|
عروس وهاجس الطلاق
السلام عليكم ورحمة الله وبركاته بعد التحية اعرض مشكلتي التي طالما ماارقتني وهو زوجي الذي تزوجته من 3 اشهر وبدايه كان من اليوم الثاني من الزواج حيث انه كانت تبدوا عليه العصبية الزايدة يعصب علي شي يسوى ومايسوى وتحملته وسافرنا لشهر العسل وهناك اتضحت الصورة كان لاينام معي ومنطوي على نفسة حتى لمن نتمشى يرفض المشي معايه او حتى مسك يدي حتى اني اكتشف انه يشتري وياكل لوحدة من دوني مع انا ناكل سوا بالمطعم ووالبس له ويطنش ولاكأني موجودة ولمن ناقشته وجلست ابكي يقولي انتي بتعملي كذا علشان مابنام معاكي وكل يوم يقولي احنا نتفق فكريا بس انا مومنسجم معاكي كيف مو منسجم معاية وكان يكلمني اثناء الملكة ويثني عليه ويتغزل فيه ولمن تزوجت تغير جذريا فانا والحمدلله جميلة وموظفه وماينقصني شئ لكن هو يدور اي شئ حتي يبرر تقصيرة معايه تخيلوا يقولي اانا مااحبك وعلشان كذا مااجيلك وقلت من متى اكتشفت انك ماتحبني يقولي من ثاني يوم علما بأنه مطلق 3 مرات قلت ليه طيب فتحت يقول انتي الي جيتيني ولم لمته ليه تفتح طالما موحاب يقولي زوجتي وانا حر كأن الناس عبيد عندة ولاحظت عليه انه كل يوم يبلع حبه ولمن سألته قال عنده التهاب بالبروستاتا ويختلط الدم بالمني يالبول ولمن قلت له بيأثر عليك يقول نهائي ولمن اسأله ليه طيب يقولي مااحبك ومرة جلست ازن عليه يشتري ليه غرض ولمن شراه حبيت اشكره واقبلة تصورا من كثر مايصدني استأذنت منه اقبله وسمح وبسرعه سحب نفسه مني موطايقني قلت له ليه تعاملني كذا يقول مااحب المرأة الي تفرض نفسها احاول البس واهتم مايعبرلدرجة انه يضع بيني وبينه مخاد ويتلحف بلحاف لحالة ولم احاول اتقرب له وابوسه يهاوشني ومرة حاولت ابوسه اعتدل من جلسته ورفع يده يبي يضربني علشان بسته ولمن زرت اهله يحاول يرفع صوته قدامهم ويحاول يهينني ولمن اغسل يخليني اعيد الغسل وكان اسلوبه اسلوب تطفيش لاتقولوا حاولي معاه حاولت تخيلوا مني تزوجت ماجاني الا مرتين من تزوجت ولمن ناقشته يقول مااشتهيك وانا احس انه فيه شئ ومخبيه اخر شئ قمت اشغل قران بالبيت وبالغرفه يجي يطفيه ويقول ابي انام ولمن ابي اجلس معاه نتفرج ع التلفزيون حالي حال المتزوجات يقولي روحي اجلسي بغرفتك حتى اني اكل بالغرفه وهو يحب يطبخ ويغسل ملابسه لانه متعود ع العزوبية ولمن اطبخ يقولي اطبخي بطريقتي وبقدري والي ابيه وانا اعمل الي يبي حتى غسل الملابس اغسله مثل مايبي هذا كله والعصبية الزايدة منه يصحى من النوم كانه بدور عليه علشان يهاوشني لدرجة مرة تحممت بمويته سبني وقلي اجلسي بعرقك ولمن اتحمم واخلض تتحممي تعبت منه ولمن صرت اقوله هذاالحال ماراح يمشي معايه قال عجبك عجبك ولا بالطقاق قلت موعاجبني قال جهزي ملابسك واوديك لاهلك ولمن جهزت ملابسي لقيته بيشوفها ويقول مستعجله ؟؟؟؟؟؟؟؟؟؟ قلت خليني اتناقش معاه واشوف ايش عنده قلت له قولي ايش مميزاتي وعيوبي قال مافيك عيوب ومميزات قلت له طيب ايش تبي قال خليك مثل ماانتي وبعدها قالي اسمعي ياامساك بمعروف او تسريح باحسان وانتي روحي لبيت اهلك قلت اذارحت بتكون مرتاح فال ايوه ولاحياة المذله والمهانه الي معيشك فيها قلت خلاص واتفقنا على الطلاق وانا الان عند بيت اهلي محتارة ماادري ايش اعمل ومحرص عليه اني مااخذ رقم اهله امه او اخته مع ان علاقته فيهم موهالقدا بس انا اخذت ارقامهم وكلمتهم وقالوا ليه انتي لو سأليننا عنه قبل الزواج كان مانصحناكم فيه ليه ماادري؟؟؟؟؟ بس انا حاسه فيه شئ هومايشرب بس يدخن بشكل فضيع ولمن ادخل عليه اوقات بالليل الاقيه يكلم ومرة دخلت اكلمه وبعدها جاني معصب يقول انتي تناظريني تخزيني مع اني والله نظراتي له عادية يقول واضح من نظراتك انك تقولي عليه حقير او مجنون تخيلو؟؟؟؟؟؟ ومن خلال مناقشتي معاه قال ليه انا ابغى وحدة احبها قلت له انت عمرك حبيت قال لا قلت عمرك انحبيت قال لا قلت كيف تدور عنه وانت ماتعرف له وهو عمره 45سنة ماهو صغير قال انا ضيعت عمري واناادور عنه قالت ماراح تلاقيه لانك بتدور عن وهم وبعد كذا سالني سؤال مفاجي قال انتي تحبيني وحاولت اتهرب ومااجاوب لاني كنت احبه وبعد ماعشت معاه كرهته قال جاوبي وعصب ولمن قلت ايوه احبك جلس يضحك وكانه انتشي ولمن قلت انت انسان متمرد ومكابر قال كل هذا علشان ماحبيتك وكأن فيه جنون عظمة او مريض نفسي لانه متردد ومتوتر على طول ومتقلب المزاج والضحكة مفارقته دائم مكشرواناالان عند اهلي تصوروا حجزليه وسافرت لهم وقالي لاتشلي كل اغراضك وقلت بترك الصور قال تركتي شريط الفيدوا قلت لاشلته معايه قال لاخذيهم كلهم قلت ليه ؟؟قال يمكن احن وشلتها كلها وسافرت تصوروا حتي لمن وصلت ماكلف نفسه يطمن عليه وتركته كمن يوم واتصلت اسأل عنه وقالي متى تبي الطلاق قلت متى ماانت تبي قال عادي لوتبي زواج صوري قدام الناس عادي او تبي الطلاق الاجازة الجايه عادي او تبقي على ذمتي سنه ماعندي مشكله قلت لا طبعا الزواج زواج ولا بلاش قال ايش عرفك يمكن نرجع وبعدين قال انا مااوعدك اماانا ماابيه ووايش رايكم اطلب الطلاق ولاانتظرعلمابانه اناالان الي بتصل فيه وهو اوقات يرد اوقات مايرد واخذمني شبكتي ولمن قلت له هي من حقي قال حقك المهر ولاتنسي شهر العسل مع اني شاركته في بعض المصاريف كلمت امه واشتكيت اشارت عليه امه اني اكلم اخوه علشان يوديه لشيخ او لطبيب نفسي بس هو مقاطع نص اهله وامه موبارفيهامره ولمن اجيب سيرتهايقول لاتدخلي بيني وبين اهلي ماادري ايش اعمل اخواني استغربوا ايش العروس الي كل يوم جايه عندنا وانا موقادرة افاتحهم وكل الي قدرت اقوله لاخويه الكبير اني مومرتاحة معاه وانه يحتاج لشيخ اولطبيب نفساني خصوصا لم اشعر به بالليل لمن يغطي وجهه عني او يغطي وجهي عنه وبكائه بالليل وبالفراش حالته غريبه لمن امسكه يقولي انتي مره حاره تحريني ولمن رجلي وانا نايمة بالغلط تيجي على رجله مالاقي الا الرفسه وبقوه محتاره بما تنصحوني اشيروا عليه انا جالسه عند اهلي واتصنع البسمة تخيلوا حتي مصروف مايعطيني ولمن طلبت منه يقول انتي موظفه مومحتاجة 3 اشهر كأنهن جحيم لمن قال تبي الطلاق قلت له متى ماشعرت انك ماتبيني على ذمتك طلقني بس هو محزني واتمنى بان اخوته يهتمون له خصوصا وانه كبير موصغير ولو كان مريض اوفيه شئ ع الاقل يكون هناك سبب مقنع للطلاق لكن بدون سبب صعبه أطلب الطلاق ابي رايكم ؟؟؟؟ اظل على ذمته او اطلب الطلاق بسرعه وانا مالي 3 اشهر متزوجته او اصبر اشوف ايش بيصير مع اخوها تنصحوني اكلم اخوه بحالته اولا انا كلمت امه وامه مريضة مابيدها شئ واخواته مقاطعهم بس عنده اخ كل يمدح فيه اكلمه عن حالت اخوه اولا ؟؟؟التهاب البروستاتا هل تؤدي الى ضعف جنسي ؟؟؟ لوطلبت الطلاق ماهي حقوقي ؟؟؟؟مع انه هو الي يبي ؟ ولكن بيقول لاهله اني اناالي ماابيه ؟؟مو هو ؟؟؟ اخذ شبكتي؟؟؟ هل يحق ليه استردادها والله يجزاكم خير |
لو سأليننا عنه قبل الزواج كان مانصحناكم فيه
باين اهلك ما سئلوا عنه ومطلق 3 مرات يعني الانسان هذا فيه شئ زوجك مزاجي و معقد لازم تكلمي اخوه لاتسكتي ليه يقول لاهله انتي ما تبيه مو من حقه ليه ما يقول انا ما ابيها لازم تبرري موقفك وانك ما تبي الطلاق وان معاملته معاكي سيئه الله يفرجها عليكي |
لا حول ولا قوة الا بالله..
