|
للمطلقاااات تعالي شاركيني احساسي ..
السلام عليكمـ ..
بدايه اقول كل عام والجميع بصحه وسلامه يارب صراحه مو عارفه من وين ابدى ;) ولا ادري كيف اوصل لكم الموقف الي صار لي اليوم .. طبعا خرجت اليوم مع اهلي وكانت اول مناسبه اخرج لها معاهم لمكان فيه زوآج عند جماعتنا طليقي من برى العايله وماله اي صله فيهم ابد حتى ان اغلب الحريم اليوم ماعرفوني لان لي اكثر من خمس سنين ماشفتهم ولا تقابلنا .. الي صار ان الوحده تجي تسلم علي وتسولف وبعدها تسال انتي جايه اجازه وبعدين وين ولدك انا هناا ماعاد عرفت وش اقول رحت اليوم ولا احد منهم يعرف خبر طلاقي الا اقاربي وهم اصلا مايتكلمون ولا ببلغوا احد طبعا جو كم وحده ويوم سالوني قلت الحمد لله على كل حال تطلقت شوي تنقلب النظرات كلها استغراب وكن جريمه صارت الا وحده منهم قالت ايييه والله من يوم شفتك داخله وانا قايله متغيره ياربي ليه كذا تغير شكلك مررره حتى ملامحك صراحه اني منصدمه منك لاحول ولاقوة الابالله كنــي ناقصه تجي هي وياها بعد تعلمني ان خلاص واضح علي اني انسانه مكسوره من الطلاق واني احتاج لنظرات الرحمه والشفقه منهم وكل وحده تخبر الثانيه يااااااااااااااااارب صبرني .. ويمرون من عند طاولتنا وكان فيه مرض معدي عليها مو ادميه مثلهم .. على العلم اني مبتسمه وبشوشه ولالا كنت ناويه اخبر احد عن وضعي لكن اسالكم خواتي هالشي طبيعي وشفيهم بس عرفوا طلاقي تغيروا احتاج اشوف تجاربكم .. وشلون اتصرف المره الجايه انا مشكلتي من النوع الي يبين على ملامحي اي شي يضايقني يعني بمجرد ماتكلموا كذا معاي صرآحه ضاااق صدري بعد ماكنت رايحه للمناسبه وانا كلي تفاؤل وطموح اني ماخلي شي يقهرني او يضايقني لكن الشكوى لله .. اترك لـ اخواني واخواتي الاعضاء المايك لمشاركتكم ونصايحكم .. لآحرمني الله محبتكم |
الحال من بعضه يااختي << توي صآحيه بس أصحصح أقولك تجربتي:d |
وعليكم السلام ورحمة الله وبركاته وانتي بصحه وسلامه أولآ : طمنينآ عليك وعلى صغيرك ؟ وكيف الوضع معآك .. ؟ اقتباس:
لاحول ولاقوة الا بالله .. أختي لايهمونك أنا تقريبآ حصلي نفس موقفك بس متــى ؟ قبل الطلاق بـ خمس أيآم كنت بزوآج وأنا حآلتي لايعلمهآ الا الله منهآره كثير وبآين بشكلي أني على وشك أنكسسسسآر كنت جآلسه بطآوله وكلن يمر وينآظرني كأني فيني مـرض معدي أو شي لاسمح الله ومع إني مبتسمه ونفس حآلتك بـ الضبط .. هذآ وأنا ماتطلقت والكل كأن يتكلم هذي ندمآنه اللي ماشاءالله و و شوفوآ وش صآرت ومن هـ الكلام ورجعت للبيت وكنت أبكي بقووووووووووووه قلت : يآرب لاتضيعني مـالي غيرك يآرب وندمت أني رحت للزوآج وأنا بهـ الحآله خصوصآ بأني توي متزوجه وعروس << كانت غلطه كبيره بأني حضرت الزوآج وأنا على وشك طلآق اقتباس:
