|
قلق وتوتر في يوم عيد (رحماك يارب)
السلام عليكم ورحمة الله وبركاته
أحس بقلق من كلمت عمي بموضوعي .......... متوتره بشكل مو طبيعي وهالقلق له عدة جوانب .. من جهة الوالد الله يطول بعمره على طاعته ومن جهة الأقارب أما من جانب الوالد فلأنه إلى الآن مايدري وش السالفه وياويلي لو يدري وبعدين أحس أني تسرعت ويمكن أنه صادق إلى الآن ماجاني الإنسان ألي يتمناه هو لي ويستاهل النسب!! و أمي دائما تقول لي سويتي شيء ما أحد سواه وفضحتينا وتقول الله يصبرني ربي رزقني بنت قويه ما تستحي ...للمعلوميه كانت تشجعني بالبدايه بس ألحين تبي تتخلى عني بعد ما صار ألي صار ... وربي أني أخجل من نفسي بس وش أسوي ! مابيدي شي ثاني ( رحماك يا رب ) ومن جانب قرايبي لأني أخشى ان الموضوع ينتشر و ينتشر تبعا له الهمز واللمز وان بنت فلان تبي تعرس << يا شينهاااااا شيناااااااه وبصراحه كنت ناويه أروح لجمعة قرايبنا في يوم العيد بس بعد ألي صار ماعندي نيه أبد لأني أدري بيقولون مسيكينه جايه تدور ..... !! ولأنه مو من عادتي أني أروح أصلا ،، و ألي ذابحني أكثر عماتي وجدتي لأنهم هم ألي ألتقي فيهم دائما و أدري ماراح يخلوني بحالي لا قدامي ولا من وراي .. ومتوقعه أي شيء منهم .. والله أني ادعي اللهم أكفنيهم بما شئت كل ماتذكرت الموضوع وربي موقف شين شين شين شين شين الله يصبرني ،، الله يصبرني ،، الله يصبرني |
أحيانا أتمنى أني مت قبل ألي صار
لا حول ولا قوة إلا بالله |
??? وش اللي صار
مافهمت وش مشكلتك عشان نحاول نساعدك |
كلامك مو واضح يعني انتي عطيتينا طرف السالفه
اللي فهمته انك طلبتي من عمك انه يقنع الوالد يزوجك!! وخايفه انه يعلم جدتك وعماتك وهذي عيبه بحقك!! ياليت توضحين اكثر ياعبير |
ارجوا التوضيح اكثر وان شاء الله نقدر نساعدك
|
وانا بعد مني فاهمتك اختي
لو زي ماقالت مشموشه عادي ولا يهمك احد إنتي ماطلبتي شي حرام هذا حقك تحياتي لك |
عبورتي الغاليه
:d :d :d بيني وبينك انا ماأدري ايش السالفه من أولها الظاهر كنت مسافره وماأدري ايش الموضوع ياليت تقولي بإختصار شدييييييييييد عشان نقدر نتفلسف عليك:d :d لاوالله يالغاليه عزيزه على القلب بس حبيت الطف الجو شوي مبدأيا استهدي بالله وتوكلي على الله وصلي واستخيري وان شاء الله يارب يرزقك الزوج الصالح اللي يخاف الله فيك ويقدرك ويصونك ويسعدك ويرزقك منه الذريه الصالحه بس هااااااااااااااااااااااااا لاتقول كلام ماله داعي انك تتمني تموتي ووو ياويلك مني اذا كررتيها وانتظرك حبيبتي على احر من الجمر |
عفوا حتى انا مافهمت !!!! |
أنا ما كان ودي أتذكر وش سويت
بس ضاقت فيني الدنيا وكنت الأسبوووع الماضي كله متضاااااايقه وشايله هم هالموضوع منزله موضوع الأسبوع الماضي وهو على هالرابط للي يبي يقراه و لا تنسون تدعون لي http://www.66n.com/forums/showthread.php?t=111827 ××× روح الغالي يالغاليه أسلوبك لطيف وتراك غاليه علي كثييير فخذي راحتك بالكلام وأبشري بحاول ما أقول شيء يضايقك بس إذا نفسي ضايقت نفسي فلا تلوميني الله يسعدك ويوفقك |
إيه أنا أتذكر الموضوع.. بس إنت قلت بتخبرين عمك بس.. مب الديره كلها؟!!!!!!!!!!!
