|
أنا في ورطه (لا حول ولا قوة إلا بالله)
بسم الله الرحمن الرحيم
اخواتي أدعولي بالثبات من جد ما أدري وش جالس يصير فيني أحس قهر السنين الماضيه كلها وثمن سكوتي بادي يطلع ألحين لا حول ولا قوة إلا بالله المهم تناقشت مع أبوي و الأصح قامت الحرب ببيتنا وموضوعي هو السبب ( وهو عضل أبوي لي ) طلعت ألي بقلبي كله ما خليت ولا بقيت ( لا أحد يقولي عاقه لأن هذا مو وقته ) وضحت لأبوي انه اذا أستمر كذا يتصرف وياي بطلب مساعده من أحد أعمامي ما أعترض بالعكس قال بكيفك والمشكله أنه يحس انه على حق و أنه لساتني صغيره أهم شيء وظيفتي شكله مو متوقع أني أسويهاااااا وأكلم بصراحه بعد كلامه معي حسيت ماعنده نيه يطلعني من المعتقل فقررت أنفذ فكرة راودتني كثييييييير وخصوصاً أني قلتله فأنا بين أمرين يا أرضخ له وأزيد ضعفي ولا أزيد قوووة ويدري اني مو لحاااالي وبالفعل كلمت عمي وقلتله يجينا في يوم لأني أبيه بموضوع فوعدني أنه يجي وألحين أنا خاااااااااااااااااايفه وش أقوله !! وكيف أبدأ وياه !! و و و و .... والله أني محتاره تصرفي ما ندمت عليه بس أحس بإحراج كبيييييير من الموضووووع حسبي الله على من حدني على هالتصررررف وش رايكم كيف أبدأ وياه ؟؟ |
أختي الغالية ..
أنت تعرفين طبيعة والدك الكريم .. فإذا كان سيحزن أو يغضب لأنك أوصلت المشكلة إلى العم .. فلا أنصحك بالتكلم .. وأخترعي عذرا لعمك لدعوتك له .. لكن .. إذا كان الأب موافق ولن يتضايق ولن يسبب لك مشاكل بعدها .. فتكلمي أختي .. هذا حقك .. ووالدك هداه الله متمسك برأيه كثيرا .. وفي النهاية أنت المتضررة الوحيدة .. لا .. بل هو أيضا سيتضرر .. فتوكلي على الله وتشجعي .. وأكملي مشوارك الذي بدأته .. ولكن لا تنسي .. يجب أن يكون الحديث بوجود والدك .. أي تكون الأطراف مجتمعة .. ولست بحاجة لأن أنصحك بالحديث باحترام وبكلام لطيف .. كان تقولي أحب أبي ولا أريد أن أغضبه .. وأحترمه كثيرا .. لكن .. لا بأس بأن اصحح وجهة نظره .. خصوصا فيما يخصني .. وفقك الله .. قلبي معك .. |
احسها صعبة تكلمين عمك وأبوك موجود
كنها شينة بحقه ولا؟ تفاهمي معه او مع أمك أختي كل شي ولاأهلك ترى محد نافعك بهالدنيا ومحد حاس فيك وخايف عليك غيرهم لاعم ولاغيره وان اضطريتي وبتكلمين عمك بتتجرأين؟ ودي اساعدك هنا بس تخيلت نفسي بمكانك لايمكن أكلم عمي بهالموضوع مرة صعب الله يفرج همك وييسر أمورك ويرزقك قريب يارب استخيري قبل ماتقدمين أي خطوة وادعي ربك تحري أوقات الإستجابة وتصدقي وربي الصدقة لها فاااااائدة عظيمة |
والله مادري وش بسوي
الله يكتب ألي فيه خير بحرينية ماقدر واعدته وما عمري طلبته لموضوع كيف أصرفه وبعدين أبوي بيتضايق أكيد بس وش السوات ما جابه الطيب شوبادر والله ما ودي لكن للظروف أحكام وهالشيء مصيري بسويه سواء كنت صغيره ولا كبيره فمن ألحين أفضل أنا أشوف امي تنظلم وتسكت حياء من الناس وخوف على عيالها ومابي أكون مثلها كل شي له حد الله يكتب ألي فيه خير |
