|
عمي بيتزوج على خالتي
السلام انا عندي مشكلة كبيييييييييييييييييييييييييييييرة
عمي بيتزوج على خالتي بعد كل هالسنين بدون ادنى سبب ومو مقصرة معاه في شي ابد وجايبة له الصبيان والبنات ومريحتنه ولاتطول لسانها عليه يعني ماشاء الله عليها مسويه اللي يبيه واكثر تخيلوا خطب وهي ماتدري وسمعته وهو يكلمهم ويقولهم انا اسماء اخواني كذا وكذا عشان لما يسألو عنه بس هي سكتت عشان اولادها واختبارات وماتكلمت الا لما خلصوا نتايجهم يعني من شهر ذي الحجة قبل العيد حتى لما قالها قامت تصيح بس ماسوت معاه مشاكل والله لو تشوفوها تكسر الخاطر ضعفانة ومهمومة وعيونها سوده من السهر هو يسافر لحاله لعباده وهناك يتعرف على ناس قاموا قالوله ليش ماتجيب معك زوجتك قالهم ماتقدر عشان العيال قالوله تزوج وجيب معك زوجتك الثانية ورسخت في باله الفكرة وخطب وعقد ويمكن بيتزوج في ربيع خالتي مو عارفة شنو تسوي لانها طيبة ولاتقولوا خلها تروح بيت ابوها لانها كبيرة وعاقلة وعندها بنت متزوجة وانا تعبانة كثير من اللي صار احس عمي طاح من عيني تخيلوا لما قالولي قعدت اقولهم مستحيل تمزحوا هذا آخر انسان اتوقع منه يسوي هالشي وضليت اصيح وماعندي ثقة بالرجال احس مهما عطيتيهم ومهما حافظتي عليهم يغدروا بك احسهم كلهم مثل بعض لان ابوي تزوج على امي يوم كنت بالابتدائي وتاثرنا كثير وضل وياها شهر عاقدين بس يعني مادخل عليها وبعدين تركها بس بعد ماتعبنه وصارت مشاكل وغيره وصارت الناس تعرف عنه وغير لما شفنا عنده في جواله رقم جارتنا اللي امي معاها علاقتهم حلوة وصارت مشاكل وبعدين انتقلنا من بيتنا وابتعدنا عنهم بس صارت امي علاقتها بذيك الجارة مو مثل الاول وانتهت الحين انا خايفة اذا شاف عمي تزوج مايصدق على الله ويتزوج هو بعد عمي هو ابو خطيبي وخالتي زوجته وهي اخت امي خطيبي مسافر وبيرجع بعد اسبوع وخايفة عليه كيف بينصدم في ابوه اما من جهتي اثنينهم طاحوا من عيني ابوي وعمي وماودي اروح بيتهم واشوفه ساعدوني يناس والله تعبانة ومهمومة |
تخيلوا بدل مايجهز لعرسي انا وولده الاول يجهز لعرسه هو آه آه آه وشقول تعبانة
وبنته بترجع من كندا وبتشوف ابوها خطب الله يساعد قلبها |
11 واحد دخلوا ولا رد على الاقل ادعوا ان الله مايجمع بينهم
ولاحتى الدعوة مستبخلين بها |
والله يا نور ما ادري وش الي بحصل بالرجاجيل كل مالهم ينجنون:25: ما اعمم
الله يهديهم لكن انت وش دخلك بالسالفه خليكي عاااااااااااااااااااادي انت وعمك وانا اعرف صعبه لكن ما تنسي انه هو ما عمل شي غلط يعني لو عرفتو انه خانها مع وحده وش بتكون ردت فعلكم بس هو عمل شي حلال الله يهديه لطاعت رب العالمين اهم شي تشوفين خطيبك وش رأيه بالموضوع اذا كان مضايق والا لاء واذا كان مضيق اسئلي قولي له حبيبي انت ممكن تعمل كذا فيه ؟؟؟ وشوفي وش ردت فعله وان شاء الله الله بوفقكم للخير اما خالتك فـــ الله يكون بعونها يارب ويقويها على تخطي هذه المحنه بسلام بكره بتتأقلم مع الوضع الله يصبرها على ماهي فيه ويوفقها وانتم تكلمو معها كثير قولو لها يعني هو على الاقل ما خانك وهو تزوج بالحلال يعني كلمات يمكن تخفف عليها الله يكون بعونها يارب وفقك الله حبيبتي وطمنينا على خالتك في حفظ الرحمن |
لنقل جميعا كما قال سلفنا " سمعنا وأطعنا "
مهما كثر الحديث عن التعدد ستظل المرأة هي المرأة لا تقبل بحال أن يشاركها غيرها في زوجها وإذا حاول فالرد موجود مسبقاً وهو طبعا سيل عرم من الأسئلة الاستنكارية!!!
