|
وضعي الاجتماعي!!!
السلام عليكم ورحمة الله وبركاته..
ادخل في الموضوع على طول انا متزوجة من رجل متزوج عانى كثيرا من زوجته وام اطفاله السليطة اللسان والسيئة الاخلاق هو قبيلي وانا لا..كان هذا الشيء يعلمه من قبل الزواج وقبل الخطوبة وذكر ان الله لم يفرق بين احد من خلقه الا بالتقوى وان هذا الموضوع لايعني له شيئا حتى لو كان لاحد من اهله اعتراض هو صاحب الموضوع وهو راضي به..كان استمراري بالعمل شرط من شروط الزواج قبل به..وتم زواجنا بمباركة اهم أهله ماعدا اخوين من اخوانه واخت واحدة ولكن مثل ماقال هذي حياته وليس لهم علاقة..مع انه من تملكنا بدأت تظهر بعض المشاكل الغريبة وشكوكه بس كنت اقول بكره نتزوج ويعرفني ونبني الثقة شوي شوي..استغلت زوجته نقطة اني مب قبيلية وبدأت تعايره بي وباطفاله اللي بكون انا امهم وهو ابوهم وبدت تسوي مشاكل كثيييييرة وكلام كثير وترسل رسايل وكلام كثير وصل حد القذف ومع هذا قلت لازم اتمسك واتحمل واصبر ولا اخرب حياتي بيديني..ومادام انه يحبني واحبه وحياتنا هادية ماراح نستسلم للضغوط.. راتبي اكثر من راتبه اجبرني اخذ قرض اطول مدة واكبر مبلغ على راتبي وخذ 90% منه وشرا سيارة احدث موديل ونص الباقي حطيته على مبلغ عندي وشريت بها اسهم والنص الثاني صرفها على اي شي وكل شي..بس ماكنت ابي اهد حياتي واسوي مشاكل جوا البيت ويكفي مشاكل برا بطاقتي الصراف خذها مني بحجة انه هو اللي يكون برا وماراح ياخذ منها الا اذا خلص راتبه..راتبه اقل مني بس لي الحين 9 شهور متزوجة عطوري هي عطوري ملابسي هي ملابسي ولا فيه شي جديد اشتريه الا اوصي امي او مثل مرة طلعت للسوق من بيت اهلي معاهم وحطيته عند الامر الواقع بعد ماحولت الفلوس لحساب ثاني حق اهلي بواسطة االتلفون واصرف من بطاقتهم واتحجج اني نسيت بطاقتي بالبيت وارجع اوريه اغراضي يقول انتي بتزنقينا هالشهر من سبة مشتريات مالها داعي.. عياله اي وقت يجيبهم واحيانا اربعاء وخميس وجمعة ويوديهم يمشيهم ويخليني ببيت اهلي على باله انها وسيلة ترفيه لي..ويتحجج ان امهم متمشكلة معاه وجالسة عند اهلها.. ومع هذا عمري ماعاملت عياله الا معاملة زينة.. بعد 9 شهور لقيت نفسي مطلوب مني اسدد قرض لمدة 5 سنين مااعترف اني خذيته علشانه وانه ضغط علي علشان اخذه وقال لي يوم ناقشته فيه ان السيارة اعتبريها هدية زواج..ومطالبة بايجار شقتنا لانه مايقدر من راتبه بس وراتبي علشان كذا يبيني ابيع اسهمي كلها واساهم..مطالبة اني كل مابغيت شي طلبت منه فلوس او اذا بغيت غرض للبيت جمدني كم يوم وجاب الغرض بوقت على مزاجه علشان بس يفهمني ان اي شي ابيه مب لازم بالوقت اللي اطلبه فيه..مطالبة اني اتحمل رسايل قذف وسب من زوجته لجوالي بحجة اني انسانة محترمة وماراح ارد عليها مثلها..مطالبة اني اشارك معه بمصروفات البيت بحجة اني اشتغل ولابد من التقصير مع ان اشغالي مااقصر ولله الكمال بس احسن من حريم كثير جالسين بالبيت مايشتغلون..ومطالبة اني أأجل الحمل علشان "نستمتع" انا وياه ومايكدرون علينا الاطفال وماله داعي اراجع طبيبة مادام ان من الله هالفترة ماحملت!!وملتزمة بمبلغ شهري احوله لاهلي كل شهر مساعدة مع ان كل شهر يضغط علي مااحول او انقص بحجة انهم مو محتاجينه مع انه مايدري عن الخافي وبحجة انه مايرسل لاهله شي!! وباخير لما وقفت وقلت له لا..وخذيت بطاقتي وغيرت الارقام وقلت ماراح ادفع من اليوم ولا ريال انت ملزوم وانا كنت اساعدك الين توقف على رجولك واساعدك علشاني متمسكة بحياتي واساعدك علشان الفلوس تجي وتروح..قال انا مابي وحدة مو متعاونة..سامحيني احبك واموت فيك بس الضغط الاجتماعي كثير علي مع وحدة ماتبي تساعدني!!!! وضعك الاجتماعي مايساعدني!!لاتزعلين مني لازم ننفصل هاذي مو نظرتي هاذي نظرة المجتمع!! احبك واموت فيك بس برجع لزوجتي وعيالي واتحملها علشان عيالي وانتي بنفصل عنك..ويمكن مااتحمل وارجع لك ويمكن مانتطلق ويمكن نستمر بس وضعك الاجتماعي سبب ضغط علي كبير وهاذي مو نظرتي هاذي نظرة المجتمع..بس اوعديني تبقين على اتصال يمكن نرجع لبعض وصدقيني احبك!!!!! انتي خسرتي وانا خسرت وخسارتي المعنوية اكبر وانا الخسران..مافيه مثلك انتي تناسبيني خلقا وتعامل وقلبك ابيض وخفيفة دم واحبك واموت فيك بس مااتحمل!!! !!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!! قلت له لو ماقلته اليوم يمكن تقوله بكرة يمكن تقوله بعد سنة او سنتين..!! تعبانة نفسيا ومتضايقة وعايشة حياتي مثل العادة اداوم واجي واجهز اغراضه عادي واي شي فيه فلوس اطلبه يقول ماعندي..