المهم انت الحين خلاص ما تقدرين تمنعين شي.. إلا بالدعاء ..و اجتهدي و ربنا معاكِ.. و انت ما غلطتي أبد.. هذا حقك.. و ان شاء الله ما يصير إلا الخير.. |
حبيبتي و لا يهمك من كلام أو نظرات العمات ولا الخالات
إنت ما سويتي شئ خطأ إفرحي بعيدك وزوري الاهل وألاحباب وانبسطي استغلي هالعيد لتصفية النفوس بينك بين والدك ما طلبتي غير الستر من رب العالمين ولا همك حبيبتي الناس ما تاركة حدا في حاله إنت طلبت رضا الله والله انك صغيرة حبيبتي فافرحي بالعيد واتركي عنك الحزن كل سنة وإنت سالمة إن شاء الله سنة الجاية تعيدي مع زوجك أم شادي |
بر الأمان تتوقعين فيه شيء يتخبى هالأيام !!
و مثل ما يقولون خبر اليوم بفلوس بكرهـ ببلاش الله يكتب ألي فيه الخير |
أم شادي
الله يجزاك خير على كلامك وبإذن الله ماسويت شي غلط بس القلق ذابحني حاسه الموضوع مو جالس بمكانه بيتحرك بشكل سلبي علي شخصياً ثم على أبوي وهذا ما أبيه الله يستر بس |
رغم إني من لحظة كنت بطلع
بس بكتب لك شيء يريحك .... خلي عندك ثقة بنفسك اللي بيتكلم بيتكلم ولو ما فضفضتي .... وثقي أن الله بيجعل لك مخرج وبعدين لو قالوها ماعندك مشكله ماضنك طلبتي حرام ولا أحد بيتجرأ يتكلم بوجهك .... يحكون عنك أحسن بياخذون من ذنوبك لكن الأفضل والأجدى لا يأخذ من أعصابك الكثير ولو أن كلام الناس بيريحك كان وضعك الآن ريحك .... إتركي الناس لرب الناس أول من يدفع ثمن وحدتك أنت .... وفقك الله وأعانك |
تصدقين لو عندهم جرأة خليهم يقولوا قدامك اي شئ ,,,,
مايقدروا لانهم عارفين انك ماطلبتي حرام ,,, انا عن نفسي لو اتكلم مع ابويا نفس طريقتك في اي شئ حتى الزواج بيجيني كف ماحلمت بيه ابدا :30: ماشاء الله جريئة مع ابوووكي :) صدقيني خليي كل شئ بينك وبين اهلك ترى حتى عمك تخافي منه خلاص الان الموضوع انتهى ,,, وحصل اللي حصل ,,, لاتكرريها الله يكفيكي شرهم |
حبيبتي عبير اول شي كل عام وانت بخير وان شاء الله الله بستر عليكي دنيا واخره تاني شي انت قلتي لعمك طيب انت حاسه انه عمك ثقه والا ممكن يتكلم بالموضوع
اذا أمنتيه علىالموضوع وحسيتيه ثقه فليش خايفه واذاتلكم انت ما طلبتي شي غلط انت تبين الستر مو الحرام الله يهدي بعض الاباء الي مضيقين على بناتهم ابي واحد منهم هداهم الله ياااااااااااارب وانبسطي حبيبتي بالعيد وخلييييييييييييييييييييييكي عاااااااااااااااااااادي وبالعكس انبسطي وحضري كلمتين حلوت للي بحب يحكي علشان يسكت ما تخافي الله معك وانت ماعملتي شي غلط ابدا اهم شي انت تحضرين كلمتين تعرفين كيف تسكتي الي بحكي انا لو مكانك اعمل نفسي مستانسه واااااايد واحضر كلمتين واذا حد تكلم اخليه يسكت ادري انه الموقف صعب لكن يبيله شويت قوه الله يرزقك الزوج الصالح يارب تحياتي لك وطمنينا عليكي حبيبتي أختك في الله |
أهاااااااااااااااااااااااااااااااااااااااااااااا