فلماذا يعدد وهي تقوم على راحته وله منها بنين وبنات ويشهد على اخلاصها له وتفانيها في خدمته القاصي والداني!! ويلي هذا السيل طبعا النظر إلى الزوج نظرة دونية يصحبها سقوطه المشين المهين من نظر الزوجة وأهلها وصويحباتها وجاراتها ونساء الحي وإن شئت فقل نساء الأرض إلا من رحم ربك! وطبعا إلا الزوجة الجديدة وأهلها!!!! سيظل الأمر هكذا شاء من شاء أم أبى من أبى !! لكن يا أختاه اسمعي لقول ربك(( وما كان لمؤمن ولا مؤمنة إذا قضى الله ورسوله أمرا أن يكون لهم الخيرة من أمرهم، ومن يعص الله ورسوله فقد ضل ضلالا مبينا) وقوله: (إنما كان قول المؤمنين إذا دعوا إلى الله ورسوله ليحكم بينهم أن يقولوا سمعنا وأطعنا، وأولئك هم المفلحون) والله إن اتخذت المرأة من قول ربها دستورا ومنهاجا لحياتها لهان عليها الأمر، فما فعل الرجل ليسقط من عينيك؟؟ فلا هو أصاب حدا ولا أتى بموبقة، غاية الأمر أنه أتى أمرا مشروعاً لا يعاتب مثله على فعله إن أخذ في اعتباره الشروط اللازمة . فلما التسخط على شرع الله بدون قصد؟؟ ولسنا بصدد مناقشة التعدد لأنه قتل بحثا ونقاشا وسيظل هكذا إلى ما شاء الله وعذرا إن كنت جاوزت الحد وصلاة الله وسلامه على من سعادة الدنيا والآخرة في هديه واتباع ما جاء به ، وهلاك الدنيا والآخرة في مخالفة هديه وما جاء به. |
تباع الاثر فتحي الباب مشكورين على ردودكم اللي تخفف عني شوي
ياربي ياربي اهدي عمي اي والله وانتي صادقة يافتحي الباب مدري وشفيهم على الزواج من الثانيه الظاهر ماعدنا نكفيهم تباع الاثر ادري انه ماسوى جريمة بس ليش يجرح زوجته اللي عاشت معه سنين بدل مايفرح بولده وبتخرجه مااقول غير حسبي الله على اللي حط الفكرة في باله احيانا اتمنى ان الشرع حنا اللي حلل لنا الزواج باربع رجال استغفر الله كان والله بتحسوا فينا الحمدالله على كل حال |
أختاه سلى الرجال من أهل الفجر وأعني أولئك الذين يخضعون لأمر ربهم ويخرجون لصلاة الصبح في المسجد صيفا وشتاء سواء عندهم حرارة الجو أو برودته
سلي هؤلاء لو كان الأمر بأيديهم هل كانوا ليجعلوا وقت صلاة الصبح كما هو الآن وخاصة في الشتاء والبرد القارس والمطر وو ....... ؟؟؟ لعلك ستجدين من أكثرهم الرغبة الشديدة أن لو كان ميعاده ليس كما هو للأسباب السالفة الذكر ولكن لا جدال ولا شك بأن تخصيص صلاة الصبح بهذا الوقت لحكمة من الله يغني وضوحها عن تفصيلها ولو تأملت في كثير من أمور الشرع لوجدت أنها قد تأتي على غير مراد النفس ولو ترك الأمر للناس لغيروها هذا مع اليقين التام بوجود حكمة إلهية خلف هذه الأمور علمها من علمها وجهلها من جهلها.. وهنا في هذا الأمر وأعني التعدد فقد فطر الله الإنسان على حب نفسه وحب الخير لها ولولا ذلك لهلك الناس، فمن منا يحب أن يشاركه غريب في رغيفه فضلا عن بيته أو كما الحال هنا من تحب أن يشاركها غيرها في زوجها ؟؟؟..... الجواب لا أحد إلا من رحم ربي ولكن هل يعني هذا خلو الأمر من حكمة إلهية قد تكون جلية ظاهرة أو خفية ؟؟؟ الجواب معلوم بالضرورة... إذن فما الحل إن كان الأمر كذلك؟؟ الحل أن نتعامل مع أمور الشرع وإن أتت على غير مرادنا كما يتعامل أهل الفجر مع صلاة الفجر وإن أرعدت السماء وأزبدت... لا سبيل لطيب العيش إلا الرضا بقضاء الله حلوه ومره وإلا فمن ركب جواد الطبع وأطلق العنان لنفسه فليس بخاسر إلا نفسه. |
مشكور يتباع الاثر شكلك انت الوحيد المهتم ترد على موضوعي انت وفتحي الباب
على العموم مشكور اليوم وانا اصلي الفجر دعيت ربي من كل قلبي ان الله يوفقها مع واحد احسن من عمي ومو متزوج وان الله يهدي عمي ويسخره لزوجته بنصبر وبنشوف يمكن يصير شي ويمكن هذي مراهقة الخمسين ويمكن نزوة الحمدالله على كل حال |
ما اقدر اقول الا الله يعين خالتك
|
الخوف ليس من زواج الرجل وتعدد زوجاته
ولكن الخوف من الظلم فإن كان الرجل صالحا عدلا فالله يوفقه لتكثير امة محمد بل ان هذه سنة سيد المرسلين ( صلى الله عليه وسلم ) من عظمة التشريع الإسلامي، ورحمة الله بعباده المؤمنين، ومنعًا للفتنة وانتشار الفاحشة، ورعاية للأرامل اللاتي استشهد أزواجهن، وتحصينًا للمسلمين، أباح الإسلام تعدد الزوجات، وقصره على أربع يَكُنَّ في عصمة الرجل في وقت واحد، والمرأة الصالحة لا تمنع زوجها من أن يتزوج بأخرى، إذا كان في ذلك إحصان له، أو لمرض أصابها، أو لرعاية أرملة، أو لمجابهة زيادة عدد النساء في المجتمع عن عدد الرجال، فإذا تزوج الرجل بأكثر من واحدة فعليه أن يعدل بينهن، قال تعالى: {فانكحوا ما طاب لكم من النساء مثني وثلاث ورباع فإن خفتم إلا تعدلوا فواحدة أو ما ملكت أيمانكم} [النساء: 3]. |
مشكورة عيون فتانة على المرور الله يعين خالتي
aimمشكور على المرور بس هو اللي سمعته انه يقول بيعطيها خميس وجمعة بس ما ادري مو متاكدة لان هو يشتغل بمنطقة بعيدة ومعاه عيلته وثانيا هو من النوع اللي يوجب الناس كثييييييييييييير يعني اعراس يروح يبارك وناس متوفيه يروح يخلف عليهم ويروح يزور اهله يعني عنده صلة رحم ماشاءالله عليه وعمي ترى طيب كثير وحبوب ويجنن بس ليش بيخرب حياته ما ادري يالله خله يجرب غير خالتي بعدين بيعرف قدرها |
اهم نصيحة مني لك اختي نور الغدير
لا تتكلمي مع احد في هذا الموضوع كثرة الكلام ما راح يجيب لك انت وخطيبك الا وجع الراس الرجال عقلة في راسة يعرف خلاصة كلامكم ما راح يودي ولا يجب اهم شي انت وضعك حساس...لان اللي را ح تتكلمين علية هو قبل لا يكون عمك فهو ابو خطيبك حطيبك يسمح لنفسة ان يتكلم عن ابوة لكن لن يسمح لك انك تتكلمين باي كلمة عن ابوه فاللي راح يصير ان علاقتك مع خطيبك راح تتأثر اسمعي وشوفي بدووووووووون تعليق على الموضوع عمك رجل يعرف مصلحتة والله يكون في عون خالتك |