تقريبآ حآلتك نفس حآلتي .. أنآ يبآن بملآمحي بس أحآول قد مـاأقدر أضحك وأنسى أنا أيآم العده أطلع واستانس و أضحك .. أما لما طلعت من العده ماطلعت لأي منآسبه أحس بدأ شعوري يختلف اليوم عندي منآسبه وهي أول منآسبه بعد خروجي مـن العده والآن النآس عرفوآ بأني تطلقت .... مدري كيف بيكون الوضع ؟! أنا بالأمس طلعت لصآلون نسآئي وغيرت من شكلي .. وعندي ثقه بنفسي وتفآئل لكن اليوم بيكون أول يوم موآجهه بيني وبين الناس بعد ماعرفوآ الطلاق ... ومن الآن محضره نفسي للأسئله :d الله يعيـن لكن كيف نتصرف .. نزرع الثقـه بأنفسنآ ونعتبر أنفسنآ مـاتزوجنآ ونعيش حيآتنآ ومايهمنآ أحد وربي رآح يستغربون .. لاتضغفين قدآم النآس حذآري << هـ الكلام لي ولك وأنآ اليوم بطلع لمنآسبه .. ورآح أجآوب عليهم بأنه ( نصيب والحمدلله على كل حآل ) وأي وحده بتلف وتدور وتبي تعرف الأسبآب بقولهآ حيآتي خط أحمر وبطنشهآ وبعيش حيآتي ولاكأني متزوجه << لأن آسآسآ ماتزوجت :22: عسى ربي يعوضني ويعوضك ويعوض كل مطلقه خير يآرب ويرد لك صغيرك عآجلآ غير آجلآ .. |
اقتباس:
|
اهلين ياعسل
انا شخصيا مياثرون فيني كثير هذا غير ان ملامحي مايبان عليها ابد الي جواتي شاطرة بالكتمان :) لكن الي يضايقني بجد : ليه تطلقتي وش فيكم يالقف الناس بس! يعني انا اسال نفسي معقولة مايعرفون ان هالاشياء قوة بالخصوصية ومحد يحب يحكي عنها! تناهيد مدري كم صار لك مطلقة بس واضح قريب احب اطمنك كل يوم يمر بتكونين احسن ان شالله الله يعوضك خير منه ويخلي لك صغنونك |
تحبو اشارككم تجربة ابنتي
لانكم ذكرتوني كانت ببداية الانفصال او قصدي الزعل لان حتى الآن لم يتقدم على طلب الطلاق بعد ذهبنا الى خطبة لصبيه نعرفها والكل هناك يعرفنا وطبعا سمعو بالخلاف اول وحده اسرعت وسألتني ووقت عرفت زعلت وفرحت وقالت : والله اعرف شخص مطلق يبحث عن فتاة ذات اخلاق وبنتك ما شاء الله جمال. واخلاق ولكن انا قلت لها انها لم تقدم على الطلاق بعد جا اللي بعدها تقول لي : رجعي بنتك لزوجها شوفو فلانه هنا وفلانه بعد طلاقهم ما حد يتقدم لهم وبنتي رح تعيش تعيسه كل حياتها قلت لها : حصل خير وحياتها وهي حره فيها البنت احست انو النظر عليها بين الشفقه والريبه يعني لو صعدت المنبر واخذت المكرفون وبدل الدي دجاي