مالذي يحدث يامسلمين !!!!!!!!!!! |
سلمي أمرك للرجال بعائلتك .. أخوك .. أبوك .. عمك .. خالك المفروض يعرفوا مشكلته ونوع الحبوب اللي يشربها ... هم يعرفوا الرجل ويعرفوا تقاليدكم ويعرفوا أنسب طريقة لفتح الموضوع معاه .. شوفي واحد منهم هادي وعاقل تكلميه وتقوليله كل اللي صار معك حتى يكون بالصورة كاملة وهو يقعد معاه لوحدهم ويحاول يفهم منه المشكلة بالكلمة الطيبة والهدوء وإذا ما نفع اللين يشد عليه .. لازم يتأكد من نوع الحبوب اللي يشربها زوجك ويعرف مرضه .. وممكن أهله وأمه يقولوا لك شنو مشكلته أو مرضه .. روحي عندهم أو اتصلي واسألي بشكل صريح .. شنو مرضه؟ المهم أنك ما ترجعي قبل ما تفهموا القصة وبعدها تقرري اذا عندك رغبة تتعاملي معاه وتتأقلمي مع مشكلته الحمد لله ما صار حمل واحرصي انه اذا رجعتي ما يصير حمل الى أن تعرفي اللي صاير . أدري انه مقل جدا بالعلاقة لكن يكفي انه تصير علاقة مرة وحدة بدون احتياطات ويصير حمل . اذا رجعتي بدون أي خطوات أو شد أو شروط راح ياخذ راحته ويزيد أكثر . انت ما أذنبتي ولا عملتي شيء غلط حتى تخبي على أهلك ... لازم تقولي لهم كل اللي صار معك .. مافيها شي يخجلك أنتي .. المشكلة مشكلته هو ربي ييسر أمرك ويفرج كربتك لا تتركي الدعاء أبدا ... أيام فضيلة وان شاء الله تلاقي فيها الفرج |
كان الله في عونكم كلمي اخوه وشوفي وش راح يصير بعدين ليتك تخبري اهلك بالوضع من الى حتى يكونوا في الصورة لان شكله بايع الرجال ويبي يطلق خلي ايمانك بالله قوي وربي بيعوضك خيرا منه |
الحمدلله الذي عافانا
هاذا يا أختي مولي ما فيه أمل الي عاق بأمه وش تتوقعين منه !!؟ أنتي منتي مصلحة أجتماعيه حتي لو كان زوجك مع أنه ما يحمل من صفات الزوج أو الرجوله أي شي وبعدين الرجال مطلق 3 مرات وأهله يقولو لو شاورتونا ما نصحناكم فيه يعني معناته ما منه فايده والله يعوضك أم النذاله حتي الأكل ياكل بروحه !!؟ أقسم با الله تصرفاته تقول انه يتعامل مع عدو مو عروس !!؟ |
مريض نفسي .....واضح جدن
حاولي بأهله يعالجونه... ولا لاترجين فيه من غير علاج الله يشفيه ماعتقد راح تهنئيين بالمحاولات الشفهيه...زوجك محتاج علااااااج عند الطبيب النفسي ربي يكشف همك |
حبيبتي بحر الايمان
ممكن اسالك عن سبب طلاقاته السابقه ؟ كم جلس مع كل وحده ؟ |
اختي الله يكون في عونك ويفرجها عليك عاجلا غير اجل
نصيحتي لك فاتحي احد من اهلك يكون حكيم وعلميه بكل شئ وشوفي اذا في مجال تتصلح الامور بحيث يروح لدكتور يكشف عليه ويتعالج والا اطلبي الطلاق وربي يرزقك بزوج افضل صراحه وضعك صعب ومتعب نفسيا فكرت من زاويته مطلق 3 مرات وانتي 4 وامبين من كلامه انه يبغاك تعطينه فرصه مايبي يفشل من جديد ويمكن شاف معاملتك الحلوه ولايبي يخسرك بس لمن فكرت من ناحيتك وش ذنبك تصبرين عليه ... من حقك تتزوجين ويجيك اولاد وتعيشين حياة كريمه فاللي اشوفه مناسب اصبري كم شهر ودخلي احد بينكم والله يقدم الله فيه الخير |
اختى اعانك الله كم عمرك وهل سبق لك الزواج وهل وجدتى اى مزايا فيه |
الله يكون بعونك اختي
لكن انتي لازم تكلمين احد من اهلك وتوضحين لهم الموضوع من شان احد يتدخل ويشوف الموضوع تصرفاته تدل على انه في سر وراه مو طبيعي مايبيك ومايحبك ولا اكتشف هشيء الا بعد الزواج بيوم وشلون هذي والمرض الي عنده ماقالك عليه من قبل ماحاولتي تفهمين منه هل هو هشيء سبب في تدني معالته معك ماجربتي تطرحين عليه فكرة يروح عند طبب نفسي يشخص حالته ويعرف شو عنده حاولي تبينن له انك راح تتجاوبين معه وتعيننه بس لازم هو يبداء باول خطوه وهي انه يروح لطبب نفسي يعرف شو علته وانك راح توقفين معه واذا رفض ومنع اي مساعده منك له او من طرف اهله فمالك اختي الا طلاق والله يكون بعونك |
الله يكون بعونك لابد أن تناقشي أحد من أهله
|
السلام عليكم ورحمة الله