حتى الخبز طلبته يومين وماجاب يقول ماعندي!!وايامي ماشية عادي يوم عندها ويوم عندي بعد مارجعت.. ماني طايقته وهو يتقرب مني وكل شوي يقول لاتزعلين هذا شي مو مني من المجتمع..وقرار الانفصال موجود بس متى مدري!! مقدر اتذكر ولا موقف حلو مااقدر اتذكر الا الاشياء الشينة والكلام الجارح اللي كان يقوله بكل هدووووء.. وضعي الاجتماعي متزوجة من شخص متزوج متعلمة هادئة الطباع طيبة او بالاصح مغفلة كنت احط بين عيوني ان مافيه شي يضيع عند الله ومتأكدة من هالشي اللي شفته ان حقي ضاع عند الناس.. انسانة تقدر الحياة الزوجية بجدارة وباعترافه تحلم ان تكون أم حرمها هالشي وكل يوم يقول بكرة ان نراجع والحمد لله ماجبت لهالدنيا طفل يعاير "بوضعه الاجتماعي" واول واحد يخجل من وضع امه هو ابوه نفسه!! انا قلت له وضعي الاجتماعي مب شين..الحمد لله وضعي الاجتماعي ممتاز والحمد لله مرضية ربي وحكمتي في الحياة اني ابات مظلومة ولا ابات ظالمة المشكلة كلها ان وضعي الاجتماعي "ماناسبك"!! مابي اتكلم فيه الله يهديه لكن كنت ادعي له وهو انسان مب سيء لكن مافيه احد كامل..طباع مو زينة لكن كان عندي امل يتحسن وكان في طور التحسن للافضل.. عمره 36 وانا 27 ..لكن عاملته مثل اخته ومثل امه ومثل صديقته ومثل بنته.. سألته من بين الدموع امااااااااااااانة وش ماعجبك فيني غير وضعي الاجتماعي؟قال ولا شي..وسكت وقال خلاص اسكتي.. ادعو لي واعذروني على الاطالة.. |
ما يستاهل دمعة من عيونك..
اتركيه هو استغل وضعك ربي يعوضك بواحد احسن منه.. عشان كذا دايم نقول تزوجو من نفس طبقتكم التعليميه والماديه والاجتماعيه تفاديا لهذه المشاكل.. لكن زوجك استغل وضعك استغلال غير طبيعي ورح يضل طول عمرك في كل موقف يقول وضعك والضغط وماعرف ايش فنصيحتي اتركيه فورا قبل ماتنجبين وادعي ربك انه يعوضك بالرجال اللي يحترمك ويحترم اهلك ويحطك على راسه من فوق.. |
الله يعينك اختى استخيرى الله ............................
|
زين اختي انتي ليش وافقتي عليه دامه متزوج وعنده عيال ومتزوج مسيار ومعاشه اقل من معاشك
وانتوا من طبقات اجتماعية مختلفة .............خاصة في مجتمعنا المفروض كنتي تسألين نفسك ويش السبب اللي يخليه يتزوجك وويش السبب اللي خلاك توافقين واللي المفروض اي واحدة تفكر فيها قبل الزواج الف مرة اختي لا تخدعين نفسك وانظري لحقيقة الأمور وعندها ستعلمين ان راحت البال كنز . |
زوجــك مع الاسف ما تزوجك حب لسواد عيونك
لكن هدفه الاول والاخير هي المادة وبعد ما وهقك قال نبي نتفارق وصــدق اخوي البلحه بالنفس عشان كذا دايم نقول تزوجو من نفس طبقتكم التعليميه والماديه والاجتماعيه تفاديا لهذه المشاكل .. وقالوها الاطباء النفسيين والمستشارين الاجتماعيين وزادوا عليها بالاختيار مايقارب الافكار والاعمار ولكن من يستفيد ويفيد غيره الله يكون بعونك اختي ويعوضك انسي انه يحبك لشخصك لان لو انه يحبك وصادق معك ماكان يجرحك ويستغلك لابعد الحدود |
تزوجته لاني اعتقدت انه انسان يخاف الله من شكله ومن كلامه واكتشفت بعدين انه منافق وكان يتحجج انه محسود
ايام يكون اكبر عابد واحيانا ينطمس على قلبه..مااقول عاصي لكن غافل.. قلت اهم شي الزوج الصالح وكل شي ثاني ماراح يكون له قيمة يمكن ماعنده شهادة بسبب ظروفه العائلية مثل ماعرفت منه قبل الزواج بس ماكان هذا ذنبه..عقليته وحبه لتطوير نفسه للافضل عجبني وطمني انه بيطور وضعه في المستشقبل اذا ساعدته انا وساعدتنا الظروف ماكنت اعرف انه متزوج مسيار الا بعد ماتزوجت اعترف لي وقال موضوعها منتهي وانا تورطت وخلاص موضوعها محد يعرفه زواجه مب عيب..بالعكس كنت اتوقع انه مظلوم وانه محتاج شخص يفهمه ويعيد ترتيب حياته من جديد واقنعني ان الفروق الاجتماعية ماتهمه.. امه واخواته طيبين وماشفنا منهم شي الى الحين يسألون عني ويتصلون علي ويوصونه علي وعلى بالهم حياتنا تمشي طبيعي وقبل هذا كله اســـــــــــــــــــــــتـــــــــــــخــــــــــ ــرت استخرت قبل الملكة واستخرت بعدها استخرت لما عرفت بزواجه المسيار واستخرت في كل موضوع كنت اتخوف منه في حياتي معه وهذاني استخير في الطلاق والله يقدم الخير ويكتبه لي ويعطي كل انسان على نيته |
والله ما عاد فيه رجال يستحون على أنفسهم ... مثل هذا الرجل نخشى أن يأتي يوم القيامة وشقه مائل بسبب عدم مساواته بين زوجتيه وكذلك بسبب استغلاله البشع ..... اختي اذا كان زوجك بهذه الصفات ويدندن على الوضع الاجتماعي والكلام الفاضي حقه .... اتركيه ولا حسافه عليه...
