|
تبون تتزوجون وذا خطبنا ما تبونا ليش؟
السلام عليكم
يمكن موضوعي تكرر الف مره لاكن هذي المره الموضوع زاد عن حده انا شاب في 25 لي سنه ونا اخطب وكل ما خطبت وجت الشوفه الشرعيه وكل واحد فينا اقتنع بالثاني تجي الف مشكله بقول لكم اخر خطبه وش صار فيها قبل 5 ايام خطبو لي اهلي بنت تدرس بالجامعه علوم طبيه مو دكتوره لا المهم ما زالت تدرس خطبوها اهلي ووافقو وجت الشوفه الشرعيه ورحت بعد ما سألو عني اهلها حتى المطار سالو فيه اذا كنت اسافر او لا المهم انا رجال مستقيم ماعندي لف ولا دوران محافظ على صلاتي ولا اترك فرض ابدا ما عندي خرابيط شباب الحين من الدوام للبيت ومن البيت للمسجد والزيارات العائليه وشغلي الخاص فيني المهم بعد ما رحت وشفتها هي عاديه جدا ليست بشعه ولا جميله بس عاديه جدا عجبني فيهم النظافه وحسن الخلق طبعا الاب والاخوان من ابدع ما يكون قالي ابوها كلمها طبعا مكالمه وحده قبل اي شي يعني قبل الملكه انا قلت احسن اعرف شخصيتها على الاقل شي بسيط المهم بعد المكالمه ارتحت لها وهي كذالك لكن نجي مربط الفرس بعد الملكه كل شوي تتطلع لي بسالفه قامت تشوف نفسها لدرجه محد يتصورهاكن ما احد درس طب الا هي كل ما فتحنا موضوع تقول صعب التفاهم معك اانت ما تفهم يا الله شلون مخك كذا المشكله اني سكرتير واملك من الذرابه وفن الحوار بشكل ممتاز لدرجه اصبحت سكرتير بوزاره لدينا واصبحت من المكتب الخاص بالوزير المهم شكلي جدا مقبول وحالتي الماديه جدا ممتازه لاكن المشكله برزة الخشم المشكله ما تعرف تتكلم الا بشي واحد انت ما تفهم انت صعب التعامل معك لين طفح الكيل وقلت تراك ازعجتيني افتحيي اي موضوع وناقشيني فيه قالت انت وش تفهم فيه قلت انتي وش تفهمين فيه اتكلم بالسياسه تبين او الاقتصاد او الرياضه او بوشو كلها افهم فيها قلت انت ما تفهم بالطب قلت تراك مصدقه عمرك هذا ونتي توك بثاني سنه اجل اذا تخرجتي وش بتسوين قلت انتي تفهمين بشي واحد ونا افهم بأمو كثيره وعموما مو مشكله الي بينا مو طب ولا تجاره ولا سياسه الي بيننا زواج واسره وحب وتفاهم والاشياء هذي كلها ما لها اي قيمه اتعبتني واخر شي قلت لها مع السلامه انا براجع نفسي بصراحه لازم اعيد النضر ومن هذي الكلمه الا اليوم ما قلمتها واليوم تدق علي صجتني ووترتني بصراحه ورسايل وكل رساله تقول انا اسفه رد علي ونا مليت بصراحه انا قلت لكم انا مرتاح لها بغض النضر عن شكلها |
ليش انت ماتفهم هذا كل الزوجات كذا بس عجبتني انها قالتلك انت ماتفهم :) بالعكس هذا شيئ حلو احسن من تجاملك المفروض تتمسك فيها واللي عجبني زياده انهم سالو حتى الخروج والعوده فعلا هذولا ناس ينشرون ليش انت شايف نفسك سكرتير تحتك بالوزير:) تحياتي |
أولا.. موضوعك بعيد تماما عن عنوانك