اشكركم اخواني واخواتي على تفاعلكم امابالنسلة لاختي ظل انثى ألااهلي سألوا عنه في عمله ومامدحوة وبنفس الوقت ماسبوه وكان هذاالامر محير اما اهله كان حريص انه يوضح انه بينه وبينهم مشاكل علشان كذا متكتم عليهم ومادروا الا بعد الملكة والي وضحة انه هورجال وماعيبه شئ وحجته انه من اتاكم من ترضون دينه وخلقة فزوجوه اشكرك اخي هشام ابن العاص ماغير نقول هم صحيح مسلمين لكن ابتعدوا عن الاقتداء بسيد المرسلين عليه الصلاة والسلام اخي / اختي Peta .سلمي أمرك للرجال بعائلتك .. أخوك .. أبوك .. عمك .. خالك انا الان عند اهلي وكلمني اخوي الكبير قالي انا معاملته لك ماهي عاجباني وهذامالاحظة خلال حضورنالمناسبة عند اهلي وقلت له انا مومرتاحة معاه ووضحت هذالشئ بس ماحب يتدخل قال يمكن لانكم لسامتزوجبن ومافهمتوا بعض وسكت .ام الاب فأنا يتيمة الاب والاعمام والاخوال علاقة صلة رحم فقط وشياب وممكن أهله وأمه يقولوا لك شنو مشكلته أو مرضه .. روحي عندهم أو اتصلي واسألي بشكل صريح .. شنو مرضه؟ يااختي انا كلمتهم وسألتهم ماعندهم خلفية عن مرضة وعن الحبوب الي بياخذها وتفاجئوا بس اخته قالت كان ياخذ حبوب اكتئاب ولمن كررت سؤالي لها قالت هو مر بحالة اكتئاب بعد طلاقة الثاني اما رجعه مااعتقد برجع له حاليا |
اشكرك اخي شغموم ان شاء الله بحاول اكلم اخوه انا خبرت اختي وقلت لها بس قالت ننتظر عليه خوصا اني عنداهلي وعلشان قربت المدارس ومقر عملي عند اهلي وهو موساكن معايه بنفس المدينة واخويه المحت له اني مومرتاحه معاه قال مااني مكلمة الان وقال يمكن لانكم توكم متزوجين ولسامافهمتوا بعض ؟؟؟
اشكر مواساتك اخوي feeling اختي قارئة الصمت مسكين والله ماله الا الدعاء فعلا مريض نفسيا لان حياته مليئة بالمتناقضات واخرتها بكائة على مخدته في الليل ولمن اكلمة مايرد عليه ولمن حاولت اشير عليه يرح لطبيب لشيخ يفولي هذاالي باقي طلعي عليه مريض ... وانا اكره المطاوعه ؟؟؟؟؟؟؟ وامه تقول يمكن مريض نفسيا وانا والله ماادري اختي حلم الواقع ممكن اسالك عن سبب طلاقاته السابقه ؟تزوج 3 وحدة يقول فيها بداوه وموعاجبه تصرفاتهاواسلوبها والثانية غشته وكانت من ذوات الوزن الزائد والثالثة من الحجاز وتدخل هلها بكل صغيرة وكبيرة واتهمته بانه طمعان في فلوسها والله اذاكان كذا فهن معذورات ووحده ملكة فقط وكلهم ماكملوا سنة معاه وحده 3 شهور ووحدة شهر ووحدة اسبوع وكان قبل الزواج يقول اذا مضت 6 شهور ع الزواج وماحدث شئ يعتبر الزواج ناجح ؟؟؟؟؟ واين الي تصبر عليه ؟؟؟ وامه تقول اصلا متفشل من اهله واخوانه لانه ماله صبر ومايجلسوا معاه الحريم لذا هم مايتدخلوا فيه لانه فشلهم مع الناس ؟؟ اختي ام سارة / والله كما ذكرتلك سابقا رد اخوي واختي تقول نصبر عليه خاصة واني عند اهلي بحكم عملي ويعلم الله اني ماتزوجت الا من اجل العفاف والذرية لكن صبراجميل والله المستعان اخوي ابو مريم انا في الثلاثين وهمو 45 سنه مع انه ذاكر ان عمره 38 وانهم مكبرينة في البطاقة!!!!!لالم يسبق ليه الزواج والله مافيه مميزات سوى انه بن عائلة وناس ووسيم والباقي جدا عادي ؟؟؟ لكن النصيب والحمدلله ع كل حال |
لاحول ولا قوة الا بالله.. ماقلت لكم دايم زوجة العربيد الشرير السيء الخلق تجي انسانة طيبه ... والعكس ..!!
يارب انعم علينا بنعمة الصبر والعقل.... اللهم يارب فرج همومنا اجمعييييييييييييييييييييييييييييين |
يااختي هذا مبين عنده مشكلة مرضية ونفسية ويحب يجيب العيب فيك
هذا ان كملتي معاه راح يفقدك الثقة بنسك ويجبلك مرض نفسي فكري اذا الله رزقك بعيال كيف راح تكون حياتك وحياتهم مع زوج بها المواصفات الي ذكرتيها فيه مثل يقول من فم الئر ولا من قاعه اخلصي بجلدك لا حلوى بيرفسك ليييييييش هو حمار ليرفس |
السلام عليكم ..اختي بحر الايمان ...شدني موضوعك..فاحببت ان اشارك..كان الله في عونك..من قرائتي لمشكلتك ارى ان زوجك يعاني من التهاب البروستات وهو مايجعل الزوج يشعر بالنقص من ناحية الواجبات الزوجيه فهو في داخله اشعر انه يحبك ولكنه يكره التقبيل لانه يشعر انها مقدمة للعلاقه فهو ان قام بها سوف تؤثر عليه بعدها فيشعر بحرقان والااام ..فهو يريدك ويحبك ولا يريد ان تجلسي معه شفقه بالمعنى الاصح..يكابر..فانا من وجهة نظري ارى ان تعامليه بلطف وسكينه وتذكري له انك احببتيه ولكن هو من باع واذا بادر بالعوده عودي ولكن خوذي مانع للحمل وعودي اليه وعامليه كأخ بدون تقبيل او طلب للعلاقه بتاتا او اي مقدمات او ان تطلبي منه تقبيل او مبادره فاتوقع وبحول الله مع الدعاااء في جوف الليل ان يصلح الاحوال عليك بالدعااء اولا واخيرا فاذا لاحظت بعدها انه ارتاح لجلوسك معه اقترحي عليه العلاج من التهاب البروستات وليس العلاج النفسي لانه من الواضح ان التهاب البروستات سببت له هذه المشكله النفسيه ...دعواتي لك بحياة زوجيه سعيده..وتسخيره لك..وفقك الله لما هو خير لك وله ..دمتي بود ..
