|
*. أرغب بالفضفضة عن شقيقاتي .*
السلام عليكم و رحمة الله و بركاته أرغب من فترة طويلة ، إني أتحدث هنا .. عن أخواتي ( من أمي و أبوي ) .. لكن ترددت ، لإنه علاقتي بهم .. ما كنت اتخذت قرار ( كيف إنها تكون ؟ ) . . بدأت الصدمات تتوالى علي .. و اكتشافي لأجوبة ( علامات التعجب الي كانت بداخلي ) و وصولي للأجوبة بنفسي .. من يوم ما ( تمّ دفن أمي الله يرحمها ) .. و ما عدّت ساعات على دفنها ؟ يا سبحان الله .. . . أرغب بالتخلص من الصدمة العنيفة الي واجهتها .. بإني اتحدث هنا .. يمكن أرتاح عالأقل ؟ أو أصل لطريقة ( دبلوماسية للتعامل معاهم ) .. يمكن أجد تفسير ( نفسي أو منطقي لكل الي واجهته ؟ ) يمكن ألاقي ( ناس عاشت نفس اللي أنا مريت به ، فيخف عني الألم ؟ ) . . أبغى أعيش حياتي خلاص .. و أنسى ( المشاعر الأخوية التي بداخلي ) .. . . مو معنى كلامي إنه أخواتي ( سيئات ) .. لكنهم ( أنانيات و البعض منهم عديمات المشاعر و البعض تعودوا ياخدوا فقط ) .. أيضاً ( بعض من أخواني معاهم ) لكن أخواني يتأثروا بكلام أخواتي و مواقفهم أخف علي من مواقف أخواتي .. فما أبغى أتكلم عنهم .. أخواتي ( بتخطيط و تدبير ) .. . . يمكن ألاقي ( السرّ ) .. لسبب اللي واجهته منهم و خاصة بعد وفاة أمي الله يرحمها و يغفر لها ؟ و سامحوني عالفضفضة .. الغير مرتبة .. |
رد : *. أرغب بالفضفضة عن شقيقاتي .*
ابدا من الأخير /
انا ما صرت دحين اروح ازورهم غير بالمناسبات .. و لا صرت اغصبهم و لا اصر عليهم انهم يجوني البيت .. و لا صرت اشتاق مثل قبل لهم .. و لا صرت ابحث عنهم خاصة بعد اخر مشكلة انا مريت فيها و الكل يعلم به .. . . اخواتي ما وقفوا معايا غير .. الكبيرة .. لكن كانت مرات ترمي علي كلمات ( شماتة ) .. ليت بس ما وقفوا معايا ! الغريب طبعا وقف معايا و هما ولاشي .. بالعكس .. الى الان مثل الي ما صدقوا مسكوا شي علي .. . . كنت اترجاهم يجوا عندي عشان انشغل و أتسلى و ما افكر بشي .. كانوا يجوا .. و يشوفوني مرات مسرحة او أبغى ( انام ) نوع من انواع الهرروووووووب من التفكير .. مع اني انسانة نومي قليل جدا .. و نشيطة الحمدلله بس كنت بس ابغى احط راسي و انام .. و البيت بيتهم مافيها شي ؟ يجوا عندي يبغوني اضيفهم و أعاملهم برسميات و ضيافة ووو الخ ؟ الى الان يعلقوا علي .. انت لما نجي عندك ( تنامي ) او تبغي نمسك اولادك .. بس عشان مرة او مرتين زاروني خلال المشكلة الي مريت بها .. و تركت أولادي يلعبوا مع اولادهم و نمت شوية لأَنِّي كنت مصدومة .. و نفسيتي تعبانة و مابغى أتكلم او افضفض من يومها عرفت انه مافي خير منهم .. و لا اي فايدة و غير الي مريت به منهم بيوم موت امي .. خلاص اخدت قراري النهائي .. ما اشتاق لهم .. و انتهوا من حياتي .. الي بيني و بينهم علاقة صلة رحم فقط .. و اني أدافع عنهم امام الغريب و ما ارضى احد يأذيهم .. و قدام الكل .. طبعا انه نحن اخوات مترابطات جدا .. اصلا اخواتي يهمهم كلام الناس و بس |
رد : *. أرغب بالفضفضة عن شقيقاتي .*
الغريب كان يقول لي ..
