السلام عليكم ورحمة الله وبركاته..
ادخل في الموضوع على طول
انا متزوجة من رجل متزوج عانى كثيرا من زوجته وام اطفاله السليطة اللسان والسيئة الاخلاق
هو قبيلي وانا لا..كان هذا الشيء يعلمه من قبل الزواج وقبل الخطوبة وذكر ان الله لم يفرق بين احد من خلقه الا بالتقوى وان هذا الموضوع لايعني له شيئا حتى لو كان لاحد من اهله اعتراض هو صاحب الموضوع وهو راضي به..كان استمراري بالعمل شرط من شروط الزواج قبل به..وتم زواجنا بمباركة اهم أهله ماعدا اخوين من اخوانه واخت واحدة ولكن مثل ماقال هذي حياته وليس لهم علاقة..مع انه من تملكنا بدأت تظهر بعض المشاكل الغريبة وشكوكه بس كنت اقول بكره نتزوج ويعرفني ونبني الثقة شوي شوي..استغلت زوجته نقطة اني مب قبيلية وبدأت تعايره بي وباطفاله اللي بكون انا امهم وهو ابوهم وبدت تسوي مشاكل كثيييييرة وكلام كثير وترسل رسايل وكلام كثير وصل حد القذف ومع هذا قلت لازم اتمسك واتحمل واصبر ولا اخرب حياتي بيديني..ومادام انه يحبني واحبه وحياتنا هادية ماراح نستسلم للضغوط..
راتبي اكثر من راتبه اجبرني اخذ قرض اطول مدة واكبر مبلغ على راتبي وخذ 90% منه وشرا سيارة احدث موديل ونص الباقي حطيته على مبلغ عندي وشريت بها اسهم والنص الثاني صرفها على اي شي وكل شي..بس ماكنت ابي اهد حياتي واسوي مشاكل جوا البيت ويكفي مشاكل برا
بطاقتي الصراف خذها مني بحجة انه هو اللي يكون برا وماراح ياخذ منها الا اذا خلص راتبه..راتبه اقل مني بس لي الحين 9 شهور متزوجة عطوري هي عطوري ملابسي هي ملابسي ولا فيه شي جديد اشتريه الا اوصي امي او مثل مرة طلعت للسوق من بيت اهلي معاهم وحطيته عند الامر الواقع بعد ماحولت الفلوس لحساب ثاني حق اهلي بواسطة االتلفون واصرف من بطاقتهم واتحجج اني نسيت بطاقتي بالبيت وارجع اوريه اغراضي يقول انتي بتزنقينا هالشهر من سبة مشتريات مالها داعي..
عياله اي وقت يجيبهم واحيانا اربعاء وخميس وجمعة ويوديهم يمشيهم ويخليني ببيت اهلي على باله انها وسيلة ترفيه لي..ويتحجج ان امهم متمشكلة معاه وجالسة عند اهلها..
ومع هذا عمري ماعاملت عياله الا معاملة زينة..
بعد 9 شهور لقيت نفسي مطلوب مني اسدد قرض لمدة 5 سنين مااعترف اني خذيته علشانه وانه ضغط علي علشان اخذه وقال لي يوم ناقشته فيه ان السيارة اعتبريها هدية زواج..ومطالبة بايجار شقتنا لانه مايقدر من راتبه بس وراتبي علشان كذا يبيني ابيع اسهمي كلها واساهم..مطالبة اني كل مابغيت شي طلبت منه فلوس او اذا بغيت غرض للبيت جمدني كم يوم وجاب الغرض بوقت على مزاجه علشان بس يفهمني ان اي شي ابيه مب لازم بالوقت اللي اطلبه فيه..مطالبة اني اتحمل رسايل قذف وسب من زوجته لجوالي بحجة اني انسانة محترمة وماراح ارد عليها مثلها..مطالبة اني اشارك معه بمصروفات البيت بحجة اني اشتغل ولابد من التقصير مع ان اشغالي مااقصر ولله الكمال بس احسن من حريم كثير جالسين بالبيت مايشتغلون..ومطالبة اني أأجل الحمل علشان "نستمتع" انا وياه ومايكدرون علينا الاطفال وماله داعي اراجع طبيبة مادام ان من الله هالفترة ماحملت!!وملتزمة بمبلغ شهري احوله لاهلي كل شهر مساعدة مع ان كل شهر يضغط علي مااحول او انقص بحجة انهم مو محتاجينه مع انه مايدري عن الخافي وبحجة انه مايرسل لاهله شي!!
