|
تهددنا بالسحر
السلام عليكم ورحمه الله وبركاته ماعندي أحد الجأ له بعد ربي غيركم .. فعلاً مثل الأخوان وماتقصرون دايم : ) الموضوع طويل ولو آخذ راحتي بالحكي ماراح أخلص بختصر لكم قد ماأقدر جدتي امراءه كبيره بالسن ومريضه عايشه مع بنت خالي اليتيمه طبعاً أمي وخالاتي مو مقصرين معها بشي وأمي مهتمه فيها بشكل كبيره هي اللي توديها مواعيدها للمستشفى وموفره لها كل اللي تبيه عندي خال وحيد بس للأسف رامي كل المسؤوليه على أمي ومعتمد عليها بشكل كلي طبعاً جاب لجدتي خادمه عشان تخدمها خصوصاً ان حالتها تطورت للأسوء ومن اول ماشفناها ماارتحنا لها سبحان الله .. شكلها وكلامها وهيئتها مو مريحين ابد :rolleyes: ومع الأيام اكتشفنا أنها من مذهب غير مذهبنا من خلال صلاتها بدأت مشاكلنا معاها لما كانت بالمستشفى مع أمي وجدتي شافتها أمي تكلم رجال وتقول له كلام عن جدتي .. انها يعني حرمه كبيره وماتفهم راحت لها أمي وأخذت الجوال منها وقالت هذي آخرة ثقتنا فيك تكلمين رجاااال ! من يومها وهي حاطه امي براسها و حاقده على الكل بدون استثناء كنا لما نروح بيت جدتي تدخل غرفتها وتقفل الغرفه وتجلس بالساعات وماتشتغل أبد .. وربي عايشه زي الملكه وتاخذ الراتب كل شهر من غير ماتشتغل وتتعب واذا سمعت اصوتنا وحنا نسولف ونضحك تعصب وتنقهر وتحسبنا نتكلم عنها وتلم اغراضها وتطلع من البيت لبيت خالتي القريب وماترجع الا بعد يومين ثلاثه طبعاً هي مبسوطه ع الوضع لأنها مرتاحه مافي شغل مافي مسوؤليه .. وراتب ببلاش : ) من قدها وعلى هالحال الى يومكم هذا .. كل ماتشوفنا تحبس نفسها بالغرفه وياويل أحد يحاول يدخل الغرفه .. حتى لو جدتي وزياده على كذا صارت تعترف لنا انها تكلم رجال وهم زي الأصدقاء بالنسبه لها .. وان هالشي مو حرام والمصيبه اننا اكتشفنا اكثر من مره انها تمارس معاهم ......... ع الجوال : ( ومره ناس من الحي اشتكوا عند خالي ان هالخدامه تطلع وتعطي هندي كيس ويتكرر هالشي كثير عرفنا بعدين انها تهرب له الأكل وكل اللي يحتاجه من بيت جدتي ! أقترحنا على خالي ياخذها لبيته ويخلي جدتي تجي بيتنا وحنا نهتم فيها اخذها اسبوع وماقدر يتحملها أبد .. زوجته كرهتها وعياله يكرهونها ومايحبون تمسكهم او ياكلون منها شي هو خاف منها وماعاد ياخذها وصار يسكت على تصرفاتها عشان ماتسوي له او لعياله شي وجدتي صارت تعطيها فلوس على كل شي تسويه عشان بس تساعدها وتهتم فيها يعني مستغله جدتي أشر استغلال حسبي الله عليها صرنا نلاحظ عليها تصرفات غريبه بكل صلاه .. تحط ملابسها الداخليه بسجادة الصلاه وتلفها اذا خلصت متخليين انتوا ؟؟؟ يعني تحط قذارتها بسجادة الصلاه !! وبرضوا نشوفها تهذي بكلام جنبنا بطريقه غريبه وتطور الموضوع وصارت ت تهدد أنها تسوي سحر وتقولها بصريح العباره .. اذا رحت بسوي لفلانه سحر تقصد أمي .. قالت هالشي لجدتي ولكل خالاتي تقول بخليها تكره بيتها وبدمر حياتها !!!! وحده من خالاتي علاقتها متوتره مع أمي .. وهي من البدايه تتقرب للخدامه وتعطيها فلوس وتجاملها .. خوفاً منها طبعاً والحين خالتي تحاول تأثر على أمي