|
وسامتي تفوق جمالها
السلام عليكم ورحمة الله ..
اخوتي واخواتي اتيت استشيركم في كلام لم استطع ان اصرح به لاحد سوى احد اصحابي وهو انني اخشى انني اجمل من خطيبتي , لقد رايتها مرة ونظرت اليها كثيرا لما سولفت معها بالنظرة الشرعية , طبعا السواليف لازم مو مثل حركات بعض الشباب من اهل العصر الحجري اللي بس يدخلون ويسكتون يناظرون ويطلعون لا انا سولفت وكلامي بعضه مضحك وهي محافظة على نزول رأسها من خجلها ياحليلها , عمرها 21 ولكن في احد قطاتي البايخة ههه فلتت منها بسمة لأن كلمتي اضحكتها ولكنها امسكت بالضحكة الا ان طرف الضحكة بدى ببسمة واسعة شوي يعني واضح ضحكة مكتومة, ولكنها نزلت راسها على طول البخيلة ههه طبعا راسها نازل ولكن بالبسمة نزل اكثر المهم اخواني اخواتي, مااحس اني شفتها كويس لان راسها نازل ولو انها ترفعه شوي لما ترد على سؤال لي الا ان عيونها تكون نازلة بعد , ماشاءالله شعرها طويل ولكن ملامحا وضحت لي بنسبة 70% بس مع اني طولت وانا اطالع فيعا لكن ماتمكنت هي شافتني بعد ولكن انا متخوف من ان اكون اوسم منها , وانا طموحي في الجمال عالي يعني ابي وحدة شق مثل مايقولون, طبعا الجمال مايتبين كله في نظرة لان الجمال ممكن يتبين مع الحياة الطبيعية والحركات والتصرف والاطباع وغيرها , ولكني مع ذلك متخوف اما الفتاة فهي متدينة من ناحية عدم اجتراحها المحرمات وليس كثرة عبادة وكذا , وعموما قيل اتق المحارم تكن اعبد الناس مع اني ماشفتها كويس ولكن حيائها لعن خامسي , يازين الانوثة بس والحياء, خصوصا بسمتها اللي فلتت سوت فيني سوايا , اخوها صاحبي منذ ست سنوات صحبة قريبة جدا :-) يقول عنها اخلاق جدا ومحترمة ومتواضعة وتستحي, واهلي بعد مدحوا اخلاقها خلوقة جدا وحالمة لبى قلبها, طبعا انا ارتحت لها كثير جدا, واستخرت وارتحت جدا بعد, وهي كذلك استخارت وارتاحت وتبيني الفحص الطبي قالوا ان فيها اشتباه مرض كبد عندها, فجلست هي اسبوعين بكي وحزن ومن الاباب خايفة اني ارفضها ولكن انا يوم اخبرني اخوها بحالتها , والله رفرف قلبي لها ياحليلها الامورة ماتستاهل كل هالحزن, ويوم بحثت عن المرض طلع بسيط, وبعد فترة طلع التقرير ان مافيها شي واستانست هي وانا بعد كثير اسرتها محترمة جدا وفي وظائف مرموقة , اخوانها ابوها محترمين جدا والعائلة محافظة رغم الحالة المادية الحلوة,, حالتهم المادية ميسورة وعندهم خير .. ولكن عندي هالحالة , لما اجلس مع نفسي واكون وحيد واقعد على النت او اي شيء, ارجع اتذكر مخاوفي وقلقي بانها ماتكون بالجمال اللي ودي فيه, او اكون اوسم منها طبعا انا يوم شفتها , هي كانت سادة بدون شطة ولاكتشب, يعني بدون مكياج ولا روج ولاشي بشرتها حنطية يعني بياض مخفف بشوية صفار بيض مع سفن دايت لا لا جد يعني بياضها فيه شوية صفار, يااخوان والله اني محتار , اتمنى القى منكم الكلام اللي يشفي الصدر .. وانا جاد جدا يوم اكتب لكم, واعوذ بالله من ابليس,, وش الحل ؟ |
