|
إن صاح جرحي مالقيت اللي يحن ويسمعه ...!!
السلام عليكم ورحمة الله ... بالبداية ترى موضوعي مشتت ومخربط وكلمات متقاطعة والله يعين من يقرأ الموضوع ههههه بينحاس فأنصحكم تتقهون أو شاي عالسريع عشان تقرأون موضوعي بتركيز وتحتسبون الأجر ... بالإضافة أن موضوعي طووووووووووويل لأني فتحت قلبي لكم ...
بسم الله وأبتدأ موضوعي بهذه الأبيات المنقولة ... إلى متى يا " ضيقه الخاطر " على مجرى الوريد ماعاد باقي من دمي قطره مهي مستوجعه ! بس البلا لا صارت أمواج " التعاسه " من جليد وإن صاح جرحك مالقيت اللي يحن ويسمعه :"( من لا يقدّر خوتي .. فـ " أبرك سنه " فرقـاه عيد أما " الرفيق الغالي " إليا غاب .. خذ قلبي معه ! البارحه هبت هواجيسي فـ صدري من جديد سوالف ٍ تشره على قلبي بـ حلم ٍ ضيعه لاهنت يا " جرح الزمن " حقق مرادك مايريد أهديت للخافق جروح .. وهو رفع لك قبعه ! يا ويل حالي من شقى اللوعه ويا قطع الوريد على آخر جروح الزمن .. والطعون الموجعه قلبي " مصفي نيته " لو كل من حوله ضديد يبقى ( الجبل ) مهما وطته الريح ماهي تزعزعه ! من طاح من عيني ماعاد يهم ينقص أو يزيد اللي ينزل قدره بـ نفسه .. هو اللي يرفعه ! " ريحت قلبي " من عنـا الدنيا وانا اللي مستفيد مادام قلبي مالقى في الوقت شي ٍ يقنعه إلا رفيق ٍ يجبر الكسر .. وعلى الشده عضيد هذا منى قلبي عـلى الدنيا وهذا مطمعه أضحك لو أن الضيقه اللي في الحنايا تستزيد لين أقهر الضيقه وأخليها تفارق فـ السعه ! لا خانك الوقت الردي " وما للحديد إلا الحديد " اللي شراك أهده وفـا .. واللي خذل عهدك بعه تمشي المقادير بـ هوى الراضي وتلعب بـ العنيد صدق اللي قال ان طاعك " الوقت الردي " ولا طعه ! العمر بـ أيامه قطار .. وراكب ٍ سكة حديد وتمر لحظاته مابين المحزنه و الممتعه كل الحياه دروس والدنيا عبر والمستفيد !! اللي خذا من ( جمله الدنيا ) دروس ٍ تنفعه السالفة إني معصبة من المجتمع بلا إستثناء ايه بلااستثناء وحطوا تحت بلا استثناء مليون خط ابتداء بعائلتي ومحيطي وانتهاء بالمنتدى .... متضآآآآيقة ... نفسيتي جدا تعبانة وتفكيري غير منتظم ... أهملت عملي بسبب سوء نفسيتي يعني أشتغل بالدف ... وطبعا مافيه أحد يرد الصوت ... كأني بكهف أتكلم يرجع صدى صوتي .... ربي رحمتك أرجوووو ... أحس بقهر بغضب .... سؤال يطرح نفسه بس قبل مااطرح سؤالي لو سمحتوا الله يخليكم لاأحد يقول هذا حسد أو مقارنة بالآخرين أفهموني قبل تكتبون رد الله يحرم يديكم عن النار ... سؤالي هو ليش (البعض) مايهتم بالمتأخرات عن الزواج ؟؟؟؟؟؟؟؟؟؟ ولا أعمم لكني قلت البعض ... يعني لاشافوا وحدة ماتزوجت ومهمومة ومتضايقة يستهزأون بهمها وربما يضحكون بسخرية ... ويقولون عادي وش فيها وش مكدر عليك أصلا ؟؟ احمدي ربك ماتزوجتي وجاك رجل يغثك !! لا والسؤال اللي يقهر وش مكدر عليك ؟؟؟؟؟؟؟؟؟ وش اللي ماكدر علينا الوحدة بمعانيها وألمها لحااااااااااااااااااالها أكبر ضيقة ولاأحد يرد الصوت حتى في بعض المنتديات بدون تحديد إذا وحدة متأخرة بالزواج تضع مشكلتها أو تفضفض نرى الردود قليلة مقارنة بغيرها من المشاكل ... طيب وين نروح بعد الله ؟؟ من يسمع شكوانا بعد الله ... مالنا إلا الله وكفى به وكيلا ... لكن الإنسان بطبيعته يحب أن يفضفض ويرمي همومه ويجد الأذن المصغية له ..... بيقولون البعض وش نسوي لها ماجاء نصيبها لكن غيرها من الحالات فيه مشاكل تستدعي وضع الحلول ... بقول لكم فيه مشاكل تواجهنا بسبب تأخر الزواج ومنها إنتقاد الناس اللي يسم البدن ويجرح القلب .... أدري كلام الناس يغث ومامنه فايدة وعدم التركيز فيه أبرك ولازم نكبر عقولنا لكن حنا بنات حساسات مثل الجوري .. النظرات بالمناسبات الكبيرة تجرررررررح ,,, لاتقولون تتوهمين مو خبله أتوهم بس تقعد تناظر تناظر كنها معجبة تبي توقيع خخخخ وبعدين تسولف مع أمي وأهلي وتقول الله يرزقها ويستر عليها ويرزقها من يضفها ... << تقهرني الكلمة الأخيرة يرزقها من يضفها .. والا يجونك ناس من أقرب النااااااااااااااااسسسسسس يطقونها بوجهك ... ويقولون كل البنات بسنك تزوجوا وأمهات ولدها طولها وأنتي للحين !!! والأسئلة المعتادة المطروحة ياترى هي ماتنخطب ؟؟ مااحد تقدم لها ؟؟؟ يعني لازم إذا إنخطبت أحط إعلان إني إنخطبت وعدد مرات خطوباتي وماذا حصل .. ومن مين كان الإنسحاب وش الأسباب ,,, عشان أسلم من الكلام ومن النظرات ومن التجريح !! لازم أمسك كل وحدة وأشرح لها عشان تسكت عني وماتجرحني وأفتك من آذاهم ؟؟؟ ياناس المسلم من سلم المسلمون من لساااااااااااااااااااااااااانه ويده ... والحين الآذى مايجينا إلا من لسان بعض الناس اعوذ بالله ... بتقولون طنشي لاتهتمين .... اللي يده بالنار مو زي اللي يده بالماء ... حاولت أطنش وتعبت انقهررررررررررت آذوني بكلامهم آآآآآذوني وأسئلتهم تقهر ,,, الدمعة حايرة بالعين والقهر بالقلب .... لو الإنسان يختار نصيبه كان اخترت نصيبي أفضل رجال الدنيا لكن إلى متى بيظل هذا الجهل معشعش في عقول بعض الناس ويجرحون الإنسان ويلومونه بشئ لايملكه !!!! ... حنا ماانخلقنا للزواج رغم اهميته لكن خلاص لازم يفكونا من هالسيرة ... تعبناااااااااااااااااااااااا مو أنا لحالي كثييييييييييييييرات مثلي وأردى بعد ... والا تجيك حرمه عندها درزن بنات ماشاء الله ماتزوجوا همهم من همنا ... ولما ينخطبون بناتها ويمشي نصيبهم ربي يوفقهم ويسعدهم ويبارك لهم ماشاء الله ... تبدأ تلتفت علينا وتمارس علينا ماكان يمارسه الناس عليها من أسئلة وأذية باللسان ... طيب هل نسيتي ألم بناتك عاملينا كبناتك ... والله أنا أواجه أسئلتهم ببرووووووووووووووووود وتطنيش مزيف وردود بسيييييطة مثل الله يسهل الحمدلله ,, توي كتكوته أبي أتدلع ... وأنا أصرف ,, ماابي ابين ضعفي وقهري للناس .. لكني من داخلي أحترررررررررررررررررررررررررررررق وكل مااجي من مناسبة أحترق وأبكي أبكككككككككي بحرقة ... حتى بالعمل لم أسلم من التجريح يسألوني عن عمري واستغربوا بمعرفتهم إني آنسة وشوي ويشرقون بقهوتهم يوم دروا اني آنسه يقولون وش ناقصك ليش مااعرستي ؟؟ قلت بكل مكابرة وبكل تزييف ... مابعد جاء اللي يستاهلني ... وانا أكابر جروحي لم أوفق بأي خطوبة والحمدلله على كل حال ... كل اللي ابيه أفتك من التجريح صرت أحس ماحد يحبني لو يحبوني ماجرحوني .. أنا ماعمري جرحت أحد ولاعمري آذيت أحد بلساني إطلاقااااا كافه خيري شري وأتمنى ربي يتوفاني مسلمة وثابتة .. ليش ألقى هالتجريح ومن أقرب الناس لي بعد ؟؟؟؟؟؟؟؟؟؟؟؟؟؟ نجي لموضوع ثاني ليش((((بعض الناس)))) يعتقد أن الجمال محصور بالبياض الناصع ؟ أو بالطول أو الرشاقة أو أو أو ليش مايحط الدين والأخلاق والشخصية الراقية هي الأهم يعني الجمال بس طول وبياض ناصع ؟؟ ولاحظوا ناصع مايبون أي بياض ... ومافتحت هالموضوع معناتها مو جميلات لا الحمدلله ربي منعم علينا لكن الفضائيات خربت على البعض !!! أتوقع الجمال يشمل نواحي شكلية كثيرة منها الملامح وأمور كثيرة والجمال الروحي يغطي على كل شئ .. بتقولون من حقهم يختارون اللي يبون أنا معكم من حقهم يختارون اللي يبون بس إذا هذا كلامهم وذوقهم وشروط البعض تعجيزية ويبون بعضهم حورية ... متى بنتزوج حنا ؟؟؟ وليش قبل مايتشرطون ليش مايشوفون المراية ويلقون نظرة شوي على شكلهم ؟؟ قبل مايجرحونا .؟؟؟ بعد كل هالهذرة فوق بالأخير نلقى سؤال وش مكدر عليكم يالمتأخرات ؟؟؟؟؟؟؟؟؟؟ هذا كله كوم وحاجتنا للسند بحياتنا كوم ثاني حاجتنا لأنيييييييييييس حاجتنا لأحد يتقهوى معنا يآخذ ويعطي يسألنا وش سوينا بيومنا ؟ وش راح نخطط ؟ نفكر سوى بصوت مسموع ...... نحتاج ليد تمسك يدينا ليد تلف أصابعها حول معصمنا وتشد عليه ... ليش فيه فراغات بين أصابعنا ؟؟ عشان نملأها بأصابع من نحب .. نحتاج بهالحياة الغامضة لأذن صاغية تسمع لنا لقلب حنون يحتوينا ويرحمنا .... أكيد كل آنسة تحس بإحساسي لما تروحين السوق وتشوفين بنت وزوجها وطفلتهم وهو يساعدها بحمل بنتهم ويشاركها إختيار ملابسها تدعين لها بالبركة والسعادة وتتمنين إنك بنعمة مثلها وتغبطينها ... لما تحضرين حفل زفاف وتشوفين العروس عالكوشة تتمنين ربي يرزقك مثلها ربي يبارك لها ويسعدها .. كل مكان نروح له نسمع البنات وحماسهم لتجهيزات الزواج ونتمنى يجي اليوم اللي نشاور بعض بتجهيزات زواجنا .... حتى بالعمل وهو المكان اللي ذهبت إليه هربا من هالتجريح ... وجدت فيه تجريحات ولامليون بلاستر مايضمدها .. حتى مرة رحت الخياطة بفصل فستان قالت لي هذا فستان من تجهيزات زواجك ؟ قلت لا أنا آنسه ... قالت اووووه للحين ؟؟؟؟؟ تحطمت حتى الخياطة !!!... أنام ودمعتي على خدي وأصحى ودمعتي ماجفت .... يمكن البعض قرأ موضوعي بعنوان ( قهر لاسآلت الدمعة على خدك بلاتبرير ) وأشكر كل من رد على هالموضوع ودعمني برأيه ودعواته ... وتجاربه كذلك ... لكني بكل إختصار لست مقتنعة بهذا الخاطب .... ومن وجهة نظري إن القناعة بالزواج أهم شئ عشان لاقدرررر الله صار تتش بعد الزواج مااقول ايييه عشاني مو مقتنعة صار كذا .. بصراحة تمنيت إنه حب لي ماأحب لنفسه وتمنيته ما عارض الدراسة والعمل وأنا تنازلت عن العمل وقلت خلاص اهم شئ الدراسة العليا فياليت انه قال ادرسي وياليته قدر تنازلي وتنازل مثلي !! لاسيما إني عرفت إن فترة دوامه من الثامنة صباحا وحتى السادسة مساء؟؟ وش المانع إني أدرس ؟؟ أول كنت أتعذر له وأقول يمكن يبيني أهتم بالبيت ويجي من الدوام ويلقاني مهتمة بالبيت لكن دوامه حتى السادسة مساء !!!! يمديني أدرس وأجي و أنام وأقوم وأطبخ وأشوف البيت وهو ماجاء من شغله .. فحسيت إن شرطه ينم عن تسلط وتحكم والله أعلم هذا مجرد إحسآآآآآس .. وأنا صحيح أتمنى الزواج لكن ماابي ارمي نفسي رمية سوداء وأقبل بأي أحد لمجرد الزواج !!!!! هذا هبال مو عقل .. الأهم عندي من أتزوووووووووووووج ؟؟؟؟؟ لأني طموحة بحياتي المستقبلية ... بعد كل ماسبق الكثير يقولون تو عمرك صغير ووووو (( مع إني أرى إني كبيرة )) ... لكن طالما عمري صغير وأنتم شايفين إني صغيرة أجل ليش التجريح من الناس ؟؟؟ آآآسفه على حوستي وخربطتي والسموحة على تشتت كلامي وآآآآآآسسسفه جدا على الإطآآآآآآآآآآآآآآآآآلة ... إن حظي كدقيق فوق شوك نثروه ثم قالوا لحفاة يوم ريح أجمعوه صعب الأمر عليهم قال قوم اتركوه إن من أشقاه ربي كيف أنتم تسعدوووووه ..... أختكم ... نجــــــــــــــــــ الذووووووووق ــــــــــــــــدي |
الله يوفقك ويرزقك الزوج الصالح وعليك بالاستغفار .
الجمال مو كل شي ولا له علاقة بالنصيب . الدنيا قسمة ونصيب واقدار مكتوبة . لا تهتم بالناس والي بيدقق بكلام الناس يتعب , معليش : بصراحة تعاطفت معك واتنمى لك الزوج الصالح والسعادة في حياتك ، لكن لفت انظري توقيعك يضحك شوي ، اخاف نصفك الثاني من النوع الي مايلبس الشماغ ولا يحب القهوة وش بتسوين بالحاله ، واسف اذا ضايقتك لكن احب المزح والفكاهه . والله يستر عليك . |
اقتباس:
آآآآآآآآآآآآآآآآآآآآآآآآآآآآآآآآمين يارب ويرزق كل البنات يارب ياكريم ... بالعكس مافيه مضايقة أنا ماحطيت هالموضوع وهالفضفضة الطويلة العريضة إلا لإستقبال الردود ومشكور أخوي وجزاك الله خييييير على ردك وعلى مواساتك لأختك المسلمة الله يجعله في ميزان حسناتك ... بس المعذرة أخوي بالرغم إني أشكرك على التعاطف الأخوي لكني ماعمري قصدت بفضفضتي إن أحد يتعاطف معي أو يرحمني ... لكني أقصد بالفضفضة لعلي أرتاح قليلا ولعلي أجد نصيحة قوية ... أو على الأقل أجد أحد يرد الصوووووووووت .. موب أتكلم لحالي ,,, وبالنسبة للقهوة والشماغ ولايهمه خله يجي الحين ويشرب ميراندا إن بغى ههههه ... وانا بشتري له شماغ هدية .. شكرا للرد .. |
والله لو اقول احس فيك ماراح تصدقين
بس عندي اختي عشااان كذا حااسه فيك الله يوفقك ويسعدك ويرزقك الزوج صااالح عاجل غير اجل انتي وكل بنات المسلمين اللهم اميييييييييييييييييييييييين |
اقتباس:
والله يرزقني ويرزق أختك وكل المسلمات ... والله يتقبل منا ومنك الدعاء ... مشكورة حبيبتي وماقصرتي ..... |
عزيزتي كلمات ونظرات المجتمع شرلابد منه!!!