ثانيا.. موضوعك مناسب لقسم المقبلين عالزواج ثالثا.. لاتضيق صدرك ياأخوي عادي تصير هالحركات كثير وبعدين توك متعرف عليها استحالة تصير في هواك على طول اصبر عليها شوي وبين لها ان دراستها ماتعني لي لك ولاشي هذي تخصها لوحدها وبس! ودراستها علوم طبية أحسه عادي ماهو ذاك الواااااو يعني.. وان الرجل ( مع اني ماودي اقولها عشان مانقص من حقنا ) اهتماماتهأكبر من المرأة سياسة واقتصاد و ووو الى اخره نقطة بسيطة حابة أقولها ترى بعض البنات اذا تملكت تحب تتفلسف شوي ماودها زوجها يسيطر عليها بقوة وتسوي نفسها فاهمة لاتكبر السالفة وضح لها انك تتضايق وانك ماتحب احد ينقص من كلامك وبس! وبعدين وشي تعيد النظر؟؟ تراه زواج زواااااااااااااااج ياأخوي الله ييسر أمورك وامونا أخوي خبير العمارة والله لو أقولك اهلي شلون كانو يسألون عن أي متقدم لي ماتصدق والحين ملووووووو صار يقولون ماراح نسأل كثير آآآآآه يارب رحمتك |
اخوي 00
البنت تلمح تبغاك تتكلم عن المشاعر 00 حبك لها 00 شوقك لها 00 هذا كلام المخطوبين 00 بالتأكيد هي لاتريد كلام لابالطب ولا بالسياسة |
يا ناس لا تفهموني غلط
هي لها فتره وهي كل ما دقت ما تتكلم الا عن الطب والطبيبات ونا ونا ونا وتقول مادري شلون بتمشي حياتي معك لدرجه حسيت اني ما اسوى ريال ولله العضيم انا ما اتفشخر قسم بالله لاكن الي ابي اوضحه من قصتي انها زي ما تفهم هي في امور انا افهم في امور ثانيه وكلنا نكمل بعض هذا قصدي لاكن تتكلم بشكل ولله محد يرضاه يا ناس الي ما عنده احاس ولله يموت قهر بعدين يا اختي الي ردت اول وحده وش تجاملني فيه لو انها مره كان مشيتها في كل مكالمه ترددها الف مره لين صرت اذا شفت رقمها حسيت بشي في قلبي عليها يا ناس انا انسان جدا بسيط ابي زوجه وبيت هي تراعيني ونا اراعيها بس ما بي اكثر من كذا |
أخي نواف
لا أشك في قدراتك ماشاء الله من خلال كلامك عن نفسك ابغى اوصيك اخوى نواف ، البنت من تنخطب اويعقد قرانها تصير في حالة توتر وانفعالات متلاحقة ومتقلبة ، ارجو ان تقدر تلك المشاعر فالبنت مشاعرها تختلف حاول ان تكون حنون وهادي وحكيم وبعيد نظر ، الله يوفقكم ويسعدكم بحياة زوجية هانئة ويبعد عنكم الشيطان ولك التحية |
لا تضيق صدرك يا اخوي 00
افهم من كلامك انها متعالية ومغرورة ؟؟ |
اخوي كاره الرياضيات ياخي ليش اسمك كذا يضحك
تصدق كل ما فتحت معها هذا الموضوع تقفله وتفشلني واخر مكالمه قلت لها عن هذا الموضوع وسألتها ليش دايم تصدني انا فيني شي ما رتحتي لي وش السالفه قلتها |
اقتباس:
الاخ نواف انا خبير ماني خبيره شف طريقك لا تصدم العماره ترى البنت لسا بداية فرحتها بالقبول بالجامعه تحياتي |
ولله يا الحبيب ما ندري وين البنات من الاولاد عموما اسف
|
اسمي يضحك عشان يوسع صدرك 000 ياكريم
يمكن انها من النوع اللي ماتعود يفصح عن مشاعره 00 اطلب منها احدى المرات ان تستمع فقط 00 وامطرها بوابل من الاشعار والكلمات الرومانسية التي تعبر عن حبك لها وبتنفرج معك شوي شوي مافيه امرأة ماتحب هالكلام صدقني مهما كانت << صح كلامي والا لا أخواتي النساء |
اقتباس:
جرب وأكيد بيتغير حالها أصلا بتصير مستمعة لك وبتنتظر كلماتك حسسها بأنوثتها وبرجولتك امممممممم وخلك حازم معاها شوي واذا قالت انا انا تنهد وسو نفسك منشغل << لمح لها بطريقة غير مباشرة وقل اكلمك وقت ثاني << صدقني بتضيع علومها حيرها معك عشان تلجأ لك كثير |