بكلامها وتقول ترى بتسوي لك سحر وبتذوقين اللي ذقته < لأنها تعبانه وتتعالج بالرقيه ومتهمتنا ومتهمه أمي اننا مسوين لها سحر !! وتقول اننا نتواصل مع شغالات جدتي اللي قبل عشان يسوون لها سحر ! وصارت تنشر هالخبر للناس وتشوه سمعتنا بكل شي .. حتى بالشرف : ( وترسل رسايل لأمي تدعي فيها عليها وعلينا وان ربي ينتقم لها منا !! أمي على نيتها قالت ان شاءالله ربي ياخذ حقي وحقكم لأن هذا ظلم والله مايرضى بالظلم ولأن خالتي هذي اتهمت أكثر من شخص انه مسوي لها سحر .. يعني انسانه مو طبيعيه والله اتمنى ربي يشفيها المهم الحين كيف نتعامل مع خدامة جدتي لأنها بتسافر يوم الخميس وحنا مو شاكين .. الا متأكدين انها ناويه على شر وأنا خايفه مره منها خصوصاً أنها طلبت صوره لي .. وانا رفضت وش تقترحون علينا نسوي معاها قبل ماتروح : ( ؟ لأن هالموضوع مسبب لنا قلق وخوف مو طبيعي .. ومو مرتاحين وراح يزيد الخوف اذا راحت : ( |
الله يعين..
أحذرك وأحذرك وأحذرك ... ماتسافر الا بتفتيش ..ولاأحد يفتشه من أهلكم يمكن ماعندكم الخبرة .. أكتبي في قوقل أرقام مفتشات .. وماهي خسارة 200 أو 1000 ريال على تفتيش.. أهم شي العائلة ماتضيع بسبب شغالة .. |
فتشوها تفتيش دقيييييييييييق مرررررررة قبل تسافر حتى ملابسها الي لا بستها فتشوها قبل لا تطلع لا تاخذ اي اثر لكم معها
يعني اذا ما اخذت لكم اثر ما تقدر تضركم بشي ان شاء الله وعليكم بقراءة سورة البقرة دائما والمحافظه على الاذكار ودائما قولوا اللهم اكفنيها بما شئت وكيف شئت انك على ما تشاء قدير الله يحفظكم ويحميكم ان شاء الله |
اقتباس:
والفلوس مو مهمه والله .. المهم نرتاااح الله يجزاك خير |
اقتباس:
ياليت ياليييت نقدر نفتشها بأنفسنا هي حقوده مرررره .. كيف لو نجي نفتشها ! ودي موضوع التفتيش يجي من خالي ويحسسها ان هالشي اجباري ولازم كل الخدم يمرون فيه لأنها تخاف منه بس هو يخاف منها أكثر :d : ( ماادري بصراحه وش نسوي معها مشكوره والله يحفظك ويحميك انتي بعد : ) |
http://www.66n.com/forums/images/icons/cry3.gif
ساعدوني تكفوووون أمي راحت بيت جدتي عشان تاخذ جدتي المستشفى واكتشفت ان خالي قال للشغاله انه بيسفرها يوم الخميس والشغاله جن جنونها لأنها ماتبغا تسافر وجلست تصارخ وتصيح بوجه امي وتقول بسويلك سحر قوي انتي وعيالك والله بموتهم كلهم لك .. لأنك انتي السبب وامي كلمت اختي ع الجوال وتبكي وحالتها النفسيه تعبانه http://www.66n.com/forums/images/icons/cry3.gif |
اختي انتم قولتلها متى بتسافر؟
اذا ماقتوا لها لاتقولون الافي نفس اليوم واشتروا شنطه وملابس لها واذا جت تسافر خذوا شنطتها وملابسها واعطوها الشنطه اللي اشتريتوها لها ولاتخلوها تاخذ شي من اللي عندها والله يكفيكم شرها |
^
شوفي المستجدات : ( |
اختي الكريمة ابحثي عن هاتف الأستاذ عادل طاهر المقبل المسؤول في الهيئة عن السحرة ويغطيكي الحل المناسب فهو خبير جداً ومحتسب ونسأل الله أن يكفيكم شرها. |