الأخ الكريم .. أنت مرتاح نفسياً لها وهي كذلك وحتى الاستخارة كانت مريحة .. ما يبقى إلا أنك تشوفها مرة ثانية وثالثة ورابعة كمان إذا أحببت حتى تتأكد بنفسك من جمالها وإذا كان يناسبك أو لأ ... نحن لن نقدر نقيم إذا كنت أنت أوسم منها أو لأ .. نحن فقط ممكن نقترح عليك حلول لنساعدك تلاقي الجواب بنفسك .. لكن لفت نظري شيء .. كيف عرفت أن شعرها طويل ؟؟!!! |
والله مرتاح وانا خوفي مو من الارتياح, خوفي اني ارتاح وبعدين اتفاجأ بعد الملكة , لما اشوفها زين يعني
والله حاولت اعدي الموضوع لكن انا ماكتبت لكم الا وانا محتاج فعلا احد يتكلم يقول اي شيء في باله يمكن احد يفتح لي أفق كان مغمى عني , أو قناعة تقلب تفكيري 180 درجة الشغلة كلها طمع بجمال اكثر, فيها مسحة جمال مع انها سادة بدون تحسينات المشكلة لا اختليت بنفسي قعدت افكر واقلق , موسوس الله يصلحني بس شعرها كانت فاكته على ورى ولكنها مطلعة شيء منه من الامام, واللي مطلعته من الامام هذا كان جالس بحضنها ماشاءالله, ومشكورين على التعقيب ونطلب من الله الزود |
مثل ما تفضلت
اقتباس:
لكن خطبيتك تقول إنها حلوة .. و أعجبتك و مرتاح لها .. و جننتك ضحكتها البريئة ايش تبغى أكثر من كذا ؟ . قسم بالله أعرف وحدة جميلة جميلة جميلة .. جمالها ينطق لكن شخصيتها .. و طريقة كلامها و ضحكتها .. بااااااردة .. ميتة ! . و لو كنت أوسم منها ؟ مهما كان يبقى للأنثى جمالها و رقتها و نعومتها .. و لو كانت أسمر من الرجل أو ملامحها أقل منه ياما شفنا "كوبل" البنت حليوة و الولد صاروخ بس الكل يقول لايقين على بعض و البنوتة كيوت و هالزمن برأيي الجمال مش كل حاجة تجذبك نحو البنت - وهذا ملاحظ في مجتمعات النساء - الوحدة لو تكون حليوة و ثقافة و شخصية و كشخة و جسم حلو .. كذا خلااااص البنت 100% أما تجيك وحدة شق مثل ما تقول و ما فيها حيوية .. باردة ميتة .. ولا تعرف تقول كلمتين على بعض ولا تعرف تكشخ .. شالفايدة ؟؟ يقول المثل الفرنسي " كوني جميلة و اصمتي " ، مثل ما يقولون الناس عن البنت الصاروخ يا زينها ساكتة بس :d لأن منطقها يضيّع جمالها . |
انت ارتحت لها وهي ارتاحت لك اعقلها وتوكل على الله
والله يوفقكم ويهنيكم |
الله يهديك بس شلون لعنت خامسك ونفس الوقت انت مش متأكد اذا هي حلوه انت
جاي عشان الشكل بس!!! طيب هي ذوق واخلاق زي ماتقول ومحترمه اقولك لاتقعد تضايق البنت اذا ماتبيها قول من الحين لها وانت ايش يعني مهند على غفله الله مايعيب الرجال الا جيبه الجمال للحرمه مش لرجال فكر زين وخل عنك تأثير الفنانات الله يهديك بس |
يكفيك اهلها محترمين ومحافظين
يكفيك حيائها يكفيك انهم عائله وفتاة مشهود لهم بالاخلاق يكفيك انك استخرت الله وارتحت نفسيا اعقلها وتوكل تمنياتي لك بحياة زوجيه سعيدة |
على أي اساس حكمت أنك وسيم جدا ؟!