أختي الكريمة عبير الرياض
بداية استغفري ربك على عبارتك (( حسبي الله على من حدني على هالتصررررف )) مهما كان هذا ابوك . جاء رجل إلى النبي صلى الله عليه وسلم وقال له ابي اخذ مالي قال له سيد الخلق صلى الله عليه وسلم انت ومالك لأبيك )) أختي عليك بالصبر والدعاء وإذا ارضيتي ابوك والله الذي لا اله الا هو سيرزقك الله من اوسع ابوابه عليك بالصبر ------------------------- أما مسألة عمك اتصلي عليه وقولي له كان عندي موضوع ووجدت حل له واعتذري له لأنك إذا استمريتي في هذا الموضوع وكلمتي عمك ستقعين في مشكله كبيره مع ابوك --------------------- عفوا عندي بعض الاستفسارات صحيح أنها خارج موضوعك ولكني أرغب في ايجاد حلول لك : كم عمرك ؟ كيف عضلك ابوك ؟ هل يتقدم لك خطاب ويرفضهم ابوك بسبب راتبك ؟ تحياتي |
غاليتي أحس بأنكِ تسرعتي في التصرف
لو حاولتي في أقناع والدك عدة مرات مرة بعد مرة وباكلام الطيب سيستجيب ويرضى ولكن الذي حدث حدث فإذا جاء عمكِ أخبريه واشرحي له موقفكِ وعسى أن يكون سببا في إقناع والدكِ ولكن أخبريه بأن يكلمه بكل هدوء وليس بالعنف والهواشة بل بالتفاهم ووأكثري من الإستغفاااااار والدعااااااااء والصدقة وفقكِ ربي لمرضاته والله يكتب لكِ الي فيه الخير والصلاح لكِ |
خلي امك او اخوانك يكلمون عمك
|
انا اشوف لو تكلمة امك احسن
اسيرهااا |
ماني ندمانه بس منحرجه من الموضوع
صاحب رأي سديد أنا أفكر ادق عليه وأقوله بالتلفوون مايحتاج يجي أو أوصي أخوي عليه اذا بيرضى بس أني اصرفه ماعتقد أنها سليمه خصوصا بمثل هالوقت عمري 24 سنه أنا ببداية وظيفه للآن مانزل راتب بس كان فيه حديث بيني و الوالد وضحت له أني ما أصلح لوظيفه لأني فعلا أحس بتعب و إرهاق منها قالي على الأقل تجمعين فلوس تضمنين مستقبلك قلت ماني محتاجه بما أنك عندي تصرف علي قال إذا ماتبينها عطينياها << وربي كلام يبط الكبد الله يستر بس |
الذئبه أعتقد الوالد راح يكون موجود معنا وهذا ألي مخوفني بزياااده
وبخصوص من قال يكلمه أمك أو أخوك والله بغيتها كذا بس كل واحد منهم يتهرب ويرفض بحجة أن ماله دخل وخايف من أبوي والله مدري وش أسوي شكلي بكلمه تلفوون أفضل والله يكتب ألي فيه خير |
اقتباس:
ولكن هل كيف عضلك ابوك ؟؟ وهل تقدم خطاب لك ورفضهم ابوك ؟؟ انتظر الاجابة الله يسعدك |
مع التحية للإخت عبير الرياض
ينقل لعالم المشاكل الإجتماعيه |
اختي لاورطه ولاشي إن شاء الله
كلمى عمك بالتلفون وقولى الموضوع بينى وبينك وابغاك تكلم أبوى بطريقة هادئة عنى والخطاب وأن كثر رد الناس ممكن يمنع عني الخطاب بالمستقبل واني كبرت وزميلاتي عندهن اولاد وان الكل ينظر لى على اني فيني عيب يمنع زواجي وتطلبي منه يكون بينك وبينه يعني مجرد يقدم النصح لوالدك وانتهى الأمر الله يوفقك ويسعدك بكل خير |
اقتباس:
اختي عبير الرياض اوافق اخي الكبير بهذا الرآي وهو صائب 100% اعانك الله ويسر لك امورك كلها |
