اروح لاهلي ام ابقى في بيتي
 

اخوتي حبيت استشيركم في موضوع
وابي اعرف رايكم فيه ((ماخاب من استشار ))


سبق نزلت لكم موضوع عن زوجي وبخله وعلاقاته واهماله لنا شهر اعوذ بالله مدري وش صاير فينا ((من بعد خيانته لي )) واحنا من مشكله في مشكله ثانيه وكل ما انتهينا من وحده دخلنا بالثانيه

مشكلتنا الاخيره كانت تافهه جدا ما ابي ادخل بتفاصليها وكان سببها زوجي الله يسامحه لكن كانت بدايه للزعل وتطور الامر ودخلت مشكله في وسط مشكله وبناء على مشاكلي السابقه مع زوجي وتذكري لخيانته لي اعترف اني كنت ولاول مره من خمس سنوات ارد عليه بالكلام مره كنت الحقه ابسأله عيالي وينهم وسافهني وانا اعيد السؤال دخل الغرفه وسك الباب بوجهي انقهرت فتحت الباب قلت له طول عمرك قلبك اسود ومره قلت له انت فيك لؤم عير طبيعي وحتى هو كان يسمعني كلام يسم البدن
عشنا ايام من المشاكل
جلست استعرض حياته معه وبعد ماكتبت في المنتدى هنا بعضهم اشار علي اني ادخل احد من اخواني في السالفه

كلمت اخوي الكبير قلت له لكن تفجأت من رده انا ماقدرت افتح موضوع خيانة زوجي سكت بس تكلمت عن بخله
للأسف اخوي وقف ضدي في البدايه قال خلاص راح اشوف الموضوع لكن خلا اختي الكبيره تكلمني واللي فهمته من اختي انه كان متنرفز من مكالمتي وقال كلميها يا اسود يا ابيض ياتطلق او تنثبر

انا ماكلمت اخوي الا لما استحالت الحياة بين وبين زوجي وابي حقي المصروف وبسس ومثل ماذكر القرآن فاتو بحكم من اهلها


لكن للآسف انصدمت من موقف اخوي تاثرت بكيت في بيتي ولا احد داري عني

ومازالت مشاكلي مستمره مع زوجي قررت انهيها واعتذر لزوجي لما رحت رفض يقبل اعتذاري قال انا قلبي اسود ولئيم مثل ماقلتي اعتذرت عن كلامي لكن رفض وهددني اني راح اعيش معه حياه سوداء بالفعل
وجلس يقول انا كنت احرم نفسي من اشياء علشانكم (( مع اني اشوف الواقع غير )) لكن انا ماعاد يهمني شيء ماعاد يفرق وجودك من عدمه
واذا تبين تروحين لاهلك روحي تو اقتنعت بروحتك لان وجودك ماعاد يفرق احجزي اليوم وروحي قلت خلاص ابي اخذ العيال قال لا بلحالك

وصار يومين يقول هاه ما حجزتي قلت استنى توافق على روحة العيال

من يومين قال خلاص روحي انتي والعيال
وبعد شهر تجون
انا لسا ماحجزت

زوجي هالأيام معيشني في جحيم حياتي معاه ماعادت تنطاق فكرت اروح لاهلي وخااااايفه اذا رحت تزيد المشاكل بيننا اكثر واكثر

وفي نفس الوقت اقول اروح يمكن يحن لنا ويشتاق
ويحس بقيمتنا اذا فضى البيت عليه وخصوصا اليوم كان يكلم زميل له ويقول انه من بكرا بيشترك في النادي وبيصير نظامه من 5 الى العشاء في النادي ومنها يطلع لزملاؤه في الاستراحه الى 3 الليل ((طبعا زوجي راعي سهر الى اخر الليل )) والصباح طبعا الدوام

يعني كالعاده مالنا وجود في حياته وفوق ان البيت ماينطاق ودي اروح لاهلي مع ان ديرة اهلي حاااااره بهالوقت وبيتهم بعد ماينطاق

بس فكرت ابعد احسن لي واجدد واغير بنفسي
لكن في نفس الوقت اخاف من ضريبة البعد

حبيت استشيركم واسمع ارئكم وبالأخص من الاعضاء


مواضيع الاخت بسمه حنونه

http://www.66n.com/forums/showthread.php?t=168304

http://www.66n.com/forums/showthread.php?t=168450

أختي الغاليه ما في مكان تاخذ المرأه راحتها فيه الا بيت زوجها

واهلك مستحيل يتحملون أولادك وبالتالي لن تكوني مبسوطه عندهم هذا اذا فكرتي ان تقيمي عند اهلك لفتره طويله