كانت عملت لهم خطبه وشرحت لهم ظروف زوجها وطلاقها انو يمكن ارتاحو خرجت للسياره وجلست في السياره فقدتها واتصلت بها وخرجت لها لم تقل لي وكانت تتحجج وبالاخير اعترفت فضحكت وقلت لها : فلانه تعرفيها هناك جابت لك 3 عرايس (ههههههابو الي بعيدها وما بيزيدها بتعرفو للمثل صح ) وقلت لها انو وقت تطلقي يحصل خير انرفعت معنوياتها شويه ورجعت دخلت وحصل موقف من يوماااااااان ومازال الوضع مششششششششحون جدا في البيت ووقت يمر على خير اخبركم عنه ولكن كلما شاهدت الاحباط على وجهها اصرخ ارفعي راسك ولا تفعلين ما يفعلون وكل واحد يشوف اهل بيتو ويجي يحكي علينا وانتو كمااااااان كل واحده منكن اهتمو بانفسكن ومثل ما قال اخوكم شاب البسو اجمل من العروس واضحكو ويا ويل اللي تتغاظ منكن ازعل والله انو يعني الناس واضعه على راسها ريشه ما كل واحد يشوف داخل بيتو شو عم يصير ومن ثم ينظر للغير |
اقتباس:
ياحبيلك بعد مـامـا قرين كل شي ولا تزعلي علينا أبشري بنكون أحلى مـن العروس بعد أهم شي رضى ربنا عنآ .. ورضآنآ عن أنفسنآ .. والنآس ... يطول الزمن أو يقصر حكيهم ماينتهي ربي يسسعدنا ويسسعدك ياماما أنتي وبنتك ويعوضها ويعوضنا خير |
وعليكم السلام كل عام والجميع بخير وبصحة وسلامة يارب تناهيد حبيبتي ماراح أعلق على كل نقطة ذكرتيها لكن راح اقولك شئ واحد إنه أنت السبب في كل الي صار لو إنك تملكين الثقة العاليه بنفسك ووتكلمين بكل ثقة إنك تطلقتي ماصار الي صار أنا أناقش وأتكلم وأقول إني تطلقت ولا يهمني أحد يكفي إنك تتكلمين وبداخلك مافيه شئ يغلي يكفي إنه ثقتك وأنت تتكلمين تنعكس بشكل كبير على المتلقي صدقيني ردود أفعال الكثير بحسب طريقتنا في توصيل الخبر أنا لما تطلقت وبلغت صديقاتي أنا الي أصبرهم مو هم الي يصبروني وممكن يكون تأثروا أكثر مني ههههههههه مع إني أقولك كنا أنا وطليقي حياتنا حلوة يعني فيه حب بس خلاص مجرد ماباعني بعته ونسيته صدقيني كل شئ نقدر نغيره لمصلحتنا بالاقناع والاهم الايمان بالقضاء والقدر وحسن ظنك بربك |
اختي كل هذي الأحاسيس داخلنا وانا نترجم نظرات الناس واسئلتهم حسب احاسيس الذل والانكسار الي داخلنا