شوبارد
انا ما زعلت ليش يسؤلون عني هذا حقهم ونا اذا انخطبت بنتي الا مدري وينها بسوي كذا وازود بعدين تدرين ليش انا كتبته هنا منب غلطان يمكن انضم لكم عن قريب ما فيه احد يرضا بهذا الوضع وذا تبين اذكر لك قصه انا مستعد بتقولين نواف معذور وهو اصلاا مو رجال الي متحمل |
اخوي كاره الرياضيات
اختي شوبارد فشلتني كم مره جيت بتكلم معها وتعطيني كلام يخلي النفس تنسد |
اقتباس:
أنا أتفق مع أختي شوبارد بس صحين ذي مالي دخل فيها هي ادرى |
زي ايش 000 عطنا مثل عن الكلام حتى نعرف الوضع 00
ونحاول نساعدك ونعرف هي ايش تريد بالضبط |
وقف يا نواف
البنت لازم ترفع نفسها ماينفع انها تكون ذليله قدامك صدقني البنت جربها بالكلام الرومانسي وتعرفها والجد انت جربتها هي ردت عليك انت ماتفهم هل انت اول مره شفتها اقتنعت والان انت متردد اعترف احسن لك تحياتي |
شفيك يا خبير العماره ياخي بشويش
ياخي انا مقتنع ومرتاح لها لكن تصرفاتها شينه متكبره |
تقول انها بثاني سنه بالجامعه
يعني عمرها 20!!اذا افتراضي صحيح فكلها فتره وتكبر وتنضج وتعرف ان الحياة مو مظاهر وفشخره! كلامها نتيجه لصغر سنها وقلة خبرتها بالحياة,,يجي دورك هنا لتوجيهها كما تريد! الله يوفقك |
عمرها 22 سنه
|
بقولك شي أخوي
انت كيف شخصيتك؟ ترى أغلب البنات يحبون الرجل بمعنى رجل شخصيته قوية كلمته ثابتة واحد من اخواني كان يسولف علي بكل صغيرة وكبيرة أثناء الملكة واخوي هذا شخصيته وسط لكن معها راح فيها وهي مستقوية بقووووة عليه لدرجة بدت تلعب عليه وكل ماجا من عندها قال تقول انا وانا شكلي ماقدر اسعدها حياتها غير عني مدلعة ومغروروة! عاد اخوي غالي علي مابي احد يلعب عليه ومهما كان هو رجال السيطرة له وصرت معااه مع اني تعبت ومرة جرحني وقالي انت تغارين مالك دخل بحياتي وتزوج ولازال معها كنه خكري.. وصار موقف منها قوي وتذكر كلمة انا قلتها له وسواها على طووووول تصدق صارت تبكي تحت رجوله تقول ارضى علي اخاف تطلقني والله لأسوي اللي تبي بس ارضى عني!!!! << وهي طبايعها معه اول كنها رجال ماسكة كل شي!! |
اخوي نواف
تعوذ من الشيطان بقولك شيء مهم انت تقول انك ارتحت لها وهذا شيء حلو وطيب لكن من غير المعقول انك تصرف النظر عنها علشان هالنقطة البسيطة خصوصا انها اعتذرت منك وبعدين صدقني الرجل يقدر يغير بشخصية زوجته بشكل غير طبيعي وانا اقولك هالكلام من واقع انت لمح لها مره مرتين على انك ماتحب انها تتكلم عن نفسها وتفلسف وتميلح وتقلل من قيمة الطرف الآخر اذا مافهمت صرح ومستحيل تستمر على هالأسلوب وعلمنا وش يستجد معك الله يوفقكم ويهنيكم ويسعدكم |
ولله شا شوبارد انا وضحت من البدايه
ماعندي لف ولا دوران لا في حياتي ولا في قراراتي يعني قلتلك انا اتفاهم واناقش واخذ برئي الطرف الاخر اذا اقتنعت فيه مشيته او اذا ما قتنعت فيه ارميه ورا ظهري واصير صاحب قرار وهي تعرفني مستحيل اقتنع بأي شي الا بوجود شي يستحق الاقناع وعموما انا انسان مبدئي الحوار اقنعني او اقنعك اما الخرابيط الي ما تدخل العقل مستحيل تدخل عقلي |
استخير الأول ..