ولكن عزاءنا في ذلك قوله تعالى "وجعلنا بعضكم لبعض فتنة أتصبرون" قوي ثقتك بخالقك اولاثم بنفسك صدقيني لن تشعري بهم ابدا عجبي ممن يمنع فتاة احلامه من العلم!!! اليس ذلك ضمان لأسرته مستقبلا !!! استخيري خالقك في اي خاطب وسددي وقاربي ... وان شاء الله يجي اليوم اللي تضبطين فيه الشماغ:d بس انتبهي لاتحرقينه ترى بعدين:29: |
اقتباس:
اشكرك على ردك الجميل وروحك المرحة لاني خفت صراحة تزعلين ، تعرفين الناس نفسيات مدري وشلون قايله . وعفوا ما اقصد بتعاطفي معك الرحمة ، لكن حاسك فيك ودي انصحك وقولك كلام يريحك لكن ماني عارف كيف اعبر لك بالي بخاطري . هههههههههها حلوة سالفة الميرندا مدري الكوكا والدعوه فيها بيع وشراء شماغ بعد ، الله يوفقك ان شاء الله اسعدتينا وضحكتيني وانا ماودي اضحك . تحياتي . |
اقتباس:
وبالنسبة للدراسة تمنيت أنه قدم تنازل مقابل تنازلي ... وإلا أنا أتنازل وهو لا !!!! هذي أسميها أنانية .. ولولا ثقتنا بخالقنا وبرحمته وبلطفه لنا كان ماقوينا نعيش لكن هي رحمة الله مصبرتنا والرضا بقضائه وقدره .. ههههه خليه يصفقني لاحرقته ضرب الحبيب مثل آكل الزبيب ... وأستاهل أنا اللي حرقت شماغه ههههه << دخلت جو .. مشكورة على الرد حبيبتي وربي يسعدك ويخليك ويوفقك ... جزاك ربي خير يالغلا ,,,, |
اقتباس:
مشكور أخوي على إحساسك ومشاركتك لي بهذا الهم وعبر باللي تقدر عليه وأي نصيحة اطرحها ولاعليك أمررر ,,, لاتستصغر أي فائدة منك يمكن فائدة صغنونة منك أو من أخواتي وأخواني لكنها عندي وعند المهمومات مثلي تكون كبيرة ونستفيد منها ... وتمنيت بصراحة إن المقربين مني يحسون فيني .. لكن كني أنفخ في قربة مشقوقة ماحولي أحد ... جزاك ربي خير على متابعتك للموضوع وردك جعله الله في موزاين حسناتك ولاحرمك الله الأجر ... |
موضوعك طويل عريض وماقريت منه إلا مقاطع
الحمد الله رب العالمين إستمري علي إلي أنتي في خلك مهمومه متضايقه بس الله يعافيك بعدي غمك عنا وش يقولون البنات إلي في الثلاثين إذا أنتي نفسيه وغاويه هم غيرك لا والله تحب توسع صدرها وليه تغم عمرها محد ميت قبل ياخذ رزقه تلبس وتفرفش وبعدين وش يحسون فيه تبين أحد يرحمك علي حالك اقتباس:
من أشقياء ربي لا صح أنتي حساسه وتشعرين هم لا (( ونبلوكم بالشر والخير فتنة وإلينا ترجعون )) اجلسي علي همك وغمك إستمري علي الطريق إلي أنتي أنتي في مصيبه عظيمه محد حس فيك ورحمك وسمع فضفضتك ويضحكون عليها أصلا أحنا إلي نرد عليك ماجربنا الحياه ولا عندنا خوات ولاشي بس أنتي الوحيده إلي في العالم سبحان الله الإنسان لما يشوف حال غيره يشكر الله علي حاله أختي نصيحه أرجعي لربك مو أقول إستغفري عشان ربي يرزقك لا أستغفري عشان ربي انعم عليك بنعم كثيره وأنعم علينا وقابلنا نعمه بالشكوى والتسخط ونشوف الشي إلي ناقصنا ونبكي ونتحسر عليه وبعدين لا تقولين أنتي ماجربتي لا أبدا لكن الحمدالله علي الحال ومن رضا فاله الرضا ومن سخط فاله السخط تصدقين هالفتره وش أكثر شي متحسره علي أني كنت أردد نفسك كلامك في أشياء ألحين أقول ليه متحسره وش عشانه والله لايعاقبني بصراحه لو تقولين وش الألم في الحياه بقول لك الإنسان تقصيره في جنب الله بصراحه هذا الألم الحقيقي إلي مفروض نشكي منه ونتحسر علي حالنا أما كذا ومواضيع عشان أقول ماتزوجت أختي تعودي علي الحمد الله علي النعمه راح تتزوجين إن شاءالله لكن عيشي حياتك وتوكلي علي ربك وصدقيني الأيام إلي تروح ماترجع ليه نضيع الأيام بالحزن ونبكي إلي حولنا ممكن هم اليوم معنا بكره مو معنا لين جلستي في مكان لاتكونين غميه لين جيتي تكونين تعيسه وجلستك ممله لا بالعكس أدخلي السعاده في قلب غيرك تجيك أنتي السعاده الله يهديك ويصلحك ويشرح صدرك ويرزقك الزوج الصالح وبنات المسلمين |
حبيبتي الغالية ملامح قمر أولا جزاك الله خير حبيبتي على نصائحك الرائعة وبارك الله فيك حبيبتي وتقبل الله منا ومنك الدعاء ....
ثانيا ... سامحك الله على (بعض الجوانب الجافة في ردك) ومسموحه على هالجفاء ماقصرتي حبيبتي ومشكورة ... ياقلبي طالما أنك ماقرأتي الموضوع كاملا تمنيت إنك مااستعجلتي ومارديتي حتى تقرأين كل جوانب الموضوع وبكون مسرورة جدا إني أستفيد من نصائحك بعد إطلاعك على كل جوانب مشكلتي حتى أستفيد بشكل شامل ربي لايحرمك الأجر يالغلا ...لأن الهدف من موضوعي هو أني أحتاج نصائح صادقة وأحتاج مشاركة أو عالأقل أحس إني فضفضت وتكلمت ... وبالعكس أنا بحياتي مع الناس فرفوشة وضحكتي تشق وجهي ولاأنقل غمي للآخرين ,,, وعادتي إني أكابر القهر والألم واللي يشوفني يقول ذي أسعد بنت بالدنيا !!!! لكني لما أجلس لحالي تنهمر دموعي وأنقهر على حالي وتوجعني جروحي .... عشان كذا توكلت على الله وجيت هنا بالمنتدى لعلي أجد أحد يرد صوتي بدلا من الصدى الممل المميت .... حبيبتي الغالية أنا أحمد الله سبحانه على نعمه التي لاتعد ولاتحصا وأشكرك على التذكير جزاك الله خير ... وكتبت موضوع سابق وشرحت فيه بعضا من همومي ...ولاأبي أزكي نفسي ياغاليتي .... ولولا أملنا بالله كان ماقوينا نعيش ... لكن رحمة ربي معنا وربي ماينسى خلقه ... لكن الظروف تكالبت علي وأنا وحييييييييييييدة وفيه غيري وحيدات كثيييير وبالموضوع ياقلبي تطرقت أن هذا همي وهم الكثيرات غيري ولم أفكر بنفسي فقط !!! وطالما عزيزتي إنك مافهمتيني فأعتذر عن إكمال الشرح .. وتشرفت جدا جدا بردك لي مهما كان جافي وقاسي فنحن أخوات ويكفيني فقط إطلاعك على مشكلتي وإعطائي دقائق من وقتك الثمين للرد على مشكلتي فلك كل الشكر غاليتي ... جعله الله في ميزان حسناتك ... وأبشري بشيل همي وغمي وعفشي وأروح بعيد عنكم بس للأسف مااعرف منتدى راقي الا هالمنتدى ... تقبلي كلامي أختك الذوق نجدي ... |
الحمدلله ..