انا نحتاج الثقه ثم الثقه ثم الثقه والرضى التام بالقضاء والقدر بعدها نقدر نواجه المجتمع بقلب قوي انا عندي نصيحه مهمه جدا لكل مطلقه في بداية طلاقها اولا.. لاتتكلم عن طليقها ومشاكلها معه وسبب طلاقها عند اي انسان حتى اقرب الناس ...الناس انفس وغايات منهم الحاسد منهم الشامت منهم نقال الكلام منهم الأرعن الي ينصحك بشي ضدك منهم الي يتتبع مصائب الناس ويزيد من الامهم واحزانهم وينقلها للناس ( لما تسكتي عن الكلام ماراح تخسري شي غير ان ألمك داخلك محد يعرفه والناس راح تنغاض لأنهم ماعرف وش داخلك ..لكن لما تتكلمي راح تخسري نفسك وتزيد الامك واحزانك ويكثر الكلام حولك ويوصل لطليقك واهله اما يشمتون او يكون عند طليقك نيت الرجعه ويتراجع لما يلقاك نشرتي غسيله ) هذي حكم؟؟؟ لن تندمي على السكوت ابدا ولكن سوف تندمين على الكلام الف مره ؟؟؟؟؟ ثانيا ..في بداية الطلاق لاتخرجي وتواجهي المجتمع ابعدي عنهم حتى يتزن تفكيرك وترتاح نفسيتك ولا تتهورين في لحظت غضب وتنشرين غسيلك انت وطليقك بعدين تندمين لكن لا تجلسي لوحدك خالطي اهلك ودخلي دوره في اي مجال وادرسي كم شهر حتى تنشغلين ولا يتوحد بك الشيطان ويضعف ايمانك ويجعلك ساخطه على ما اصابك من ربك في هذي الفتره قوي ايمانك وتعلقي بربك اكثر واكثر واستمري اذا زال السبب ولا تكوني كما قال تعالى { وَإِذَا مَسَّ الْإِنْسَانَ الضُّرُّ دَعَانَا لِجَنْبِهِ أَوْ قَاعِدًا أَوْ قَائِمًا فَلَمَّا كَشَفْنَا عَنْهُ ضُرَّهُ مَرَّ كَأَنْ لَمْ يَدْعُنَا إِلَى ضُرٍّ مَسَّهُ كَذَلِكَ زُيِّنَ لِلْمُسْرِفِينَ مَا كَانُوا يَعْمَلُونَ } ثالثا ....لا تدخلي كثير منتديات المطلقات لانه راح يصيبك الحزن واليائس اكثر واكثر وكل مره تفتح جراحك ...مع العلم فيهم الصادقه والكاذبه والمبالغه والجاهله وضعيفت الايمان ادخلي منتديات الحوار الفكري المنظرات الدينيه المواهب والأفكار الشعر الصور والرسم او الرجيم اذا كنت بدينه فيه نساء لهم مشاركات وقروبات وتحديات ادخلي معهم وراح تنشغلين مره...والتجاره مثل موقع سوق ستي كل وحده جايبه بضاعه تسوقها تفرجي شاركي اشتري على استطاعتك واذا قدرتي تسويين مثلهم زين على زين هل تتوقعين ماعندهم مشاكل او مهم مطلقات لكن مدلعين انفسهم ومشتغلين بشي يفيدهم اخير الله يسعدكم ويبعد عنكم شياطين الجن والانس |
الله يعينك حاسسه فيك من جد الناس تضايق بالاسئله واسلوب الشفقه
ذكرتيني بحالتي لدرجة اعتزلت الناس ماحب اروح ولا اجي يادوب مدرستي بيتي .. وهذا الشي اثر على نفسيتي وعلى تعاملي معاهم والله العظيم تغيرت وتغيرت اشياء كثير فيني للاسوى بسبب الوحده الي عشتها .. وقفت حياتي بالبيت على النت ...بقولك احتكي بالناس وامور طلاقك لاتتكلمي فيها واعتبري نفسك ماتزوجتي اكشخي واضهري الابتسامه وخليك دلع ..عشان تكسري نظرهم ولا يتشمتو فيك .. |
كان الله في عوونك اختي ..