|
انا ما اقصد الطلاق لأن موضوع الطلاق هذا انتي تحددينه ... انا اقصد لا تعطينه وجه ..... واستخيري قبل كل شي....
|
|
هو استغلك استغلك مايبي لها تفكير الأمر واضح ويذكرك دائما بوضعك الإجتماعي ليذلك ويأخذ منك أكثر وأكثر اتركيه قبل تتورطين معاه بأولاد
|
اختي الحبيبه
اعانك الله وفرج همك ويسر امرك اسمحيلي اقولك كل شي لو زاد عن حده ينقلب لضده وانتي افرطتي في عطائك وثقتك فيه وسلمتيه مفاتيح امرك ومالك وانتي توك لك 9 شهور ونسبتي انه السنه الاولى زواج سنه تعارف وتقابل بيئات وشخصيات مختلفه قلبي البكاء على الحليب المسكوب لا يجدي ولا ينفع وهذاا غرضه منك واضح الابتزا ز والمال فاستخيري الله اولا واخيرا وحاولي النقاش معه بهدوء واخبريه انك حولتي حسابك باسم اهلك وانت مكلف تصرف علي وفلوسي ملك لي انا بكيفي اعطيهاا ان رضي فالخير واعرفي انه شاريكي وان قالك لا فاسمحيلي هذا شاري فلوسك والي ياخذ انسان عشان شي يتركه عشان غيره استخيري الله ولا تضيعي حياتك وتهدري وقتك مع من لا يستحق |
السلام عليكم ورحمة الله وبركاته..
تصدقون صار لي 27 ساعة مانمت فيها الا ساعة وحدة.. ادعي الله واستخير يدلني ويقدر لي خير الامور اتصل علي قبل العصر يقول وش اخبارك ووش جديدك ودخل في موضوع ان الانسان لايعرف وين رزقه.. مثلا انا اخذت بطاقتي منه وغيرت ارقامي السرية قبل كم يوم واليوم الصباح زوجته الاولى عطته بطاقتها..يقول رجعتها لها وانا اضحك واقول في نفسي سبحان الله مايدري الانسان رزقه وين؟؟!! مرة اقول هو بس يبي يلوي يدي ويستغل سالفة الوضع الاجتماعي وياخذ اكثر ومرة اقول يبي يقول لي شوفي على سوء خلقها عطتني بطاقتها وسلمتني القفل والمفتاح..مدري وش في باله.. قلت شف ياابن الحلال..ان كاني قصرت معك في شي سامحني.. اللي بيننا مثل ماقلت بينتهي اليوم ولا بكرة ولابعد سنة ولاسنتين.. انا تزوجت وتحملت اشياء كثيرة علشان يكون لي بيت وأسرة ماعندي استعداد امشي طريق ادري اني برجع فيه.. جلس يقول لاتكملين انا مقدر استغني عنك واذا انا رخيص عندك وتقدرين تستغنين عني انا مقدر ومن هالكلام.. صدقوني الوضع تعدى التأزم النفسي الى التعب الجسدي.. احس بصدري عبررررة مارضت تطلع.. وسبحان الله العظيم من اسمع صوته يمسكني صداااااع موطبيعي ومن اسكر كن ماجاني شي.. قال بمرك بالليل بعد الدوام نتفاهم قلت ماعندي شي اتفاهم معك عليه..انت اللي حطيت النهاية.. وبعد جهد قال خلاص ماني مارك بخليك هاليوم ترتاحين بس بشرط لاتفكرين بالنهاية.. انا اقدر اتحمل كل شي ونرجع نعيش حياتنا سوا طبيعية..وانا عارف ان اخذك للبطاقة وتغيير الارقام مجرد حركات انفعالية وردود فعل اذا مرت هالفترة بيرجع كل شي طبيعي..قلت لا.. هذي حقوقي وماراح اتنازل عنها ولاتحط في بالك ان فيه شي بيتغير..قال انتي ارتاحي اليوم ولاتفكرين بالنهاية وبس..هذا طلبي.. واذا استغنيتي انا مقدر استغنى حبيت احطكم في الصورة وشكرا لردودكم وان كان في بعضها شي من قساوة الواقع وشكرا لدعائكم وجزاكم الله عني خير الجزاء الله يفرج همي ويقدر لي خير الامور |
ابتلاء قد كتبه الله عليك .. لتضافي بذلك ..إلى رصيد ( العطاء عند المرأة) .. ويضاف ذلك الذي ظن أنه رجل .. إلى قائمة أولئك الذين ..يمنحون أنفسهم كل الحق باسم الشرع .. وهم في الحقيقة أول من خالف الشرع وتجبر!!! إلى كل أولئك الذين يتنطعون باسم الشرع .. ويعجبون.. ويتساءلون .. (لم الفتاة قد أضحت لا تقبل بالمعدد .. لم كل ذلك الغرور .. قطارها قد مضى ..ولازالت ترمق الثرى !) ماذا تنتظر؟؟؟ إلى أولئك أقول : أتدرون أي شي تنتظر ؟ تنتظر ..الرجل ! فإن مر بينكم ..فأبلغوها ..ولكم كل الثواب ..وأعظم الأجر واقعنا للأسف ينطق ويقول : كم من رجل قد ودعته الرجولة ..وانطلق في طرقات الحياة متغافلا عن حاله ..يبحث عن أنثى ..ليضيفها إلى قائمة ..المطلقات ..تكرما منه حتى لا تبقى عانسا !!!!!!!!!!!!!!!!!!!!!! أفلا رحمتها ..وتركتها بثوب عنوستها ..خير لها ..من قيل وقال ..وكثرة السؤال!!!!!!!!!!! |
أختي الحبيبه ..