واديها فرصة أخرى .. وقول لها على مآخذك عليها .. انعدلت .. أهلاً وسهلاً ما انعدلت ... فيه ألف غيرها أكره الناس اللي شايفين حالهم ع الفاااضي :29: أختك حسابات الزمن |
اخوي نواف صاج والله اغلب البنات(هل الايام) لى يدرسون طب شافيين نفسهم حتى لى ما كملو كورس >>>>>معا انا صار لى 5 سنين ادرس و البنات عادي الله يساعدك انت كلمها آخر مره بجدييه و قول لها يمكن هى اخر مره اكلمج فيها
|
السلام عليكم
يا اخي الكريم اذا انت تقصد بأنها مغرورة فقول لها بأنه صفة الغرور و التكبر انت ما تحبها و بين لها انه مواضيعها مو طيبة لكم و غير نافعة اذا خطيبتك تكلمت عن الطب و قالت لك انا و انا و انا قولها هالكلمة: طيب>>>>تلميح بأنك كلامها مو عاجبك ولا تنسى نصيحة الأخوة و الأخوات الكلام الرومانسي له دور كبير تصدق اخي اللي خطبتها و ملكت عليها كنت كل ما اكلمها و اقولها شيء تقولي ابشر او تقولي ولا يهمك حاضر لكن مافي نصيب ................ الله يوفقك و يسعدك و بشرنا بالأخبار الطيبة و دمت بخير |
اللي فهمته من شخصيتك انك جدي شويه ... خف على البنت ..حاول تنكت معاها..امزح .. لا تلكلمها كأنها من الشباب ..ولاتخلو كلامكم كله مناقشات سياسه وطب اجتماع علوم حشى مو مخطوبين الا تقدمو على تخصصات .. هههههه معليه انكت معاك .. مثل ماقالو الاعضاء فرفش معاها غرقها كلام حلو <<< لكن من قلبك لانه بيطلع ماصخ لو العكس .. ولاتسوي حركة التنطيش وعدم المبالاة وماترد على الجوال وعلى رسايلها لانها زوجتك .. وترا كلها مشاكل مملكين ولسا بالبدايه .. لاتخاف الله يهدي سرك يااخي الكريم |
أخوي أول شي أسأل الله سبحانه
أن يبارك لك فيها ويجعلها من نصيبك وقرة عين بالدنيا قبل الآخرة ... اذا كنت عقدت القران .. وهذي مشكلتك لي ملاحظة بسيطه تحمل ودوس على نفسك وسوها :d شوف اخوي ماراح اتفلسف عليك بس البنات عالم حلو وغامض ولازم تكون فنان وتدخل عالم البنت وتتربع عليه بلا منازع :22: % كل انسان له اهتمامات في حياته يحبها وتكون مثل المفاتيح اللي تخليك تدخل عالمه الخاص باين أن البنت هواها وميولها بالطب والامور الانسانية والعطف والحنية ... ماعليك أمر لا تكره الطب .. اصدمها !!!! كيف ؟ حاول تقرالك عن موضوع طبي حلو وبسيط .. ورح أسألها وأخذ رايها وناقشها بالطب :22: :23: ادري انك كرهت الطب وسيرته من هالبنت بس ماعليه دوس على نفسك وأنت الربحان بالنهاية تكلم معاها عن هواياتها وحبها للطب ... وكل ماتكلمت بشي بالطب تعجب واظهر لها انفعالات وانك مستانس لطريقة طرحها وكلامها وتخصصها .... صدقني راح تحبك وتحب تسولف معاك بعدين اهي راح تردلك الكره وتسألك عن اهتماماتك وذيك الساع عطها دورات بالاقتصاد والرياضة والساسة وطلع روحها تجمل شوي انت تقول شكلها مقبول وعاجبك واهلها خوش ناس حاول تكسبها انت بتحدي حلو والحل بيدك واي شي تبيه او تطورات بلغنا أول بأول :30: |
أنتبه .. لا خير في امرأة ترى نفسها على زوجها , وتتكبر عليه , بسبب تخصصها ..