يحمد ربه .. إِيش ناقصه !؟ اختي الكبيرة توقف معايا و تتعاطف و تسحب مني الكلام .. عشان اكتشف انها فاضية و تدور عن اي هرج عشان تهرجه مع زوجها و اخوات زوجها .. اختي هذه الكبيرة .. مع انها اكثر وحدة حنونة و مسالمة و طيبة .. لكن من زمان كانت تقول لي ( مرات احس اني أكرهك .. من كثر ما اخوات زوجي يمدحوكي قدام زوجي او قدامي ) المهم .. لما صارت لي المصيبة هذه .. راحت تنشر بين اخوات زوجها عن الي صار .. و على كيفها تخليهم الحكم و القاضي والجلاد ؟ كأني انا طلبت رأيهم !؟ زعلت و غصب عصبت و قلت لها .. و إِيش دخلهم هما عشان يحكموا و يتدخلوا ؟ بعدين اعتذرت لأختي مباشرة و قلت لها نفسيتي تعبانة معليه و تأسفت منها لكن زعلت بجد صارت اختي هذه مرات تقول لي و بشماتة ( زوجي يقول اصلا مين يتحمل اختك روح الطير ؟ ) هو زوجها إِيش يدريييييه عني اصلا ؟ اذا ماعمري كلمته و لا شافني ؟ اختي ماعرف إِيش تنقل له صورة عني ؟ و بعدين هذا وقته المناسب انها تجي و تقول لي و هي تضحك اصلا مين يتحملك زوجي يقول ؟ . . و لما شافت انه زوجي متمسك بيا و يحارب عشاني و يرسل لاخويا شفت بنظراتها علامات تعجب ( و تقول لي ؟ معقولة يعني يكون يحبك ! ) لانها شافت أفعال منه و أشياء تدل انه متمسك و ندمان و يبغاني ارجع له .. فاستغربت بعد ما كانت تتشمت قلت لها ( ماعرف ) و ما علقت .. كنت الفترة هذيك ما أتكلم كثير .. مستخسرين ( الحب فيا ) !!!!!!! . . اخواتي صحيح ماشاءالله أزواجهم عاقلين و حالتهم كويسة لكن .. لو وحدة منهم قالت لزوجها طلقني؛ يقول لها ( مع السلامة ) .. يخافوا يزعلوا أزواجهم .. فاستغربت انه ليش يتمسك بيا ! و انا رافعة قضية طلب طلاق و بهدلته بالمحاكم !؟ قبل كم يوم زوجها يقول ( اصلا ماحد يتحمل روح الطير ) و بعدين اخويا يحكي لهم عن مواقف زوجي و كيف يبغاني ارجع له ! لانه اخويا هذا ما يحكي لأحد عن اي شي .. غير لزوج اختي الكبيرة هذه لانه زوجها كبير و عاقل ماشاءالله و حكيم |
رد : *. أرغب بالفضفضة عن شقيقاتي .*
زوج اختي الكبيرة ..