دوبي عرفت ايش السافله شوفي يالغاليه الكوره في ملعب عمك دحين حطي ايدك ورجليك بمويا بارده استهدي بالله وتوكلي على الله وكلام اخواتي رائع انت ماطلبت شي حرام على فكره انا اتكلم بكل اريحيه مع اهلي في هذا الموضوع كم مرره اقول لأخويا ياشيخ ماعندك اصحاب نتزوجهم<<<<قويه صح اما امي حزنت عليها من كثر ماأقرقر عليها حبيبتي الموضوع بسيط ان شاء الله تذكري ماضاقت الا وفرجت صلي واستخيري واستغفري واكثري من الدعاء والصدقه وكرري لااله الا انت سبحانك اني كنت من الظالمين لاحول ولاقوة الا بالله وان شاء الله خير حبيبتي توكلي على الله واحنا ان شاء الله قلبا وليس قالبا معك ودعواتنا لك وطمنينا عليك اهم شيء هدي نفسك ولاتفكري وربي يسعدك ويفرج همك وينولك مرادك ويريح بالك ويسخرلك ويرزقك الزوج الصالح اللي يخاف الله فيك |
اختي الكريمه عبير الرياض
اختي لاتجزعي ولا تنزعجي لو نراقب كلامهم والله راح نتعب ... بنت اخوي مثلك تماما ... اتصلت علي ذات يوم واخذت راحتها بالكلام ,,, واخذت امازحها ببعض لطائف المزح واقولها يالله متى اشوفك بيت زوجك ونفتك منك .... قالت مازحه على ايدك ياعمي ............... قلت اكيد ابوك يرفض ,, قالت مدري مدري في حياء فهمتها على طول .............. واقوم وسوي عشاء واعزم بيت اخوي واطرح موضوع الزواج المتأخرات ودخلنا في نقاش طويل واخذ يفكر في الإمر بجديه ,, والآن .... وعدت بنت اخوي اول خاطب يقرع الباب فقط تشعرني به لتأخذ رأي ,, اسأل الله ان يوفقها ويفقكم ..... اختي عبير اذا كان عمك تموني عليه لاتزعلي ولا تتضايقي .. كل عام وانتم بخير |
ياعبير ياعزيزتي
انت شسويتي عشان تخافين وتتفشلين؟! عادي من حقك اللي سوييته وانتبهي انتبهي يبين عليك انك مستحية او متفشلة والله بعضهم ياخذونها فرصة ابد ارفعي راسك وروحي تعيدي ان كان من عادتك تروحين لهم وان كانك ماتعودتي ابد احسن لك ويارب يارب يكون هالعيد فاتحة خير عليك وتفرحين |
أختي الكريمة عبير الرياض
بمجرد إنك رفعتي السماعة على عمك وطلبتي مقابلته لا يحق لكِ أن تقلقي وتتوتري فما حدث فمن الله هو وكيلك وهو حسبك ثقي ثقة تامة بأن الله معكِ سواء أن اصطف عمك بصفك أو بصف والدك هو خير لك.. عسى أن يكون هذا الموقف تهيئة لأمر قادم بإذن الله. أما بالنسبة للقيل والقال وشماتة الأعداء.. فإذا كان موضوعك يشعرهم بتفوقهم عليكِ فليستمتعوا بهذه اللحظات قليلاً فالله عز وجل يمهل ولا يهمل.. خليهم يقولوا إللي يقولوه.. أما عن العمات والخالات فقد كن فتيات في يوم من الأيام يتحرقن شوقا ليصبحن زوجات وأمهات المفروض هن من يقفن بجانبك ويثرن على والدك. أختي عبير هوني على نفسك وأتركي ما سيأتي لمقدر الأقدار وادعي أن يشرح لك صدرك وييسر لك أمرك ويحلل عقدة من لسانك ليفقه قولك.. وقتها ستنساب الكلمات بأمر من الله عز وجل.. فلو في قدومه خير سيئأتي ولو كان شر سينسيه الله أمرك وتمر مكالمتك كأنها لم تكن.. ولو تذكر بعد حين قولي له خلاص حليت الموضوع على المرة القادمة. وإن تقدم لك خاطب قريباً وعرفتي أن والدك غير مقتنع به وقتها إتصلي بعمك ليتدخل إيجابياً. أسأل الله تعالى أن ييسر لك أمركِ ويهيء لك الأسباب ويرزقك الزوج الصالح والذرية الطيبة المعافاة..و كل عام وأنت بكل خير :) |