وباخير لما وقفت وقلت له لا..وخذيت بطاقتي وغيرت الارقام وقلت ماراح ادفع من اليوم ولا ريال انت ملزوم وانا كنت اساعدك الين توقف على رجولك واساعدك علشاني متمسكة بحياتي واساعدك علشان الفلوس تجي وتروح..قال انا مابي وحدة مو متعاونة..سامحيني احبك واموت فيك بس الضغط الاجتماعي كثير علي مع وحدة ماتبي تساعدني!!!!
وضعك الاجتماعي مايساعدني!!لاتزعلين مني لازم ننفصل هاذي مو نظرتي هاذي نظرة المجتمع!!
احبك واموت فيك بس برجع لزوجتي وعيالي واتحملها علشان عيالي وانتي بنفصل عنك..ويمكن مااتحمل وارجع لك ويمكن مانتطلق ويمكن نستمر بس وضعك الاجتماعي سبب ضغط علي كبير وهاذي مو نظرتي هاذي نظرة المجتمع..بس اوعديني تبقين على اتصال يمكن نرجع لبعض وصدقيني احبك!!!!!
انتي خسرتي وانا خسرت وخسارتي المعنوية اكبر وانا الخسران..مافيه مثلك انتي تناسبيني خلقا وتعامل وقلبك ابيض وخفيفة دم واحبك واموت فيك بس مااتحمل!!!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!
قلت له لو ماقلته اليوم يمكن تقوله بكرة يمكن تقوله بعد سنة او سنتين..!!
تعبانة نفسيا ومتضايقة وعايشة حياتي مثل العادة اداوم واجي واجهز اغراضه عادي واي شي فيه فلوس اطلبه يقول ماعندي..حتى الخبز طلبته يومين وماجاب يقول ماعندي!!وايامي ماشية عادي يوم عندها ويوم عندي بعد مارجعت..
ماني طايقته وهو يتقرب مني وكل شوي يقول لاتزعلين هذا شي مو مني من المجتمع..وقرار الانفصال موجود بس متى مدري!!
مقدر اتذكر ولا موقف حلو مااقدر اتذكر الا الاشياء الشينة والكلام الجارح اللي كان يقوله بكل هدووووء..
وضعي الاجتماعي متزوجة من شخص متزوج متعلمة هادئة الطباع طيبة او بالاصح مغفلة كنت احط بين عيوني ان مافيه شي يضيع عند الله ومتأكدة من هالشي اللي شفته ان حقي ضاع عند الناس..
انسانة تقدر الحياة الزوجية بجدارة وباعترافه تحلم ان تكون أم حرمها هالشي وكل يوم يقول بكرة ان نراجع والحمد لله ماجبت لهالدنيا طفل يعاير "بوضعه الاجتماعي" واول واحد يخجل من وضع امه هو ابوه نفسه!!
انا قلت له وضعي الاجتماعي مب شين..الحمد لله وضعي الاجتماعي ممتاز والحمد لله مرضية ربي وحكمتي في الحياة اني ابات مظلومة ولا ابات ظالمة المشكلة كلها ان وضعي الاجتماعي "ماناسبك"!!
مابي اتكلم فيه الله يهديه لكن كنت ادعي له وهو انسان مب سيء لكن مافيه احد كامل..طباع مو زينة لكن كان عندي امل يتحسن وكان في طور التحسن للافضل..
عمره 36 وانا 27 ..لكن عاملته مثل اخته ومثل امه ومثل صديقته ومثل بنته..
سألته من بين الدموع امااااااااااااانة وش ماعجبك فيني غير وضعي الاجتماعي؟قال ولا شي..وسكت وقال خلاص اسكتي..
ادعو لي واعذروني على الاطالة..