رجلا كهذا لا يعادل ثرى تمشين عليه .. ولا يستحق أن يشاركك ..هوائك وفضائك .. الرجولة أن ودعت صاحبها .. لا يُنتظر منه إكرام ..وإن طال الزمان |
ماأدري .. كأنك تشكين منه ومن الوضع اللي صاير بينكم وبنفس الوقت تمدحينه
وتبررين موافقتك عليه من البداية بأنها في مكانها ومافيه أي مشكلة بالنسبة لك ؟!! إنتي غلطتي من البداية مهما كان التوافق في الزواج أمر مهـــم لكن مانقول غير نصيب وربي كاتبه لكم وضعك الآن معه لازم يتغير ، استغلاله واضح لك وحتى تصرفاته وقراراه اللي يقولك عنه بالانفصال كأنه إنسان صغير مايثمّن كلامه !! لازم تكون شخصيتك أقوى وأوضح من كذا ، لا تصيرين مسالمة لدرجة السذاجة !! وكرامتك فووووق كل شي خليها استخيري ربك والله يكتب لك الخير وواجهيه بحقوقك كاااملة ولا ترضين بغيرها مهما كان كل شي ممكن نتغاضى عنه إلا جرح الكرامة من أقرب الناس لنا الله يوفقك وييسر أمرك ويكتب لك الخيـــر |
والله اختي تأثرت بحالك كثير, اعرفي شي واحد يا اختي الكريمة ان هذا ابتالاء. " إن الله إذا احب عبدا ابتلاه" الله يثبتك ويهدي زوجك الي ما يحمل شيء من الرجوله.. والله الرجال هالايام وفي هذا الزمن نوااااااادر. لماذا يا كل من اتصف بهذه الصفات وكل من يقراء كلامي ألا تشعر بالعار وانت رجل مكلف بحماية اسرتك والصرف عليها من مصروفك وجهدك. اسرة تترعرع على حب الله وحب النبي وحب الخير. انتم تصنعون الاجيال فإذا كان الاساس فاسدا فقد خرب.!!!!!!!!! الله وفق اختنا وافرج مصيبتها وأكشف همها وأقل عثرتها وانشر رحمتك عليها وعلينا وعلى كل المسلمين يا رب العالمين...... اصبري فجزاء صبركي عند الله..... |
هذا الذيب اللي كل الناس تتكلم عنه.. يقولج لا تفكرين في النهايه .. لأنه بعده ما شبع .. ما شبع من الفلوس .. ما شبع من المتعه .. ما شبع من الإذلال و الامتهان.. و انت بعدج في بيته.. شو تنطرين؟! تنطرين اللحظه اللي يقولج فيها اطلعي من بيتي؟!!
و يقول وضعي الاجتماعي؟! و يقول فيه نهايه بس ما تحدد وقتها بعد؟!!! و انت بعدج تنطرين النهايه.. كم عمرج ؟!! 27 .. تشتغلين ؟ إيه .. يعني فاهمه الدنيا و عندج وظيفه .. يعني تقدرين إنت اللي تنهين هالمهزله كلها و ما رح تموتين من الجوع لأنه في وظيفه.. و لأنه في رب ما رح يضيعج.. المفروض حتى ما تفكرين فيها .. خلاص محسوبه.. النهايه جايه جايه .. حدديها انت.. لا تركني لكلماته فهو كالأفعى ملمسها ناعم و لكن لسانها يقطر سمّا .. محد رح ينفعج غير الأهل و اللي من مستوااااااج الاجتماعي!!! و يقولون ليش ما ترضون بالمتعدد!!!!؟ (ختم الله على قلوبهم و على سمعهم و على أبصارهم غشاوة) فأنا لهم أن يسمعوا أنات أمثالك يا أخيه.. أعانك الله و وفقك و أبعد عنك كل ظالم جبار.. لا حول و لا قوة إلا بالله.. |
اختي نزلت دمعتي وانا ارى ماكتبتي كان الله في عونك لكن اياكي والتنازل فهو لن يشبع ابدا وسوف يطلب الاكثر كل مرة ونصيبك واللي كاتبه لك ربي بيصير سواء طلاق او بقاء معه لكن بعض الرجال لا يحب المرأة الضعيفة فقد يحبها بداية حتى يستغلها إلى اخر قطرة ثم يتركها بكل سهولة والمثل العمي يقول ( اهلك يبونك غنية وزوجك يبيك قوية ) وفقك الله لما يحب ويرضى |
اسمعي اللي واضح لي من السالفه بانه يريد ان يستغلك فلا تعودي كما كنتي في السابق بسبب فرق الطبقات ممكن يقولها لك عشان يحسسك بالذنب استغرب منك مذافعتك عليه فصدقيني بانه انسان بدون شخصيه فاحذري منه ولك التحيه |
السلام عليكم ورحمة الله
لا فض فوك يابسمة رضا: " كم من رجل قد ودعته الرجولة ..وانطلق في طرقات الحياة متغافلا عن حاله ..يبحث عن أنثى ..ليضيفها إلى قائمة ..المطلقات ..تكرما منه حتى لا تبقى عانسا !!!!!!!!!!!!!!!!!!!!!!" انا مامدحته..انا ارجع بكم لورااااا لما جيت اتزوجه.. عيبه الظاهر بس انه كان متزوج..وماشفت شي غيره..بالعكس كان لابس ثوب الرجل اللي يخاف الله ويبحث عن رضاه ومايهمه الا ان يعوض سنوات الشقاء اللي عاشها مع زوجته الاولى.. اكثر شي خلاني اتشجع اني اتزوجه اني حسبته والله حسيبه انه رجل يخاف الله ويعرف الشرع.. وماعلينا من الماضي.. انا ماني في بيته..انا في بيت اهلي لاني تعبانة وقلت له اللي بينا اذا بيستمر يستمر صح او ينتهي الحين وانا احدد النهاية ماانتظرها.. تكلمت مع امي في الموضوع وصارحتها بكل شي (الا موضوع القرض لاني غلطااااااانة وماتحمل كلام في هالموضوع اكثر) وامي الحمد لله انسانة عاقلة وحكيمة.. قالت يابنتي انتي صاحبة المعروف عليه من يوم تزوجتيه..اذا هو بيتعدل ويعرف اللي له واللي عليه ولا ترا ماعليه حسافة.. تحملتيه الى درجة لاتحتمل ومحد يوصل المرحلة اللي وصلتي لها ولا نصها.. اشكر لكم تفاعلكم ونصائحكم ودعواتكم مستمرة في الاستخارة والله يقدم خير الامور لي ولكم وجزاكم الله على دعمكم خير الجزاء |
