منتدى عالم الأسرة والمجتمع - حكايتي مع الألم وفصول العذاب المتكرر.. رحمـاك يـا الله( مستجدات 76 / 82 )

منتدى عالم الأسرة والمجتمع (http://www.66n.com/forums/index.php)

- المتزوجين (http://www.66n.com/forums/forumdisplay.php?f=6)

حكايتي مع الألم وفصول العذاب المتكرر.. رحمـاك يـا الله( مستجدات 76 / 82 )

بسم الله الرحمن الرحيم

الحمد لله رب العالمين والصلاة والسلام على اشرف الأنبياء والمرسلين وعلى اله الطيبين الطاهرين وصحابته الغر الميامين ومن تبعهم بإحسان إلي يوم الدين

السلام عليكم ورحمة الله وبركاته..

اخوتي الكرام ولأنني عاجز عن تحديد بداية الحكاية وكيف هي نهايتها ..!! وكم هي عدد فصولها بالتحديد ولأني متشتت وراجعت نفسي كثيرا لطرح مشكلتي وإلى الله المشتكى اولا وآخرا.. لذا قررت أن اكتب لكم فوجهوني وادعوا لي فوالله إني مبتلى والحمدلله الذي لايحمد على مكروه سواه.

//

بالعامي الفصيح

اخوتي الكرام أنا شاب ابلغ من العمر ثلاثين عام ومتزوج من 6 سنوات وعندي طفل عمره اربع سنوات القصه بعمومها لها بداية قديمه ولكن المهم هنا هو هذا الفصل المرعب من الحكاية وهو حين قررت الزواج بتلك الانسانه التي بنيت احلامي وطموحاتي معها وجاء اليوم الموعود لاتقدم رسمياً ..

تم الخطبه والرؤية الشرعية وتبعها بعد شهرين الزواج ولله الحمد ثم لاحت بوادر الشقاء من أول شهر .. والله يا اخواني ويا اخواتي اني بالضبط ما اعرف كيف اصيغ لكم الاحداث كيف ابدأ معكم .. زوجتي تبلغ من العمر حينها 21 عام الفتاة من أقاربي البعيدين نسبياً .. لكن ما اعرفها ولا اهلي يعرفونها فقط يعرفون أمها بحكم القرابه .. حتى اهلي لم يروها قط ..! المهم بعد الزواج بشهر أرقنتي واتعبتني عصبيتها الزائده وحنقها على أتفه الأمور ..! وكان ابوها على حق يوم همس لي بأن ابنته عصبيه و...و... الخ طبعا هذا ايام الخطبه وقبل الملكه.. طبعا انا ماهتميت وقتها بالعكس كنت متحمس للزواج واريد اتمامه بأسرع وقت .. بداية الشهور الاولى تعبت من تكرار زعلها وعصبيتها تثور وتزمجر وتجعل عاليها واطيها على اتفه الاسباب!! طبعا حبيتها لكونها شريكة حياتي وايضا هي بادلتني نفس الشعور وعشنا قصه حب حتى الرمق الأخير..

مالكم بالطويلة .. البنت مع الوقت بدأت تتمادى ومن اول شهرين تقريبا وهي تطلب الطلاق !! بسبب تافه جداً وهو اني منعتها مثلا من زيارة اهلها اليوم الفلاني .. علما اني من تزوجتها مايمر اسبوع واحد الا وهي عند اهلها هذا اذا ماكان يوم ورا يوم !! لكن الشكوى لله انا مالي الا الله ثم هي أمي -رحمها الله- توفيت وانا في سن 7 سنوات وابوي كذلك توفي -رحمه الله- وانا في سن الـ20 .. والحمدلله له ما اخذ وله ما اعطى وكل شي عنده بأجل مسمى..

صبرت على تماديها احيانا بالكلام الجارح ثم مع السنين قل الاحترام منها الى ان وصل الى مد اليد !! ثم الى اللعن !! ثم الى الصراخ والفضيحه عند الجيران !! حتى بالشارع لا اسلم من مدها ليدها وعصبيتها وصراخها والله اني احيانا اقف عند الاشاره ثم انعطف يمين او يسار (عن الفشيله فقط) طبعا زيادة على ذلك طلبها الطلاق والانفصال في حاله واحده فقط وهي اذا عصبت ! اما في غيره فهي تعشقني حد الثماله ..! وان لامخلوق على هذه البسيطه أغلى مني ..تناقض عجيب ولاتستغربون ...