وبصراحه كيف تتركين البيت وبينكما خلاف وزوجك غير راضي عنك

اجلسي في بيتك وانسي المشاكل ووسعي بالك والدنيا ما تستاهل ابتسمي لزوجك وفرفشي واخزي الشيطان

والحياه يااخيتي تحتاج الصبرررررررررررررررررررر

وصدقيني كل الي نفسك فيه يجي بالابتسامه وحسن المعاشره وبلاشي تقولي لزوجك كلام مو حلو زي انت قلبك اسود

وغيره حاولي تكسبي زوجك ولا تروحي لاهلك الا وهو راضي ومبسوط

الله يسعدكم ويصلح بينكم

سامحيني يالغاليه اريد ان اذكرك بقراءة القران والدعاء والصلاه فيها سر عجيب لانشراح الصدر

الله يوفقك

اللهم اهدي زوجها
فكري جيدا واستخيري وشاوري اختك وامك

اذا جوزك انسان كويس وفي منو امل خليكي عندو
اذا ما في منو امل ويكفيني انه خائن لذلك اتركيه
والله يعوض عليك
ويهديك
صدقيني ريحي راسك وبلاها عيشه مع رجل ووجع راس

اختي حبيبتي
خليك في بيت زوجك والله جلستك في بيتك تسوى الدنيا ومافيها
لاتخرجي من بيتك وزوجك زعلان او قلبه فيه شئ ربما لاسمح الله تكبر المساله ولاترجعين اسمحيلي على هذا الكلام
لكن افضل لاتخرجي وخليه هو يروح النادي ويسهر مع اصحابه وانت كمان شوفي لك مكان نادي ولا تحفيظ قران ولا اي مكان ولا اخرجي اجتمعي مع الجيران
المهم قضي وقتك ياعيوني
وحاولي تلطفي الجو بينك وبينه وتحننيه عليك
فهميه انك جلستي عشانه وقولي له اذا قالك ماحجزتي قولي لا ماني رايحه شوف امورك انت واذا خلصت مشاغلك نسافر سوى يومين نغير جو انا وانت والاولاد لاي مدينه قريبه منكم
اجلسي معه وصفي النفوس وحاولي ان تستشفي مافي نفسه ومايضايقه

واخبريه بما في نفسك ومايضايقك بااسلوب لبق وكلام محترم لكي يكون الحوار هادف وتخرجون بنتيجه يعني لايكون مبتذل
واهانات وسب وتخرجون بلا نتيجه

الله يصلح الاحوال في انتظار اخبارك

الله يجزاكم خير

لكن انا ماعاد اقدر افتح معاه اي موضوع مانكلم وماعاد عندي استعداد ارجع اكلمه بعد مارفض اعتذاري

((سبحان الله لما اكتشفت خيانته اعتذر مني وقبلت ونسيت على الطول لان العشره ماهانت عندي )

لكن هو تفكيره غييير

مسألة اني اطلع لجيران او غير ممنوعه مايبني اتحرك شبر من البيت ولا يكون لي علاقه مع احد يبني بس جاسه كل يوم انتظره لاخر الليل

كل يوم احساسي بالظلم والقهر يكبر

كل اللي حولي من قرايبنا يطلعون ويتمشون على كثر الحدائق والمنتزهات اللي عندنا الطلعه علينا حرااااام

هذا رابط موضوعي السابق والله يجزي الجميع كل خير
http://www.66n.com/forums/showthread.php?t=168304

الصراحه امورك بين خيطين فيها ممكن تجري الامور جيده وومممكن لا

فافضل حال انك تسوي الي ترتاحين له وحسب الامور الي تشوفينها حولك ممتازه لك

شخصيا لا اقدر ان انصحك الا ان تتمسكي ببيتك وباقي الحلول من ذهاب لبيت اهلك للراحه واعطائه فرصه للتفكير وغيره

راجع لك .

اتمنى ان تصلح امورك وامور زوجك وتكونوا سعداء

والتنازلات لازم من الطرفين ليتحقق ذلك

شهر مره كثير
أختي زوجك غير الأشياء الي ذكرتيها عنه فيه ايجابيات ولا لا
حبيبتي مافي أنسان كامل وهاذي الحياة يبيلها صبر وشوية تنازلات
قبل التفكير في اي قرار أستخيري الله

ونصيحتي لك مادامه صاحب علاقات لاتتركين بيتك وتفضيله الجو وياخذ راحته00
================================================== ===============

ياختي احنا في اجازه روحي لاهلك غيري جو حتلا لو شهرين مو شهر بس عادي

انتي رايحه تغيرين جو وتزورين اهلك

مشكورين الله يجزاكم خير

انا ودي بالروحه لاهلي اغير جو عندهم

لكن مشكلتي توني جايه من عندهم قبل شهر

بعد ماقضيت 4شهور انا وزجي هناك كان عنده عمل

محتااااره

ودي ابعد عن زوجي لان لنا سنه كامله تقريبا مابعدت عنه
لما رحت لاهلي كان معي علشان عمله