أعتقد بعد كل تلك المواقف التي ذكرتيها ... وبعد كلام الاخوة والأخوات الأعضاء الأفاضل .. وبعد كلام والدتك المصونة باتَ الأمرُ واضحاً وضوح الشمس ... من كلامه الأخير في اتصاله الذي وردكِ منه ... أنه رجل أناني .. طماع .. ولا يريد سوى استغلالك ... لستُ أتكلم على الرجل إلا من خلال كلامه ... فكان هذا واضحاً بين ثنايا أحرفه ... ولستُ أعتقدُ بأنني أضيفُ لكِ الجديد ... إلا أنه تأكيدٌ لما عرفتيه عنه ... من الجيد أنكِ في بيتِ أهلك ... قد منعتِ عنه ما أراد منكِ ... وفي الغد يذوب الثلج ويظهر المرج . كما في المثل .. استمري في منعكِ مما تكرمتِ به عليه ... ولا تطلبي الطلاق أختِ الكريمة ... فإن أتى فليأتِ منه هو .. وأتوقع أنه سيأتي بعد أن ينفذ صبره وكل محاولاته في إقناعك بأن تعودي للصرف عليه وإعطائه كلما أرادَ من المال . السؤال الذي أود أن نعرفه ويشرفني أن ألفتَ نظركِ له ... بما أنه قد أخذَ منكِ ما أخذ ويأخذ من الأولى ما يأخذ أين يصرفُ كل تلك الأموال ؟؟؟ هل لديكِ معرفة بهذا ؟؟ أسألُ الله أن يختارَ لكِ الخير .. واستمري في الاستخارة .. وما حصل لكِ هو ابتلاءُ من الله الكريم المنان .. ليرفع لكِ به الدرجات ... أويغفرَ لكِ به الزلات ... أو يجمع بحكمته بين الاثنين ... فهو العالمُ المطلعُ على شؤون عباده الرحيم بهم ... فاجعلي صلتكِ معه وبه وإليه .. وأوكلي أمركِ وشأنكِ له .. وانطلي في غياهب الظلم .. وحنادس الليل تجأرين إليه ... بأن ليسَ لي من يُدافعُ عني .. ويأخذ بحقي .. ويريحُ بالي سواك ... يا مفرج الكربات .. ويا مقيل العثرات طالعينا بآخر الأخبار والأحداث ... وكلنا معكِ عوناً ومعيناً إن شاء الله ... كانَ الله معكِ |
اللهم اجعل ماأصابني تكفير ذنوب
من الاشياء اللي كانت تضايقني في أخذه للراتب اني مااشوفه يصرفها في شي لنا احنا في شقة صغيرة وراسي وراسي يعني مقاضينا ماراح تاخذ منه شي وباعترافه اني ماني من النوع المتطلب وجب وجب بس هو اسلوبه في الصرف موب مدروس يعزم اي احد ويظهر اكثر من استطاعته في هالامور يعطي بلاحدود لاي احد لدرجة ان كثير ماخذين عنه فكرة انه كريم اي احد يطلب منه سلف يعطيه ولو جا يرجعها ان رجعها يقول له خذ نصها لك لانك محتاج في العمل كل يوم هو اللي يباشر وكل يوم ياخذ بيده شي لهم يحب يهدي رؤساءه انا اعتبره من الناس اللي يبالغون في اهتمامهم بنظرة الناس لهم لاني لما اجي اروح لاهلي واقول له باخذ شي في يدي معهم مايقول شي بس بعدين يقول لي حطي ببالك مو كل ماتروحين تاخذين شي ترا ميزانيتنا ماتسمح لو ابي ارسل شي من الغدا لاحد بما ان احنا ثنين وكثير علينا الاكل يقول ليه ماعندهم اكل؟ ولما اناقشه يقول اهم شي ماراحت فلوسي في حرام ولامخدرات ولا سجاير وانتي واثقة فيني ومتأكدة وعارفة اني بصرفها في شي حلال! واذا احتد النقاش قال ان ملكية راتبي انتقلت مني له برضاي وهو حر في صرفها مادام مافيها شي حرام حتى لو صرفها على عياله وزوجته!! انقهر لما نفسي في شي يقول ميزانيتنا ماتسمح او يجي رمضان ويطلع وانا ابي اشتري صحون واشياء للمطبخ ويقول ماله داعي ..يعني لو راتبي عندي خذت اللي نفسي فيه على الاقل مو لا كذا ولا كذا وانا مثله اتعب في شغلي وشغل البيت ولا احصل شي! اللهم ارحمني برحمتك واغمرني بفضلك واجعلني من الصابرين وثبتني على ذلك اللهم اقدر لي خير الامور ياأرحم الراحمين |
ممممممممممممممممم
هذا والله الي يخرب على غيره والرجال الي بمثل هالشخص لايمكن أن يكون محل ثقة وبعذر لو الحريم أخذن فكرة سيئة جداً عن كل شخص يريد الزواج من ثانية بسبب هذا الشخص الاستغلالي لا أقول الا أعانك الله على ماابتليتي فيه وأكثري من الدعاء وتوكلي على الله فهو نعم الوكيل وفقك الله |
