زوجي والسياره
 

السلام عليكم
بصراحه انا عضوه جديده في هذا المنتدى الاكثر من رائع واسعدني الانضمام لكم
ولاحظت انكم شباب واكيد تهتمووون بالسيارات وعارفين كل شي عنها وهذا سبب مشكلتي
بصراحه زوجي مامعاه سياره وهو عايش على الايجار من شهووور طويله
وهو مسكين يبي يشتر بس ماعنده كاش ويبيها بالتقسيط ومايقدر لانه مو موظف والله تعبنا وقلت يمكن عندكم حلووول لنا ياليت اذا عندكم لاتبخلوون علي والله الموووضع مهم وباقتراحاتكم ان شاءالله القى الجواب الشافي االي ازفه لزووجي وشكرااااااا للجميع

هههههههههه
لا اختي

فيه ترحيب وترحيب وترحيب
حياك الله معنا

وبالنسبة للسيارة والله ما أعرف شركة تقسط لغير الموظفين

لكن اذا زوجك عايش على سيارات الإيجار
فمعناته يقدر يدفع قسط شهري
فخليه يقسط ولو بأسم اي واحد من اصدقائه الموظفين
أو اقاربه الموظفين


وربنا يكون بعونك

يمكن يشتري سيارة بطريقة الإيجار المنتهي بالتمليك

اشكركم على ردكم وجزاكم الله خير
وبالنسبه للايجار المنتهي بالتمليك كيف طريقته وايش هي شرووطه

خليه يروح لأي شركة وراح يفيدونه

اختي شروط الايجار يكون موظف

عموما الحل الوحيد ان يكون فيه كفيل له يعني اخوه ابوه ولد عمه ويشتري سيارة من معارض السيارات ويبيعها كاش وياخذ فلوسها ويشتري سيارة على مزاجه

ويدفع الاقساط على اساس السيارة الاوله اللي باعها وهذي موجوده في كل مكان

انا مثلا موظف بس راتبي مايسمح لي اشتري سيكل من وكاله مو سيارة

رحت للمعارض وكفلني اخوي على سيارة وانيت بقيمة 75000 ريال طبعا بعتها كاش بقيمه 52.000 بنفس اليوم القسط 1500 ريال


اخذت ال 52.000 وشريت سيارة من نفس الوكالة اللي رفضوا يبيعون لي بالتقسيط كاش

لو حسبنا النسبه اللي اخذها اللي باع لي الوانيت نفس نسبه السيارة من الوكاله بالتقسيط

والقسط اتوقع نفس اللي يدفعه زوجك على الايجار

لو فرضنا اقل سيارة بيكون ايجارها 50 ريال باليوم بيدفع 1500 ريال بالشهر

:)

أنا ما عندي حل لك....

إن شاء الله تلاقيه عند غيري....

بس حبيت أرحب فيك معانا... :)

الجرايد مليانه دعايات من شركات التقسيط ومن وكالات السيارات نفسها وبدون دفعة اولى
المهم يكون عند زوجك اقتناع بالفكرة
ولاينسى ان الاجار دم فاسد

اذا تقدرين انت ساعدية ؟؟

اختي عندكم حل من اثنين :
1- فيه بعض الناس تقصد للناس من غير ما يكونون موظفين ويعرفون باسم (الديانه)

2- ممكن شخص يكون يثق في زوجك وياخذها باسمه وزوجك يتحمل الاقساط ولاتنسي موضوع الثقه من بين الطرفين لانها مهمه

واتمنى لكم التوفيق ان شاء الله

اشكركم جميعا على ردكم وتعاونكم معاي والله يسهل يارب

معذره الموضوع بسيط جدآ عطيني المنطقه الي انتم سا كنيين فيها وانا بدلك على الطريق الصحيح

شريط سيارات ههههههههه

اختي انتم في اي مدينه ؟؟ راح نساعدكم ان شاء الله

اختي الكريمه

في اي مدينه انتي وان شاء الله بعلمك بشركه تقسط لكم سياره ..

جزاكم الله خيرررررررررر فتحتوو نفسي الله يسهل كل امووركم ويرزقكم يارب انا من الرياض وان شاء الله اخلي زوجي يتفاهم معاكم بس كيف؟؟؟؟

مالي بالسيارات ولا بالتقسيط والإيجار

لكن حبيت أدعي لك ولزوجك

الله يوفقكم وييسر لكم أمركم ويرزقكم كل خيـــــر .

اشكرك اختي غاليه على دعائك
بس اللي قالووو انهم بيدلووني على شركات وينهم لاحس ولا خبرر

مرحبتين اختي بين اخوانج وخواتج اول شي


ثاني شي مثل ما قلتي انه ما شيتغل يعني اعمال حره مو موظف

شوفي خليه يدخر مبلغ ومعووه ويشتري سياره على نص عمر يعني ويقضي فيها مشاويره

اما اذا هو يبغى جديده فهاذا يحتاج الى صبر واظن حتى قرض ما بيعطونه

او انه ياخذ قرض حسن من احد التجار وعلى ان يسدد مبلغ متفق عليه كل شهر

رزقكم الله ما يحب ويرضى


سلااام

اعملوا خطة توفير مكتوبة
توفير الف ريال كل شهر ...... بعد سنة سيارة تمشي ..... بعد سنتين سيارة جيدة .......... بعد خمس سنوات سيارة جديدة ( 60000 ريال )

اهم شيء الارادة القوية ......... ثم التعاون على تنفيذ الخطة بدقة

تنازلوا عن اشياء كثبرة ..... الذهاب للمطاهم ..... ملابس الحفلات ..... السفر

وسوف تجدون خير .... بس اياكم والتقسيط.

والسلام

فيه عدة طرق للمساعده .. ولكن كلها تعتمد على جدية زوجك ووفائه والتزامه بالعهود والمواثيق ..!

أحد هذه الحلول طرحها أحد الأخوة إن كانت الرغبة جديّة وليست مجرد طريقة لإستنزاف الجهود والطاقات

من أجل رغبة غير حقيقية الهدف منها تسلية الذات ..!!

هناك أسئلة كثيرة لعل أهمها .. أين يعمل زوجك ؟؟

وماهي طبيعة عمله بالظبط ..؟

وهل له أشقاء .. صالحين ؟؟

وأسئلة كثيرة لم تـفصحي لنا عن ماهيّة هذه الحاجة ..لكي نستدل بها على طريقة مساعدته ..!

ننتظر اجاباتك قبيل محاولة المساعدة ..!

اشكركم اخواني على تجاوبكم معاي من ناحية يشتغل زوجي فهو يشتغل بالاعمال الحره والحمدلله هو ماديته زينه لكن مامعه سيوله يبي تقسيط اسهل عليه ومن ناحية التوفير بكل شهر الف ريال حلووه بس مشكلتنا قل الصبر وبعدين الاجار اللي ذبحنا يعني بلا فايده مرجوه منه وياليته اجار منتهي بالتمليك كان حلوووو
الله يعينه والمسلمين اجمعين...

الله يكون بعونك وعون زوجك وحياك معانا..

الله يرزقنا وإياكم