|
كيف نتعامل مع المقارنة بين الأطفال ؟
سبحان الله كل طفل يختلف عن الآخر
لكن في ناس ما شاء الله عليهم هوايتهم المقارنة بين أطفالهم والآخرين وخصوصا بين الأطفال اللي يكونون بنفس العمر صحيح الواحد يحصن الطفل وما عليه إلا العافية لكن هذا اسلوب يزعجني شخصيا أقولكم أمثلة من عندي زميلة أعرفها طيبة وعلى نياتها ما بين بنتي وبنتها إلا أقل من شهر دائما تسأل عن حسن نية بنتك كم وزنها ؟ تصدقين وزن بنتي كذا طيب أنا بنية بنتي غير وكثافتها العظمية غير ما في مجال للمقارنة وقت كانت أسنانهم تطلع تفتح فم بنتي تشوف أسنانها فين طالعه وكم سن وتقول بنتك تحت وبنتي فوق عدد أسنان بنتك كذا وبنتي كذاك بنتي ماشاء الله تمسك الصيصان عادي وبنتها تخاف تقول بنتك عادي تمسك ما تخاف ! أنا أخاف وبنتي تخاف كل هذا على مسامعهم أقولها أنا ما أخاف ولا خوفتها وفطرة الطفل ما يخاف يمسك الحيوانات الصغيرة إلا إذا أحد خوفه منها لكن لا حياة لكن تنادي بنتي الحين ما شاء الله قريب 3 سنوات إذا قالت لي أبغى الحمام تقول ماشاء الله تعرف أنا بنتي لسه والمشكلة المقارنة ممكن تتضرر منها بنتها لأنها تقول لها شوفي صارت صديقتك تروح الحمام وانتي لسه بنتي من وقت كملت السنتين وأنا أحاول معاها وما تعلمت غير من كم شهرين مع وجود بعض الحوادث النادرة يعني بيصير لي قريب سنة وأنا أعلمها والناس يعلمون أطفالهم في شهر واثنين لكنها ما تشوف التدرج فقط تشوف النتيجة إنها تعرف تقول لبنتها ان بنتي تتكلم وتسولف معانا وانتي لسه دائما تسكتين مع الناس وأنا أقولها حرام تقولين لها كذا ما تهتم وكثير أقولها في سياق الكلام مو على موقف معين عشان لا تزعل انه كل طفل يختلف سبحان الله لكن أحسها ما تستوعب هي بحسن نية تسوي هذه الأمور وطيبة جدا وتحب بنتي وتتمنى لها الخير لكن هذه الطريقة تزعجني وتطفشني وعلى فكرة هي مرضعة بنتي هل هذا مسوغ إنها تقارن بهذا الشكل ؟ وناس ثانين من أقارب بنتي عيالهم الحمد لله الذي عافانا يتأخرون في الكلام ولا يكون واضح ربما لأنهم يصيرون مع الشغالات ولا هم كذا الله أعلم إذا بنتي تكلمت بشيء يقولون ماشاء الله تقول كذا هم يذكرون الله لكن أنا استغرب من استغرابهم ليش هم ما يدرون إن الأطفال قدرات ويختلفون حتى البنت تفرق عن الولد والاخوان يختلفون فيما بينهم وغيرها من المواقف كيف تتصرفون في مواقف المقارنات مع العلم إن بعضها ممكن يؤثر على نفسية الطفل مثلا يحس أحد يقول انه طفل ثاني أحسن منه ولا يرسخون فيهم أمور يقولون فلان قوي وانت خواف هو دائما يسمع كلام أمه وانت مزعج فوضوي |
فعلا شي صعب
انا اعاني من نفس المشكله هناك مقارنات كثيره بين ابنائي وبين من هم في سنهم الله يحفظهم من كل شر ومن كل عين حاسد |
اذا كان الهدف من المقارنة هو التشجيع للأطفال ولكن ليست بطريقة مقارنة صريحة و واضحة أمام الأم او الأطفال قد تتسبب في تعقيد الطفل أو تعطي احساسا للأم بالتقصير.......