وعوضك باللي اخير واحس منه يااارب .. انا وانتي ياقلبي |
وعليكم السلام ورحمة الله وبركاته عيدكم مبارك وكل عام والجميع بخير نصيحتي للمطلقات هي عدم الشعور بالعار من الطلاق لأنه مثلما الزواج نصيب الطلاق أيضا قدر من المولى ورأي الناس فيك هو عبارة عن رد فعل لشعورك الداخلي. أما بالنسبة لتجربتي فهي مشابهة لتجربتك ففي الأيام الأولى لخروجي من بيت الزوجية كانت أيام التحضيرات لزفاف بنت عمتي شاركت معهم وكلي ثقة بنفسي لقد كنت مرحة أتصرف بشكل جد طبيعي لدرجة لم اعطهم الفرصة لمناقشتي فبدل أن يتعكر أنا مزاجي تركت الحيرة تغمرهم وأصبحت أتصرف بنفس الطريقة الى ان اصبحوا يقولون لي "لا تظهر عليك علامات الزواج أبدا وكأنه لم يسبق لك وأن تزوجتي". كما أنني في المرات القليلة التي سئلت فيها (وهذا مؤخرا بعد 4سنوات من الطلاق) عن سبب طلاقي كان جوابي مختصرا "انتهى النصيب". وبما أنه كانت هناك علاقة نسب بيني وطليقي كانت بعض أفراد العائلة يريدون أن يتجسسوا عن الأسباب وأيضا يريدون اخباري بسلبيات طليقي على أساس انهم يعرفونه وانا بدوري حينها كنت ابدي غضبي وأدافع عنه بكل صدق( رغم أنه كان قاسي معي كما أنه خانني) ولكن العشرة التي كانت بيننا اسمى من أن أشهر به وبعلاقتنا. لا أدري ما أقوله لك سوى أن تعززي ثقتك بنفسك وتتأكدي بأن الطلاق ليس عيبا ولا عار بل هو قدر، اعتني بنفسك خططي لمستقبلك ايجابيا وانظري حولك تجدين العديد من البنات من سنك لم يتزوجو بعد، عيشي مثلهم الى ان يعوضك الرحمان بالزوج الصالح الذي يقدرك ويصونك. تأكدي بأن الناس تنظر اليك مثلما تنظرين أنت لنفسك. اتمنى أن أكون قد أفدتك قليلا .
|
المجتمع هذا يبغاله فرمته من اول وجديد
يعني السالفه مو بس معاي مع كل المطلقات .. انا اعترف والله اني اذا عرفت وحده تطلقت يجيني شعور رحمه لها لكن ويشهد الله ماعمري بينت لهم ان وضعهم يحزن او شي بالعكس اوقات ماسالهم ولا افكر افتح الموضوع الين هم يتكلمون من نفسهم ويقولون الي بخاطرهم .. ااااهـ بس الله يرحمني برحمته ويفتح لي ابواب الرزق ويرزقني من حيث لااحتسب اششششكركم من اعمـااق قلبي على هالتواجد الحلو : |
عن تجربة تبين تسكتين الناااااااااااس ولاتعطينهم فرصة للكلام ؟؟!
اطلعي لهم وانتي واثقة وعلى سنقة عشرة ولاكأن صاااااار شي يعني اخلي الي بالقلب بالقلب !! اسأل الله ان يعووووووووض كل مطلقة خييييييييير |
اهمم شي الثقه
ومايهمني كلام الناااس او نظراتهممم وطلاقي انا طلبته من النجسس ومحد يتجرا يسالني عن سبب الطلاق لا انه معرووف عند الكل والحمدلله مبسوووووووطه ع الاخير صارو الناس يقولون كيف طلق الملاك الله ياخذ حقي منهم وان شاء الله اشوفها في اخواته واذا احد سالك قولي خصوصياات ما احب القاافه مره هههه |
أنا عكسكم ..