|
اختى سبحان الله انت تزوجتى من آجل الاعفاء والذرية وهو عفانا الله لم يعفك وبطريقة معاملة لن يكون سبب فى ان يرزقك الله بطفل اذن استخيرى الله عز وجل فى هذه الايام الفضيلة فى الانفصال ولا تعودى له الا اذا تعهد امامك اخوانك انه يتقى الله فيك ويتعهد بينه ويينك ان يؤدى حقوقك الزوجية ويكشف لك عن سر الاقراص التى يأخذها ويعاملك معالمة حسنة مثل اى زوجة وفقك الله عز وجل لما يحب ويرضى |
يا أختي تتداركي نفسك
قبل لاتحملين وبعدين تقول بصبر عشان العيال نصييييييييحه أطلبي الطلاق شكل زوجك مريض إلا في حالة أنه بتعالج صح أصبري أما تععيشي مع واحد ما يحبك لا يا أختي كرامتك أهم أطلبي الطلاق والله ب يرزقك شوفي البعض يتعالج زميل أخوي تزوج أكثر من 5 مرات ويطلق ولما تعالج الحمدلله تحسنت حالته والحين تزوج ومعاه عيال ربي يوفقك لكل خير |
كان الله فى عونك
ووفقك المولى الى مافيه خير لك وصلاح لأمورك دعواتي لك بالتوفيق |
كل عام وانتم بخير
اختي امواج الصمت انا كلمتهم وكلهم يقول اصبري..... اصبري وانا ماابي اتعلق بوهم انا مثل اي بنت وعروس ابي احلم واتمنى لكن ان قلتلكم ماشفت من الانبساط شئ اجمل ليلة الليلة الاولى حتى انه نكد عليه باستعجاله في الزفه ووتر اخواني واخواتي لدرجة انه واحد من اخواني بغى يطردة من الزواج لكثر ماهو معصب ويبي اخرج بسرعة لانهم من عادتهم ماعندهم زواج ........ انا قلت يمكن يبي يثبت لنفسه شئ واثبته واستغربت منه باليوم الثاني كلامه لي احنا نكذب على بعض مانحب بعض قلت انت تكلم عن نفسك ولاتتكلم على لساني وقلت له من الطبيعي الحب ماهو بهالسرعة الحب يأتي مع المعاشرة والمعاملة الحسنة يمكن هو من نوعيه الناس الي يبغى الشئ ولمن يحصل عليه تنتهي حاجته له ماادري والله جدا محتارة فيه انا احس انه فيه نوع من الغش لانه ماقالي قبل الزواج عن مرضه طرحت عليه يروح لشيخ او الطبيب لكن يقولي اكره المطاوعة ولاتطلعي عليه اني مريض هذاالي باقي وانا فعلا مبديه استعداد لمساعدته تخيلي في شهر العسل سخن وارتفعت حرارت ولمن جيت احط يديعلى راسه رماها وبعد عني حتى لمس مايبيني المسه وقلت له انك مريض وحرارتك مرتفعه وماصدق الا لمن راح للمستشفى وانا مريضة بشهر العسل ماعبرني ولمن راح للمستشفى قال اذا تبي مستشفى اوديك قلت خىلا ماابي يخاف على نفسه بس وانا لاوهو رافض اي مساعده مني لمن كان يجلس بي بلكونه الفندق وابي اجلس معاه يقولي قومي ولمن اعاند واجلس يعصب عليه ويقولي كلام يعوفني الارض الي بمشي عليها سبحان الله اشكرك اخوي كاتم الاهات ان شاء الله بحاول اكلم اخوه والله المستعان |
السلام عليكم ورحمة الله وبركاته
اخي مشكلتي زوجتي سبحان الله هذا نصيب وماحد ياخذ غيرنصيبة والمرمن مبتلى والله يعطينا الصبر اخياختي / الم الايام بالفعل اصبحت مهزوزة من كثر مايقلل من شخصي لدرجة اني اصبحت لمن احدثة ارتبك واتلعثم مين يقول هذي الانسانة المتحدثة اللبقة اصبحت اشك حتى بذوقي في اختيار الملابس اختي الليدي اوسكار فيشعر بحرقان والااام .طيب هذي الالام كيف تزول طيب لوكان يحبني كان على الاقل يكلمني يواسيني يعطيني ريق حلو ع الاقل قدام اهله وانا عمرك مانتقصت منه بشئ وماحاولت ابين له ضعفة لدرجة مرة صارحني وقالي خلينا صحاب قلت له طيب انا على بالي انه محتاج لصاحب يكلمة يفضفض له للاكن ماهو على حساب اعفاف نفسي او اني الغي حاجتي ويعلم الله كيف اعامله ولمن اعامله بلطف يقول انتي شايفتيني خبل ولابزر ولمن اصمت وانظر يعصب ويقول انتي تغزيني وكأن نظراتك تقولي انت حقير مع اني والله مااتكلم لدرجة صرت احط عيوني بالارض لن اكلمة يكرة نظراتي ايش اعمل فيه؟؟؟؟ ولوعلى علاج البروستاتا هو الحبوب الي بياخذها هي خاصة بالتهاب البروستات بس شكلها ماهي نافعة مهاه ومابياخذها الان توقف عنها |
اخي ابو مريم