كن معها صريح , وأرها شخصيتك , وبين لها , انه انك منت راضي عن ترفعها عليك .. فإذا رضخت فنعماهي , وان لا .. فاشتري راحتك من الان .. |
هذا وهي علوم طبيه ماهي طب
العلوم الطبيه مختبرات وتحاليل واشعه اجل لو كانت طب ويش سوت اعذرني اخي بس من جد خطيبتك قهرتني انا مااحب الغرور وشوفة النفس وكون انها تصتصغرك هادا كمان شي تاني واللهي مره صعبه على الرجال ياجماعه انه تيجي وحده تقولوا انت ماتفهم شي بصراحه احسها استحقار واذا هيا من قبل الزواج كده اجل بعد الزواج واذا اتوظفت ايش بتقول عليك من رايي اعطيها فرصه بل فرص قلها غيري اسلوبك معايا كلمها بالذوق والهدوء واذا مااتغيرت استخير بنا في اتمام الزواج او لا وربنا يكتبلك اللي فيه الخير |
واليوم تدق علي صجتني ووترتني بصراحه ورسايل وكل رساله تقول انا اسفه
رد علي <<<<<<<ههههههههههههههههههه خافت وحست انك بتتركها .. شكلها تندمت والله .... تبي الصراحه الغلط راكبها من راسها لرجليها ... انت والله ماشاء الله عليك اللي قدرت تتحمل(( انت ماتفهم وانت ايش تفهم )) ... الصراحه ماعندها اي ذوق في الكلام .... والله انه عيب عييييييب مدري شلون عندها الرجأه تتكلم كذا وهي لسه في فتره الخطوبه .... اما انها تفكيرها واسلوبها مانضج كفايه ( مع انه والله 22 سنه مو صغيره )) او انه هذا طبعها هي مغروره وشايفها نفسها .. بس غريبه حتى لو كانت البنت شايفه نفسها ماتقول الكلام م الجارح هذا لخطيبها .. كلامها واسلوبها قوي والله .. الحمد لله انها مو داخله طب بشري لاتشوف اكثر بعد .. والله عجايب اذا انت ملكت عليها الله يعينك ويساعدك لازم تصبر وبأذن الله تتغير وتقدر تغيرها .... واذا في فتره خطوبه ومافيه عقد ماالومك اذا فكرت مره ومرتين وعشرين مره علشان تنهي الموضوع ... لكن نصيحتي انه ضرووووووري منك توضع حد لتصرفاتها وكلامها ...اذا مااحترمتك الحين وفي البدايه وقدرتك وراعت مشاعرك متى راح تهتم .... لازم توضع حد وبالنسبه لعنوان موضوعك وموضوعك اصلا احس فعلا مكانه مو هنا .. لأن اللي خخطبتها اصلا مو عانس وانت مو عانس :d صح والا لا ؟؟؟ حنا العوانس يخطبونا وهم اللي ينحاشون .. اختك اللي هي انا شافوها لليوم سبعه وانحاشووووووا مو انا اللي رفضتهم .. ياعمري على حال هالعوانس ... حتى ومالهم علاقه بالموضوع يدق عليهم وهم سبب المشكله بالتوفيق والله يعينك |
أعقد شخصية هي شخصية طلاب العلوم طبية.. ليه أنا أقلك..
مضيعين المشيتين لاهم أطباء ولا هم طلاب علوم.. فتلاقيهم يبعدوا من طلاب العلوم ويتلصقوا بطلاب الطب.. ويلبسوا لباسهم يعني يسوا نفسهم أطباء.. ويقعدوا يتفلسفووووا يحللولك المعلومة بطريقة يحسسوك إنك ما تفهم ولا شي ولا أحد يفهم إلا هم.. ويبينولك ميزة دراسة تخصصهم أنه لا يقل عن الطب أبداً بأهميته وحاجته.. ولو نفسهم يدرسوا طب عادي يدررسوا سنتين برة يصيوا أطباء لكن همه علوم طبية بمزاجهم. لكن في الأخير هم بشر لهم نقاط ضعف ولهم مشاعر إنسانية.. تستطيع تذويب هذا الجليد بكلمتين حلوين سبقني بهذه الفكرة أخونا المجدد.. يعني ما راح ينقص من عمرك شي لو كبرت راصها شوي.. شوي بس.. يعني إسئلها كم سؤال.. إمدح ذكائها شوي قول ما شاء الله عليكِِ تخصصك حلو.. عشان تفك العقدة اللي تكلمنا عنها من قبل شوي في المقدمة.. لا تتوقع أن تجد شريك يناسب هواك وخيالاتك يجب أن تتحدى نفسك لكي تصل إلى قلبه.. أعرف وحده دارسة هذا التخصص وتصرفاتها نفس تصرفات أختنا في الله خطيبتك.. تزوجت من شخص نعرفه أكبر منها بسنه وهو مو داري راصه من رجله وين.. المهم..