سبحان من قسم الحظوظ فلا عتاب ولا ملامه .. لن تربي الناس :: فربي نفسك .. والتفكير بإيجابيه وإيجاد الحلول .. خيرٌ من الوقوف على كلام فلان وعلان .. في محيط مجتمعي وعائلتي .. قمت مع مجموعه من النساء الفاضلات .. لتشكيل لجنه يرأسها رجال ثقه .. لحصر اسماء كل من تأخر زواجها او ترملت او طلقت .. ومن كانت في السابعه والعشربن وما فوق .. وجمع المعلومات عنهن وبسربه تامه .. وذلك لتكاثف الجهود للعمل على تحسين حياتهم قبل فوات الامان .. فقط كوني إيجابيه .. واتركي السلبيه المدمره .. لنفسك وحياتك |
اقتباس:
وأسأل الله أن يجعل ماكتبتي في ميزان أعمالك .. ماشاء الله عليكم أنتي وعائلتك وكثر الله من أمثالكم .... وجعل ذلك في ميزان أعمالكم ... تحياتي .. |
لاالومك على ماكتبتي فكل إنسان يحمل بداخله هموما واحزنا بعضنا يفضل كتمها ولايحب أن يشكوا وبعضنا يجد راحته عندما يتكلم ويفضفض ويجد من يشاركه ويسانده ويرشده ,,,فأكتبي ولاتترددي حتما أن ذلك يريح الخاطر ويريح النفس فالانسان مهما بلغ من القوه والصبر يحتاج الى من يحمل معه هموم هذه الدنيا فاللهم لك الحمد .,,,,,,,قرأت موضوعك مع غروب شمس يوم مبارك يوم الجمعه تجاب فيه الدعوات كما اخبرنا صلى الله عليه وسلم
فأسأل الله في هذه الساعة المباركة أن يفرج همك وهمي وهم كل مسلم ومسلمه ومطلقه ومطلق وارمله ومتأخره وأن يحقق لكل منا مايرجوا من خيري الدنيا والاخره وفوق مايرجوا وأن يرحمنا فوق الارض وتحت الارض ويوم العرض وأن يعجل فرج كل من يريد او تريد او تفكر او يفكر في الزواج وأن ييسر له أمره ويحقق له مايتمنى ويرجوا من زوج وزوجه وأن يسعدهم ويبارك لهم ويزقهم قلوبا تحمل الحب والخير والاحسان والمودة ,,, وأن ييسر لك ويعجل لك بزوج يحمل كل صفات الرجوله خلق علم مثقف وسيم انيق يساعدك على كل ماتحلمين به وأن يقف بجانبك ويساندك ويكون لك كالاب الرحيم وكالام العطوف وكالصديق الوفى وكالزوج المحب المخلص لك ولجميع من في هذا المنتدى الراقي |
اقتباس:
ياقلبي عليك مشكوووووووووووووووورة أختي على هالدعوات اللي تثلج الصدر وتبرد الكبد ماقصرتي جزاك الله خير ......... ربي يتقبل منا ومنك صالح الدعاء يارب ..... مشكورة ياذوق ... دمتي بود حبيبتي ,,, |
ماشاء الله عليك مالحقت أعدل في الموضوع الا وإنت كاتبة الرد ,, حفظك اللهI am not Male,,,,,
|
السلام عليكم ورحمة الله وبركاته ،،،
الله يسعدك ويثيب لك صبرك ويمد عمرك على طاعة الله . خليك قوية انا شايف فعلا انت قوية ولا تهزك الاقدار لانك مؤمنه بانها واقع على كل البشر . بروحك المرحة تستطعين ان تتجاوزي كل الهموم اذا كان هناك هموم . تقبلي كل الامور بصدر رحب يعني طنش تعش تنتعش . اهتمي باشياء اخرى مفيدة لدينك ودنياك . ابحث عن عمل اضافي يشغلك . الايام تجري وفيها ماخفى والا متوقع فكوني مستعده . تفائلي بالخير تجدية . بعدين تعال تقل سمعنا ان ودك تضفين عفشك واغراضك ومدري وين بتروحين ، لان شوي صار بخاطرك على احدى الاخوات . ترى قصدها تنصحك بعدم التذمر والاستسلام للضروف باسلوب القوة علشان تاخذين منه القوة في مواجهة صواديف الزمان . والله يساعد ويرزق وبندعي لك بصلاتنا ولكل المسلمات بالستر والعفاف والدين والزوج الصالح ، امين . |
اقتباس:
I am not Female آسفه جدا أخي الكريم ظننت أنك فتاة من أمس أحسبك فتاة أكرر إعتذاري على هذا الخطأ أنا جدا محرجة ... وأشكرك على ردك وعلى دعواتك جزاك الله خير وتقبل الله منا ومنك الدعاء ... ههههه ردي جاء بسرعة حنا بعصر السرعة لاتستغرب ... شكرا لك والله يجعله في ميزان أعمالك ... أكرر إعتذاري السموحة .. |
اقتباس:
لاعادي اسمي اصلا ماهو واضح لان كنت مسجل بغرض اخذ معلومه فقط وطرح مشكله ولم اتوقع أن أكون مشاركا ,,,ولكن جذبتني مواضيع هذا المنتدى وردود أعضائه بارك الله فيهم وجزيهم خير الجزاء |
اقتباس:
وعليكم السلام ورحمة الله وبركاته ... أشكرك أخي على ردك وإسهابك في السطور .. جزاك الله خير على مواساتك والله لايحرمك الأجر وكل من رد علي لو بكلمة مشكورين جميييعا الله يجعله في ميزان أعمالكم ... وبالنسبة للضحك والمرح فلابد من ذلك لأني عارفة مااحد بيفكر بأحد إلا من رحم الله !!! فلازم أبسط نفسي لو بضحكة عابرة .... والله يسعدك أخوي حتى أنت تعتقد إني فعلا قوية !!!!!! أتمنى أكون كذلك لكني بالواقع لست كذلك !!! وكما ذكرت لكم سابقا من يرآني يعتقد إني سعيدة لأني أكابر ... لكن ماأن أخلو بنفسي حتى أستعيد شريط الجروح والألم ((غصب عني مو بيدي أتذكر آوجاعي )) ... لكن أسأل الله أن يقويني برحمته ومنه وكرمه .. و مابيني وبين أخواتي إلا كل محبة وود ومستحيل أشيل بخاطري بس متناقرين شوي :16: ههههه بعيد عنكم ... ولاتصدق كل مايقال إشاعات وكلام جرايد :26: بس أنا أتدلع عليها شوي أقول بروح ,, أبيها تقول لا تعالي أمزح معك :25: يعني أتغلى شوي :d ,, أنا قاعدة على قلوبكم لين أعرس هههههه ثم أجيكم بمشاكلي مع المعزب ومشاكل العيال :23:.. هي كذا الدنيا وأنا أختك .. ومسألة البحث عن عمل إضافي فكرت فيها بجدية بس صعب بسبب كثرة المسؤوليات .. الحمدلله على كل حال ... رتآآآبة مملة بحياتي أمس زي اليوم زي قبله .... رب إني لما أنزلت إلي من خير فقير ,,,, جزاك الله خير أخي الفاضل وجعله في ميزان أعمالك ولاحرمك الله الأجر .. |
اقتباس:
الله يجعلنا ممن ينفع المسلمين كما انتفعنا منهم بهذا المنتدى المعطاء ... |
مشكلتك تتلخص في :