السلام عليكم
اللي سويتيه حبيبتي حق من حقوقك الشرعيه
ممكن تتخوفين في البداية لكن هذا من صالحك والحمد لله انك حصلتي احد يسمع لك انت عارفة انه فيه بنات يروحون المحكمة يشتكون اهاليهم وتجبرهم المحكمة على تزويج بناتهم الله لا يبلانا لكن إذا ما تبغي الموضوع ينتشر قووووووولي (( ياااااااااارب استودعتك الموضوع اللي كلمت فيه عمي يااااااااارب موضوعي وداعتك وفي حفظك ورعايتك )) >>>>> وكوني على ثقة تامة في الله انه ما راح يطلع الله خير حافظاً وهو ارحم الراحمين الله يوفقك ويرزقك الزوج الصالح |
أبـد ولايهمك ياعبيـــر إن كانهم بيحكون تراه فترة وبيعدّي وينتهي كل شي
أهم شي إنه عمك ينفعك في هالموضوع ويكتب لك الله الخيـر عن طريقه لا تشيلين هم وتوترين نفسك زيادة ، توكلي على ربك ، وقبل كل شي تذكري إنك ماسويتي شي غلط ، بس إنه شوي ماتعودوا عليه الناس !! يالله إن شاءالله يكون فاتحة خير عليك وأدعي ربك طول وقتك إنه يحقق حلمك ويبعد عنك كل شي يضايقك قريت بداية موضوعك قبل أروح أصلي العيد ومن رجعت ررركض أبي أرد عليك وأشوف وش صار عليك كل عام وإنت ِ بخيــر وبإذن واحد أحد ياعبيــر يكون هالعيد آخر عيد في بيت أهلك من غير شر يـــارب |
الله يفرجها عليج ياااااااااارب ..
|
بصراحه لا تخافين ابدا
لأن عمك باين عليه انه ساير في الموضوع بالشكل الصحيح ولا تخافي باين عليه كتوم ولن يخبر احد الله يوفقك وكل عام وانتم بخير |
أختي الغالية موضوعك غير واضح وغير مكتمل الجوانب وإن كنت قد كتبته سابقا فحاولي أن تضيفيه إلى هذا الموضوع ليتم ربط جوانب الموضوع مع بعضها البعض ..
|
السلام عليكم ورحمة الله وبركاته ...
الأخت الفاضلة .. كل عام وأنتِ بخير ... بالنسبة لموضوعكِ, فإن كان ما فهمتهُ صحيحاً, وهو أن والدكِ يمنع عنك الزوج الكفء خلقاً ودينناً بحججٍ واهية, فهذا هو العضل المنهي عنه شرعاً, والذي يُجيز للفتاة أن تطلب من القاضي فسخ ولاية النكاح من أبيها ونقلها للأقرب من الأصلح من أهلها, فهنا أختي الفاضل: الشرع يُجيز لكِ خلع ولاية والدكِ ولا يُعد ذلك عقوقاً؛ لأنه مترتب على حقٍ شرعي لم يرعه والدكِ حق الرعاية؛ ولذا ما فعلته أنتِ بإخبار عمك, وما أظنكِ اخترتيه إلا لمعرفة وثقة في حكمته وموزانته للأمور؛ ولذلك فتصرفكِ هذا أعتبره تصرفاً حكيماً ويدل على رجاحة عقلكِ ونظرتك للأمور نظرة بعيدة, وهذا عين العقل... وثقي أن لا مجال للوم نفسكِ, فلم تفعلي حراما, وما دام الشرع موافق وحاث على مثل هذه التصرفات عند الحاجة فلا تهتمي لأحد,, ومن ينتقدكِ اليوم لن ينفعكِ غداً بشيء.. بل لعل تصرفكِ هذا يكون مفتاحاً للخير لكِ... أسال الله تعالى أن يوفقك, وأن يجعل حرصكِ على الخير والحلال سبباً مباركاص في إعفافك وتوفيقكِ... |