على سبيل المثال , اذا رأت الأم قصورا في تعامل الأم الأخرى مع أطفالها أو فروقات بين أطفالها و أطفال الأم الأخرى من ناحية التربية أو الدلال الزائد أو غيره مما يمكن للأم تقويمه فأعتقد ان الطريقة الأفضل هي أن لا تقارن بين مميزات أطفالها وعيوب الأطفال الآخرين, ولكن ممكن أن تأتيها بأسلوب لين وراقي بأن توضح لها أن أطفالها لو تصرفوا بهذه الطريقة سيكون ذلك له أثر ايجيابي عليهم وتوضح لها سلبيات تصرفهم الحالي ولا تأتي لها بطريقة المقارنة أبدا لأن لها أثر سلبي على الأم والأطفال وقد يتسبب ذلك في عنادهم وتصميميهم على التصرف الآخر الخاطىء لمجرد اثبات وجهة نظرهم..... هذه وجهة نظري و الله أعلم. |
اقتباس:
شاكرة لك مرورك |
اقتباس:
لكن للأسف هذا لا يأتي بالنتيجة المرجوة فالمقارنة دائما تسبب مشاكل للأطفال خصوصا من ينقصهم الشيء أو الذين تتم مقارنتهم بمن هم أفضل منهم لكن المقارنات في الأمور التي لا يكون لها دخل بشكل مباشر في السلوك كالقدرة على الجلوس أو المشي أو الكلام التطورات الذهنية والعاطفية والجسمانية ما المقصود بها يا ترى وهل توجد منها فائدة ؟ شاكرة جدا مرورك ومشاركتك |
اقتباس:
الله يهدي الجميع |
آمين
وشكرا لك على المتابعة وفقك الله |
انا اعاني من هذا الشي وصرت اطنش ولا احط في بالي
انا واختي زوجي ولدنا في نفس اليوم ووحده من الاقارب بعدنا بيومين يعني مقارنه غصب عني حتى زوجي احيانا يقارن صرت اكره لما نجتمع عشان الكلام اللي نسمعه تصدقي كنت اصدق المقارنات احيانا واشك في ولدي مثلا لما الطفلين طلعت لهم اسنان وولدي لا ولما بدأ بالزحف وولدي لا بعدين اقتنعت تماما ان الاطفال يختلفون وصرت مثل ما قلت لك ما اسمع لاحد واريح نفسي حتى لما اغتربنا مازلوا اهله في المقارنه لما يشوفوا طفلي في النت غير الاسئله ياكل ينام يتكلم وهو لسه عمره سنه وخمس شهور الله يعين |
نسيت اقولك شغله
انا ولدي صغير وانتي كمان ياريت الي اطفالهم اكبر يعني بالمدرسه والمقارنه اكيد بتأثر عليهم كيف يتصرفون |
اقتباس:
لكن من كثر ما يقارنون اللي حولك يشككونك في طفلك بنتي ما جلست بدري واللي انولدوا معاها كلهم جلسوا ما شاء الله عليهم أنا ولا كنت حاطة في بالي ولا أطالع عيالهم أصلا لأن أدري كل طفل يختلف عن الثاني يعني جوانب طفلك يتقدم وجوانب أطفالهم لكن من كثر ما قعدوا يزنون بنتك ليش ما تثبت نفسها ليش ما تقعد كأنها رخوه شوي كل اللي في عمرها جلسوا من زمان كنت أقولهم يختلفون يقولون لا بس طولت ومن هالكلام حتى شككوني خلوني أوديها المستشفى أسأل طبيب الأطفال هل هي فعلا رخوة بزيادة ولا شيء قال عادي جدا ولا تأخرت في الجلوس ولا شيء لكن أطفال يجلسون بدري شوي وأطفال في المتوسط وأطفال يتأخرون شوي وهي حتى لسه ما وصلت لمرحلة التأخر في الجلوس عادي وهكذا مسلسل المقارنات ما ينتهي وإن شاء الله يشاركونا الأخوات كيف يتصرفون مع المقارنات هذه سواء كان الأطفال بسن صغير ولا أكبر في الروضة والمدرسة شاكرة لك مداخلتك عزيزتي أم راغده |