انتقادات اخواني عليه .. انه كان يتمنى لو زوجته موظفة .. قال لها مرة .. لما تقدمت و خطبتك على بالي انك موظفة او معاك بكالوريوس طبعا هي الوحيدة الي بيننا ما كملت دراستها الجامعية كانت تلعب كثير بالمدرسة و ما تذاكر و ترسب كل سنة مرتين .. و لازم عندها اختبار في الصيف عشان الرسوب لما مريت بالمشكلة هذه نشرت عند الناس .. انه بسبب وظيفتي و اني مقصرة مع زوجي !؟ ملقوفة من راسها ! قلت لها و مين قال !؟ و ما حبيت اخد و أعطي معاها .. لأَنِّي كنت تعبانة و ما ابغى احد يجي يعلمني انا في إِيش مقصرة ! لأَنِّي حاسبت نفسي كثير قبل لا هي تحاسبني و عارفة حالي .. انا كنت مرتبة جدولي و الحمدلله ما عمري قصرت مع بيتي بسبب وظيفتي ومتآكدة من الشي هذا مليون بالمئة .. عكس اختي هذه الكبيرة .. ما تترك زواج الا و تحضره ما تترك مناسبة .. لا و تحضره و تترك اولادها بالبيت من غير ما تهتم إِيش أكلوا و إِيش يعملوا !؟ لازم كل أسبوع تخرج مناسبة اقل شي مرة .. انا ما اروح و اخرج .. و الزواجات اخر اهتماماتي .. اهتماماتي بيتي و أولادي و زوجي و نفسي .. |
رد : *. أرغب بالفضفضة عن شقيقاتي .*
ما اعرف هي ليش كذا كانت معايا !؟
كنت احبها .. و اعتبرها صاحبة القلب الكبير .. تشمتت فيا .. و خلف الطيبة هذه و الحنان .. كره مدفون بداخلها تجاهي .. بدأ يظهر لاشعوريا .. . . مرة اوري لها مقطع فيديو لولدي و هو يعمل حركات تضحك .. و ولدي الكبير اصغر من اولادها كلهم .. فرق يعني 5 سنوات اقل شي .. المهم .. كل مين شاف المقطع جلس يعلق .. ولدي الكبير دمه خفيف و يتقن التمثيل و التقليد .. وعمره كان 6 سنوات اختي تغير وجهها و توقعت تعلق عادي .. قالت لي ( اصلا أولادي كلهم كانوا كذا ) طيب مين جاب سيرة اولادك ! :( انا أحب اولادهم و اولادهم يحبوني .. اصلا أحب الأطفال كلهم .. فكنت زمان أتوقع انه راح يصدر منهم نفس الشي مع أولادي ! . . كم مرة انزل السوق و من حالي اشوف حلق او اسورة اكسسوارات او بنطلون او بلوزة تنفع لبناتها او تي شيرت لاولادها و من غير اي مناسبة أخده لهم و يفرحوا به .. الى الان أشوفهم يلبسوه .. يعجبهم ذوقي بالملابس .. . . افتكرت شي .. اختي هذه مرة اخدت مني ( تبادل بيننا على ايام امي الله يرحمها و انا كنت أولى جامعة ) اخدت بلايز مني .. و لما لبسته ؛ زوجها قال لها ( ذوق اختك حلو باختيار الملابس ) .. افتكر تعليقها هذا .. بس كانت تقولها لي و عادي ما كان فيه شي بالنفوس و لا انا دققت و لا حتى هي ! |
رد : *. أرغب بالفضفضة عن شقيقاتي .*
انا حزينة عشان اختي الكبيرة هذه ..