خل عنك السطحية أخوي.. و أظفر بذات الدين تربت يداك. أهم شئ الدين و الخلق و بالنسبة الى الجمال اذا كان مقبول و ترتاح له.. فأستخر و توكل على الله. و على فكرة المرأة الفائقة الجمال في الغالب تكون متكبره نوعا ما.. فأحذر من هذا الشئ. أسأل الله أن يوفقك و يرزقك زوجة صالحة تكون قرة عين لك. |
أولاَ: أهنيك على أسلوبك الممتع ثانيا: انا فاهمه انك تريد زوجتك أجمل منك كبقية الرجال , و بعض النساء أيضا لا يقبلن بزوج أجمل منهن لذلك لو أنت أوسم منها ربما هي ترفضك هههههههههه . ثالثا: لا تكن جاحد بأنعام الله عليك فانت ذكرت مميزات كثيره في البنت وعائلتها وان الله سبحانه وتعالى سهل لك أمور كثيرة فاشكر الله على هذه النعم و لا تفقدها بسبب امر نسبي وهو هل هي شق أو لا كم ذكرت. رابعا:ذكر أحد المشائخ المعروفين بالعلم رجل شكى, وقال له زوجتي جميلة والكل يثني عليها ولكن ان اجدها قبيحه وجمالها عادي فرد عليه الشيخ وقال : قبل ان تدخل المنزل اقراء آية الكرسي لان الشيطان يقبحها في عينك لتذهب للحرام وتخرب بيتك . أقسم بالله أجري وراء الزيوت والكريمات عشان يصل شعر للطول إلى انت ذكرته ... ماشاء الله تبارك الله , الله يهنيك ويهديك أقترح عليك بنت شق وصاروخ بس ابوها مدمن مخدرات واخوها في السجن وامها طقاقه موفق يارب |
انا الحمدلله مابدي انسان جميل يكون عادي عشان ما يعايرني ويقلي انه احلى مني والناس ما يصيروا يعلقوا ويحكوا خطيبها احلى......بس يا اخي الجمال مش كل حاجة ازا انت مرتاح الها ليش تخلي شكلها عائق.....ياما ناس اخدو ملكات جمال وبالاخر ندموا بنصحك تصلي استخارة وتتوكل عالله موفق يارب
|
اترك عنك الوسواس ..
ماشاء الله فيها صفات جميلة ... اتوكل على الله واذا انت شاكك كثير .. اطلب انك تشوفها مرة ثانية بحجة انك حابب تسالها كم من سؤال ... وان شاء الله يوافقوا .. اخيرا تذكر انك شفتها بدون مكياااج .. وارتحت لها و شفتها جميلة نوعا ما مابالك بالمكياج من كحل و غيره و اللي يبرز فعلا جمال البنت الله يوفقكم و يسعدكم |
من كلامك واضح انها دخلت قلبك ودخلت انت قلبها لذلك ياعزيزي توكل على الله وتزوجها
لاتكسر نفسك ونفسها بالجمال اللي مستحيل تلقاه لو تلف على اكثر من وحده غيرها يكفي انها مملوحه واخلاق وياما ناس تشرطو بالجمال بس مالقيو اللي ترضيهم بالأخر اخذو بنات غير مملوحات نهائيا بس مشت الحياة لان اهم شي من هذا كله ربي طرح بينهم مودة ورحمة وصار بينهم عشق غير متوقع الله يوفقكم يارب ويتمم عليكم بخير |
ياريت تشوف الفنانات من غير مكياج صدقني بتقول خطيبتك احلى وراح تكون ان شاء الله احلى بيوم الملكة الحمد الله انها ما اخدعتك وحطت مكياج
|
سحبن الله والله مااقدر ارد نفستى تعبانة جدا
|
اخوها صاحبي منذ ست سنوات صحبة قريبة جدا :-)