السلام عليكم
أعجبني رأي أخي الكبير فهو عقلاني و من يدري ! إن شاء الله عمك يكون واعي اكثر من وعي والدك و يساعدك في هذه المسألة اسأل الله أن يوفقك و يدد خطاك و يعطيك الرحمن ما يسر رؤياك اللهم آمين |
أختي الكريمة عبير الرياض
لقد قرأت موضوعك السابق ورد ابيك للخطاب لأنهم اقل منك في المستوى التعليمي ولا ما نع من كلام عمك كما تفضل اخي الكبير ولكن بشرط كيف هي العلاقة بين عمــــك وابيك ؟؟ هل إذا اقتنع عمك بالفكره سيقنع ابوك ؟؟ هل ابوك يسمع من عمك وسيلبي طلبه ؟؟ فكري في الاستسارات السابقه إذا وجدتي الاجابة بنعم توكلي على الله وكلمي عمك بالهاتف واخبريه بالموضوع . أما إذا كانت الاجابة بلا فانصحك بعدم اخباره حتى لا تكبر المشكله تحياتي والله يوفقك |
أخي الكبير بالفعل هذا ما أفكر به
فمحادثته بالهاتف أخف على النفس من حضوره لكن كون الأمر بيننا لا أستطيع لأني اخبرت والدي بالأمر مقدما *** أخي الوزاري وأختي الغاليه على قدم وساق أشكر لكم مروركم ولا تنسونا من الدعاء ** أخونا القدير صاحب رأي سديد هو رد للخطاب لأسباب غريبه فكل شخص يخرج له سبباً جديداً للرفض فترة يرفض بسبب دراستي و أخرى بسبب أن الوظيفه أهم و ثالثه لكون تعليمه أقل أو بكونه متشدد ورابعه لن أتزوج قبل أخي واليوم يقول لن أقبل بشخص يريدك لأجل مرتبك !! إذاً سأبقى بلا زواج لأن الكل سيفسرهم بهذا السبب ومجيئهم طمعا فيني أنا أطمح لشخص عاقل صاحب دين و خلق وسيرة طيبه ووالدي لا أعلم كيفية تفكيره يرفض لمجرد الرفض لا يسأل عن الخاطب لأنه سيرفضه فلما يتعب نفسه بالسؤال والأدهى والأمر انه يقولها صريحة لي (شخص انا رافضه رافضه ليه اسئل عنه ) لا حول ولا قوة الا بالله |
الله يسهل أمري ، الموضوع ما أدري كيف جاااااي
والله أني منحرجه ومحتاااارهـ وخاااايفه الله يكتب ألي فيه خير |
اقتباس:
لا مجال للتراجع الآن .. أتصلي بعمك وكلميه عن مشكلتك .. قبل أن يأتي الموعد ويحضر بنفسه ويصعب عليك الامر أكثر .. دعواتي الخالصة بالتوفيق لك .. وبالهداية لوالدك .. |
الحمد لله خلص كل شيء جاء لبيتنا و كلمه أخوي بحضوري
وكان جدا فااااااهم حتى أنه قال : كنت أفكر بموضوعك و أخشى هذا الشيء لكن بإذن الله لي موعد ثاني مع أبوك احس حرااااارتي مرررتفعه وضربااااات القلب قوووووية الله يكتب ألي فيه خير و يسهل أمري والله ماقصرتوا معي الله يجزاكم خير و ياليت تقفلوون هذا الموضوع |
الحمد الله ياعبير والله شايلة همك مررررة
وزين طلع عمك ابن حلال ومتفهم وان شاءالله يفيدك ويلين راس ابوك ونفرح فيك قريب:14: |
الحمد لله رب العالمين ..
عدا الموضوع على خير .. الله يطمن قلبك ويريح بالك.. ويحنن قلب والدك عليك .. ويرزقك الزوج الصالح .. |
يغلق الموضوع بناءً على طلب الأخت الكريمة
|
| الساعة الآن 11:58 AM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©