اشكرك على تفاعلك مع مشكلتي جعل الله ذلك في موازين حسناتك اما بالنسبة للاعفاف والذريه اي والله الوحدة صاينة ومحافظة على نفسها طول هالسنين واخرتها ماتجد شئ لكن الحمدلله ع كل حال اختي جروحي كثيرة الله يعطيك العافيه لكن هو بيتعالج وشكله مانفع لانه مبطل ياخذ الحبوب وشكله ميأس من العلاج ومحبط حاولت اساعدة لكن مايحب يتكلم ولمن افاتحة بالموضوع يقول شئ مايخصك وانا بخير والحمدلله يكابر لدرجة كبيرة يعني ابغى اخذ اجرة وابيه يتعالج لو مااستمريت معاه لانه حرام بهالعمر وماعنده احدلاوالد ولاعلاقات ولاشئ انطوائي الله يجزاك الجنة اختي سلمى اللهم امين ربي يحفظك |
جزانا الله واياكم وتقبل الله منا ومنكم اذن الجىء الى الله عز وجل وتضرعى اليه سبحانه وتعالى وهو قادر على كل شىء وايضا انظرى يا اختى الى نفسك ربما مقصره فى جنب الله عز وجل وكلنا مقصرين والله نسأل الله ان يتوب علينا ويغفر عنا وانت تعلمى يا اختى جوانب التقصير وخصوصا للنساء كثير والله احد الاخوات جاءت لنا وتشكوا انها تزوجت ولم يدخل بها زوجها شهر من المحاولات ولا فائدة وفى النهاية اخبر والده والدها ان ابنه به عجز ولا حول ولا قوة الا الله وتم الطلاق وما هى الا فترة و جاءت هذه الاخت وتشكوا وتقول ان بها حزن لما حدث لها ولماذا يفعل بها هذا وهو يعلم ظروفه لماذا لم يذهب ويتزوج مسار ليجرب نفسه بدلا من ان يجعلها تأخذ لقب مطلقة بعد شهر واحد من الزواج ولكن وفى سياق كلامها قالت لقد كنت مدمنة افلام اباحية ومحادثات شباب بكل الطرق ولكنى تبت وتوقف قبل الزواج بعدة اشهر انظرى يا اختى الى اثر الذنوب نعم الله عز وجل يقبل التوبة ولكن للتوبة شروط ولا يعلم صدق النية الا الله عز وجل وما حدث لها من شئم المعصية ولكى تدخل فى اختبار للتوبة الصادقة وهل كانت التوبة لان الزوج الحلال جاء وستحصل منه على المتعة المرجوة ام التوبة لله عز وجل وانها ستصبر ولن تعود الى معصية الله عز وجل اقصد يا اختى الصابرة المحتسبة اسأل الله ان يثبتك ويعينك ويغفر لنا ولك ان مراجعة النفس هامة جدا مع نزول المصائب وكما قيل لا ينزل ذنب الا يمغصة ولا يرفعه الله عز وجل الا بتوبة صادقة وحقيقية |
الحمدلله انا لاازكي نفسي ولكن نرجوا من الله الثبات وكلنا مقصرين ولاندعي الكمال لكن ثقتي بالله كبيرة والحمدلله على ماابتلاني به وعلى كل حال
والله يجزاك كل خير |
السلام عليكم ورحمة الله
اناالان في اول ايام العيد حبيت اعايده واتصلت ومارد وبعدها اتصل وعيده عليه وقال كنت باجي اعيد بيكم مالقيت حجز ولمن قلت له اادورلك قال لاتعبي نفسك ماراح تلاقي وشكلها حجة علشان مايجي المهم اتصلت على امه اعيدها وسألتني عنه قلت انه قالها اني عند زوجتي وبعيد عندها والحقيقة انا اصلا ماسافر ولاجاني وكذب على امه اني عندي على باله ان اهله مابيكلموني واني مااكلمهم واكتشفت امه كذبه وقالت يابنتي انتي ايش تبي فيه تطلقي منه هذا مامنه نفع وسبحان الله كل يوم انفر منه بزيادة لكن انا ع الاقل حابه انتظر يمر كم شهر ع الاقل لان احس حتى اهله ماهم متقبلينه وطلبت منهم رقم اخوهم بس الين الان ماجابوه لي ...............صبرا جميل والله المستعان |
وعليكم السلام ورحمة الله وبركاته وتقبل الله منا ومنكم اللهم آمين والله يا اختى اهتمامه الظاهرى ولو هو كاذب خطوه جيدة ويظهر انه باقى عليك وربما مفتقدك الان اما موضوع الطلاق ام الاستمرار فليس امامك الا استخارة الله عز وجل ثم التضرع اليه سبحانه وعليك بسهام الليل ولا اعلم ان كنتى جربتى سهام الليل من قبل ام لا ولكن بإذن الله لن يخيب الله ظنك ابدا ابدا ولا تنسى الصدقة بنية فك كربك وخصوصا لاهل الصومال وهم فى هم وضيق لا يعلمه الا الله ومن يفرج عنهم كربه سيفرج الله عنه كرب الدنيا والآخرة اسأل الله ان يهدى زوجك ويحنن قلبه عليك ويألف ما بين قلوبكم ولا تنسى فى كل دعاء ان تطلبى من الله عز وجل ان يألف ما بين قلوبكم فأن تأليف القلوب من عند الله عز وجل |
الله يعينك يا قلبي ويخرجك من اللي انتي فيه
|
الله يعينك والله انا متاكد انو جنيه عاشقته 100 با 100 لزززززززززززم يقرا عليه شيخ ونتي مثل ما تقولين ايذ شغلتي قران يطفيه يعني الرجال مالبوس ودوه لشيخ< والله المستعان>
|
السلام عليكم ورحمة الله