معليش على الكلمه
لاكن انـــــــــــــا قريت كلامك ومستغرب : وش عاجبك فيه ؟ ليش اصلا تزوجتيه ؟ انسان متزوج وعنده عيال وبخيل وراتبه ضعيف وماتعلم ؟؟؟؟؟ |
انا لم أقرأ الردود ابدا ولم أتمعن في موضوعك جيدا
قرأته قراءة سريعة وعرفت المشكلة وين .........هو تزوجك لأجل المادة فقط هذه النوعيه من الأشخاص تعمل اي شيء بحثا عن المادة فقط حتى لو امتهن اعمال وضيعة او مخلة لا تتوقعيان حاله ستتبدل ولن يتحسن ابداً عندما مدحك في آخر الرسالة لكي يظغط عليك فقط لا أقل ولا أكثر أختي الكريمة ما الذي يدفعك الى التمسك به ما الميزة التي فيه تضحين من أجلها هذا مستعد لأن يبيعك مقابل كسرة خبز وصديقيني قاعد يضغط عليك علشان يرجع ويخبرك ان زوجته الاولى اعطته بطاقتها يعني المسألة استغلال بحت انفصلي وتجدين خيرا منه بإذن الله |
معليش قرأت كلامك ثاني مره
وعرفت انه خدعك بمظهره طيب يوم عرفتي انه تزوج مسيار ليش ماصرفتي نظر عنه فيه انسان طبيعي يتزوج مسيار ؟ وعلى فكره هو استغلالي جدا وبخيل جدا ولا تحسبين اللي يصرف على الناس كريم لا والف لا هذا شاري سمعه على حساب اهله وطبعا من تصرفاته انه يبيك عشان راتبك واذا بتختبرينه قوليله بستقيل من وظيفتي وماظن بتشوفين وجهه هالنماذج مرت علي كثير |
بسم الله الرحمن الرحيم
في البدايه ارجو ان تعذروني فثقافتي محدوده في هذه الاشياء فماذا يعني زواج المسيار هل هو زواج لفتره محدوده وماذا يعني انه قبلي ولماذا يعتبر انه ليس من مستواك الاجتماعي كونه قبلي لكني احببت ان اوجه لاختي صاحبة المشكله عتاب واقول لها (ما ذا كنت تنتظرين وانت تتزوجين رجل متزوج وعنده اطفال وزوجته لاعيب فيها سوى انها سليطة اللسان؟) ثم تشتكين لانها تبعث لك برسائل سب وشتم وماذا كنت تنتظرين منها وقد سرقت منها زوجها واب اطفالها ؟ يا اختي ضعي نفسك مكانها وحسي بما تحس به من الم ومهانه بالتاكيد هي تكرهك وتحقد عليك وتحاول استعادة زوجها على مساؤه التي اكتشفتيها انت به والان ماذا تنتظرين يا اختي اتركيه ليعود الى زوجته واطفاله عسى ان يغفر لك الله ويهبك الاحسن وشكرا :( |
((اذا لم تستـــــــــــــــــــح فاصنع مــــــــــــــــــاشئـــــت))
آخر التطورات..عارض علي عرض.. اني ياأرجع واترك (القيادة) له على قولته او اني اتحمل اي شي.. يعني ياخليني اتصرف على اساس اني اتزوج الوحدة واملك كل شي فيها او انها ترضى بمقدرتي.. اسكنها بيت على مقدرتي حتى لو كان خرابة ولاتقول بساعدك واوديها السوق الوقت اللي ابي وبالفلوس اللي معي ماتقول انا معي فلوس بزيدها ولا حتى لو صار لنا عيال تشتري من راتبها ولا والله لارمي اغراضها في الزبالة..اذا هذا مبدئك خلي فلوسك لك (واكنزيها) وعيشي بمقدرتي وانسي راتبك او اتركي وظيفتك.. وانسي اني اخلي (حرمة) غبية تقودني او تتحكم فيني..خلي راتبك لك ولاتجين يوم تقولين خلنا نسافر معي فلوس بتنطقين وتعيشين على قدرتي.. قلت مالله حدني اتحمل اهانة ولافيه اي شي يجبرني..شف لك وحدة تناسب وضعك الاجتماعي وتفكيرك الجاهلي..وسكر السماعة في وجهي..!!! حسبي الله ونعم الوكيل.. مدري وش شايف نفسه عليه..كل شوي يقول احمدي ربك ماني سكير ولاراعي حريم ولامخدرات.. خلاص انكشف..انسان مادي 100% مستعد يتغاضى عن كل شي في سبيل المادة ومستعد يلوي يدك بأي شي علشان المادة.. خلاص قفلت جوالي وماراح انزل مستواه وماني متصلة ارفع صوتي ولا اتكلم عن افعالي وصبري.. عزائي اني حطيت الله قدام عيوني ورضيت به لانه ظهر لي انه انسان يخاف الله وماتوفق في حياته مع زوجته.. واني مؤمنة بقضاء الله وقدره وان هذا نصيبي.. بالنسبة لك ياأخت زليخا انا ماسرقته من زوجته وعياله..انا مارحت ادوره واخطبه ولا اجبرته يجي يخطبني ويتزوجني..لو ماتزوجني بيتزوج غيري..وهذا مو موضع كشف عيوبها ولامساوئها لان الله كتب له انه يتزوج عليها 2 وليست واحدة وقد يكتبه على غيرها ولو كانت من دون عيوب.. ومحاربتها لي لاني تزوجته ليس من حقها ولاعذر لاستحقار الناس أو قذفهم أو سبهم ولاشتمهم.. الاولى لها ان تحاسب زوجها وليس انا.. انا ماتركته لما صارحني انه كان متزوج مسيار لانه ذكر لي انه اضطر انه يتزوج مسيار لان زوجته جلست عند اهلها اكثر من 6شهور وهو مايبي الحرام..وزوجته المسيار (واللي مو مسيار.. كان زواج سر بس كان مايبي يصدمني بأولها) كانت عند اهلها وهو مستعد لطلاقها وقد طلقها..هذه الاسباب مالقيت انها منطقية علشان اتركه خصوصا اني في بداية حياتي معه ولا بعد بان لي شي من صفاته فاعتبرته ماضي وراح..غير اني ويعلم الله اني كنت أستخيره دائما دائما و احرص اني مااتخذ اي خطوة ولا اجراء استبق به الامور.. سبحانك اللهم وبحمدك..أشهد أن لا إله إلا أنت..أستغفرك وأتوب إليك |