دارس إدارة أعمال.. فوجئت بخبر الخطبة لأنهم في نظري القاصر لا يتفقون أبداً.. وسألوني أهله عن رأيي قلت إبنك أهبل وهي قوية.. سبحان الله.. لا أعرف تفاصيل حياتهم.. لكني لاحظت عليها تغير كبير أصبحت تضحك وتتكلم أكثر من أول.. هو من النوع اللي يمشي كثير ما يدقق ويجاملها ومحترم شخصيتها حتى أهله.. يعني عاملين لها إعتبار والصراحة هي ما تؤذي قليلة الكلام أحسن حتى محد يمسك عليها شي.. عاقلة ما تقول شوف أمك وأختك قنوعة ما شاء الله.. ورضية بأهله تجاملهم وتفرح لفرحهم وتحزن لحزنهم.. شوف سبحان الله في توازن يعني هي تعقله وتخليه رزين وفعلا عاش الدور وصار رجال.. وهي خففت جمودها لأنه هو شكله طيوب وضحوك وماشي على البركة. بإختصار.. المفروض تفخر بزوجتك أنها واثقة بنفسها.. فهذا دليل على ثقتك بنفسك.. وتحب الخير لها.. إصبر عليها ولمح!! واللبيب بالإشارة يفهمُ.. بمعنى لو بدأت أنا وأنا قول إيوه هاتي أسمعيني قلولي إيش سوت زوجتي إنجازات أطربيني... بمزح رح تنخ وتدلع وتقول تتريق عليه ؟!!! قول لا والله بس زهقتيني بأنا وأنا برضو بمزح.. ما تدري يمكن تبغى تثير إعجابك ما عندها سالفة غير اللي درسته.. وبعدين مثل ما إنت تعصب من الأنا حقتها هي أيضا تعصب من الأنا اللي فيك.. تجلس تتكلملها بشتى المواضيع فما تقدر تناقشك فتسكتك.. والخيار يعود لك.. تقدر تروضها وتكبر راصك.. أو تروح تدورلك علة وحدة في عالم الكمال.. تلاقي عيوب الأولى حسنات في الثانية.. وحسنات الأولى عيوب في الثانية.. وتدخل بدوامة.. لين تعنس.. هيهيهيهيه الله يوفقك.. |
احس خطيبتك تريد تتفشخر شوي عليك عشان تحسسك بقيمتها ظنا منها مكانتها بتزيد في نظرك وبتفرح انك حصلت بنت زيها
ونفس الوقت متوترة وخايفة من المستقبل وماتريد تضيعك من يدها بدليل الرسايل والتاسف فاذا انت مرتاح لها بين لها الاشياء الي ازعجتك واذا تغيرت خير وبركة واذا لا الله يوفقك |
اقتباس:
بس واضح انها متمسكه فيك ,,بس المسكينة تبغى تبين لك إنك اخذت وحده مهمه بس ماعرفت توصل لك المعلومه!ويمكن هذا اسلوبها مع اهلها وزميلاتها واعتقدت انك مثلهم! ومثل ماقالو الاخوان حاول تفهمها انك مليت من اسلوبها في الكلام عن نفسها والتقليل من شأنك!! الله يوفقك |
والله ياخوي ماأملك الا اقول لك:
الله يجعلها من نصيبك اذا كان فيها خير لك ..ويسعدكم ويوفقكم .. واذا كانت شر لك ..الله يصرفها عنك ..ويعوضك باللي احسن منها .. |
اللي هذا اوله ينعاف تاليه
هججججججججججج قبل لايطيح الفاس بالراس |
أخي أرجع وصل ِ الإستخارة في إكمال الطريق أو الإنتهاء
أسأل الله لك التوفيق والسداد |
واضح من كلامك ان انت تتكلم عن نفسك كثير وهي تتبع نفس اسلوبك عشان تحسسك انها مهمه وفاهمه مثلك طول بالك ترى الزواج محتاج طولة بال وبعدين اذا غضيت النظر على شكلها لاتجلس تعايرها كل شوي وتذكر موضوع الشكل حتى لوبينك وبين نفسك كل ماعبرت عن رايها او قالت شئ ما جازلك اخوي ترى هذه زوجتك وام اولادك انشالله وما فيها شئ لوهي حاسه انها مهمه وشكرا
|
واضح من كلامك ان انت تتكلم عن نفسك كثير وهي تتبع نفس اسلوبك عشان تحسسك انها مهمه وفاهمه مثلك طول بالك ترى الزواج محتاج طولة بال وبعدين اذا غضيت النظر على شكلها لاتجلس تعايرها كل شوي وتذكر موضوع الشكل حتى لوبينك وبين نفسك كل ماعبرت عن رايها او قالت شئ ما جازلك اخوي ترى هذه زوجتك وام اولادك انشالله وما فيها شئ لوهي حاسه انها مهمه وشكرا
|
| الساعة الآن 06:39 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©