اقتباس:
كلام سليم كوني قريبة من خالتك وفي نفس الوقت لا تخسري عمك فتخسري خطيبك ... والله يعينا على الرجاجيل |
مشكورة فيفي على المرور ادري موقفي حساس
انا مستحيل ادخل بس ابيكم تنصحوني اذا جا خطيبي من السفر اقوله ولا اخليه يعرف لوحده لان بيجي الجمعة واهلة يوم الجمعة يروحو المنطقة اللي يشتغل فيها عمي واللي يدرس فيها اولاده لانه خلاص بتبتدي المدارس وكيف اذا شفت خالتي وش اقول لها لاني استحي منها شوي وعمي اذا شفته كيف اكلمه عادي لان انا بالعادة امزح واضحك معاه ولا اسلم عليه ولاحتى ابتسامة وكيف اساند خطيبي في المحنة هذي كيف اخفف عنه والله مابي شي يكدر خطيبي ودي لو احمل همه لحالي ارجوكم جاوبوني لاتطنشوني ربي يفرج كربكم كلكم ملاك الغربة مشكورة على المرور الكريم ولاتخافون مستحيل اتكلم على عمي لاني احبه كثير لامع خطيبي ولامن وراه ويوم اقول طاح من عيني مو قصدي بس من الحرة قلت لكم اعذروني لاني مريت بتجارب قاسية انضربت فيها وانا مخطوبة بس عشان اني وقفت مع الحق |
السلام عليكمورحمة الله وبركاته
عزيزتي الفاضله اهديكي اطيب التهاني بمناسبة خطوبتك وانشاء الله تتم الفرحة في بيتك الزوجية قريبا، انا اعرف ان الموضوع صعب عليكي والله يكون بعونك وحاسه فيكي كانك بدوامه ما بين تجربتك مع والدك انه راد يتزوج على امك وما بين تجربت عمك الحين وزواجه على خالتك ، الله يهدي النفوس انشاء الله ويطمنك ويريح بالك، عزيزتي النار ما تكوي الا ايد صاحبها والله يعينك، اما بخصوص خطيبك وقدومه من السفر فالافضل ان لاتطلعيه من على الموضوع من جهتك انت انتظري لبين ما يعرف بالموضوع من طرف اهله افضل يكون او اذا قلتي ما احد موجود يخبره فلا باس تخبريه انتي بس بطريقة لطيفه ولو انا افضل ان ما تخبريه حتى لا يعمل مشاكل مع اهله والسبب يكون انتي، اما بخصوص خالتك فحاولي تصبريها بالكلمه الحلوة والطيبة وتذكريها بالرجوع الى الله في الدعاء عسى ان يذهب كربتها ويفرج عليها واوصيك عزيزتي بالدعاء وقول ( اللهم لا سهل الا ما جعلته سهلا وانت تجعل الهم والحزن لو تشاء سهلا) والدعاء الاخر( اللهم اذهب غيظ قلبي) وكرري هذه الادعيه في كل صلاة ما استطعت فسوف تجدين الانشراح في صدرك باذن الله لاني انا شخصيا جربتها.. اما بخصوص عمك فهو ابو خطيبك ايضا واحترامه واجب لذلك حافظي على علاقتك به ولا تتغيري في معاملتك معه.. وفي الختام ارجو ان لا تضعي نفسك في موقف الحكم بينهم ولا تنحازي لاحد وكوني حياديه وعقلانيه في هذه الظروف الصعبه التي تمرين بيها لانهم بحاجه اليكي لتهدئة نفوسهم وعدم سكب الزيت على النار مثلما يقولو.. فهم بحاجه الى انسانه قوية تحبهم وتهتم لامرهم وهذا ما انتي عليه ويجب ان تكوني قويه وتحكمي عقلك لا عواطفك .. واعلم ان هذا الكلام ليس سهل التطبيق . وسوف يكون الله معكي باذنه تعالى لانك صادقة النية بحبك للخير لجميع الاطراف.. وبالله التوفيق. |