هي الي ربتني و اهتمت بيا و انا طفلة .. ما افتكر امي و انا صغيرة .. امي كانت تهتم باخويا الي بيني و بينه سنة وحدة و تهتم بالبيت و نظافته اختي هذه .. كنت احبها .. و تحبّني .. بس ماعرف ليش العلاقات ما صارت مثل قبل .. هل لأَنِّي بدأت افهم النفسيات !؟ و صرت الاحظ سبب تعاطفها معايا ( انه ما كان بسبب حبها لي ؟ انه كان بس كذا تدور اي هرج ؟ ) و مبسوطة و مرتاحة الصراحة اني توقفت عن الفضفضة لها .. لانه كلامي لها من باب الإخوة و الفضفضة .. كانت تجلب لي مشاكل مع البقية من غير ما كنت افهم إِيش السبب !؟ و ليش كذا بيصير لي!؟ . . ملاحظة / قبل لا تتوفى امي ما كنت اعرف ليش تصير لي مواقف مالها تفسير ! بعد موت امي الله يرحمها .. لقيت الإجابة و اكتشفت انه امي كانت تغطي عليهم عشان تحافظ على علاقتنا .. فما كنّت اشوف الي صرت اشوفه الان .. |
رد : *. أرغب بالفضفضة عن شقيقاتي .*
خلينا نشيل كلمة اختي الكببرة تكرهني ونحط بدالها تغار مني
غريبه انه غيرتها ما كانت وانتو صغار .. بدليل انها مثلك ما علقت علي ملاحظة زوجها بخصوص البلايز وانه ذوقك حلو بالملابي هل ممكن انها تكون سمعت كلام ومقارنات وتكرر هالشي الي ان تولدت عندها الغيرة ؟؟؟ احس بشفقة عليها صراحه . متابعه معك روح ... راح اطلع الان من المنتدي وبرجع لموضوعك ان شاء الله |
رد : *. أرغب بالفضفضة عن شقيقاتي .*
علاقتي مع امي الله يرحمها كانت كل مالها تتطور وتتعمق اكثر و اكثر
و امي انسانة كتومة و غامضة جدا .. كنت انا عكس امي .. أتكلم و امزح مع امي و اضحكها و أنكت معاها .. و احكي لها قصص و مواقف صحباتي و زوجي و دراستي و الغربة امي اخر مرة قبل لا تموت الله يرحمها .. قالت لي ( انا اعتبرك مستودع أسراري .. الوحيدة الي اثق بها في العالم و اقول لها اي شي و انا متطمنة ) عمرها امي ما بينت لي مشاعرها تجاهي .. اكتشفته من تعليقات اخواتي لما امي كانت عايشة و خاصة فترة مرض امي .. بس أسمعهم يقولوا ( انت ماما تحبك / او يحرضوا امي علي ) و بعدين مرة امي قالت لي .. و اول مرة في حياتها تفتح قلبها لي و تقول لي الكلام هذا و ما أتوقع عمرها قالت لأحد .. انا من يوم جبت أخواتك .. كان ابوك و هو شاب ؛ مرة عصبي .. و يقول لي شوفي تربيتك لهم ؟ و كانت تحس انها فاشلة .. تقول لي .. انت لما جيتي و صرتي تجيبي درجات عالية بالمدرسة و شهادات تميز و تفوق .. صرت اقول بداخلي .. ( الحمدلله يعني انا ماني فاشلة ) و تقول صارت تعرف انها انسانة ناجحة .. . . افتكر لما كنت كمان في البكالوريوس .. عملوا حفل صغير للخريجات و نادينا امهاتنا .. وانا كنت في السكن الداخلي امي لما جات و حضرت .. قالوا اسمها و أعطوها باقة ورد كبيرة و قالولها بنتك من المتفوقات و المميزات و شكروا امي انا ماعرف انه اثر الموقف هذا في امي .. لكن لما سافرنا و رحنا نزور أخوالي و أهل امي .. ماكانت امي تخلينا نجلس معاهم و نسمع هي إِيش تتكلم مرة كانت غامضة و كتومة .. لكن شفت امي