1/ كلام الناس ...2/ الوحده .. كلام الناس ما يخلص و بصراحة عبيطه اللي يزعلها كلام الناس لأن بعضهم يقصد الاذيه من باب الغيره يعني اذا تزوجتي خلاص ما يتكلمون فيك ..! لالالا بيزيد الكلام ههه الوحده / مو كل متزوجة حاسه بالسعادة وياما متزوجات يعيشن قمة الوحده والفراغ العاطفي والألم النفسي وشوفي الواقع ولا كل متزوجة تشوفيها مع زوجها مبسوطة او حياتها اوكيه 100% لالا .. يمكن انتي افضل حال من اللي شفتيها بس مشكلتنا مالنا الا الظاهر ..! الزواج مو حل سحري للمشاكل تخيلي نفسك تزوجتي ( خيال واقعي مو تشطحين بالخيال الغير منطقي زي سندرلا و الأمير ) مع شخص عادي زي البشر و يوميات عادية روتينيه ترى بتحسين بانك بالغتي في تقدير الزواج .. انا ما اقولك لا تحلمين ولا تتمنين لأن هذى طبيعة البشر .. لكن لا تبالغي وكأنك تعيشي باسوء حال و اصعب ظروف ،، مع انك متعلمة موظفه بصحة جيدة عندك ام واب وامن .. كلها نعم عظيمة جدا ،، فان انرحمتي من نعمة وحده ( وان شاء الله تجي بس لا تستعجلي ) فنعم الله عليك لا تحصى التشكي والتسخط لا بيقدم ولا يؤخر إلا يزيد نفسيتك سوء و يضعف الإيمان بقلبك .. استغلي ايام عمرك هذى اللي تضيع بالإنتظار بشيء مفيد وتعلمي و طوري نفسك ،،، ترى الحياة لها اهداف اكثر من مجرد زواج ،، التفتي لها واهتمي فيها ،،، يعني ما تزوجتي خلاص تنتهي الحياة وتجلسي كذا ..! اذا حسيتي بالنقص روحي شوفي مراكز الرعاية لذوي الإحتياجات الخاصة ترى جربت هالخطوة ،، بتعرفي وقتها نعمة الله عليك و روحي المشفى النفسي وشوفي بنات بالعشرين الحمدلله على حالنا ... وحده عمرها 24 سنة اختها الللي اصغر منها تزوجت وهي اغلب ايامها بالمشفى النفسي و اذا طلعت تعالى شوفي الحريم الفارغات ايش يقولوا لها .. وردت عليهم جواااب راااائع جدا جدا قالت لهم ( أنا راضية باللي الله كاتب لي ) ..! حسيت بعدها بسخف الحريم وقله عقولهم ،، و احتقرت حتى نفسي ..! اكرر احمدي الله و اسأليه يحقق لك امنيتك بأدب بدون تشكي و تسخط .. |
اقتباس:
مشكوووووووووووووووورة حبيبتي شوجي على ردك الرائع ... وفعلا الحمدلله على نعمه التي لاتعد ولاتحصى .. لكن أحد أبواي متوفي رحمه الله لذلك هذا جزء من ألمي المتكرر .... فأنا كما أوضحت مسبقا هي ظروف تكالبت علي ... وبصراحة ياقلبي وبكل شفافية أنا لم أشطح بأحلامي ,,,,, فقط أتمنى روحا تشاركني حياتي بحلوها ومرها أعيش معها بكل حب وهدوء وأعلم تماما أن الحياة الزوجية تحمل مشاكل فالمشاكل ملح الحياة وليست هناك حياة بلا مشاكل و الأزواج ليسوا جميعهم سعداء فالمحاكم تشتكي ... وأنا واقعية جدا وبسيطة بأحلامي وأمنياتي ولم أعتقد إطلاقاااا أن الزواج حلا لمشاكلي بل أعتقد أن زوجي المستقبلي سوف يمسك بيدي وأمسك بيده لنعيش بسلام ومحبة ونتعاون على صعوبات الحياة ... وتوقيعي دليل واقعيتي وبساطة أحلامي ... وأسأل الله أن يحقق أمنياتك ويحقق أمنياتي وجميع بنات وشباب المسلمين ... أشكرك من أعماقي على ردك اللي كتبتيه وباين ياقلبي متعوب على ردك وكاتبته وأنتي مصحصحه أشكرك على وقتك الثمين اللي قضيتيه في كتابة هذا الرد الجميل ... ماقصرتي يالغلا ... |
يابعدي انتي ’ مدري شقول الهم طيلني و طيلك
تدرين انك حتى على الهم تؤجرين فيما معنى الحديث عن الرسول صل ???اللـَّــ??? عليه وسلم بعدين ياعيوني توك صغيرة على الهم & خليك مثلي إذا أحد قالك ليه ماتزوجتي قولي والله ابن الحلال مضيع العنوان ممكن تدلونه ???اللـَّــ??? ييسر أمرك ويفرج همك ويسعد قلبك صح وين موضوع البارح حجزت مقعد وطار ً |
اقتباس:
أختي مو مسألت أنتي تضايقيني لكن لو أجي أقدر شعورك بصراحه كلامك يحزن جدا لو وحده أصعب من ظروفك وتقراء كلامك راح تتحسر ينذبح قلبها من كلامك يااختي ممكن الإنسان مااقول مايتألم لكن لكل شي حدود الوحده إلي أنتي تعيشينها غيرك كثير يعيشونها طيب أوكي بعلق علي كلامك عشان تعرفين قد إيش قوي وراح تحزنين كم إنسانه بكلامك اقتباس:
أختي بنت في عمر 24 عشرين وشلون عيالها طولها هاذي مو مبالغه ؟؟!! طيب مثلا بنت الثلاثين بتشوف هالكلام وش بتقول علي حالها وبصراحه مدري وش هالمجتمع الوقح إلي يقول عندكم هالتعليق بصراحه ماجيبت سمعت وحده إنقال لها كذا أما الدعو بالعكس الله يجزاهم خير الكلام الاخير تدرين وش المصيبه والناس إلي أرحمهم إلي يحطون نفسهم محور العالم وهم كل الناس مهتمين منهم ويدورون أخبارهم لا أنا ولا أنتي ولا غيرنا أكبر هم الناس وحديث المجالس عشان يقولون فلانه ماتزوجت الناس إلي شايله همهم علي فكره ماطقو لك خبر ولا فكرو فيك اقتباس:
بصراحه تخيلت الوضع أختي مهما كان مو لهالدرجه ومثل ماقلت لك وإضافه لكذا أنا عندي قريبه جدا في نفس عمرك ماتزوجت ومع كذا بصراحه ماشفت كل إلي تقولين ينقال لها بالعكس إهي الجميله الدلوعه مع أنها ماتقدم لها أحد وظروفها أصعب بصراحه علي قربها مني ماسعتها تقول هالكلام وبالعكس نفسيها أحسن وعايشه والكل يحب جلستها الدليل المشكله فيك أختي شوفي أختي أنا إنسانه لين شفت أحد يتسخط وهو في حاله أعتبرها ممتازه تدرين أرحمه ليه عشانه ماحس بنعمه والإنسان إلي سبحان الله ماعنده نعمت الإستمتاع في الحياه والتعايش مع كل الظروف هذا إنسان ضعيف أختي صدقيني لمصلحتك أحمدي الله إستمتعي بحياتك بيجي يوم راح تندمين وشلون ضيعتي هالعمر في التحسر أنتي في أجمل مراحل عمرك طيب لو أقول مثلا تزوجتي وتطلقتي وش راح يكون حالك صدقيني وإن كنت ماابي أقول هالكلام بسبب فيه غيرك راح يقراه لكن حبيبتي لاتدمرين نفسك وتخربين حياتك بهالوساوس وتتوقعين الدنيا راح توقف عليك والناس كلهم مهتمين منك ويتهزون فيك الناس إلي مثلك يتعبون في حياتكم غيري نفسك عشان تعيشين في سعاده الدنيا هاذي هموم وكلها تعب تتوقعين الزواج هو الجنه لاعزيزتي صدقيني الزواج ممكن أتعب بكثير من الحال إلي أنتي فيها صدقيني لو تستمرين علي هالحال راح تتعبين أقرى مقال خالد المنيف إلي في جريده الجزيره اليوم مقال جميل لما قريته تذكرتك أختي أنا في فتره من الفترات ذبحت نفسي من الهم وش كسبت ولاشي تسخطت علي قضاء وقدره وش إستفدت ولا شي بالعكس تدرين إني ندمانه إني ضيعت أيام من عمري في هم وغم علي شي مو في يدي وبيد الله الإنسان مايدري وين خيره ربي ممكن الخير أنتي تتأخرين في الزواج طيب توقفين عمرك علي هالشي وتذبحين نفسك بالهم لا بالعكس عيشي حياتك أمك وأبوك عايشين أدخلي السعاده في قلوبهم وفي قلبك لأنفسنا علينا حق حرام نذبح اقتباس:
أختي سؤال هل أنتي أحكم من الله ؟ هل أنتي أعلم الله تعالى ؟ تدرين ربي أرحم بنا من أنفسنا لو يدري الإنسان عن الخير لأختار إلي إختاره الله له اقتباس:
إحترقي من الهم والغم ذبحتي عمرك من البكي ؟ زاد شي الناس إلي بيكتي بسببهم أعطوك شي وإلا رضو عنك لا حبيبتي عايشين حياتهم ولافكرو فيك وانتي بس تجمعين التصرفات والكلام وتذبحين نفسك تدرين كذا أنتي تغضبين ربك اقتباس:
أنتي أصلا ليه معطيه الناس مجال للكلام والتجريح سدي أذنك وعيشي حياتك وبعدين فيه مثل المقصود منه إذا أنت خليت مجال للناس يسبوك ويعتدون عليك فلاتلومهم علي كلامك حطي لك شخصيه مو كل إنسان تسمحين له يتكلم عليك أو ينطل حطي اقتباس:
تدرين ألحين كثير متزوجات يشكون من أزواجهم إلي تقول البيت فندق يروح ويجي وإلي تقول مااحس فيه وأصبح غريب ووحده من صديقاتي تقول حتي بعد ولادتي ماصار ينام معي يعني عزيزتي لاتنتظرين هالشي من زوج المستقبل أنتي إلي دوري من يسولف معك قريباتك خواتك أمك وأبوك هم ريحه الجنه أجلسي معهم تقهوي وسعي صدرهم بصراحه ضحكت علي كلمتك مدري وش تحسين به :d اقتباس:
مره رحت لسوق وقال راعي المحل ياخاله لي خلاص لازم أنتحر واتحطم ياخاله وأنا ماعندي عيال وش هالمصيبه :29: اقتباس:
الله يعينك علي نفسك أختي أتمنى تملين قلبك بالرضا والحياه هاذي فيها مصايب أكبر واعظم إذا هالشي حطاك في هالحاله لو يصير لك شي اعظم وش راح تكونين عودي نفسك علي الرضا بقضاءالله وقدره أحد الصالحين يقول لو يضعون في فمي جمره أحب علي أني أقول ياليت هذا كان واعترض علي شي كتبه الله وكذالك أخر نسيت إسمه لما فقد بصره وكان مستجاب الدعوه ويأتونه الناس يدعي لهم قال له رجل أنت شيخ كبير وتدعي للناس أدع الله لك أنه يرد لك بصرك قال أني أفقد بصري أحب لي من أني أدعو الله يرفع عني قضائه أختي مو معنى كلامي ماتدعين لا أدعي لكن لاتتسخطين وتحطين نفسك عندك مصيبه الدنيا إلي ماحلت علي أحد أقرى هذا الكلام وتفكري فيه اقتباس:
|
اقتباس:
هههههههههههه أما مضيع العنوان حلووووه يالغالية ضحكتيني .. لا أنا إذا جيت أستهبل أقول تعكرف حصان فارس أحلامي ومسط ومااحد سمى عليه ههههه والله انك صادقة ربي بس يصبرنا على هموم هالحياة ويعظم لنا الأجر والمثوبة ... بسألك معليش وإذا ماودك تجاوبين عادي ياقلبي ودي أعرف عمرك ؟ وبالنسبة لموضوع أمس شفتك أبطيتي زعلت عليك وحذفته :d أمزح راعين الحلال حذفوه يقولون ممنوع :26: أسأل الله أن يفرج همومنا ويجعل ماسطرتي في ميزان أعمالك ... ويسعدك ويفرح قلبك يالغالية .. |
ماشاء الله تبارك الله لا اكيد امور النفسية ازبطت معك وصارت هادئة .
يبدوا ان عندك بعض ضيقة الصدر على احد الوالدين . مع بعض المشاكل العادية عاد انت ماصدقتي تلقين شماعه تعليق عليها كل مشاكلك ياختي الشماعة امتلت وبتتكسر من كثر متعلقين عليها خاصة كانها من النوع الردي حق ابو ريالين ( اخبر اشتريت شماعة وطاحت مع النزيل عند الباب قبل ادخلها للبيت وانكسرت نصفين ورميتها على طول - الرخيص بخيس ) اقول يالله نعيش حياتنا عادي ونستانس وننبسط بحياتنا مع الي يحبوننا من الاهل والاصدقاء . وبالله التوفيق لجميع الاعضاء والزوار والقائمين على هذا الصرح النافع نفع الله به . |
اقتباس:
ثانيا يالغلا وراك تنافخين شوي شوي :d والله أحس إنك شوي وتدخلين علي من الشاشة وتكفخيني شوي شوي علي تراي حساسة ههههههه أمزح معك مجرد دعابة .. لاتزعليييين ... وبعدين ياقلبي أنتي فنجالك تقهوي واقدعي وتعالي أسولف عليك شوي ياحبي لك بس تقولين مبالغة يوم أقول أم 24 ولدها طولها والله هذا كلامهم موب كلامي !!!!!! وأنا أفضفض باللي أسمعه وافضفض باللي ينقال لي !! لا وأزيدك من الشعر بيت يقولون اللي كبرك على عهدنا جدات !! وهاتي من الخرط والكلام الفاضي ... وأنا عارفة أن بعضهم تقول هالكلام بدافع الغيرة أو الأذية لكن ليش كل هالأذية وأنا مسالمة ؟؟ واذا أنتي ياقلبي مافيه بمحيطكم كذا وقريبتك كبري وماتسمع هالحكي فهذا من نعم الله عليكم واحمدوا الله ولاتعتقدين إني أبالغ أو أتصنع إني بمشكلة !!!! لا الحمدلله لكن طفح الكيل من بعض هالناس الجاهلة نجي لنقطة ثانية مسألة أنا أتوهم أنهم يهتمون فيني لا ياقلبي أنا موب مريضة بالتوهم الحمدلله على العافية ولافيني جنون العظمة ولاأحس إني تحت المجهر ولاأحب أكون تحت الأضواء لكن أكثر من حرمة تدق من خارج مدينتي وتتعب نفسها وتفتح خط وتدق بالثابت أرخص لها الله يخلي خدمة جود ههههه لأنها عارفة أنها بتطول حكي عالجوال ومغثتها طويلة ,, المهم تتعب نفسها عشان بس تقول مثل هالحكي وعشان تغثك وتحر قلبك وتحر قلب أهلك وتقهرهم !!! تعتقدين هذا مجرد توهم !!! بكل مناسبة ينحرق قلبك ... أنا ماشلت هم الناس والدليل إني أرد عليهم ببرود وأكااااااااااااااااابر أنا شايلة هم نفسي تعبت من الجروووووووووووووووح ... بالعربي ياقلبي الناس كوم ومسألة القهر من الأهل كوم ثاني ... تجيك أمك وهي أممممممك تعرفين وش معنى أمك اللي حملت بك وولدتك هي الحضن الدافي بهالحياة وتصير زيهم عليك !!!!!! وتقول لك كل البنات أعرسوا وانتي لا ووووووو كلام طويل عريض لامجال لذكره الآن ,, واذا جاني خاطب قالوا مايستاهلك أنتي مميزة لازم زوجك مميز !!!!! والله ماشفت هالتميز اللي تقولون :26: بكل مناسبة بلا استثناء اسمع كلام يغث وكأني تجاوزت الخمسين !!!! حرام عليهم والله .. كل كرت زواج يجينا أنجرح من كلامهم ,,, تجي أختك شقيقتك وأخوانك يجرحونك بمثل هالحكي !!! حبيبتي ياقلبي ياعمري ياعيوني ملامح لاتقسين علي أكثر أنتي ماتعرفين ظروفي !!! ماحبيت اقول إن أهلي سبب قهري لأن من إحترام الأهل إني أدمح زلتهم لكن أنجبرت أشرح لك كذا عشان ماتقسين علي أكثر .... لو أبي قسوة الحياة مليئة بالقسوة أنا جيت هنا أبي أفضفض وأحد يرد الصوت لاجيت هنا أتسخط ولاأتذمر ولا أبي عطف ولارحمة !!! أنتي ياقلبي حاطة في بالك أن الذوق نجدي تتوهم وانها زي طبيعة قريباتك ونفس الظروف لا ياقلبي اعتقادك مو بمحله ... كلن له ظروفه ونفسيته وحساسيته ... وكان المفترض إني مااسهب بالشرح لأنك مافهمتيني ياقلبي وقسيتي علي ... لكن مشكورة حبيبتي أنا دااااااااااارية إن قسوتك من حبك لأخواتك وحبك لمصلحة أخواتك اللي أنا منهم .. مشكورة ياقلبي وأختلاف الرأي لايفسد للود قضية ... وأنا مضطرة إني ماأشرح لك أكثر من كذا لأنك مافهمتيني موب قصور فيك لكن السطور أحيانا لاتكفي للشرح وحاولت أشرح لك ياقلبي بس أنتي مصره إلا إني أتوهم ... فهذا رآيك أحترمه وأقدره ولك دعواتي والجميع ... وأشكرك على وقتك الثمين في كتابة سطورك القيمة لاحرمك الله أجر مساهمتك في هذا الصرح الشامخ ... دمتي بود (( محبتك الذوق نجدي :22: )) |