عزيزتي .. أولاً : أبارك لك بمناسبة خطوبتك وان شاء الله ربي يتمم على خير ... ثانياً : برضه أبارك لعمك زواجه الثاني وربي يوفق الجميع ... القضية يا عزيزتي ليست في الزواج لذاته وإنما في شخصية الرجل ! نعم شخصية الرجل فإن كان رجلاً عادلاً ومقتدر من جميع النواحي التي تمكنه من إقامة العدل بين زوجاته وأبنائه فلم يعد الزواج الثاني أو الثالث أو حتى الرابع يشكل أي عائق من الحياة الهادئة للأسرة التي يقوم عليها مثل هذا الرجل .(( وحسب ما فهمت من موضوعك عمك رجل مقتدر ولديه الكفاءة لذلك)).. أما إذا كان الرجل من النوع الذي من الممكن أن ينجرف وراء المرأة الجديدة ويكرس جهده في سبيل تحقيق رغباتها ولو كانت على حساب زوجته الأولى وأبنائها ، فهنا مكمن الخلل!! فكم عرفنا من الرجال الذين عددوا ونجحوا في تأمين الحياة الكريمة والجو الاسري الملائم لزوجاتهم وأبنائهم .. وكم عرفنا أيضاً من الرجال الذين عددوا لمجرد التعدد وكانت النتيجة حرمان الزوجة الأولى وأبنائها من أبسط حقوقهم ..!!
إذن يا عزيزتي ... يفترض أن تتركي هذا الموضوع أو حتى مجرد التفكير فيه (دعي الخلق على الخالق)... وركزي إهتمامك على ما يعنيك بشكل مباشر لأنكِ (وبكل بساطة) لن تستطيعي أن تغيري من قناعة عمك أو غيره من الرجال الذين إقتنعوا بفكرة التعدد وبدأوا في تنفيذ هذه الفكرة .. وذلك لامور (بطبيعة الحال) متعددة ومتشابكة فمنها مسوغات هذا الزواج ..(هل تعلمينها أو يعلمها غيرك) ؟!! بالتأكيد لا .. لأن البيوت أسرار ولا نعلم ما هو المبرر لهذا الرجل أو ذاك لكي يعدد .. وفي الجانب الآخر موضوع الشروط فالرجل الذي تكتمل فيه شروط التعدد .. من البديهي جداً أن يتزوج كيف ومتى شاء ( في حدود الشرع) ويبقى السؤال هل تتوافر شروط التعدد في( زيد) من الناس ؟ وهذا سؤال ليس من السهولة أن نجيب عليه لمجرد قراءة موضوع عن عدم تأييد الزواج من ثانية !! أخيراً .. لا تخسري عمك لمجرد كونه تزوج على خالتك .. ومن ثم قد تخسري خطيبك .. إهتمي بموضوع خطبتك انتي وان رأيتي ان الوضع في اسرة عمك فيه شئ من التوتر بسبب زواجه فأعطيهم وقتهم لتعود الامور الى ما كانت عليه ولا تقحمي موضوع خطبتك في هذا الوقت بالذات .. رتبي مع خطيبك أن يكون هناك تنسيق وإختيار للوقت المناسب لإتمام خطبتك . وأخيراً :آآآآسف للإطالة وللرد إذا لم يعجبك كونه يمثل وجهة نظري ولكلٍ وجهة نظر ..!! وبالتوفيــق ،، |
عفواً .. تتمة المشاركة : بالنسبة لخطيبك أرى انه من الأفضل عدم إخباره بما صار من خطبة والده .. ولكن إذا دعى الأمر فليكن بشكل لبق ، أظهري فيه التعاطف مع والدته ولكن إحذري من إنتقاد عمك أو تصرفه أمام ابنه مهما كان انطباعك عن الموضوع ..