أنا محد يسألني .. أنا أبدآآآآآآ أسرد قصتي وأبكي أحيانا .. أنا أشك إني سويه !!!!!!!!!! |
الله يجبر كسرنااا يارب
بقلكم سالفه حصلت معي قبل اسبوع أصرت علي الوالده اني اروح معهاا للجيران اللي جنبنا تعاارف وقلت ابشري وتلبست وتكشخت ومشيت معها وتونا جلسنا والمجلس ملياان حرريم وجااتك الاسئله وهاذي بنتك الصغيره ماشاء الله ووين سااكنه قالت الوالده ساكنه معي ماشاء الله وزوجها ساكن معكم قالت الوالده لا هاذي تزووجت وربي ماكتبلها نصيب معااه ونفصلت هيه قاالت كذا والحريم كلهم هااه اماننه لاحول الله ياربي يالللله ،، والكل يناظرني صرت اناظرهم واضحك كان الوالده قالت نكتته نشبوا القمه بحلقي طبعاا فيه اساله كثييره في بالهم بس مستحين يسالون شوي قالت وحده فلانه تطلقت بنتها ومارضت تزوج تقول ابغى اربي بنتي لين تكبر اخاف لاتزوجت بياخذها ابوهاا !! لاحظوا المقدمه هاذي كلها عشان تسااال بنتك ولدها معها ولا مع ابوووه قالت الوالده لا معااها طيب يجي يااخذه ولا لا قالت لا يااخذه بصررراحه انا امسك في ضحكتي على حركاااتهم نسال الله السلامه والله ولاكني غيير معاايه مرض الإيدز بس حمدالله والله مااثروا فيني بفضل الله اني اضحك على تصرفااتهم |
اهلا حبيبتي :) لا تستعجلي بمواجهة المجتمع مادمت غير قادرة , دعي الخبر يتسرب وانشريه وخليهم يشبعون حكي ثم اطلعي لهم بعدين وانت قوية , انا مرت علي فترة اول الطلاق متعبة شوي والحمدلله لك ياربي , وجلست فترة ما اقابل الناس ... بعدها انطلقت في الحياة واكمل دراستي والامور تمام ...:22: فاللي تقدر تواجه المجتمع من البداية تنطلق واللي حاسة بتعب شوي تنتظر شوي ... بس والله يا أخواتي اللي تبغي تعرف بانها بأحسن نعمة , تشوف المرضى وراح تحمد الله ألف مرة على نعمه عليها سبحانه ________ نوآرة حبيبتي انتبهي من كثرة الكلام بكرة راح تلقين قصتك مبهرة كثير , خلي فضفضتك هنا أحسن لك فرج الله همومكم حبايبي |
المشكله بالنسبه لي انهم مو بس انقلبو وتغيروا علي انا
حتى على امي وخواتي بمجرد ان بنتهم صارت مطلقه خصوصا المتزوجات من قرايبنا خايفين على ازواجهم منـي وصارو يكرهوني بالبدايه كنت متأزمه من الوضع ونفسيتي تعبت من تعاملهم بس بعدين صرت اعاند واكشخ اخر كشخه قبل ما اروح عزايمهم واتدلع قدامهم وقدام امهات ازواجهم ههههههههههههه مو عشان شي بس عشان اقهرهم اكثر :25: |
أتوقع هذا الشي مؤقت ومرده يصير شي عادي بس أنتي حاولي تسيطرين على نفسك واقري الأذكار وقوي قلبك بالله ولا تخلين كلامهم يأثر فيك. يعني لو قالوا لك كلمة من هذا الكلام قولي الحمدلله كل شيء نصيب هذي حكمة الله وارادته الحمدلله مو أول ولا آخر وحدة تطلقت :d امزح معك هذي لا تقولينها فيه ناس ما تقصد سوء بس اسلوبهم غلط لا تخلين الطلاق يعزلك عن الناس عيشي حياتك طبيعي والله يوفقك ويعوضك خير. |
ابدا مو متشابهين بس نظرة الناس بدل على نوع من الشماتة وبعضهن وكاني الغلط مني ما صبرت وهيك شي يعني كان لازم اتحمل اكتر من هيك بس مافي شي بيقهر ولا حتى بزعل بالعكس ضليتني متفائلة انه بكرى احلى وماهمتني نظرة الناس وكل مان بيحكي الحمدلله حسنت وسكتواني مقتنعة ورضيانة وهدا الصح
|
والله باقي ماصار لي الا اسبوعـين وبآقي ع قولتكم نظرة المجتمع خصوصا انو في مشاكل بيني وبين طليقي
يعرفونها ... اذا نفسي لسسسه مو مصدقه الي صار فيني وبالذات لاني صبرت ع اشياء كثيره |
وينكم انا قلت احسن شي نفضفض لبعض وينكم طرتو
|
| الساعة الآن 12:50 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©