في البدايه اشكركم على هالمنتدى الطيب و الراقي .... قبل لا اسجل عندكم كنت ادخل و اقرأ المواضيع و القصص اللي تصير و اشوف تفاعلكم مع الاعضاء شجعني على التسجيل و طرح مشكلتي ... مابغي اطول عليكم راح اقولكم قصتي و اتمنى انكم تساعدوني لاني جد والله تعبت ولا عارفه وش الحل.



تزوجت قبل 5 شهور و كنت في غاية السعاده و مستانسه و احب زوجي و هو يحبني وانا واثقة من هالشي.

بعد ما مر على زواجي 3 شهور اكتشفت اشياء عمري ماتوقعت انه هالاشياء تصير لي على كثر ماكنت اسمع مشاكل الناس....

مرة من المرات كان زوجي يدور على اوراق تخصه وانا كنت ادور معاه ..هو كان يحط اوراقه الخاصه في شنطه قعدت انا ادور في الشنطه على امل اني الاقي الاوراق اللي يدور عليها وبين هالاوراق كانت بطاقات كنت اعطيه اياهم ايام الخطوبه و الملجة في المناسبات وكان محتفظ فيها و مبين هالبطاقات حصلت بطاقات غريبه و اول مره اشوفهم ... و بطاقات حب و غرام ... و عن الفالنتاين و عيدالميلاد المهم انا انصدمت و اللي عور قلبي انه بطاقه من البطاقات كانت قبل زواجنا بأسبوع !!!!! حاولت اكذب اللي شفته و اقول يمكن ربعه الشباب معطينه اياه مع اني واثقه انه مستحيل شاب يهدي شاب هالبطاقات او يكتب له هالكلام....المهم حاولت اني اكتم و اسكت و انسى الموضوع مع اني احيانا كل ماتذكر اقعد اصيح بيني وبين نفسي من غير ما احسسه انه فيه شي ..... مرت الايام واحيانا احس انه هالشخص مو زوجي اللي اعرفه ... احسه ساكت و متضايق و سرحان وكل ماسألته او حاولته اكلمه اقول له فيك شي يقول مافيني شي ... و اسكت ومرينا على هالحال تقريبا كم اسبوع ..... في يوم كنت جالسه اكلم اختي في التليفون وكانت تعطيني رقم وماكان قدامي الا تليفون زوجي فتحته عشان اسجل الرقم وبالصدفه كان فيه مسج مو مفتوح ولما ضغطت انفتح المسج من غير قصد والله ولا كنت قاصده ولا فكرت في يوم اني افتش تليفونه او شي يخصه لاني واثقه فيه ......
لما شفت اللي مكتوب في المسج حسيت راسي يلف ولا عارفه و ش اسوي وعرفت انه زوجي على علاقه مع بنات و طبعا رد فعل طبيعي قعدت ادور في تليفونه و اكتشفت مسجات قديمه من هالبنات حاولت اخذ الارقام و ادق من تليفون غير تليفوني بس للاسف ما يردون ....الهم مرت الايام وانا كاتمه في قلبي وحاسه اني بموت ولا قادرة اني اصارحه ....خلال هالايام زوجي حس اني افتش تليفونه وقعد يلمح لي بس انا مسكت نفسي وسويت نفسي ماعرف يتكلم عن شووو .....بعد هالموقف اللي صار صرت ما افتش و انقطعت فتره ..... بعد مامرت فتره تقريبا اسبوعين اكتشفت انه المسجات انقطعت و فرحت واااااااااااااايد قلت الحمد هم و انزاح .... وصرت ما افتح تليفونه الا من فتره لفتره و في الوقت اللي يكون هو فيه نايم او مشغول طبعا من غير مايحس او يكتشف ............. من فتره قصيره اكتشف انه مخزن ارقام هالبنات في جواله باسماء رجال !!!!!!!!!!!! طبعا قعدت اصيح وانصدمت مره ثانيه و المصيبه انه له علاقه مع اكثر من بنت كل يوم رقم وكل يوم اسم و مسجات ...طبعا مايكلمهم جدامي يطلع من البيت حتى لو 5 دقايق يتحجج انه رايح السوبرماركت او رايح المسجد او راح يجيب غرض من السياره ..

بعد هاللي صار مره فتحت الشنطه كان بطلع له شي و اكتشفت انه شايل البطاقات اللي شفتها قبل!!!!!

وفوق هذا كله كنت اشوف صور وصخه في تليفونه وعلى الكمبيوتر وغير صور البنات طبعا هو صار مايخلي هالاشياء لانه حاس اني انا عارفه بسوالفه بس انا ساكته و صابره واحاول اني اكون مثل ما انا و احسن لاني عارفه انه هو يحبني ولا مقصر علي بشي وانا احبه ولا اقدر اعيش بدونه واحاول اطيعه بكل شي يطلبه مني ولا ازعله لاني مابي اكون سبب في تدمير حياتي ولا ابي الشك ينزرع في بيتي وبيني وبين زوجي.



ارجوكم ساعدوني ولا عارفه شسوي ؟؟؟؟ هل المصارحه هي الحل ولا السكوت احسن

مع العلم هالايام احس انه زوجي تغير و رجع مثل قبل و يحبني و يدلعني ورجع مثل قبل بس للحين مستمر مع علاقاته واتصالته لانه مايدري اني ماكتشفت انه يكلم بنات و مخزن اسمائهم باسماء شباب


والله تعبت ولا عارفه وش اسوي احس اني بموووووووووووت .... للعم انا الحين حامل في شهري الاول وهو عارف بهالشي

كل ماحاولت اني اكون مستانسه وفرحانه مع زوجي اتذكر بنات الحرام وعلاقته فيهم




ارجوكم قولوا لي وش الحل ,,,,,,,,,,,,, ادري اني طولت عليكم بس ماني قادرة اشكي لاحد غيركم