|
:14: والله ما أقول الا مبروووووووووك :14: |
الله يوفقه الرجال ماسوى شيء غلط انتي مضخمة الموضوع
|
اختي نور الغدير.. اسمحيلي بس تراج وايد مكبرة السالفة
الزواج الثاني عمره ما كان عيب او غلط او حرام عشان تقولين ان عمج طاح من عينج .. بعدين انتي ما تعرفين باللي بينه و بين خالتج .. انتي تشوفين انها مو مقصرة معاه في شي بس اللي بين الريال و زوجته ما يعلرفه حد غيرهم ,,, و ما في ريال يتزوج بدون سبب .. مستحيل .. ممكن يكون السبب تافه أو بسيط بس لازم يكون في سبب .. في رايي ان غلطة عمج الوحيدة انه خطب قبل ما يخبر زوجته .. كان المفروض انه يوم نوى يتزوج الاول يخبرها و يرضيها بعدين يخطب مو انه يفاجئها .. بس ممكن يكون عذره انه خاف ان الناس اللي بيخطب عندهم ما يوافقون عليه ففكر يتاكد من رايهم بعدين يخبر زوجته .. على كل حال الله يصبر خالتج لان اكيد هالموضوع بيضايقها لان مافي حرمه تحب حد يشاركها في زوجها .. بس اللي ممكن يصبرها انها تفكر مادام زوجها فكر في حرمة ثانية و احتاج زوجة ثانية فزين انه فكر في الحلال ما دور عالحرام .. تحياتي لج |
بلوسكي مشكورة على مرورك الطيب وانا احاول بكل جهدي اني ماافكر بالموضوع بس ياسبحان الله بشكل لا ارادي اصيح على خالتي وخطيبي
يمكن ماثر علي فراق خطيبي فحاسة في ضيقة مايعلم بها الا رب العالمين حتى احاول الهي نفسي عن السالفة بس مااقدر ماقول غير لاحول ولاقوة الا بالله العلي العظيم وانا دائم ادعي في صلاتي ان الله يصبر خالتي ويخفف همها حتى خالاتي تعبانين ومو مصدقين بالللي صار وحالتنا حاله بسبب الموضوع ابو سلطان انا مو متاثرة عشان خطوبتي ابد بالعكس ماتهمني كثر ماتهمني سعادة خالتي واولادها بس انا ذكرت كذا من الحرة اللي داخلي والله انا ماودي افكر كيف بيعدل وغيره بس تفكيري ان السالفة تنتهي لان كلما فكرت بربيع بعرس احس اني بموت كان انا اللي بيعرس علي وحنا نحاول قدر الامكان نهدي خالتي ونصبرها ونقولها ترى حنا كلنا معاكي ولاتهتمين بالعكس لما يجرب غيرك بيعرف قدرك لا والمصيبة الاعظم انه يمدح بخالتي مدح مو طبيعي بدون كذب حتى من قبل مايفكر يعرس يقول لاولاده انا اخترت ليكم احسن ام وامكم مافي منها وغيره ولحد الان يمدح فيها وهو ابد ماتغير عليها بالعكس على كلامها تقول زاد حنانه عليها بس مهما كان تضل تتعذب من داخلها بس ماتبي تسوي مشاكل وتعبنا معاها مجد وضوءالقمر ما اقول غير ماتحرق النار الا رجل واطيها |
بنت الحب مشكورة على المرور ادري ان في سبب بس تافه جدا
مايسوى ينذكر بس تعرفين الرجال اذا حبوا شي يسونه ويطلعون حجج من تحت الارض على العموم مشكورين كلكم على المرور على الاقل عبرتوني وخففتوا علي وان شاء الله الجاي احسن وان شاءالله تدوم المحبة بينهم وحتى لو تزوجها ماياثر على خالتي الحمدالله الحين الوضع احسن احس خالتي صارت اقوى وصابرة والله يكون في العون |
| الساعة الآن 12:30 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©