تحكي لهم بكل فخر .. عن الحفل و كيف كرموها و أعطوها باقة ورد كبيرة و كذا .. . . و كانت علاقتي تزداد قوة كل مرة لحد ما امي ماتت الله يرحمها لكن ما وصلت مع امي للدرجة هذه غير بالقوة كنت مرات ابكي مع نفسي من قسوتها و شدتها و جفافها العاطفي و انتقاداتها كنت مرات أرد غصب عني لما تجرحني و قبل لا اتزوج و أقوم اصلي في الليل و ادعي ربنا انه يخليني بارة بأمي و استغفر ربنا كثير .. و كنت ادعي انه يارب ارزقني زوج يساعدني على البر بأمي ) مو بالسهولة ابدا مثل ما يحسبوا اخواتي .. . . اخواتي ما عرفوا السر في علاقة امي معايا .. لانه امي تحب الاولاد و بس وحتى اخواني الاولاد مايعرفوا السر في محبة امي لي و خاصة قبل لا تموت . . كان السر هو الدعاء .. و السر التاني الصراحة ( زوجي كان من حسناته و أفضاله علي .. انه كان ينصحني و يقول لي ارجعي كلمي أمك لما امي كانت تزعلني مرات بدون سبب و تسبني و تشتمني كذا ؟؟؟؟ كان وقتها يدق على امي و يعطيني السماعة و يقول ارجعي كلميها و كأنه مافي شي ) <--- ربي استجاب لدعوتي انه رزقني شخص يعينني على طاعتها فكانت امي تقول لأخواتي و من خلفي .. بنتي روح الطير مو مثلكم .. لما ازعلها و أقفل الخط بوجهها .. و هي في غربة .. ترجع تدق علي و تتصل و كأنه ما صار شي و تضحك و تتكلم معايا عادي انتوا تقاطعوني و تطنشوني بالايام و انا ارجع ادق عليكم بعدين .. و كمان ما تردوا علي كويس او تقفلوا الباب بصوت عالي و تطنشوني |
رد : *. أرغب بالفضفضة عن شقيقاتي .*
^
ملاحظة مهمة / أختي الكبيرة .. كانت أكثر وحدة بيننا .. حنونة جدا على أمي .. و صبورة جدا جدا جدا جدا من يوم و هي طفلة .. للدرجة اللي صارت شخصيتها مهزوزة .. بسبب تردد شخصية أمي و تحكم أمي فيها و انتقاداتها لأختي الكبيرة .. أمي كانت تمنع كل شي عن أختي الكبيرة .. ممنوع بنطلونات ، ممنوع تقصي شعرك ، ممنوع تقولي كذا ، ممنوع تضحكي كذا ،. إلخ أنا كنت العكس .. جيت بين ولدين ، و ما كانت أمي تدقق علي ، و لا كانت منتبهة لي ، لإني الطفلة الوسطانية .. . . أختي الكبيرة مستحيل إنها تغار ( بسبب تعامل أمي معايا ) .. لإنه أختي كانت تحبني مرة و نحن صغار .. و تهتم فيا مرة .. و تجيب لي هدايا نجاح و تشجعني أصير الأولى و المثالية .. . . أختي الكبيرة أحس إنها بدأت تعيش حياتها ( من يوم تزوجت ، و بدأت الطفلة الي بداخلها تظهر لما تزوجت ) .. فأخوات زوجها ينتقدوها ، لإنه صارت أختي تخرج كل شي انحرمت منه و تتصرف تصرفات طفولية .. صاروا أخوات زوجها يمدحوني و أنا ما أدري و الله .. يقولوا ( إني ثقيلة و راكزة ) .. أخوات زوج أختي .. ملتزمات .. و أنا كنت أكثر وحدة من أخواتي قريبة للدين و المحافظة نوعا ما .. . . أختي تسمع أغاني و تلبس فوق الركبة قدامهم و زي و تشتري أغراض أطفال من المحلات .. و زوجها ماشاء الله يحبها و فرق بينهم بالعمر ، فيعاملها مرات كأنها بنته ( أحس ربي عوضها ماشاء الله لإنها صبرت على أمي ) فصاروا أخوات زوجها ينقهروا منها ، و يقهروها بزيادة انهم يمدحوني قدامها أو قدام زوجها .. أتوقع هذا هو السبب .. و بزيادة كمان أختي تغيرت معايا ( لما تزوجت أنا و توظفت ) . . بالإضافة ( إلى تأثير كلام أخواتي و أخواني عليها .. بعد وفاة أمي خاصة ) .. صاروا يعبوا راسها علي .. إنه أنا روح الطير ( استغل طيبة أختي و تضحياتها ) ؟؟؟؟؟؟؟؟؟؟؟؟؟؟؟؟؟ و هي شكلها صدقتهم .. لإنه هي شخصيتها ضعيفة و بسرعة تتأثر و تصدق أي شي . . أختي الكبيرة تعترف بنفسها ( إنها انسانة مادية و تحب الفلوس و ما تشبع من الفلوس ) كذا هي مرة اعترفت ، و بالفعل لاحظت الشي هذا .. صرت أحسها تحاول ترضي أختي التانية اللي زوجها مليونير ماشاء الله .. عشان أولادها يروحوا عندهم و ينبسطوا هناك .. يمكن لإنها عاشت محرومة ؟ و كانت تشوف أختي الي اصغر منها في الجامعة و تاخد مكافاة و هي لا ؟ . . أنا مهما كابرت .. لكن فعلا متأثرة إنه صدرت منها الحركات الي شفتها منها و تشمتها فيا بشكل لا شعوري منها .. كأنها لما شافت الي صار بيني و بين زوجي .. ( شعرت انها انتصرت أخيرا ) .. لا أحد يقول تخيلات .. خلاص المواقف اللي أكلتها بعد موت أمي مباشرة .. خلتني أفهم كل شي من عيون الشخص .. و أنا زمان كنت دايم أقرأ عن معاني الإشارات الجسدية بس للتسلية .. و صرت حاليا أفهم الشخص من حركات عينه ، و الدليل إني أكشف زوجي مباشرة لما يكذب و حتى أولادي أفهمهم من حركاتهم و نظراتهم .. , , لكن مالقيت تفسير لتصرفات أختي الكبيرة .. معايا أنا ..؟ . . |
رد : *. أرغب بالفضفضة عن شقيقاتي .*
ما شاء الله عليج يا روح .. حللتي تصرفات أختكِ ولازلتِ تجهلين سبب سلوكها معكِ.
واضح يا روح أن أختكِ كانت لها معاناتها الخاصة .. أولاً بسبب طبع والدتكِ رحمها الله القاسي . وثانياً بسبب طيبة قلب أختكِ وربما هشاشة شخصيتها. يعني هي ليست سيئة من الأساس .. بدليل أنها لم تكن كذلك عندما كنتما صغيرتان .. بل كانت على النقيض تماماً. أذكر مرة موضوع شاركت فيه العزيزة أم يوسف ـ حسبما أذكر ويا رب ما أكون ناسية ـ تحدثت فيه عن والدتها وكيف كانت تتعامل معها ومع أخيها .. كانت الأم تلاحق الولد وتهتم بأكله ودراسته .. بينما لا تهتم بأم يوسف كاهتمامها بأخيها. أم يوسف كانت تعتقد ـ وهي صغيرة ـ أن أمها تحب أخيها أكثر .. وعندما كبرت اكتشفت أن ما كان يبدو عدم اهتمام هو في الحقيقة ثقة في قدراتها .. يعني الولد لأنه كان مهمل في دراسته فهو كان يحتاج ملاحقة وسؤال دائم .. وهي لأنها كانت مهتمة بدراستها فلم تكن الأم بحاجة لصب ذات الاهتمام عليها ما دامت تعرف كيف تؤدي ما عليها. وما يبدو أن أختكِ لم تنجح في إدراك موقف أمكما منكِ .. وظلت تعتقد أن التضييق الذي فرضته عليها أمكما مقابل المساحة التي منحتها لكِ ربما تكون دلالة على اهتمام أكثر أو محبة أكثر .. وربما هذا ما انعكس على تصرفاتها معكِ فيما بعد. |
رد : *. أرغب بالفضفضة عن شقيقاتي .*
عذرت اختش مثل ما قالت مهره