يقول عنها اخلاق جدا ومحترمة ومتواضعة وتستحي, واهلي بعد مدحوا اخلاقها خلوقة جدا وحالمة لبى قلبها, طبعا انا ارتحت لها كثير جدا, واستخرت وارتحت جدا بعد, وهي كذلك استخارت وارتاحت وتبيني أخي إحمد الله ان خطيبتك بهذة المواصفات ....واحمد الله أيضاً انها وافقت عليك !! المرأة يهمها رجل يحميها وتثق به ويخلص معاها وتأنس به ويحل محل ابوها وأخوها وأمها هذا هو الرجل في نظرها ......سواء كان وسيما أقل أو أكثر منها |
اقتباس:
لا انا اعتقد ان فيها حركات حلوة البنت طريقتها وعفويتها لان زوجة صاحبي تقول انها احلى مني, طبعا زوجها اللي هو صاحبي هو قالي هو الوحيد اللي صرحت له باللي بقلبي مع اني نقدت عليه انه يوري زوجته صورتي لكن الشاهد هذا اللي قالته فاكيد ان اسلوب البنت وكلامها واخلاقها وحلامتها محليتها > حلامتها يعني انها حالمة بس ماعرفت كيف اكتبها ههه لا انا ممكن اضحي بقليل من جمال البنت مقابل ان يكون منطقها حلو وعقلية واسلوبها وحلامتها ههه لاأريد هطفة :-) الله يبارك فيك اختي, اشكرك على ردك مع اني تمنيت حد يجي يخرشني ويلعن شكلي شوي عشان اتأدب وأهجد لاني ادري ان اموووري حلوة مع البنت لكن فيني نسبة من جينات الحمار تطلع احيان > مرتفع ضغطي من نفسي الله يبارك في الجميع |
اقتباس:
وهي بعد الله يوفقك ويهنيك انتي بعد تحية طيبة |
صدقت يامتفائل كلامك عين العقل
|
اقتباس:
فعلا كلامك كله صح, بس بشويش عاد لحد يسب ههه صح الجمال للحرمة وانا رجال عيب علي , بس تدرين شلون تفكيري ؟ تفكيري ان فيني نسبة وسامة فأبي بنت تطغى علي يعني اعتقد انه مسوغ لي , لو اني مثل عبدالله بالخير مثلا كان عظيت على شحمة وحمدت ربي وانا احمد ربي بكل الاحوال لكن مثلا واحد معه مثلا مبلغ سبعين الف ريال, هل تفكيره واختياره للسيارات بيكون مثل شخص معه عشر الاف ؟ لاطبعا اكيد بيتشرط ابوسبعين هذا وياخذ سيارة على مستوى او خلي اتكلم بشغلاتكم يالبنات مثلا وحدة عندها ثلاثمية ريال وتبي علبة مكياج بالثلاثمية, هل طموحها في النوعية والشكل مثل اللي ماعندها الا خمسين ريال ؟ لا طبعا, تلقين ام خمسين تجيب لها علبة فيها الوان قوس قزح لحاله وأم ثلاثمية تجيب لها علبة مكياج فيها قزح وقرايبه وجيرانه واللي يعزون عليه, اتمنى حد فهمني, يعني الشغلة طمع في جمال زيادة .. مشكورة اختي جدا وبارك الله فيك |
اقتباس:
بارك الله فيك, كلام مرتب وممتاز, شكر الله لك |
اقتباس:
ايوة هذي المشكلة, البنت الحلوة مرة تتكبر وتتشرط اكثر, ياليل يعني مافيه بنت حلوة واخلاق؟ ماتصدقون انا مرة من خلال السؤال مدحوا لي بنت يقولون جمال فاره, يصقع صقع والاخلاق والركادة , وفوق ذلك ملتزمة وراعية قيام ليل لكن جاءك على هذا عيب يمشي طبلونه مريضة بالقلب :-( سبحان ربي |
اقتباس:
وانا ادري ان الجمال نسبي وفيه اشياء ثانية راح تدخل الحكم مع الجمال مثل الاخلاق ونمطها وعقليتها وحلامتها ههه وادري بعد ان الجمال اذا استمر مع الايام راح يصير بنظري عادي مثال ذلك حنا الشباب لما نروح مناطق فيها ربيع وعشب وخضار, من الوهلة الاولى نحس ودنا نرعى فيها ونعلف مع الغنم ههههه من شدة الروعة ولكن لما نخيم ونجلس بعد كم يوم يصير عادي وودنا نغير لمكان احسن مثال ثاني, انا كنت اول راعب مطاعم مشي حالك, بوفية ابوهنود او سلتة وفحسة حقت ابويمن وبعدين تطورت وصرت اروح مع الشباب لمطاعم فخمة, اجل فيه عصير اسمه رضعة الأسد هه وشوربة التنين ول اول فترة لارتيادي لهالمطاعم كنت اناظر بالملاعق طول الوقت, من فخامتها مع الايام صار عادي , وشورية التنين صارت عندي مثل شوربة القطو كلها واحد ومع ومع ومع ذلك, لازال عقلي يبيله شوي تسطير عشان افهم, محتاج تكلموني كلام يفهمه عقلي الباطن واتذكره كلما اقبل علي ليل الوسوسة .. بارك الله فيك اختي |
الله من الثقة فيكم يالعيال
نفسي أشوف ولد يقول عن نفسه مو حلو بصراحة ما أدري من وين تجيبونها متأكدة إنك ماقد فكرت بموضوع الجمال إلا بعد ما صاحبك اللي ما أدري وش اسميه ! قالك إنه زوجته تقول عنك إنك أجمل من خطيبتك !؟؟؟ ( وأتمنى يكون فهمي خطأ ) بإختصار زوجة صاحبك غيورة وبايخة وزوجها اللي هو صاحبك الله يخلف عليه اللي مبسوط بزوجته تشوف صاحبه وتمدحه !!! تعوذ من الشيطان وابعد عن الوسوسة لأنه شياطين الإنس والجن في هذا الوقت يتمنون ما يجتمعون اثنين بالحلال وبيطلعون في راسك مليون علة علشان مايتم الزواج |
طيب انت طول مدة الملكة عشان تتعرفون على بعض زين
الله يوفقك اخوي |
أولا أخي ما كان ينبغي أن تصفها فالعين حق وأيضا يوجد رجال يقرأون ما كتبت فقم بتعديل المشاركه بارك الله فيك
ثانيا هذه وسا س الشيطان فاستعذ بالله فهي بصفات تفوق الجمال مشاء الله الذي تبحث عنه واعلم وفقك الله أن الجمال لن يدوم فإذا اعتادت العين عليه فيصح عادي فالجمال جمال الروح (واظفر بذات الدين تربت يداك )أو كما قال عليه الصلاة والسلام يسر الله أمرك ووفقك لكل خير وجميع شباب المسلمين |
انت انسان اناني، تدري ليه ؟
أعطيتنا مثال، انه لو وحدة معها 300 ريال عشان تشتري مكياج، مو مثل اللي معها مادري كم .. معنى كذا .. اذا كانت خطيبتك اجمل منك، فالمفرووووووووض انها تبحث عن اللي اجمل منها .. و اللي اجمل منها، لازم يبحث عن اللي اجمل منه .. و هكذا و ماحد بيتزوج في الاخير .. . . ياخي، انت ماراح تشتري سيارة ؟ انت بتتزوج وحدة تعيش معاها بقية عمرك .. تتونس بها و تتونس هي بك .. تعينك على الدنيا و انت تعينها .. الجمال كلنا نطمح له بالتأكيد .. لكن جمال الروح هو الأهم .. فلا تخلي تفكيرك سطحي .. شكله دخلك الغرور بنفسك، يوم شفتها تبكي عشان نتيجة التحاليل .. و شفت انك ( لقطة ) على قولة المصارية، بس طلعت (نقطة عالشمال هههه ) |
اقتباس:
برااافو عليك اختي, يعني اكثر وحدة قربتي من تفكيري اي نعم ماابي انسانة يقولون عليها ان زوجها احلى منها يعني القرايب وكذا بالتاكيد راح يقارنون لكن املي الوحيد نقول انها ان شاءالله حلوة كثير, يارب صحيح البنت اذا كانت ملكة جمال وسيئة فالرجل ينسي شكلها نهائيا بسبب المشاكل الله يبارك فيك اختي, شاكر لك كلامك الطيب |
اقتباس:
جميل جدا , بارك الله فيك اختي وشكرا جزيلا الله يوفقك ويسعدك انتي بعد |
اقتباس:
كثير ناس تشرطوا في البنت واخر شي اخذوا بنت مافيها ذرة من اللي يبون انا ترى متخوف ان هالسنة الكونية تنطبق علي ههه الله يستر اي والله البنت دخلت قلبي لكن اذا جن الليل واختلى بي ابليس قام بفرفرة مخي > الله ياالفصيح عشان كذا ضروري محتاج كلام منكم ارد فيه على عقلي, ترى عقلي يشتغل مايوقف ومتعبني شوي هذي من مواصفات مواليد الدلو < طبعا ماني فاضي ابين حكاية الدلو ذي وان بينها وبين الرجم بالغيب فرق فخلوها بعدين الله يبارك فيك اختي ماقصرتي شكر الله لك |
اذا فاضي شف مواضيعي تلقى خرابيط زي خرابيطك بالتوفيق
|
اقتباس:
دخلت ملفك قالي ماعندك صلاحية تشوف خرابيطها :d |
اقتباس:
هذا رد صارخ وصارم وقوي على عقلي الابله :d صحيح هي طلعت لي ساة بدون شطة ولاكتشب نهائيا , حتى بدون سندوتش هههه ولاكحل ولاشي عشان لايصير فيه غش وكذا, احييها على هالشي واحييك على ردك الرائع, بارك الله فيج على قول الخليجيين الله يسلمج < الحمدلله والشكر لهجة ترفع الضغط |
اقتباس:
او الراحة كلها كلها مهما بلغت لذة ونشوة , راح يتم نسيانها في الساعة اللي بعدها على طول سواء كانت اللذة حلال او حرام, كلها زائلة, لانها لو استمرت فايش الفائدة من الجنة؟ شوفي اهل اللذات واللي يتفننون باستمتاعهم بالدنيا بدون اي قيود دينية او اجتماعية بالاخير حياتهم عادية جدا وتلقين ضيقهم ونكدهم كثير عشان كذا لايغرك النعيم الزائل, الاهم النعيم المقيم وهو نعيم الاخرة لاتتلهفي على شيء زائل, الله يوفقك ويستر عليك ويهنيك |
اقتباس:
والله اعتقد انها من النوع المخلص وصاحب حرارة في المشاعر يعني هذي من مواصفات مواليد الميزان من الإناث < بيتصفق الله يبارك فيك اخوي وشكر الله لك على الخيزرانة البسيطة اللي في ردك, تحياتي لك |
اقتباس:
تحياتي |
اقتباس:
خربوا علينا الشيون :d اي فاهمة غلط, زوجة صاحبي قالت ان البنت احلى منه , مو العكس ظلمتي الحرمة المسكينة بس مع ذلك ابي منكم كلام يرد الروح ارجوا السماعدة < السماعدة ذي قالها واحد من الاعضاء هنا :d |
ايــــه خطيبتك انت بتكون متفوووق عليها في الجمـــال
.. .. .. .. .. يعني واذا آنت تفوقت عليها !!!!!! وووين المشكله ؟؟؟ حتى لو آن مقياس الجمال مهم بالنسبه لك .. ذكرت لنا فيها آشيــاء حلووه .. حياءها .. خوفها من عدم تتمة الزواج وهذا آكبر دليل لتوجه مشاعرها نحوك .. وذكرت لنا بعض من صفاتها مع ان المفروض الشي هذا ماتذكره نهـــــــــااااااائي .. بعد كل هالصفااات وش تبي آكثر .. تخيل تاخذ وحـــده تفوق عليك بالجمـــــال .. لكن لاحياء .. ولا يوجد لديها مشاعر لك .. آي الآفضل بنظرك ؟؟؟؟؟ |