اول كنت اذا رحت لاهلي ورجعت بيتي او يجينا هناك احس انه مشتااااق لنا واشوف منه اهتمام لكن هالسنه غير وزادات الامور سوء بعد مادخلت البنت اللي كان يكلمها حياتنا

الله لايوفقها ولا يرحمها

ظروفك صعبة في هذا الوقت بالظبط أنصحك لاتتركي بيتك حتى يتم الصلح بينك وبين زوجك
الله يصلح بينكما اميييييييييييين

أخشى أن زوجك مبيت النية لذهابك بلا رجعه فلا تذهبي لوحدك بل هو الي يذهب بك لأهلك او هو اللي يحجز لكم لا تحجيزي أنتي خليه هو اللي يحجز

لا تتركيه في هالوقت بالذات
اذا رحتي بتزيد المشاكل وبتتعقد
واذا بتروحي لاتقعدي اكثر من اسبوع وزياده
واستخيري
وربي يكتبلك الي فيه الخير

[warning]اختي الكريمه بسمه حنونه الملاحظ عليك طرح مواضيع وعدم متابعتها لذا تم اغلاقها فالرجاء منك المتابعه[/warning]

انا متابعه لمواضيعي واقرأجميع الردود

أخي شغموم هل من الممكن ان زوجي خلاص ماعاد يبيني

لان هذا اللي احسه هالاسبوع بالفعل احس مو طايقيني ويعاملني اسواء معامله

هل بسبب الكلمتين اللي قلتها خلاص تهون العشره

انا افكر اروح لاهلي لان بيتي ماعاد ينطاق هذا غير ضيقة الخلق

احترت ماعاد ادري وين اروح

اللهم اني اسئلك باسمك الحبيب الكافي ان تكفيني كل اموري مع زوجي مما يشوش خاطري ويسهر ناظري ..


اشكركم اخوتي ماقصرتوا الله يجزاكم خير

ودعواتكم لي

الله يكون بعونك اختي
وانا لو باكون مكانك عادي باروح ازور أهلي
لكن ما راح أخلي ألتجائي لله ودعائي والأستغفار
الله يجمع بينكما بخير

كل الشكر للجميع

اخوتي اخذت بكلامكم الله يجزاكم كل خير ولزمت بيتي مع كثرة الدعاء والاستغفار اخر الليل

اختي سلطانة نفسها جزاك الله كل خير تذكرت كلامك ولا يأست اعتذرت من زوجي بغض النظر الغلط من مين والحمدلله قدرنا نتفاهم ونحل مشاكلنا بالهدؤ وعادت المياه لمجاريها
وقررنا اخر الاسبوع نروح اي مكان نغير جو وبدايه للتغير بإذن الله عزوجل

كل الشكر لكم ولهذا المنتدى الرائع
ماراح انسى وقفتكم معي

والله يجزاكم خير ويكتب لكم التوفيق جميعا


تحيااااتي للكل

اختي لا تروحين ..


انتي توك جايه من اهلك.. اصبري.. زوجك اكثر وقته برات البيت.. طيب حطي طول الوقت بالبيت سورة البقرة فيه قناة امسها طيبه على التلفزيون.. حطي عليها طول الوقت خلي قران..

انتي اجلسي باليوم استغفري اكثر من 1000 مره..

ادعي ربك يحنن قلبه

توجهي لله بالدعاء والتضرع باسماء الله الحسنى كلها.. وقوليها اسم اسم.. صدقنيني اذا اخصلتي لله ما راح يخيبك..


وفيه حديث عن الرسول داووا مرضاكم بالصدقه.. اللي في زوجك مرض .. والله يعينك عليه..

انتي الان اعملي في بيتك وربي عيالك.. وادعي ربك يكون عملك عبارة صدقه.. قبل تنادين تصدقي بعرضك لك من شتمك وسبك.. ادعي ربك انه يحسب هذي صدقات لك...


اذا قدرتي تتصدقين بالمال زين على زين..


حاولي بذل اسباب تجيب السعادة لبيتك.. حتى الماي اقرأي عليه قبل تشربينه وحتى الماي اللي في الثلاجة اقرأي عليه انتي قران.. وادعي ربك بكل شئ يطرح البركة..


واصبري هذذي الفترة..

روحتك لاهلك ما راح ترتاحين فيها بالعكس راح تكون نار عليك لانه زوجك مو معك.. ولا تدرين غيابك يمكن يكون بالعكس..


انتي توكلي على الله والله المعين..