اعانك الله اخييتي الكريمه
ويسر امرك وخيرك الخيره المباركه انت اكتشفت الان انه مادي بحت وكلما اتصل فيك يدور حول فريسته راتبك والسؤال عنه غيري رقم جوالك واذا اتصل بالبيت لاتردي عليه لمدة شهر وسيظهر على حقيقته المخادعه |
حسبي الله ونعم الوكيل
حبيبتي ايش يعني قبلي وما قبلي قوليلي يعني حيندفن في دهب وانتي فتراب ايش اللي يعير وما يعير ؟ خلي كل شي بحد معليش يا عمري كل واحد عند حده وما في تسامح للزوجه الاولى لانه حيجي على راسك كما هو الان ايش اللي خلاكي ترضي برجل مثل هذا؟ عموما قيد صار اللي صار وانتي عليك بصلاة الليل والدعاء(ياموضع كل شكوى وياسامع كل نجوى ويا شاهدكل بلوى ويامنجي موسى والمصطفى محمد والخليل ابراهيم عليهم السلام أدعوك دعاء من أشتدت فاقته وضعفت حركته وقلت حيلته دعاء الغريب الغريق الفقير الذي لا يجد لكشف ماهو فيه إلا انت ياأرحم الراحمين لا إله الا انت سبحانك اني كنت من الظالمين )في آخر الصلاة وبعدها الصلاة على خير الخليقة والدعاء بما في قلبك والله يشرح لك صدرك ويختار لك اللي فية الخير يارب و طمنينا عليك يااختي وتوكلي على الله ياعمري وربك سامع الدعاء ويفرجلك همك ويعوضك بسيد سيدو ان شاء الله وتذكري دائما يااختي راتبك لك وانتي حرة التصرف فيه ومالو اي حق لاشرعا ولا اجتماعيا انو ياخدو ولا تحكمي قلبك على عقلك في هذا الزمن طيبة القلب ماتنفع لوحدها فاهمتني اكيد وكوني حازمة في قراراتك ياعيني واللي يبغاك لنفسك موش لماديتك والله معاك ومارح يضيعك ابدا
|
بسم الله الرحمن الرحيم
اختي العزيزه اذا كنت قد جرحت مشاعرك فارجو ان تسامحيني لانه ليس من طباعي جرح احد ولا احب ان اكون كذا ولكن توجد حكمه قديمه تقول (امشي وراء الذي يبكيك ولا تمشي وراء الذي يظحكك ) استطيع ان اواسيك واقول لك كلام مواساة ثم ماذا انت تريدين الحل والحل في تخليك عن هذا الرجل الاناني اختي انت الان في نظر الجميع زوجه ثانيه والزوجه الثانيه هي دائما الملامه فللاسف في مجتمعنا الشرقي المرآه هي دائما التي تتحمل اللوم دون الرجل يعني الناس لا تقول هو الذي خطبها بل يقولون لماذا قبلت هذا هو مجتمعنا ومع الاسف يبرأ الرجل ويتهم المرآه اذن انت زوجه ثانيه ومع ذاك لست سعيده انت متعبه نفسيا وجسديا وبدأت تتعبين ماديا يا اختي انت عمرك 27 سنه هذا يعني انك في عز شبابك ومتعلمه وموظفه ما الذي ينقصك لتتمسكي برجل لم يقدم لك سوى العذاب حرام عليك نفسك ما اردت قوله وببساطه اتركيه لانه لا يستحقك وارحمي نفسك من هذا العذاب الذي اوقعت نفسك به ومره اخرى اعتذر ان كانت كلماتي جرحتك |
أشكركم جميعا على دعمكم ودعائكم وجزاكم الله خير..
اختي زليخا..أشكر لك كلماتك..كلماتك ربما كانت تحمل بعض القسوة ولكنها قسوة المجتمع ولست ملامة عزيزتي.. متأكدة فيه ناس دار في بالهم مثل اللي قلتيه وماني زعلانة منك والله..بس تضايقت شوي.. معك حق المرأة دائما هي الملامة وعيب الرجال مستور.. انا لازلت أستخير ان الله يقدم لي الخير.. اليومين هاذي مارديت على اتصالاته ابدا واغلب الوقت جوالي مسكر.. أمس كلمتني أحد الاخوات مطلقة..قالت لي "امسكي قردك لايجيك أقرد منه" وترا كل الناس مومرتاحين بحياتهم ولابد من المشاكل..سمعت كلامها وسكرت بس للحين كلامها يرن في أذني.. قناعتي تقول شي أكيد مافيه أحد مرتاح بحياته بس فيه أشياء أساسية وفيه خطوط مانتعداها وأهم شي التفاااااهم بالتفاهم كل شي يصير حلو وتذوب الحدود بين الزوجين الله يقدم الخير لي ولكم ويهدينا لما فيه خير الدنيا والآخرة |
والله ما يستاهل ظفرج يالغاليهاذا الزوجه ما لقت اللي يحترمها ويحن عليها ويقدرها شفايدت الزواج عيل؟!