:* ماشاء الله ولاقوة إلا بالله خطيبتك بلاشك جميلة والدليل أنها طلعت لك بلارتوش وبلا تزيين وأعجبتك ولعلمك البنت الجميلة فعلاً هي الجميلة بدون ميك أب :* وبعد الزواج راح تتزين لك وراح تسرق قلبك بجمالها وعندي سؤال: أمك وأخواتك وش قالوا عنها ؟ أكيد ما خطبوها لك إلا وهم شايفينها بمستوى جمالك أو أجمل منك يعني عارفين أنها تناسبك :* ومدام البنت فز لها قلبك لا تجلس تفكر جميلة ومو جميلة المهم القلب قال كلمته وراح تعيش بإذن المولى أيام وسنين حلوة معها صدقني الإرتياح والقبول شيء جوهري ومهم وهو أساس نجاح أي زواج وقليل تلاقي هالشعور بين الخطاب وأغلبهم يرضى ويسكت أما لأن الفتاة شق أو لأنه بحث ومالقى شعور الأرتياح ولا وجد نصفه الثاني :* توكل على الله وأطلب تجلس معها مرة ومرتين وعيش أجمل أيام عمرك أسأل الله أنه يهنيك ويسعدك ذكرتني بواحد من أخواني كان نفس وضعك وخليناه يزورها بعد الملكة ويجلس معها والحمدلله طار عقله فيها لأن بالشوفة جاه نفس أحساسك والآن معهم بنوته قمر وكل واحد يدلل الثاني أسأل الله أن يزين حضك زي مازين حضهم :: |
اقتباس:
تجارب مرت مثل تجربتي بالله عليك حكيني اللي صار مع اخوك بالتفصيل الممل وش كان يسوي ووش قال وكيف كان ومن ثم بعد الملكة كيف صار وشلون صار وليش بالله عليك احتاج هالموضوع كثير لانه بيريحني, التجربة لها تأثيرها اكثر من التنظير بانتظارك |
:* أبداً هو مثلك معه "رجه" كنت موصيته في النظرة الشرعية يطل بوجه البنت ويشوفها زين عشان يقتنع تمام فيها ومايجي يقول مو ذي المواصفات إلي أبحث عنها :* أخونا في الله دخل ودخلت عليه البنت وشعرها طويل مغطي نص وجهها وأستحى ويقول جلست خمس دقايق وطلعت ماشفت شيء إلا جسمها وشعرها ومدري كيف شكل وجهها :* طبعاً أخواني مكلفيني بأختيار حريمهم الله يعظم أجري لأني الأقرب لهم وفاهمه نفسياتهم بحكم تقارب السن يعني أمي وأخواتي الكبار مرتاحات وإذا بيفشل أحد بتطيح برأسي المهم: قالي ترى ماشفت وجهها وما أبغى أنصدم وترى ما أرتحت وش أسوي..؟ بحكم معرفتي للبنت أتصلت على أمها وشرحت لها الوضع وكلمت كذلك البنت لأنها حياوية وطلبت منها تقبل يشوفها ثاني بس تلم شعرها لأنه ماشاف حتى وجهها فقالت أنها أستحت مرة منه حتى هي ما شافت شكله وطلبت أكون موجودة حتى تشعر بإرتياح رحنا لهم أنا وهو ودخلت البنت وكانت هالمرة شعرها على ظهرها ومبعدته تمام عن وجهها وأخينا في الله حافظ الدرس لدرجة بدأت ألمح له يبطل تدقيق في البنية وتمت الملكة بعدها بكم يوم والحمدلله وماشاء الله لايقين على بعض ولعلمك :هو أجمل بس أنا شفت بالبنت شيء يحبه أخوي جداً ويجيب رأسه (الحياء) والأنوثة يعني ما فكرت بمستوى جمالها قد ما شدني الصفات وإنسجامها مع شخصية الأخ :* |
| الساعة الآن 06:51 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©