عندها معاناتها الخاصه وكل سلوك وتصرف يكون نتاج تربيه وماضي صعب روح الطير احنا 12 امي جابتهم 6 بنات و6 اولاد وكل واحد فينا نفسيه وشخصيه غير عن الثاني كثرتهم واغلاطهم خلتني اغض الطرف عن زلاتهم اذا احنا اخوان وما عذرنا بعض ؟؟ مين بيعذر حد مشيها وهونيها صايره حساسه هاليومين |
رد : *. أرغب بالفضفضة عن شقيقاتي .*
بيتا
ما أظن أختي الكبيرة بسبب أمي الله يرحمها أبدا ، و لا كان الشي هذا من زمان بدأ يظهر .. خاصة إنه أختي متزوجة و عايشة بمدينة بعيدة عننا .. فما شافت و لا عاشت (فترة قوة) علاقة أمي بيا أختي صحيح كانت تتحمل أمي ، و تخدم أمي .. و هي طبعها خدوم مع الكل .. لكن ماهي متعلقة في أمي مثلي .. و لا حتى تأثرت بموت أمي قد كذا .. أختي هذه عندها زوجها أهم من أمي و مننا كلنا .. حتى لما كانت أختي تنزل بالإجازات و تجلس عند أمي ، كانت تترك أولادها ببيت أهلي و تروح هي تزور الناس و لا تروح الأسواق أو الزواجات .. كانت أمي تقول لها ( إنت مو جاية عشان تشوفيني ) .. أختي الكبيرة مو مرة متعلقة في أمي ، بالعكس .. عاشت حريتها بعد ما تزوجت .. و كانت تتهرب من انتقادات أمي و تتأفف .. و ما تنفذ كلام أمي ( بعد ما تزوجت ) .. . . أختي الكبيرة ، تغيرت .. ماهي مثل زمان .. . . كوكي .. سببوا لي الأذى .. مو مجرد اختلافات عادية .. اتهموني إني عاقة بأمي .. اتهموني إنه أمي ماتت وهي غضبانة علي .. نشروا عني كلام .. طردوني من بيت أمي بعد ما انتهى العزاء ثلاث أيام .. دخلوا بنيتي و قلبي و فسروا كل شي من راسهم و نشروه بينهم و لحد ما ربي أظهر الحق و انصفني .. لو شافوني اضحك ، انقهرووووووووووا .. يكرهوا إني اضحك .. و يفرحوا إذا شافوا دمعة من عيني .. يحرضوا بعض إنهم ما يوقفوا معايا في وقت النفاس أو الولادة .. لو شافوا أحد من الأقارب ، قريب مني .. تغيروا و حللوا و فسروا كل شي من راسهم .. قلبوا أخواني الأولاد علي .. لو احتجت لهم ، ما ألاقيهم أبدا .. يستنوا متى أطيح و يتفرجوا علي .. !!!؟ ماهي خلافات عادية .. أنا أبغى - اقتلع جذور محبتهم من قلبي - .. عشان كذا أبغى أكتب عشان خلاص ( أطوي صفحتهم للأبد ) .. و اعتبرهم من الذكرى .. و ألتفت خلاص لحياتي المستقبلية .. أنا فضلتهم على زوجي و أولادي و على نفسي و صحباتي .. هما العكسسسسسسسس تماماً .. . . سبب البلوى كلها ، وحدة من أخواتي .. هي اللي زرعت الكراهية بقلوبهم ضدي .. |
رد : *. أرغب بالفضفضة عن شقيقاتي .*
حاسه فيك ياقلبي
والله نفسك مريت بظروف وانقلاب ضدي من اعز قريبه لقلبي ابي الاقي تفسير ومتعحبه كثير ماتوصل لدرجه هذي اللي مهونها علي اني مانسيت العشره الحلوه بينا مهما صار بينا نظل خوات ماراح تتغير مشاعر الحب والرحمه من ناحيتها ابدا الحمدلله رددي دايما لا اله الا انت سبحانك اني كنت من الظالمين اطلبي الله رضاه والجنه والصدقه يوميا الله يخليك لا احبابك ويسعدك في حياتك يارب |
رد : *. أرغب بالفضفضة عن شقيقاتي .*
حالياً ..