t3b2006
الله يعافيك وان شاء الله أحاول أطنشهم كلهم تدرين عاد عمر الناس ماهموني بشيء لأنهم مافيه شيء يرضيهم بس مهما كان الشخص يتمنى سمعته تكون طيبه ، صح ما فعلت شيء غلط لكن تخيلي في ردة فعل الانسان المتقدم لك بعد ما ياصله أنك تقولين لأبوك زوجني !! وكيف راح تكون معاملته لك ! كبريائي يالغاليه تتوقعين أني غلطت؟ بصراحه ما حسيت بندم ألا بعد ما فكرت بالموضوع بشكل أكبر تخيلت ألي بيصير و أيش الي ممكن يحصل بسبب هالأمر ! كبريائي لو خليت الأمر ببيتنا كان أنفجرت قهررر وماحد درى عني وبعد ما تكلمت أكلني الهم و أتعبني التفكير .. لا حول ولا قوة الا بالله فتحي الباب الله يستر عليك و لا يحطك بمثل موقفي قولي آآآآمين روح الغالي صباح الخير : ) ( ماضاقت الا وفرجت ) ياااااارب تفرج و أرتاااح الله يسعدك على هالدعاوي الزينه وبإذن الله تفرج |
أخي الوزاري
عمي يعزني من صغري وهو أكثر عم لي أرتاح له وماستغرب أبدا لما وضح له أخوي الموضوع ألي طلبناه عشانه العكس تفاعل معنا وكان يقول كنت شاك بالأمر من فتره << طالعه مشكلة العائله وهي ماتدري وياليت يكون فتحه للموضوع مثل طريقتك بشكل غير مباشر وللآن مستغربه وراه ساكت له أسبوع مكلمته !! يمكن يفكر بأسلووب مناسب يفتحه فيه شوبادر الله يرضى عليك أنا ناويه ما أوضح لهم شي بس تتوقعين في ساعة المواجهه بيبقى معك شيء من القوه !! الله يثبتنا بالقول الثابت Miss Hawaii كلامك جميل الله يعافيك فعلا كل شيء مقدر ومكتوب الحلوة انا جزاك الله خيرا |
غـاليــة الغاليه
جبتيها الناس ماتعودوا البنت تتكلم بأمر مثل كذا ويعتقدون انه عيب وقلة حياء وهذا ألي انا علشانه قلقه من ردة الفعل لما يدرون بالي سويته !! كيف نظرتهم راح تكوون ، وكيف تفسيرهم للأمر !! خصوصا أنها ما صارت في عائلتنا قبل الله يستر اعذروها الله يجزاك خير صاحب رأي سديد كنت أفكر بما قلت قبل محادثته وهو انه انسان كتووم وذكي و أستغليت معزته لي في أمري لكن بعد ما كلمته ابليس جلس يلعب براسي ... الله يجزاك خير بحاول أطرد الأفكار الخبيثه بعيدا |
الأمل المتفائل
يوجد رابط للموضوع الآخر في الصفحه الأولى في أحد ردودي على هذا الموضوع |
أخي الكريم الوليد جزاه الله خيرا
بالفعل لم أفعل شيئا حراما ولم أخشى أن يتهموني بأني وقعت في محرم لأنهم لن يستطيعوا ذلك لكن كل ما أخشاه هو سمعتي فكما تعلم أن ما أقدمت عليه أمر غريب على مجتمعي ولم يسبقني إليه أحد فقد يُفسر بأنه راجع إلى قوة الفتاة وعدم حيائها وهذه صفات منبوذه ولا يرغبها أحد فيمن اختارها شريكة له وللأسف الموضوع اليوم أخذ يتشعب فقد علمت جدتي بأمري ومن بيتنا جائها الخبر وليس من عمي << سبحان الله وأعتقد بأنه لن ينتهي العيد إلا والعائله الكريمه جميعها قد وصلها الخبر اللهم ثبتني و أكفنيهم بما شئت أول ما جائني