شيء مزعج أنا شخصيا لا أحب أن أقارن بنتي و لا أحب أن يقرنها أحد
أقارنها في البيت آحييانا لما بترضاش تاكل أقول لها شوفي فلانة هي أحسن منك.....بس هي لس صغيرة سنتين مش فاهمة بس لم تكبر إن شاء الله مش راح أقارنها عشان ما تتعقد |
عزيزتي حتى وهي صغيرة في عمر بنتك بسم الله عليها تتأثر والله
إحنا نظن إنهم ما يفهمون لكنهم يحسون ما تشوفين الأطفال مهما صغر سنهم يغارون إذا أمهم جابت طفل صغير إذا صرنا عن جدة ابنتي وحدث إنها ترفض تآكل تروح الجدة بحسن نية تقول فلانة واللي تقصد فيها بنت عمها بتجي تآكل وهي شاطرة تكمل أكلها وانتي لا ... أحس وجه بنتي يتغير لثواني وتمشي وتنطش ما تآكل فنعتقد إنها ما فهمت لكن تحس سبحان الله حتى لو ما فهمت بالضبط لكنها تحس إن أحد أحسن منها ويحبونها أكثر شاكرة لك |
حبيبتى colorsاعتقد هو يعتمد على شخصية الطفل هل كده بيتشجع بفعل الشئ المطلوب منه او يحبط ويشعر انه اقل من الاخر يعنى فيه اطفال بس تقول لهم فلان شطور ويشرب الحليب وانت لا تلقينه يبغى يشرب حتى يصير مثله وفى اطفال لا مثل ولدى اذا قلت له شفت ولد عمك شطور يشرب الحليب خلاص مايشرب لكن اذا جالس معه وشافه يشرب يسوى مثله علطول
اما بالنسبه لان بعض الناس تحاول المقارنه والاسئلة عن اشياء معينه دا الشئ يضايقنى جدا خاصة مثلا القى واحدة تسالنى ايش بنتك تنام كام ساعه فى الليل كم وزنها ثم تعلق انا بنتى او ولدى ماينام مثلها او ضعيف ماهو مثلها بالرغم انه احيانا يكون بحسن نية والحين بدأت اطنش ومااشغل بالى عادى اقرأ على اولادى وخلاص |
مادري عزيزتي أنا ما أحبذ المقارنات كثير
أو لأني وأنا صغيره كثير كانو يقارنوني باللي أحسن مني وهذا أبدأ ما خلاني أتقدم يعني أحب أربط المقارنة بالطفل نفسه يعني ممكن استخدم تآكل عشان تصير قوي وما تمرض بسرعة مو عشان فلان يآكل ويشرب والمقارنات شكله ما في غير نسمع ونرد ونطش مع انه يطفش يعني تجي جارة أمي تتصل فيها وتسأل عن اخوي اللي في صف ابنها كم أخذ في هذه المادة ايش مستواه في المادة الثانية يعني تحقيق شامل شكرا لمداخلتك |
آآآآآخ جيتي عالجرح
أنا أكره المقارنات ... مو أخاف على عيالي من العين لا والله العظيم .. يضيق صدري أحس أنهم أقل من غيرهم مثلاً فلان جلس وولدك لا .. فلان يحبي وهو أصغر من ولدك .. هذي سالفت أهل زوجي يدققون في هالامور والمقارنات لدرجه فضيعه مثلاً ولدي الان حول السنه .. وولد أخت زوجي 11شهر تخيلي عمرها حوالي حوالي 45 وتقولي ولدك يصفق .. يبوس .. يقول باي ..يغير من أخوه أسأله أستحي أكتبها إذا قلت لها لا توه قالت لا مو توه ولدي يسوي ويقول .. أحس أنها سخافات .. وصراحه أتضايق منها دائماً على هالحال ولدي الثاني في أول أبتدائي أولاد عماته في سنه يسألوني ولدك بدأ يهتم بالكوره والانديه إذا قلت لا قالت غريبه مو طبيعي أنا ولدي يتابع مباريات ويعرف انديه اوربيه يسألوني عن الدرس الفلاني في الرياضيات هل ولدي أستوعبه والا لا ينادون ولدي أقر هالجمله .. لان ولدها مااقدر يقراها وش رأيك شيء يقرف .. أنا أحس أن بس أهل زوجي يهمهم هالشيء لان اهلي ماعمرهم قالوا لي زي هالكلام أو سمعت من خوالي أو أي أحد هالمقارانات الا أهل زوجي بس |