لا حول ولا قوة إلا بالله خدامتكم شريرة وتخوف !! انتبهوا تسفرونها قبل تفتشونها ، الحين هي بين يدينكم عندكم فرصة تتصرفوا وتلاقوا حل للمشكلة ، لكن إذا سافرت صعب جداً تصلون لها مرة ثانية ،، ربي يحميكم من شرها يا رب |
اختي اولا السلام عليكم
ثانيا حبيت اعلق عن خالتك المسحوره , تراها مش هي اللي تقول ان امك السبب لان الجن اللي فيها يبون يسون فتنه بينكم ولا ماهو من راسها لان هذا حصل مع امي من قبل تقول افلانه سوت لي سحر وافلانه سوت لي سحر وحنا نعرف ان الانسانه هذي والله ماسكينه ولا عندها من الشر مقدار واذا كانت تعرف اسمه سحر هذا زين لا تلومونها الله يشفيها وادعوا لها اما عن الشغاله حنا عندنا شغاله قبل انشبتنا وصدق الاندونوسيات بالذات حقودين او ماجات تسااافر شرينا لها شنطه وهي ماتدري وشرينا لها ملابس جديده كنها تستاهل وخليتها عندي بالسياره ومن جات تسااافر خواتي دخلوها الحمام وفتشوها تفتيش يهبا تفتيش الجمرك وسبحوها تسبيح تقولين بنزوجها وطلعوها من الحمام لباااص المكتب وخذنا شنطتها الي بتروح ابها وعطينااه شنطه جديده وفيها ملااابس وسلام ختاام الله يحفظكم يارب |
السحر شي ما ينخاف منه ابد
ان كيد الشيطان كان ضعيفا اهم شي عليكم با الرقية والمواظبة على الفرايض ولا تخافون من شي سورة البقرة كل يوم خلوها شغالة ولا تخافين من شي الجن ما يقدرون الا على اصحاب القلوب الضعيفه هدي اعصابك ولا تخافي من اي شي لانو ما بيصيبك الا الي كاتبه رب العالمين لك فليش تخافي , هذه المخلوقات ما ينخاف منها الخوف لله وحده فقط حطي هذا الشي براسك زين وصدقيني ما بيصيبك اي شي الله يكون بعونكم اختي |
كلمي فرع الهيئة القريب منكم يدبرونها والله خير حافظ وهو ارحم الرحمين
|
شوكه بين ورد
رجل الرجال السنا الوزن الثقيل ابن المكلا رسيل ممتنه لمساندكم ولدعواتكم ريحني كلامكم والله يجزاكم خير جميعاً حبيت أعلق على كلام .. الوزن الثقيل بالنسبه لخالتي ممممم ممكن يكون كلامك صح وأمي قالت لها نفس كلامك قبل وعصبت وقالت لأمي انتي ماتفهمين ومو قريبه من ربك .. أنا لأني قريبه من ربي واخشع بصلاتي وادعيه صار ييسر لي هالأمور وتجيني منامات عن الناس اللي ساحريني واللي فيني ينطقون بأسمائهم ! الله يشفيها وآخر المستجدات كلمنا الهيئه قالوا جيبوها لنا وحنا نتصرف طبعاً خالي مارضى نوديها بس فهمها أن أمي مالها علاقه بسفرها وقال لها أنا اللي اخذت القرار لأني ببيع البيت وأمي بتجي معي لبيتي وبكذا وجودك بيصير ماله داعي الحين هو يحاول يراضيها وأخذها للسوق واشترى لها هدايا !! وأمي كلمتها اليوم وحلفت لها انها مو ورى موضوع سفرها وحسيت الشغاله مااقتنعت مره لأنها قالت لأمي اصلاً انا ابغا أموت ولو ابغا اسوي شي سويت بالله هذا تفكير انسانه مسلمه !! هي الحين تحاول تهدي الوضع وتحسسنا انها مصدقه بس مو مرتاحين لها .. مجرمه وممكن تغدر لأن عندها صوره لأختي الصغيره ايوا صح امي بعد اشترت لها هدايا اليوم والكل صاير يتودد لها ويراضيها خوفاً منها آآآآخ ياقهري http://www.66n.com/forums/images/icons/icon9.gif الله يرد كيدها في نحرها اذا كانت ناويه على شر : ( |
في حالتك لا يجب سماع قرار خالك وهو قرار " احمق " !
