ماهي صحيحة و أخطأت يمكن إني أوصلها لكم : و أقاربي ما في بيني و بينهم شي ؟؟؟؟؟؟؟ شكلي ما وضحت النقطة هذه كويس .. اقتباس:
. اخر شي كريستالة .. ماحد كان فاهمني و فاهم أخواتي و أخواني ( غير أمي الله يرحمها ) .. أنا بنفسي و الله ما كنت أعرف سبب تعاملها معايا و خوفها علي عن الكل .. ( كانت تقول لهم من خلفي ، روح الطير مختلفة عنكم ) الوحيدة اللي لما تزوجت ، أمي بكيت علي بحرقة قلب .. و البقية فرحت أمي و قالت ( الحمد لله ارتحت ) .. الوحيدة اللي لما حملت ، كانت تطبخ لي و تهتم فيا .. الوحيدة اللي و هي مريضة ، قامت أمي و طبخت لي الأكلة اللي احبها .. و لما أخوي جاء من السفر ، قالت لي لا تقولي له إني طبخت لك أمس ، عشان لا يزعل و يقول ايش معنى ؟ أختي الصغيرة كانت حامل بأول طفل ، و أمي ما كانت مهتمة جدا بحملها .. أنا حملت بفترة مرض أمي و بعد أختي .. و تاني حمل ليا .. أمي كانت تهتم بيا و قالت لي بعد الولادة ، سامحيني لإني مقصرة معاك .. و ماني قادرة اساعدك بوقت نفاسك .. وقت مرض أمي ، أخوي قال لي ( لا تجي و خليكي في بيتك ) السبب ، إني جيت عريس لأختي ..؟؟؟؟؟؟؟؟؟؟؟؟؟ yyy سمع منها و ما سمع مني .. بعد ما أمي ماتت بسنة كاملة ، اكتشف أخويا إنها كانت تكذب عليه و جاء اعترف لي .. و وقتها لما قال لي أخوي لا تجي و هو المحبب لقلب أمي .. سمعت كلامه و جلست ببيتي أمي دقت علي زعلانة لإني ما جيتها تاني يوم ، و نادتني اجلس عندها و طلبت مني انام عندها بينما كل أخواتي يزوروها ( يوم واحد فقط في الأسبوع ، من العصر لحد العشاء فقط .. يشربوا قهوة و شاي و يتجمعوا يضحكوا و يتونسوا ، و يجيبوا أولادهم يلعبوا كل مكان و يروحوا و خلاص ) .. و قالت أمي ( هذا بيتي أنا .. اللي يبغاك تخرجي منه ، يخرج هو منه ، وياخد معاه أخته تجلس عنده ) و أمي قالت لي ( الله يجزاك خير انك تفكري في أختك و جبتي لها عريس ، مو مثل بقية أخواتها ماحد فكر فيها و قالت لي .. إنت عملتي اللي عليك خلاص و ما عليكي لوم ) مع العلم ، بعد موت أمي .. أخوي سألني عن العريس هذاك اللي جبته وقتها .. و جوا عرسان كثيرين عن طريقي لأختي .. و مع إنه كان ممكن أقول ( مالي دخل فيها ) .. . . أختي الكبيرة أنا كنت أشوفها الحنونة الطيبة .. و ازعل ليش أمي ما تبغاها تنزل عندنا و لإنها بمدينة تانية كانت أمي تخاصمني و تقول مالك دخل و لا تقولي لها تنزل .. و تقول ، أختك ما تنزل عشان تشوفني ، تبغاني أكون مثل الفندق .. اطبخ لها و لزوجها و أولادها و هي تخرج تروح تزور فلانة و علانة و تترك أولادها عندي و تهملهم .. حتى أمي لما كانت بالمستشفى ، بين الحياء و الموت .. أختي الكبيرة راحت تزور أمي و هي حاطة ميك أب في وجهها ، و متعطرة و لابسة كعب و تضحك .. أمي قالت لي ( لما أموت ، اعملي نفس الشي في العزاء حقتي ) .. و فعلا يوم موت أمي ، أختي الكبيرة تحسب شكلها إنه نحن في مناسبة ( اجتماعية و عائلية ) .. أي وحدة تجي تعزي ، أختي ترحب بها بضحك و أحضان ( واااااااااااااو من زمان ما شفتك .. ههههاي تعالي تعالي اجلسي هنا ) و تمضغ لبان و تكركر .. . . باختصار / أأمي الوحيدة اللي كانت فاهمة كل واحد و وحدة فينا .. لدرجة انها كانت فاهمتني ، أكثر من فهمي لنفسي .. |