هو ربما يكون مدعاة للعين في بعض الحالات وللناس اللي ما يذكرون الله لكن الواحد يحصن عياله والله يحفظهم وما عليهم إلا العافية إن شاء الله
لكن سالفة المقارنة هذه تطفش سواء كان ولدك هو المتقدم أو العكس مادري ايش يستفيدون وذكرت في رد سابق إن بنتي نفس الشيء وقت صغيرة من قبل أهل زوجي فلان قعد وهي لسه فلان بدأ يحبي وهي لسه وهو نفس عمرها ولا أصغر منها بشهر وما شاء الله وبنتك لسه شكلها ما ترضع زين ولا ما تنقزينها وتلعبينا عشان تقوى شوي ما أدري ايش يبون ولا ايش يبوني أقول إذا هي ما حبت ولا قعدت أقعدها غصب كل طفل له قدراته ويمكن طفل متقدم في أشياء والآخر في أشياء ثانية يعني ماله داعي ولا يصير العكس تقول بنتك تسوي كذا ما شاء الله وتعرف وأنا بنتي لا مو زي بنتك وهم في نفس العمر طيب يا اختي كل طفل شكل وماله دخل إنهم نفس العمر وكل طفل اهتماماته غير إذا الاخوان في نفس البيت من نفس الام والأب يختلفون واحد يمشي على 11 شهر وواحد على سنة وآخر ممكن يتأخر سنة وكم شهر كل واحد له شخصيه واهتمامات لكن الناس ما يستوعبون أو ما عندهم سوالف ثانية غير سوالف الطفش والمقارنات اللي مالها داعي ومشغلتهم دايما حتى لو الواحد طنش لكن بيبقى الزهق وبتبقى الأسئلة والمقارنات اللي ما بتخلص خصوصا للي أعمارهم متقاربة حتى يمكن لين يتوظفون ويتزوجون بيقولون ماشاء الله فلان حصل وظيفة زينة وولدي من نفس الكلية متخرج لكن يشتغل براتب أقل شكرا عزيزتي لمشاركتنا الله يحفظ لك عيالك ويشفي ولدك يارب |
ذه كثري منها قريبتي ما شاء الله ولدها اكبرر من ولدي بسنه و شهر
لمن جلس ولدي قالت يااي جلس ولدي مدري متى جلس لمن مشي بالمشايه قالت يازينو يمشي طيب ولدك اساسا كبير ما شاء الله وولدي صغير باسم الله عليه و الحين لمن مشي قالت يا حليله يمشي متى مشي ليش ما ياكل انا ولدي ياكل يا بنتي طيب افهمي ولدك بيصير 3 سنين ما شاء الله يعني كبير و انا ولدي بيصير سنتين ما شاء الله يعني اصغر بشويه موشرط يسوي نفس الشيء ولدك لون شعره كذا وولدي لا و من هذا الكلام الي احسه بصراحه تصغير عقل ما فهمت للحين ايش المغزى بس صرت اقول اممم بسم الله عليه و اسكت و على فكره يا ويل تمدحي ولدها او شيء تحسب انك بتحسديه بس هي تصرفاتها شكلها عشان ما تلفت النظر لولدها و الله اعلم عشان لا اظلمها |
ما دري صراحة يقهروني إذا ما لقوا سوالف غير المقارنات هذه اللي مامنها فايده
وتتعبيبن وانت تقولين كل طفل يختلف عن الثاني وايضا مافي فايدة الله يعين شكرا لمرورك |
| الساعة الآن 05:39 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©