بل اوصلوها للهيئه وهم يتصرفون .. لديها بعض صوركم وتهدد بالسحر ماذا تنتظرون ؟.! حتى تري احد اخوتك وهو يصرع امامك ويتعذب ؟ بالمناسبه لايشترط الصوره في السحر بل اي اثر " شعر , ملابس , الخ " غريب خوفكم منها ! مستسلمين لها ! ياختي نحن مسلمين والرسول اعطانا الطريقه لكي نقي انفسنا من هذه الامور من قال اذكار الصباح والمساء لن يأثر فيه لا عين ولا سحر بإذن الله ولابد ان يقرأها كل من اخوتك وامك كل يوم في وقتها ... وهو بعد صلاة الفجر او اول الصباح .. واذكار المساء تقرأ في غياب الشمس او بعد صلاة المغرب والرسول صلى الله عليه وسلم قال " من تصبح بسبع تمرات من عجوة المدينه لم يضره سحر ولا سم " اسأل الله ان يحفظك انت واهلك من كل شر .. وبشرينا بتسليمها للهيئه ^^ |
الله يجزاك خير ومعك حق بكل اللي قلته
ولو كان الأمر بأيدي كنت كملت الشي اللي بديته وارتحنا خصوصاً ان الشيخ قال أنتوا بس قدموا بلاغ وحنا نجي ناخذها بأنفسنا ونتصرف بس مستحيييل مستحيل خالي يوافق واصلاً الموضوع صار شبه مستحيل لأن باقي لها يوم وتنقلع ثاني شي أمي بعد ماكلمتها وحلفت لها .. أطمئنت شوي وجاها برود من ناحية هالموضوع قهر من جد ! يعني أمي مفكره ان هالأدميه بقلبها ذرة ايمان او عندها ضمير لدرجة انها بتصدقها عشانها حلفت وبترضى عليها عشان كم هديه !!! وأنا كلمت بنت خالي وقلت لها تحاول تسمح صورة أختي من جوال الشغاله بطريقتهاhttp://www.66n.com/forums/images/icons/icon11.gif قالت لي ماأقدر لأن الجوال 24 ساعه عندها بس بتحاول والله مقهوره بس السالفه طلعت من أيدي وماأقدر اسوي شي http://www.66n.com/forums/images/icons/cry3.gif |
لاحول ولاقوة الا بالله ..
على الاقل يجب ان لا تهملوا : 1- خضوعها لتفتيش حقيقي ومتقن , والتأكد انها لم تأخذ من اثر احدكم , فتشوا اغراضها وحقيبة سفرها وكل شئ ! 2- ملازمة اذكار الصباح والمساء اسأل الله ان يحفظكم ويقيكم شرها .. |
^
اللهم آمييييين خالي كان رافض تتفتش .. وأنا شخصياً مالي سلطه بالموضوع أمس سافرت خلاص : ( و بنت خالي قالت لي أن خالي فتشها قبل مايوديها بس مو بدقه وكان تفتيش سريع وان شاءالله نحافظ ع الأذكار وربي الحافظ http://www.66n.com/forums/images/icons/icon11.gif شكراً لك |
| الساعة الآن 07:29 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©