ما يستاهل دمعة من عيونك..

اتركيه هو استغل وضعك ربي يعوضك بواحد احسن منه..

عشان كذا دايم نقول تزوجو من نفس طبقتكم التعليميه والماديه والاجتماعيه تفاديا لهذه المشاكل..

لكن زوجك استغل وضعك استغلال غير طبيعي ورح يضل طول عمرك في كل موقف يقول وضعك والضغط وماعرف ايش فنصيحتي اتركيه فورا قبل ماتنجبين وادعي ربك انه يعوضك بالرجال اللي يحترمك ويحترم اهلك ويحطك على راسه من فوق..

الله يعينك اختى استخيرى الله ............................

__________________

تزود من التقوى فإنك لا تدري إذا جن ليل هل تعيش إلى الفجـر

فكـم من فتى أمسى وأصبح ضاحكا وقد نسجت أكفانه وهو لا يـدري

وكم من صغار يرتجى طول عمرهم وقد أدخلت أجسادهم ظلمة القبـر

وكـم من عروس زينوها لعرسـها وقد قبضت أرواحهم ليلـة القـدر

وكـم من صحيح مات من غير علة وكم من سقيم عاش حينا من الدهر

فمــن عـاش ألفـا وألفيـن إنـه لابـد من يـوم يسـير إلى القبر

الله ارزقنى الذريه الصالحه وكل محروم ولجميع المحرومين يارب .
اللهم يامقلب القلوب ثبت قلبى على دينك

زين اختي انتي ليش وافقتي عليه دامه متزوج وعنده عيال ومتزوج مسيار ومعاشه اقل من معاشك

وانتوا من طبقات اجتماعية مختلفة .............خاصة في مجتمعنا

المفروض كنتي تسألين نفسك ويش السبب اللي يخليه يتزوجك وويش السبب اللي خلاك توافقين

واللي المفروض اي واحدة تفكر فيها قبل الزواج الف مرة

اختي لا تخدعين نفسك وانظري لحقيقة الأمور

وعندها ستعلمين ان راحت البال كنز .

زوجــك مع الاسف ما تزوجك حب لسواد عيونك

لكن هدفه الاول والاخير هي المادة

وبعد ما وهقك قال نبي نتفارق



وصــدق اخوي البلحه بالنفس


عشان كذا دايم نقول تزوجو من نفس طبقتكم التعليميه والماديه والاجتماعيه تفاديا لهذه المشاكل ..

وقالوها الاطباء النفسيين والمستشارين الاجتماعيين وزادوا عليها

بالاختيار مايقارب الافكار والاعمار

ولكن من يستفيد ويفيد غيره


الله يكون بعونك اختي ويعوضك

انسي انه يحبك لشخصك لان لو انه يحبك وصادق معك ماكان يجرحك ويستغلك لابعد الحدود

تزوجته لاني اعتقدت انه انسان يخاف الله من شكله ومن كلامه واكتشفت بعدين انه منافق وكان يتحجج انه محسود
ايام يكون اكبر عابد واحيانا ينطمس على قلبه..مااقول عاصي لكن غافل..
قلت اهم شي الزوج الصالح وكل شي ثاني ماراح يكون له قيمة
يمكن ماعنده شهادة بسبب ظروفه العائلية مثل ماعرفت منه قبل الزواج بس ماكان هذا ذنبه..عقليته وحبه لتطوير نفسه للافضل عجبني وطمني انه بيطور وضعه في المستشقبل اذا ساعدته انا وساعدتنا الظروف
ماكنت اعرف انه متزوج مسيار الا بعد ماتزوجت اعترف لي وقال موضوعها منتهي وانا تورطت وخلاص موضوعها محد يعرفه
زواجه مب عيب..بالعكس كنت اتوقع انه مظلوم وانه محتاج شخص يفهمه ويعيد ترتيب حياته من جديد واقنعني ان الفروق الاجتماعية ماتهمه..
امه واخواته طيبين وماشفنا منهم شي الى الحين يسألون عني ويتصلون علي ويوصونه علي وعلى بالهم حياتنا تمشي طبيعي
وقبل هذا كله
اســـــــــــــــــــــــتـــــــــــــخــــــــــ ــرت
استخرت قبل الملكة واستخرت بعدها
استخرت لما عرفت بزواجه المسيار واستخرت في كل موضوع كنت اتخوف منه في حياتي معه
وهذاني استخير في الطلاق
والله يقدم الخير ويكتبه لي ويعطي كل انسان على نيته

والله ما عاد فيه رجال يستحون على أنفسهم ... مثل هذا الرجل نخشى أن يأتي يوم القيامة وشقه مائل بسبب عدم مساواته بين زوجتيه وكذلك بسبب استغلاله البشع ..... اختي اذا كان زوجك بهذه الصفات ويدندن على الوضع الاجتماعي والكلام الفاضي حقه .... اتركيه ولا حسافه عليه...

__________________
قال صلى الله عليه وسلم " لا تسبو اصحابي فوالله لو انفق احدكم مثل احد ذهبا مابلغ مد احدهم ولانصيفه "

انا ما اقصد الطلاق لأن موضوع الطلاق هذا انتي تحددينه ... انا اقصد لا تعطينه وجه ..... واستخيري قبل كل شي....

__________________
قال صلى الله عليه وسلم " لا تسبو اصحابي فوالله لو انفق احدكم مثل احد ذهبا مابلغ مد احدهم ولانصيفه "

	اسمحيلي باني اقول لك انتي اللي غلطانه من البدايه وانتي اكيد تعرفي نظره المجتمع اللي حنا عايشين فيه نظره فوقيه ان لم تكن زي فانت اقل مني نظره القبيلي والخضيري فنحن اهم شي عندنا النقد والذم واخيرا وليش اخرا ما اقول الا الله يرزقك بافضل منه وتقبلي تحيايت العجمـــــي

هو استغلك استغلك مايبي لها تفكير الأمر واضح ويذكرك دائما بوضعك الإجتماعي ليذلك ويأخذ منك أكثر وأكثر اتركيه قبل تتورطين معاه بأولاد