طبعا ضربها لي هو ضرب الضعيف الذي لايقدر على شيئ ! انا طبعا اتحمل وادعي لها واقول تعوذي من الشيطان فتتعوذ مني ومن الشيطان في آن واحد ..!! ثم اهديها واضمها وشوي شوي الى ان تركد شياطينها ..!

طبعا انا في هالحاله اشق هدومي من القهر ..! ابيها تركد وتقصر صوتها وتتعوذ من الشيطان ولكن لاحياة لمن تنادي ومع ذلك تمد يدها مره ومرتين في نفس الموقف وتطور الامر الى انها تحاول الانتحار أكثر من مره طبعا لاتكون هذي المحاوله الا في حال العصبيه .. فمره حاولت بلع شريط كامل من الحبوب!! ومره اخذت السكين وهددتني بقتل نفسها ..!! ومره حاولت شرب كلوركس !! ومره حاولت شرب مزيل المناكير وهالمره مالحقت عليها الا هي شاربه نصفه ...!! لاحول ولاقوة الا بالله حاولت اهديها واركدها واركض للبقاله اجيب لها حليب او عصير او اي شي يمكن تستفرغ هالبلا (الله يكرمكم) واحاول اذكرها بالله وان الي تسوينه هذا اعتراض على الله ومصيرك النار ...الخ والله يا اخوتي اني عانيت اشد المعاناة معه هالبنت والله اني مره طلعت من بيتي على طول ادور على شيخ يقرا عليها وبالفعل جاء شيخ وقرا عليها كم يوم وقال مافيها شي ..! ثم وديتها لطبيب نفسي وراجعنا عنده وكأن شيئاً لم يكن ..! اكثر مايؤلمني بصراحه هو صراخها وضربها لي وتكسيرها للأشياء الي حولها قدام الولد .. انا في هالحاله احس بقهر عظيم ولكن ما باليد حيله ماقدر امد يدي عليها ولا اقدر حتى اصرخ لاني اذا صرخت راح ازيد النار حطب والولد يمكن يصيبه الجنون من الي يشوفه من هالمجنونه حسبي الله ونعم الوكيل ..

احيانا تعصب وتطلب الطلاق واحيانا تطردني من البيت ! وانا بيني وبينكم اخاف اطلع واخليها او بشكل اصح مستحيل اخليها بهالحاله ممكن تسوي بنفسها شي لاسمح الله .. الى ان تركد ثم تصر على الطرد ثم اطلع بعد ما اتأكد انها ركدت شياطينها ..

احيانا تصر على اني اوديها لبيت اهلها الساعه 2 بالليل وتلملم اغراضها والناس نيااااام .. ويالله قم ودني لأهلي مالي عندك قعده نهائيا..وتبدأ معاناتي مع شيل الشنط الي انكسر منها كتفي من كثر ما اشيل وارجعها لنفس المكان ..-واقولها لكم والله الشاهد انه في عمري ماقلت لها يالله شيلي شنطتك واطلعي من بيتي -

نكمل ...ولاني عارف اني مستحيل اوديها لبيت اهلها في هالوقت المتأخر وهي في هالحاله ..طبعا علاجها اعرفه وهو اني اخذ لي فرتين بالرياض الى ان تركد الشياطين وبعد ما اهديها واسمعها القرآن ثم تلين وارجعها للبيت وانام الساعه 4 منهد وتعبان وكأني واسيت لي جبل مع الأرض..!