الخبر بأن جدتي وصلها الأمر أحسست بأمر غريب يسري في جسدي مثل الإرتجاف لا أدري أهو حياء أم خوووف !! وقد يكون كليهما !! بعدها شعرت بتبلد كبير وكأن نفسي تقول وإذا عرفوا وش فيها !!! ماسويتي حرام أو أمر يستحق اللوم ! فأنا قد وكلت أمري إلى الله الرحمن الرحيم فهو العالم بحالي اللهم ألطف بحالي وثبتني بقولك الثابت وبإذن الله كلها فتره وتعدي وسأحاول تجاهل الموضوع وكأنني ما سويت شيء << فعلا ماسويت شيء (( لا تلموني متناقضه من ألي جالسه أمر فيه )) الله يسعدكم وييسر أمركم ولا يريكم ما تتضايق نفوسكم منه |
ياحبيبة قلبي ياعبوره
ان شاء الله خير ولاتشيلي هم عليك بالدعاء والإستغفار والصدقه وصلاة الإستخاره وربي معاك ويحميك من كل مكروه ويارب يكفيك شر الحاسدين وشر من أراد كسرك وذلك واهانتك وتأمر عليك ومن شر شياطين الجن والأنس اللهم ادخلها بدرعك الحصين واسترها بسترك الواقي |
اقتباس:
ربما مايجري لي الآن ابتلاء من رب العباد سبحانه الله يكتب ألي فيه الخير ويصبرني الله يجزاك خير و يحميك من كل سؤ |
السلام عليكم
تسمحيلى اختى انا بكتفى فقط والله وربى يعلم عينى دمعة والله هبكى خلاص انتم كلكم مهمومين وكلكم بتتمنو الستر بالزوج الصالح بالرغم كل ما نقراءه فى المشاكل الحياه الزوجيه ولكن كلنا نحتاج لونيس والله ياختى بالرغم انى الحمد الله شكلى كويس ومن عيله وخلوقه ومتدينه مثلى كمثل كل الاخوات فى المنتدا لاينقصها شبئ غير طبعا رجل يملئ الكون عليا يوم فرحه وسعاده ويوم حزن وبكى انا عرفه انى لسه سنى صغير جدا لكن انا بجد ديما عندى شعور انى هتأخر فى الزواج علشان كده انا حسه بيكم كلكم بتقولو فى عقلكم البنات الشنين تزوجو ونحن لم ينقصنا شيئ لم نتزوج عرفه انا ديما بفضل اتمنى ان كان ربنا خلقنى فى اسره بسيطه انا يا اختى من عيله كبيره فا كل العرسان بتخاف تيجى تتقدم علشان طبعا وحده عيشه فى هذا المستوى اكييييييييييييييد اهلها مابيجوزوها الا لواحد مثلهم فديما اى حد بيحبينى بعد مابيعرف انى من العائله الفلانيه بيعملنى وكأنى بنت مالك ماينفعش غير انه يكون خادم لى ليس اكثر من ذلك والله انا اول مره افضفض اناااااااااااااااااااااااااااا تعبت من الحياه ألى عيشاها يااااااريت ابويا كان فقير ياله ربنا يستر علينا |
أختي الغاليه المصريه
هوني عليك بإذن الله رزقك بيجيك ما أحد مانعه وعليك بالدعاء يالغاليه ومو معناته انك بنت عائله غنيه يعني أنك بتجلسين من غير زواج ولا كل بنات الفقر أو من مستويات متوسطه كلهم يتزوجووون وربي الموضوع كله أرزاق (((((( قسمه ونصيب )))))) تدرين دائما أقول الي خلقنا مو مضيعنا هو أعلم بحالنا و بالأحسن لنا وكل شيء يقدره فيه حكمه وخير بس الإنسان تجيه أحيانا حالات ضعف قوويه جدا ـ ـ ـ ـ وهذا ألي امر فيه حاليا ـ ـ ـ ـ و أحس اني كثرة الكلام على سالفتي و أكثرة الشكوى بشكل ماله داعي بس ان شاء الله راح يكون هذا آخر موضوع لي بهالسالفه << أيه هين ××× أشكر كل من ساعدني برأي أو نصيحه أو دعوه ,,,,,,,,, أو بأي طريقه كانت المساعده وقفتكم معي خففت عني كثييييير و خلتني أتشجع في المطالبه بحقي فحسيت اني مو لحالي بالموضوع ،،، فجزاكم الله خيرا ولا حرمكم الله الأجر ولم أزل أطمح لدعائكم فلا تنسونا << ما تنعطى وجه |