والله اظل عزابيه اروح واجي واشتري واستانس اخير لي الف مره من اني اعيش مع واحد مستغلني استغلال بشع؟! |
أقول لكِ أختِ الكريمة رداً على كلام صديقتك المطلقة ... من رضي بالظلم والجور والضعف .... تركه الله على ما أراد .. وهناك فرق كبير بين المشاكل ... وبين الاستغلال والتمرد والتسلط ... واختيار العيش تحت رحمة شخص لا يعرف أساس حقوق الزوجة .. ولا يخاف الله فيها ... وفقكِ الله |
بكل صراحه ((هذا ماهو قبيلي الواحد يفتخر يقول انا قبيلي يعني ليه اصل وفصل وصاحب الاصل لايستغل زوجته وياخذ فلوسها بل هو صاحب مروه وشهامه هذا الشخص عار علي القبايل ))
الحل بكل صدق وعقلانيه : شوفي انتي تبين زوج واطفال وانتي في سن كبير نسبين يعني منتي صغيره ولتلك الاسباب تحملي هذا الزوج من اجل ضل الزوج وفرحة الاطفال ولذلك لابد ان تتنازلي عن بعض الاشياء اقصد بذلك تتحملين اجار البيت ومصاريفه وتربية الاولاد وتتفاوضين معاه في ذلك وتحاولين ان تتحملين اقل شي من تلك الاشياء فقط ( طبعن حسابك معاك وبطاقتكي وتلغين اي وكاله سابقة اعطيتيها له يعني انتي الي تسحبين المبلغ وانتي الي تسددين ) اذا كنتي لاترغبين في التنازل عن شي وانتي مستغنيه عن ضل الحيطة ولاطفال وتحسين ان هناك امل في زوج اخر فطلبي منه الطلاق فورآ ( الا اذا وافق علي تحمل مصاريفك كلها فارجعي له ضل راجل ولاضل حيطه ) |
الصراحه قريت اول شق من موضوعج ولا عاد ابغي اكمل الباقي لأنه بكل صراحه الموضوع امبين اشكره! استغلال عيني عينج! شلون يعني اعتبري السياره هدية الزواج! شنو هالمصخره... حبيبتي حاولي اطلعين نفسج من هالورطه ولا ترضخين له أكثر من جذي ولا راح اتصيرين انشانه مديونه وماهو بنافعج زوجج ترا!
كلمي امج ولا ابوج ولا أحد اخوانج بالموضوع خليهم يساعدونج ويشوفولج صرفه معاه! اتلاحقي نفسج الله يوفقج إن شاء الله |
اهم مافي الموضوع ماعندك اطفال منه ووقتها راح تحسي بانك ملزومه بلتحمل علشان طفلك والحمد لله مارزق الله اطفال من شخص كل عذره انك موبنت قبايل يكفي يالغاليه انك مخلوقه من مخلوقات الله انسان متخلف واستغلالي وعيشي بكرامتك والله يسعدك
|
اختي هذه المرة الثانية التي اشارك في ها بهذا الموضوع انا رجل واعلم كيف تميل طبائع بعض الرجال اذا كان هذا وصف زوجك فالأفضل أن تطلبي الطلاق لأن فيه مثل قديم يقول( أبوطبيع مايغير بطبعه) خصوصا إنك تقولين إنه جاهل غير متعلم وفيه فارق بينك وبينه لا بالثقافة ولا بالحالة الاجتماعية ولا حتى بالعمر شكله ابر منك بكثير وأنتي ماشاء الله لسه صغيره يعني بإذن الله بيرزق الله رجل افضل منه الف بالمائة يمكن بعد غير متزوج لاتعلمين ماذا يخبي لك غداً
نسأل الله التوفيق لك وأن يفك كربتك |
صار لي الحين تقريبا اسبوعين ببيت اهلي واكثر من اسبوع ماارد على اتصالاته..
والغريب انه ماحاول يتصل على بيت اهلي ولا على احد من اهلي..حسيت من اتصالاته اللي تكون مرة او مرتين باليوم مع اني ماارد مثل اللي يبي يقول اتصلت بس علشان لايصير الحق علي.. ارسل لي قبل كم يوم رسالة كاتب فيها "شوفي حل لاغراضك وعفش البيت لانه مطلوب مني اسلم البيت وانا جدا منحرج!!! ورديت عليه بعدين برسالة "وماانحرجت يوم صارت اغراضي والعفش هي الاشياء اللي صارت اكبر همك والرابط الوحيد في نظرك بيننا؟؟!!" ولازال الوضع على ماهو عليه..بصراحة كل يوم احس اني مقدر ارجع اعيش مع هالانسان اللي مع اول ضغط مادي تكلم عن الوضع الاجتماعي وتكلم انه قاعد يتحمل مساومات مادية من زوجته الاولى علشان يطلقني!! مااحس انه الانسان اللي ممكن يكون شريكي في حياة اواذا طحت بيبقى جنبي او بيكون اب صالح بهالعقلية.. احس اني متضايقة مو علشانه بس علشان نفسي..مااحس اني قصرت معاه علشان القى هالمكافأة منه..حتى النوم مااقدر انام من الضيقة.. الله يجعله تكفير ذنوب ويصبرني.. امي تقول ماعلى مثله خسارة انسيه الحين واللي الله كاتبه بيصير.. ادعو لي |
الله يعينك ويقدم ما فيه الخير
|
| الساعة الآن 04:41 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©