فشلتني مع ابوها وامها فدائما في حاله العصبيه تاخذ جوالها وتتصل على ابوها وتناديه !! وكم مره يجي عندي وانا في حاله من الفشيله مايعلم بها الا الله .. والشهاده لله ان اهلها طيبين ولكن وش السواة مع هالبنت ..مره اصرت اوديها لاهلها ولحسن الحظ ماكانوا موجودين واصرت ان ابوها يجي وجاء وسمع مني ومنها ثم طلعت انا زعلان ومقهور من هالفشايل وبعد ساعه اتصل علي وقال بجيبها لك ولا انت تجي وانا ابوك قلت لا انا اجي وعطيته كلام يقوله لها ان مو كل مشكله تطير لاهلها وكأنهم المنقذ ..!تراي تعبت من الفضايح والمشاكل وعلمها ..و..و الخ والله اني جاي لبيته وان حبني على جبيني وقالي تحمل وانا ابوك مالك الا هي وهي مالها الا انت ..

طبعا كلكم بتسألوني أكيد انها ماسوت كذا الا لسبب قوي .. والله يا اخوان ويا اخوات انها مشاكل تافهه لاتخطر على بال احدكم ..! اضرب لكم مثال انها طلبت مني الذهاب للسوق الآن وكنت تعبان ومنهك من العمل ورفضت وأجلت السوق هنا تقلب البيت علي وتبدأ الشياطين تركبها وتبدأ معركة الخاسر فيها أنا طبعاً ..

باختصار والله اني تعبت من الكتابه..

قبل 6 شهور من الان حدث أمر لم يكن بالحسبان لا لي ولا لها .. كالعاده مشاجره وضرب وصراخ ...الخ كان مشكله تافهه ورب البيت .. كنا في الطريق الى الشقه والمشكله ان شريحه بيانات الانترنت لجوالها اختفت !! وصرخت علي قالت مايجي شي منك وفيه خير..! سفهتها لاني كنت تعبان جدا ومريض اتصلت على اخوها لان الشريحه كانت معه قبل ما امرها ..وصرخت عليه المسكين وقفلت الخط .. وترجع مره ثانيه للنكد حسبي الله عليك انا كم لي طالتبتها منك ويوم جت ضاعت بنفس اليوم (طبعا هي تبيها للبلاك بيري ) علما ان معها ايفون وجالكسي نوت وبلاك بيري .. وماقصرت عليها بشي .. طبعا سفهتها وقمت العب مع الولد .. هي هنا انفجرت قالت ماتبي ترد اجل سافهني هاه ...!!؟؟؟ اوريك والله ماتنام الليله بالشقه ! انا قلت اسكتي وتعوذي من الشيطان كالعاده تعوذت مني انا فقط .. وصلنا الشقه رحت ابي انام سكرت الباب وطفيت النور وفجأه جت وفتحت الباب وشغلت النور ونفضت الفراش ويالله قم شوف لك مكان تنام فيه !! حاولت معها مافيه فايده يابنت الحلال يالحبيبه ياللبيبه لاحياة لمن تنادي رجعت سكرت النور ورجعت للفراش تعباااان ,,رجعت للوضع السابق ومدت يدها واخذت بعض الجزم وانتم بكرامه ورمتها علي وبصقت من بعيد ..!! انا كنت متوقع منها كل شي وفي ليلة قد غابت فيها الحكمه وغاب الحلم ...! قمت ولأول مره في حياتي صفعتها على وجهها والله ان يدي تؤلمني من قوة الصفعه ! ثم رفستها برجلي اعتقد ان حوضها لولا ستر الله أنكسر .. وقمت وطلعت من البيت وانا اقول الوعد قدام والله ماعاد تشوفك عيني ... ومن ذاك اليوم الى يومنا هذا وكل واحد في طريق ..

قبل شهر دخلت في حسابها الخاص بتويتر وبحكم ان حسابها مربوط بايميل كان لي وارجعته واكتشفت انها تتكلم مع اشخاص وبالتحديد شخص كانت مشرفه بمنتدى تابع له والله يا اخوان ويا اخوات ان كلامها معه شيب رأسي !! آآآآه يالقهر كلام فيه خضوع بالقول وتميع وضحك وقلة حيا.. وصارحتها بالموضوع وردت ببرود انا ماقلت شي عيب ..!!!

الحكايه يا اخوان ويا اخوات مانتهت ولكن لعل الردود القادمه كفيله بإتمامها..

والله تعبت من الكتابه وحتى تشتت ذهني واسلوبي ..

سامحوني وادعوا لي

في أمان الله