كعادتي جئت متأخرة بس ماشفت الموضوع الا اليوم
حبيبتي الله يعينك ويجعل عمك سبب في اقناع والدك وان شاءالله ماحد ثاني يدري وعلى العموم انتي ماطلبتي الا الحلال فليش الخوف حتى لو دريوا لا تهربي من المواجهة ومن اظهار ثقتك بنفسك وبانك ماسويتي اي شي غلط ولو كانت نظرتهم لك سيئة فهذي مشكلتهم وليست مشكلتك والله يوفقك الحال من بعضه بس انا ماعرف اساسا ان في حد تقدم لي او لا وبالتالي ينرفض قبل حتى ما اعرف ان كان كويس او سيئ |
اذا كنتي واثقه من عمك انه ماعلم احد
روحي اي زيارة وخليك واثقة من نفسك واذا احد سمع شي عن الموضوع تغيبي قولي ايش اي موضوع كانك اول مرة تسمعينه... وكذلك ابوك اذا واجهك شاك انكري واذا واثق وعمك قاله قولي هو الي سالني وفسرها على كيفه.. |
بالعكس يا عبير .. اللي سويتيه هو الصح .. ليش يوم الولد يطلب الزواج الكل يفرح له ويوم البنت تطلب حقها بالزواج يستغربون ويعايرونها !!!
شو الفايدة لو كتمتي في قلبج ومرت عليج السنين وضاع عمرج وما صار حد يدق باب بيتكم :( .. شو الفايدة لو ظليتي تلومين أهلج وممكن يقولون بعدين أنج انتي كنتي راضية وما بينتي رغبتج ,, يعني ممكن يلومونج بعد انتي لأنج سكتي!!! الندم ما ينفع بعدين يا ليت عندي عم مثل عمج :) |
الله يسهل لك امورك وقريبا نسمع منك اخبار حلوه
ارفعي راسك انتي طلبتي الحلال والحمد لله الله يسعدك دنياء واخره والحمد لله كلمتي عمك ياليتني انا اكلم احد من جد فكرت اكللم عمتي لكن خجلت وتعرفي الحريم مو كتومات زي الرجال لان مشكلتك تمام زي مشكلتي لكن الي يفرق اني اكبر منك وحاليلا افكر الجاء الى مشروع ابن باز للتزويج ولا ادري متردده حيييييييل الله عين ويسعدنا ويرزقنا اجمعييين |
الأخت الكريمة / عبير الرياض كل عام وأنتم بخير تصرفك تصرف امرأة عاقلة أسأل الله لك التوفيق .. وإن شاء الله يكون عمك محضر خير .. المشكلة عائلية (( داخل العائلة )) بينك ووالدك وعمك .. وهذا والله أمر طبيعي بالنسبة للكلام (( الهرج )) موجود في كل أسرة ولكن بنسب متفاوته .. وإذا راقبتي كلام الناس لن ترتاحي ابداً بل إن هذا الأمر لن ينتهي بزواجك الكلام حاصل حاصل .. المهم أن تكوني واثقة من نفسك وأنّك لم تفعلي أمراً محرماً .. أختي الكريمة .. انتبهي فالبنت التي ترد هي أو أهلها الخطاب بشكل مستمر يأتي فترة ويكون الطلب عليها شبه معدوم.. لذلك من حسن التصرف أنّك أبلغت عمك ليتدخل في إقناع والدك .. سؤال خارجي (( إذا تكرمتي )) هل لك أبناء عم ؟؟ |
| الساعة الآن 09:52 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©