اقتباس:
بصراحة تحليلك صحيح لحد ما هي ضيقة الصدر موجودة لكن الصبر والتصبر وقبل كل شئ القوة بالله أكبر من كل شئ إلا الوالدين فلابد أن أبلع لساني ولاأبين لهما ضيقتي منهما أيا كانت والله لو مهما كان !!! أما مسألة الأمور هدأت فهذا بفضل الله ثم ردودكم الجميلة لاحرمكم الله الأجر جميعا ,,, ما كل من يضحك من الهم سالي ولا كل من يبكي من الهم محزون والله ياأخي لن أعلق أكثر من ذلك .... فيبدو أني أخطأت بشرح مشكلتي أو أني فعلا لم أجد من يفهم جوانب مشكلتي ... فهل تعتقد الله يسعدك إني أبحث عن شماعة لتعليق مشاكلي !! تفكيري أكبر من ذلك بكثير ... لو أبحث عن شماعة فالشماعات كثييييييييييرة !!!!!لكني دائما أحاول تصغير جوانب مشاكلي ماعدا مشكلتين هذه المشكلة ومشكلة أخرى .. لكن يكفيني شرفا إني قرأت ردودكم وتشرفت بها وسررت بدعواتكم الصادقة ... أشكرك أخي الفاضل على متابعتك للموضوع وردودك المتوالية والشكر للجميع ممن يتابعون موضوعي أولا بأول لاحرمكم الله الأجر جميعا وتقبل الله منا ومنكم الدعاء والعمل ... |
والله أعجبني موضوعك
ورحابة صدرك نعم صادقه المجتمع ما يرحم اذا ماتزوجت البنت ليش ماتزوجت ههههه الله يهديهم والله عن نفسي تجاوزت ال33 وماتزوجت اسمع سهام من الكلمات الجارحه لكن والله ماتهمني طالما هناك رب أرحم من العباد مشكووووووووره على موضوعك والله يرزقنا جميعا |
اقتباس:
ربي كريم وأملنا بخالقنا كبير .. ربي يسعدك ويبارك بعمرك ويطول عمرك على الطاعة ياقلبي ... |
:d:d الله يسعدك ي رب أسلوبك جنان ههههه ذكرتيني قبل شهر بالضبط طالعه مع أهلي مكان عام ومبسوطة ومعنوياتي عال العال وقابلت صديقتي وأهلها ( أمها وجدتها وخالتها وجيرانهم ووو يمكن أنتي معهم بعد خخ ) المهم وأنا أسلم عليهم مع أهلي سألتني ام صديقتي : هاه ألوان توظفتي هالترم قلت لأ:( قالت بصوت عالي / الله يسخرلك الزوج الصالح اللي يسعدك ووو أنا عيوني طارن وصرت اناظر امي وأخواتي وزوجات أخواني وجتني الصيحة هع هي ما غلطت بس وش حقه تدعيلي قدام الناس تقل أكبر همومي العرس أو كأني مسكينة بس الحمدلله تعوذت من أبليس وربعت و تقهويت وزهلت الهم وأهله المجتمع مليان متأخرات أكبر منك .. وأحس ي عمري كأنك مبالغة شوي بهالنظرة البيوت مليانه .. والناس نقول إن شاء الله نظرتهم إرتقت شوي أنت لا تفكرين بالزواج كثير ولا تحسسين نفسك أنك ناقصة أبدًا أبدًا .. و تأملي النعم اللي عندك .. لأننا دائمًا ندور على المفقود ونحجب عيوننا عن الموجود .. أغفلي كثير عن المتزوجات وحياتهم الخاصة .. مو من باب الحسد .. بس عشان ما تفكرين بالفراغ اللي عندك وتضيقين صدرك . ولاتنسين ي عسل كل أقدارنا بيد الله وحده ولن تموت نفس حتى تستوفي رزقهااااا .. الله الله بالدعاء و الإستغفار .. ونحتفل فيك قريبًا بإذن الله :22: |
اقتباس:
بس قهر مايمديني أفلها معك جيتي وأنا حجاري قاضييية وبطاريتي طوط طوط فاااارغة << جاها النوم هههه شفتي قصتك اللي قلتيها ؟؟؟ أنا أتعرض لها يوميا بلا مبالغة !!! ولو يمر يوم ماسمعت هالحكي أحسه عيد من راحتي ... شفتي كيف سألت عن الشغل وبعدين نطت للعرس وش جاب لجاب ألحين هههههه يعني تخيلي كل يوم غاثينك بنفس الإسطوانة ؟؟؟؟ أكيد ودك تكفخينهم :16: |
الله يرزقها اللي يضفها هههه احلفي أنها تقول كذا . تخيلت نفسي وحدة تقولها لي .. قمة الإحراج .. صعبة أرد عليها رد ناري بيقولون طويل لسانها .. وإن مارديت أحس بكتمة :d عموما ... من واقع مررت به توصلت إلى أنه متى ما أدمنتي التفكير حول قضية ما سترين الحياة بكافة ألوانها انعكاسات لتلك القضية. ستفسرين النظرة الحانية على أنها شفقة ، والسؤال العابر على أنه تشفي ، ستنقلب لديك الأمور فانشغالهم هجران وقربهم تدخل وفضول سترهقك الحساسية المفرطة لدرجة أنك ستصلين لمرحلة أنك أنت المعنية بكل شاردة و واردة. الكلام في هذه الجزئية يطول. ما الحل ؟! لابد أن تدركي أن واقعك هو نتاج أفكارك ، هو نتاج نظرتك للحياة .. متى ما قلتي أنك حزينة، حظك سيء، لا أحد يحبك .. سيكون واقعك كالوحش الكاسر الذي يلتهم كل شيء جميل فيك! قسمي وقتك وجهدك جيدا .. نمي هواياتك ، سجلي في الدورات، احضري محاضرات، اخرجي مع زميلاتك، جددي كل ما يحيط بك باختصار أشغلي نفسك قدر المستطاع بكل ماهو مفيد. |
اقتباس:
مشكورة على الدرر المطروحة ماقصرتي يالغالية .. ربي يجعل كل كلمة في ميزان حسناتك .... |
الأبيات اللي في موضوعك جميلة
هل فيه منها نسخة صوتية .. بحثت ما حصلت لو تعرفين خبريني. <-- تحب الشلات والهجيني (سستم شيبان :d ) |
اقتباس:
لاوالله ماادري هل فيه منها نسخة صوتية أو لا ... لطشتها من أحد المنتديات أجل حلو نحب الشعر كلنا صقيقتي أنتي :d |
اقتباس:
حزة النوم عندي أقول سنة ميلادي ولااحسب عمري الدعوة شكلها نفسيا ???اللـَّــ??? لائبلاكم أنا ياطويلة العمر والسيلامة من مواليد 1405 يلافيك تحسبي ’ ???اللـَّــ??? يستر شكلك بتهورين من توقيعك أركدي يابنيه |
اقتباس:
حسبته وخلصت :28: لا ماراح أتهور بس محتاجة دعوووووووووووووووووووووووواتكم ,, |
[QUOTE=الذوق نجدي;2720961][SIZE="4"][COLOR="Purple"]السلام عليكم ورحمة الله ...