رد : *. أرغب بالفضفضة عن شقيقاتي .*
^
بالمناسبة ، أختي هذيك .. لما تصير أي مناسبة حالياً لحماتها أو أهل زوجها .. أو عزاء و غيره .. تستنى أحد يدق على حماتها و يقوم بالواجب .. ماحد من أخواتي يقوم مع أهل زوجها بالواجب .. و كل وحدة تقول مالي دخل .. و أختي تعرف إنه ماحد غيري ( يوجب مع أهل زوجها و يعززها قدامهم ) و أنا بأعمل الشي هذا مو عشان أهل زوجها .. لإني ما اهتم بكلام الناس .. اعمل كذا عشان خاطر أختي .. و أبغاها تكون معززة و مكرمة و ماحد يغلط عليها من أهل زوجها .. و لا احد يقول أمها ميتة و ماعندها أحد .. و عشان خاطر أمي الله يرحمها .. مع العلم إني أصغر من أختي بسبع سنوات .. |
رد : *. أرغب بالفضفضة عن شقيقاتي .*
تقريبا و الحمد لله ، من بعد الموضوع هذا ..
أحس خلاص ، بدأ ذهني يصفى .. و ما صرت اتعب حالي بالتفكير فيهم ، ليش و ليش و ليش ؟ . . أبغى أوضح شي .. أنا زمان كنت قريبة جدا من صحباتي و بشكل مبالغ .. و لي عالمي الخاص بينهم .. و مع دراستي و زميلاتي و كتبي .. و المرسام و دفتر الرسم .. و عالم الخيال الي بداخلي ,, و خاصة بعد موت أبويا الله يرحمه ، زدت اكثر بعد عن أهلي .. كنت تقريبا مثل ( لجين .. و فجر الهوى .. خجولة و اسكت عن حقي .. و مالي حقوق .. و ما أعرف ادافع عن نفسي .. و أحب ارسم و أعبر عن أي شي بداخلي بالرسم ) كانت تجيني انتقادات وقتها من أخواتي و أخواني ، ليش أنا غامضة و ليش كذا باردة و ليش كذا كتومة ؟ كان أخويا الكبير و أختي الكبيرة ، فيهم لقافة مو طبيعية و تدخل و تعدي على خصوصياتنا .. يعني كم مرة أختي هذه قبل لا تتزوج ، كانت تفتش دولابي و تقرأ مذكراتي و تقطعها .. أو تخرب رسوماتي .. و لما أزعل أو ابكي أو اشتكي .. كانت أمي تصدقها و تخاصمني و تقول لي ( اسكتي خلاص ) .. كانوا قريباتي يستغربوا ليش أنا كذا ( كتومة جدا جدا .. و ما اتكلم ) .. أمي تبغانا نكون رسميات .. فكنت أحاول اكسب رضا أمي بأي طريقة .. و اسمع كلامها لكن مع صحباتي ، أنا جدا بسيطة و عفوية و البساط احمدي .. و أكره الرسميات .. . . بدأت بالتدريج ، اتكلم مع أمي مرات .. و اتقرب منها .. لما صرت اسمع محاضرات عن البر بالوالدين .. و بدأت ألتزم نوعا ما .. و اتقرب من ربنا أكثر .. أمي صارت تتأثر بنصايحي و كلامي .. و تركت سماع الأغاني و صارت تصوم أيام البيض و الإثنين و الخميس و تقرأ القران يوميا .. و بالمقابل كانت تنتقد أخواتي .. . . هما ما عجبهم تغيير أمي ، لإنها كانت زمان معاهم تنتقدني دايما .. بأسباب و بدون أسباب .. و ما كنت أرد عالانتقادات .. و عشان كذا اتهموني باللامبالاة و بانعدام المشاعر .. ( لكن كنت انشغل بعالم النت ، أقرأ مواضيع و اتعلم برامج ، و لي صحبات في النت إلى الآن تواصلي معاهم ) .. و بزيادة ، كنت من النوع اللي ادلع نفسي بنفسي .. لإنه أبويا مات الله يرحمه ، فأقنعت نفسي إنه أبويا إذا مات و مافي حد يدلعني .. خلاص أنا أدلع حالي بحالي .. و انعكست تصرفاتي هذه على تعاملي مع أمي بعد كذا .. . . المهم .. أنا مع نفسي ، كنت أشوف إنه مافي أي فايدة في موجهة أختي و أخوي .. لإنهم يفرحوا كانوا لما يشوفوني ابكي .. تعلمت احتفظ بمشاعري لنفسي .. تعلمت اكتم كل شي بداخلي .. تعلمت ما اسكت عن حقوقي ، أبويا مات و مافي أحد يدافع عني .. كنت متفوقة و الحمد لله في دراستي ، و علاقاتي كويسة مع الناس و الآخرين .. صح كتومة و هادية و كلامي قليل ، لكن ( كنت ) ما أحب ازعل أحد مني .. أختي تنتقدني لدرجة ، تعلق على نبرة صوتي هي و أخوي .. و على طريقة المشي حقتي .. ما تركوا شي .. كنت اسمع كلامهم بالبداية و اصدقهم ، لكن شفت مو عاجبهم شي .. بس يبغوا ينتقدوا و بسسسسس .. صرت اطنشششششششششش و انشغل عنهم و ما أرد عليهم أبدا .. . . صرت أشوف صحباتي و أخواتهم و علاقاتهم كيف .. و العالم الخارجي .. ( لإني عشت معاهم في السكن الداخلي ، زدت قرب أكثر من صحباتي و بعد عن أخواتي ) تمنيت أعيش الأحاسيس هذه مع أخواتي و أخواني .. و قررت إني اصنعها و أبنيها .. بأكمل دقيقة .. |
رد : *. أرغب بالفضفضة عن شقيقاتي .*
لما انخطبت ، صرت أقول خليني اتقرب من أخواتي أكثر ..
يمكن صحيح كلامهم ، أنا مشغولة دايما عنهم بصحباتي و عالمي الخاص ؟ من زمان كنت أجيب لهم هدايا ، لكن ما يجيبولي هما .. من زمان كنت أسأل عنهم ، و هما ما يسألوا عني .. . . جيت و قلت خليني ارتب أولوياتي .. 1. أمي و أهلي 2. زوجي و يمكن العيب مني أنا ، مثل ما قالت كريستالة إنه أكيد فيه سبب .. . . صرت كذا ، اتقرب من أخواتي و أخواني .. و افضفض لهم ، و افتح لهم قلبي ، و أسعى لهم في أي موضوع ، و أحسن إليهم .. أبغى تكون علاقتنا كويسة ،، و أمي كانت مبسوطة مني و هي تشوفني اتقرب من أخواتي .. و بديت أقلل من علاقاتي مع صحباتي و ابعد شوي .. أخواتي و اخواني ورثوا قساوة القلب من أمي .. أنا أخدت طبايع كثيرة من أبويا .. لكن تعلمت بعدين القسوة منهم ، بسبب الي عانيته و شفته منهم .. ودحين وصلت و الحمد لله ( لمرحلة التوازن ) .. . . أي كلمة كنت أقولها لهم بحسن نية .. صاروا ياخدوا أي شي أقوله ( بعد ما كنت انسانة كتومة في نظرهم ) .. صاروا ياخدوا كلامي ، و يفسروه مليون تفسير .. و كل شي أقوله ، لازم يروح للراس الكبيرة أختي .. كانت يوميا تتصل على بيت أهلي بعد ما تزوجت ، و تسألهم ( روح الطير إيش جالسة تعمل ؟ ) . . فقط للتوضيح ، عشان لا أحد يقول اني ظلمتها .. أختي الي اصغر مني كانت ترفض اي حد يتقدم ، لأسباب و شروط هي تبغاها .. قبل لا أمي تتوفى ، كانت أختي هذي الكبيرة تشجعها عالرفض .. و بعد ما أمي ماتت ، و أختي ترفض كانت .. أختي هذي شرشبيل .. صارت تجي تقول لي و لأخواتي .. أكيد اختنا هذه ، فيها عيب و لا خرجت بيوم مع واحد و لا و لا و لا .. و كلام كبييييييييييييييييييييييييييييييييييير جدا جدا .. و ليتها تسكت .. جلست تحاول تقنع أخواتي إنه أختي بترفض لإنها اكيد مو بنت .. و كلام الواحد يستحي يفكر فيه استغفر الله ، لو أخواني سمعوا منها بيقاطعوها نهائي و كيف كذا تتكلم .. و الحمد لله أختي تزوجت دحين و مبسوطة بحياتها .. . . للأسف ، زي كذا تجلس تتكلم عني ، أي شي من ورايا .. لكن أخواتي خوافات ، و يبغوا يتجنبوا شرها .. يسمعوا لها و يسكتوا .. . . أنا أدافع عن الشخص اللي هي تتكلم عنه .. عشان كذا ما تحبني و لا تبغاني أكون معاهم في تجمعاتهم .. لإني اخرب عليهم الجو .. |
رد : *. أرغب بالفضفضة عن شقيقاتي .*
ممكن إغلاق الموضوع ..
انا انتهت علاقتي بهم .. و قالت لي الصائمة لله يوما" .. حياتك و عالمك هما بيتك و أطفالك .. أخواتك و اخوانك فقط لهم حق صلة الرحم .. مو اكثر من كذا .. من خلال كتابتي هنا .. وجدت اغلب تفسيرات تصرفاتهم .. . . ملاحظة / امي زمان قالت لي .. ليش أخواتك بعيدين عنك ؟ شافوا منك شي ؟ وقتها كنت ادرس برة و قالتلي كذا بالتلفون لانه ماعمرها دقوا علي و انا في الغربة انا كنت ادق عليهم و اواصلهم و أعيد عليهم و اتطمن عليهم . . قلت لامي .. ( يا ماما .. يقولوا انك تمدحيني كثير قدامهم و عشان كذا يتضايقوا .. خلاص لا تمدحيني و لا تنتقديهم .. و لا تجيبي سيرتي بخير قدامهم و دلعيهم و امدحيهم دايم من بعدها .. و على بالي انه كذا علاقتي تتصلح بأخواتي و للأسف كنت غبية .. من بعدها صارت امي الله يرحمها تشتمني زيادة و تنتقدني زيادة قدامهم .. و تقسي علي بزيادة .. و هما صاروا يحرضوها عليا زيادة بدل ما تتحسن العلاقة صاروا بزيادة مبسوطين و يزيدوها اكثر علي و يحرضوها اكثر علي .. وقررت من بعدها اني ارجع علاقتي مع امي مثل ما كانت و مالي دخل فيهم .. و بكيفهم الي ينحرق ينحرق .. . . امي ماتت .. و عانيت من الوحدة .. عانيت من وجودي وسط عالم لحالي .. انظر للعالم بعين امي الله يرحمها . . لحد ما وقفت الحمدلله الان برجولي .. و لا احتاج لا لأخ .. و لا لأخت اذا يبغوني ؛ الله يحيهم و بيتي و قلبي مفتوح لهم .. . . انا حاليا باستريح من كل شي .. و ماخدة ( استراحة محارب ) لا اخرج و لا أقابل احد و بس بيتي .. شغلي .. اولادي .. نفسي .. المقربات جدا جدا جدا من زميلاتي و قروب العمل .. و عشان كذا الأوضاع مستتبة و هادية لكن باْذن الله باستعد للمرحلة القادمة من حياتي عن قريب . . شكرًا للجميع و اعتذر عن الاطالة و الفضفضة ممكن إغلاق الموضوع ! |
رد : *. أرغب بالفضفضة عن شقيقاتي .*
ربي يوفقك و يسر لك و يسعد قلبك حبيبتي
بالتوفيق ان شاءالله وربي يسمعنا اخبارك الطيبة |
رد : *. أرغب بالفضفضة عن شقيقاتي .*
يغلق.................
|
| الساعة الآن 02:49 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©