حياك الله ياابومريم الله لايحرمني ويحرم اخواننا في المنتدى من ارائك ربي يسعدك اما بالنسبة لاهتمامه مااخاف اني اصدق هذاالاهتمام واصدق يرغب فيه واعيش دور المرأة الي زوجها يبيها لكن ماابغى احس هذالاحساس علشان ماانصدم بعدين وان بجتهد بالدعاء واسأل الله القبول اشكرك اختي رومانسية ع مرورك اللهم امين شكر يااخي د/حب بجد اشعر بهذا واتمنى احد من اهله احد يعينني على ذلك وربي يكون بالعون تحياتي لمروركم الكريم |
شكله مريض نفسي الله يشفيه ولا يبتلينا -اتوقع الطلاق افضل حل لوضعك وانتي براحتك
|
السلام عليكم ورحمة الله
تخيلوا بعد مكالمته بيوم العيد ماعد كلمني والان اتصل عليه علشان ابي اتواصل معاه علشان يرسلي اغراضي واطلب الانفصال يعطيني حظر شكله فاصل جواله بالله انسان مثل هذا كيف يتفاهم معاه وانا ماابغى ارسل عليه احد من اخواني لايفكر اني بجري وراه بس غلطتي لمن قالي متى تبي الطلاق قلت له متى مانت طفشت وماتبغاني على ذمتك الاخ صدق وسابني كذا بدون تواصل مع انه قبل مااسافر سألني سبتي صورك قلت بعضها وسكت بعدها قال لاخذيها كلها اخاف احن ؟؟؟؟؟ولمن وصلني المطار سألني اخذتي جوازك قلت ايوه وسرح ياناس قمت التناقض كله ملخبط وانا بصراحة ماابغى شوشرةة علشان كذا لجأت للموقع كل الي اتمناه اعيش بسلام حتى لو انفصلت حابه انفصل بسلام |
يا اختى اصبرى وعلى ماذا الاستعجال سبحان الله ان الله مع الصابرين اتركيه فتره يشعر بقيمتك ويفتقدك ومن ثم يأخذ القرار الصحيح بعون الله تعالى فقط استخيرى الله دائما ان يقدر لك الخير ويفعله سبحانه وتعالى وانسى الموضع تماما الان اعتبرى نفسك فى اجازة من الزواج |
[COLOR="Blue"]كل عام والجميع بالف خير
عزيزتي كان الله في عونك وياليت توضحين كيف علاقته مع ربه وكيف صلاته وبخصوص انك تقولين صعب انفصل بدون سبب ..الحين الله يهداك كل عيوبه هذي والذل والمهانه وتقولين بدون سبب...واستغرب انه اهله مايدرون عن زواجه ..وانه مقاطع اهله وعاق بامه وانتي تقولين من اتاكم من ترضون دينه وخلقه طيب وين الدين والخلق الي رضيتوا فيه وهو عاق بامه وقاطع لاهله على اي اساس وافقتوا .. هذي مشكلة اغلب البشر يرمون انفسهم الى التهلكه بدون تفكير ويقولون نصيب المفروض الشخص يفكر ويشغل مخه قبل لاياخذ نصيبه.. واهم شي انتبهي من الحمل.../COLOR] |
قالي اسمعي ياامساك بمعروف او تسريح باحسان وانتي روحي لبيت اهلك قلت اذارحت بتكون مرتاح فال ايوه ولاحياة المذله والمهانه الي معيشك
يعني هو مقتنع انو معيشك بذل اعتقد عنده حاله نفسيه كلمي اخوه طالما عاقل بس على مااظن صعب العيشه معاه وانتي بدون عيال كدا اجل لو جبتي استخيري وربنا يطتبلك اللي فيه الخير |
الانطباع العام امرأه عاقله سويه متزوجه من مريض ب الوساس القهري ولديه قلق زائده وعنده انفصام بالشخصيه سببت له انعزال عن الناس وتقلب مزاجي وتبلد في المشاعر وتحبه وحب السوي لغير السوي يولد صبرا عقيما كمن يصبر على تعليم الفيل الكلام تحليل المشكله من خلال سطورك الرجل يعيش شخصيتين ولذا اصبت بالصدمه من تغير جذريا بعد الدخول والعصبيه دليل على القلق وعد النوم معك والانطوء دليل على الاكتئاب وكونك تلبيسن ويطنش دليل على الانفصام الجزئي وهروب ثلاث زوجات منه دليل على انه لايصلح ان يكون زوجا بل حياته ستكون واحدنيه الا ان يقيض الله له من يعالجه علاج روحاني بالرقيه وعلاج نفساني وهروبه من العلاقه الخاصه والمداعبه دليل على ذلك وتبلده حين ذهابك الى بيت اهلك وقوله ( حقير ومجنون ) اعتراف بها على لسانه الحل - فر من المجذوم فرارك من الاسد - هذا الرجل الاربعيني مريض نفسي ويحتاج الى رقيه شرعيه - اياك ان ترجعي اليه وفقك ربي لكل خير |
السلام عليكم ورحمة الله وبركاته