وعليكم السلام ورحمة الله وبركاته أحس بقهر بغضب .... سؤال يطرح نفسه بس قبل مااطرح سؤالي لو سمحتوا الله يخليكم لاأحد يقول هذا حسد أو مقارنة بالآخرين أفهموني قبل تكتبون رد الله يحرم يديكم عن النار ... سؤالي هو ليش (البعض) مايهتم بالمتأخرات عن الزواج ؟؟؟؟؟؟؟؟؟؟ معليش عصبي وانقهري ،، بس من تجربة محد له دخل ؟؟ طيب لحظة يعني تبينهم يهتمون في يدهم حل ؟؟؟ آه بس ،، وأعجبتني كلمة متأخرات .. كويس تؤمنين بها أكثر من عااااااااااانس ولا أعمم لكني قلت البعض ... يعني لاشافوا وحدة ماتزوجت ومهمومة ومتضايقة يستهزأون بهمها وربما يضحكون بسخرية ... ويقولون عادي وش فيها وش مكدر عليك أصلا ؟؟ احمدي ربك ماتزوجتي وجاك رجل يغثك !! لا والسؤال اللي يقهر وش مكدر عليك ؟؟؟؟؟؟؟؟؟ وش اللي ماكدر علينا الوحدة بمعانيها وألمها لحااااااااااااااااااالها أكبر ضيقة ولاأحد يرد الصوت آيوه انت منتازة ... رجل يغثك ؟؟ ولا عندك عيال ؟؟ الله أكبر عاد هم وش اللي يغثهم ؟؟ معليش أبطلع عن مسار موضوعك .. لأني بجد تنفقع مرارتي ... اذا شافوني بالشغل متضايقة من شي ... طبعا يخص العمل .. أجل لو عندك رجل ولا عيال وش بتسوين ؟؟ وهم والله وهذيني أحلف لك لا تعرف لا رجل ولا عيال ... همها سعة صدرها وطلعاتها وروحاتها .. أقسم بالله وحدة تقول اني أدخل البيت أمشي بشويش عشان ماينتبهون لها عيالها عارفة شرقت وغربت عن موضوعك ... بس يقهروني اذا قاموا يغبطوني اني آنسة ... بس تقعد تناظر تناظر كنها معجبة تبي توقيع خخخخ وبعدين تسولف مع أمي وأهلي وتقول الله يرزقها ويستر عليها ويرزقها من يضفها ... << تقهرني الكلمة الأخيرة يرزقها من يضفها .. كلش أتحمله ولا كذا في وجهي الحريم الكبار ... الله يرزقتس ... الله يبرتس بالصالح من خلقه ... خييييييييييييييييييير تصرفون علي ؟؟؟ افففففففففف من هالمجتمع ؟؟؟ والأسئلة المعتادة المطروحة ياترى هي ماتنخطب ؟؟ مااحد تقدم لها ؟؟؟ يعني لازم إذا إنخطبت أحط إعلان إني إنخطبت وعدد مرات خطوباتي وماذا حصل .. ومن مين كان الإنسحاب وش الأسباب ,,, عشان أسلم من الكلام ومن النظرات ومن التجريح !! بتقولون طنشي لاتهتمين .... اللي يده بالنار مو زي اللي يده بالماء ... حاولت أطنش وتعبت انقهررررررررررت آذوني بكلامهم آآآآآذوني وأسئلتهم تقهر ,,, الدمعة حايرة بالعين والقهر بالقلب .... حبيبتي أنا أردى منك وأقول لك بالفم المليان طنشي ؟؟؟ أصلا اذا بتسمعين كلام الناس عمرك ماراح ترتاحين ... وعليك بالدعااااااااااااااااااء والصدقة ... وفعل الأسباب بس لكن تتابعين الناس ماراح يجيك إلا الهم والغم وبيطق راسك الشيب تعبناااااااااااااااااااااااا مو أنا لحالي كثييييييييييييييرات مثلي وأردى بعد ... أنا أردى منك ... وماعندي مشكلة الحمدالله أو أتظاهر ان ماعندي مشكلة عشان ما تكبر بداخلي وتأثر على كل شي حلو بحياتي والله أنا أواجه أسئلتهم ببرووووووووووووووووود وتطنيش مزيف وردود بسيييييطة مثل الله يسهل الحمدلله ,, توي كتكوته أبي أتدلع ... وأنا أصرف ,, ماابي ابين ضعفي وقهري للناس .. قلت بكل مكابرة وبكل تزييف ... مابعد جاء اللي يستاهلني ... وانا أكابر جروحي لم أوفق بأي خطوبة والحمدلله على كل حال ... أنا أقول مابعد جاء الكفء ... مابعد جاء النصيب .. وعساني أفتك من قولة شايفة نفسها .. لاااااا وعلى ايش ؟؟؟؟ متى بنتزوج حنا ؟؟؟ وليش قبل مايتشرطون ليش مايشوفون المراية ويلقون نظرة شوي على شكلهم ؟؟ قبل مايجرحونا .؟؟؟ عزيزتي ... كل رجال وحر بشروطه .. ما نقدر نفرض عليهم .. بس أكثر شي يضايقني ، يقولون احنا مالنا شروط ؟؟؟ ويجون يطلون ويروحون ؟؟ خلاص كل وحدة تقدر تقيم نفسها .. فقولوا شروطكم موجودة حياكم الله ولا كملوا مشوار البحث عن حورية الجنة ؟؟!!!! بعد كل هالهذرة فوق بالأخير نلقى سؤال وش مكدر عليكم يالمتأخرات ؟؟؟؟؟؟؟؟؟؟ هذا كله كوم وحاجتنا للسند بحياتنا كوم ثاني حاجتنا لأنيييييييييييس حاجتنا لأحد يتقهوى معنا يآخذ ويعطي يسألنا وش سوينا بيومنا ؟ وش راح نخطط ؟ نفكر سوى بصوت مسموع ...... ماقد فكرت من هالزاوية .. أنا فقط عشان أفتك من نظرات الرحمة وتسميعي دعواتهم ... ، يمكن لأني أعيش هاللحظات في بيتنا أتقهوى مع أهلي وأنا اللي أخطط كل شي .. يمكن !! نحتاج ليد تمسك يدينا ليد تلف أصابعها حول معصمنا وتشد عليه ... ليش فيه فراغات بين أصابعنا ؟؟ عشان نملأها بأصابع من نحب .. برضو ماقد فكرت :):d حتى مرة رحت الخياطة بفصل فستان قالت لي هذا فستان من تجهيزات زواجك ؟ قلت لا أنا آنسه ... قالت اووووه للحين ؟؟؟؟؟ تحطمت حتى الخياطة !!!... الكلام اللي قبل جد ماقد فكرت فيه .. إلا موقف الخياطة مريت فيه ... بس قامت تدعي لي وان شاء الله تخيطين الجهاز عندي ....الخ .. الله يجزاها خير لكني بكل إختصار لست مقتنعة بهذا الخاطب .... ومن وجهة نظري إن القناعة بالزواج أهم شئ عشان لاقدرررر الله صار تتش بعد الزواج مااقول ايييه عشاني مو مقتنعة صار كذا .. بصراحة تمنيت إنه حب لي ماأحب لنفسه وتمنيته ما عارض الدراسة والعمل وأنا تنازلت عن العمل وقلت خلاص اهم شئ الدراسة العليا فياليت انه قال ادرسي وياليته قدر تنازلي وتنازل مثلي !! لاسيما إني عرفت إن فترة دوامه من الثامنة صباحا وحتى السادسة مساء؟؟ وش المانع إني أدرس ؟؟ أول كنت أتعذر له وأقول يمكن يبيني أهتم بالبيت ويجي من الدوام ويلقاني مهتمة بالبيت لكن دوامه حتى السادسة مساء !!!! يمديني أدرس وأجي و أنام وأقوم وأطبخ وأشوف البيت وهو ماجاء من شغله .. حبيبتي .... بعد الزواج تقدرين تغيرينه .. وأعتقد هو من نفسه اذا شافك طفشانة بيقول دوري شي يضفك ... والله جد اذا كويس لا تفرطين فيه .. تقولين العمل أقدر أقعد عنه ؟؟ اذا كذا شكل وظيفتك مو رسمية ... خلاص اتركيها وتزوجي .. ترى نادر مايجي رجال مكمل دراسته ووظيفة جيدة بعد كل ماسبق الكثير يقولون تو عمرك صغير ووووو (( مع إني أرى إني كبيرة )) ... توك صغغغغغغغغغغغغغغغيرة ولا يهمك أحد .... وخلي شعارك ... طنش تعش تنتعش أأدعو الله العلي القدير .. أن يسعدك في الدنيا والآخرة ويرزقك من حيث لا تحتسبين .... وكل من أمن بعد قراءة الدعاء |
| الساعة الآن 07:01 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©