حياكم الله اخوتي واشكرلكم تجاوبكم معي وارائكم الي ارى فيها الفائدة الكبيرة لي والي شجعتني ورفعت من معنوياتي جعله الله جميع ماكتبتم في ميزان حسناتكم اما بالنسبة لاخي الفاضل / ابو مريم راح استمع لنصحك واتروى واعتبرها اجازة زوجية مزعجة لان من الصعب جالس ع اعصابك وموعارف ايش مصيرك مع انسان منت عارف ايش بيفكر ......... اما اختي /ليه الغرور أما بالنسبة لسؤالك كيف علاقته مع ربه وكيف صلاته ؟ علاقته بربه علاقه عادية يؤدي فروضة لاافراط ولاتفريط بس بعد زواجنا اقترحت عليه كماهو تجري العادة ان نذهب نؤدي العمرة كمايفعل اغلب العرسان وعلشان ربي يطرح البركة رفض ؟؟؟؟؟ اما بالنسبة لصلاته الحق يقال فهومحافظ عليها أماوبخصوص اني بتقول صعب انفصل بدون سبب ..والي قصدته ان اهلي لايعرفون انا ليه جايه عندهم وفكرهم اني جايه عندهم علشان عملي ماحسستهم انه فيه شئ بيني وبين زوجي ولاانا اكيد عارفه السبب أما ان اهله مايدرون عن زواجه لاهم عرفوا..بعد ماملك لانه كان مخبي عليهم لانه بعيد عن المكان الي ساكنيين فيه وانه مايبي يكلف عليهم ومن كلامه انه مقاطع اهله وعاق بامه وانتي تقولين من اتاكم من ترضون دينه وخلقه طيب وين الدين والخلق الي رضيتوا فيه وهو عاق بامه وقاطع لاهله على اي اساس وافقتوا .. موافقه الاعل جات على اساس الي سألهم مااعطوهم الكلام الصح لاني ماعرفت ه المعلومات الا بعد الزواج ولاقبل الزواج سبحان الله كامل مكمل طبعا مطلعينه للسما ولكن قدرالله وماشاء فعل الدين موجود لكن الخلق مدحوه بس معاملة الناس غير معاملة زوجته سبحان الله هذي مشكلة اغلب البشر يرمون انفسهم الى التهلكه ؟؟؟؟؟الله يسامحك على كلمة رميته النفس انا موقليلة علشان ارمي نفسي لكن هذاالي صار اوقات الانسان يكون حريص وحذر لكن مايستفيد شئ منه ولكن الحمدلله اما بالنسبة للحمل مااعتقد لانه ماجلي نهائي بعد الاسبوع الاول من الزواج شكرة لك ماكتبي يجزاك الجنه |
سبحان الله زوجك ذكرنى باخى المريض نفسى الى تزوج وطلق بعد اسبوع نفس اعراض وتصرفات اخى بس الفرق نحن بلغنا الزوجة ومع ذلك الواقع اصعب بكثير
الله يكون فى عونك |
السلام عليكم ورحمة الله وبركاته
حياكم الله اخوتي واشكرلكم تجاوبكم معي وارائكم الي ارى فيها الفائدة الكبيرة لي ولغيري والي شجعتني ورفعت من معنوياتي جعله الله في موازين حسناتكم امابالنسبة لاختي/ مدلعه حبيبها موالمشكله انه عارف هذاالشئ وبالعكس هذا دليل انه متعمد هذاالشئ وكأنه اسلوب تنفير علشان انفر واهج منه او انه اثبات لنفسه انه رجل ويحق له التصرف كيفمايشاء فيك وان شاء الله بحاول اكلم اخوه واتمنى انه يتجاوب معاه شاكره لك تجاوبك أما اخي الفاضل / عمران والذي قرأت ماكتبت اكثر من عشر مرات لاحساسي بأنك قرأت معاناتي بامعان وحللتها تحليل منطقي من وجه نظر احترمها واقدرهاجدا جع الله ذلك في ميزان حسناتك اما بالنسبة للحب فأعتقد ن وأد من اول وهله خاصة انه تعامل معاه باسلوب القمع فأنا الان لااكن له اي مشاعر سوى مشاعر التعاطف معاه لاني اشعر انه وحيد واتمنى ان احد من اهله يتجاوب معي ويعالجوه فعلا انصدمت وماتوقعت هذالتغير خاصة وانه بنى لي جسور من الاحلام وانه هو الوحيد الذي يستحقني .........لكن هيهات هيهات فعلا هو كئيب وانا بطبعي فرفوش واضحك اغلب الوقت لكن تدريجيا قربت تتلاشى ضحكتي حتى اني كنت متفأله فقلت له ان شاء الله تتحول حياتك الى بسمه وضحك فقال مدري مين الي بيأثر في الثاني ياناس مايضحك الا مع اصحابه والغرباء اماانا ماالي الي العبوس حتى لمن يجي من برى واستقبلة بابتسامه في الاول يجاملني وبعدين صار يتجاهل ابتسامتي ...........والمشكله في زوجاته السابقات انه يقول هو الي مايبيهم وهم الي ماهم عاجباته ؟ واهله يؤكدوا ذلك انه هو الي مايبي زوجاته لانهم يكلمونهم وانهن يبكين لايرغبن الطلاق وهو يطلقهن وانه هوالي كان يطلقهن دون سبب غير انهن لايعجبنه في اشكالهن وتصرفاتهن لكن ماادري عدم رغبته بهم بارادته او خارج عن ارادته الله واعلم والي اتمناه فعلا ان الله يقيض له من يعالجه العلاج الروحاني أو العلاج النفساني اما بالنسبة لحلك فهو بعين الاعتبار وجزاك الله خيرافي كل كلمه خطيتها يمناك ربي يسعدكم ويوفقكم دنيا واخره |
طيب اثناء المكالمات بالملكة مابان فيه اي شي مااتضح لك انه مريض نفسي
للاسف زوجك مريض نفسي ومعقد والله يكون بعونك واحمد ربك انك ماحملتي منه استخيري واستشيري والله يهديك للاحسن يارب حاسة فيك والله اخدت واحد نفس حكاية زوجك بس انه مادخل عليه وتطلقت منه على طول ا |
| الساعة الآن 01:56 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©