حاسة أخواتي الصغار ( يبحثوا عني و مفتقدين وجودي ) .. و نفوسهم طيبة تجاهي .. هما متزوجات و في بيوتهم .. و خاصة من بعد ما انقطعت زياراتي ( لأختي الكبيرة الثانية ) .. راح أسميها شرشبيل .. عشان يتم التمييز بينها و بين أكبر وحدة .. . . أختي هذه لو فتحت مجلدات عنها ، ما تنتهي .. و لو تكلمت عن الأشياء الي عملتها معايا ما انتهي و راح اتعب نفسيا أكثر .. لإنه من يوم اتولدت و هي كذا معايا إلى الآن .. و نقلت عدوتها ، للبقية .. . . أنا الشي الي جالس في نفسي إلى الآن .. الأشياء الي حصلت منهم ( بعد عودتنا من دفن أمي الله يرحمها ) كنت في أشد حالات ضعفي : - خارجة من نفاس و ولادة - رجعت من غربة و بعثة و ماعندي أحد - وفاة أمي كل شي .. أختي هذه ، على بالها إني خلاص صرت وقتها ( المكسورة أخيراً ) .. ما تدري إنها كانت فترة ( استراحة محارب ) .. فقامت و ألقت أول طعنة من طعناتها لي ، و أنا توي راجعة من الشرشورة و لسى توهم دفنوا أمي ؟؟؟؟؟ قد كذا الحقد أعمى قلبها ؟ لدرجة إنها بدل ما تفكر في أمي ، تجلس تدقق معاي و تفكر كيف تقلب الكل علي ؟ انقهرت لإنه الناس في العزاء ، قالولي ( إنت اللي كسبتيها يا روح الطير .. تركتي بعثتك و جلستي مع أمك ) الشي هذا حرق قلبها أكثر .. فقامت تقنع الكل و تتبلى علي إنه أمي ماتت غضبانة علي و إني وحدة عاقة بأمي ؟ وصلت ، إلى إني مريت بفترة .. اقتنعت بكلامها .. لما كنت أشوف أموري تتعقد و حياتي تتعقد كل مالها مع زوجي و مع عملي .. تأثرت كثير .. و ما حاولت أظهر لهم .. . . الفترة هذه ، ماحد وقف معايا .. حتى زوجي وقتها ، على باله ماعندي أحد .. و بدأ يظهر وجهه الحقيقي .. |
رد : *. أرغب بالفضفضة عن شقيقاتي .*
دخل الشيطان بينكم تمأما مثل مادخل بين خالاتي وامي ... وللاسف انتو سمحتوله يدخل
|
رد : *. أرغب بالفضفضة عن شقيقاتي .*
راني ران
على أيام أمي الله يرحمها ، كنت الوحيدة اللي أمي تطلب مني إني كل مرة أكبر عقلي .. و إني أسامح و أنسى .. تعلمت من أمي التسامح و النسيان .. و لإنه وجود أمي كان وقتها ( كفاية علي ) و كنت غنية بوجودها .. لكن الآن ، أنا وحيدة .. ( أعيش مشاعر مغتربة الروح .. بغيابها ) .. و ما أقدر أتحمل أذيتهم أكثر من كذا .. هما تعودوا إني أسامح و أنسى ، و تعودوا يجرحوا و أتجاوز و اطنش .. لكن من يوم ما بدأت أغير تعاملي ، بدأت تنحط ( حدود ) و أنا أيضاً أرتاح .. تعودوا يزعلوني و يجرحوني ، لكن وقت فيه اجتماعات عائلية أو مناسبات عادي يتكلموا و يضحكوا معايا عشان الناس و أنا كنت هبلة ارجع اتكلم عادي و بنيتي ،، و اتفاجأ إنهم يتصيدوا أغلاطي و يطلعوا كلام عني و يعبوا راس أخواني الأولاد علي . . حالياً ،، أول شي كسبته بتعاملي الجديد معاهم .. أخوي الكبير ، و اللي الكل يحترمه و يسمع كلمته .. رجعت علاقتنا ممتازة و الحمد لله .. و يوثق فيا و برأيي .. و يستشيرني .. . . سبحان الله .. أحس حياتي سلسلة بالشكل هذا ؟ - لما تقربت من أبوي الله يرحمه و صار يوثق فيا و يمدح فيا دايما .. أختي - شرشبيل - كانت تنقهر و تحرض أمي علي .. و مات ابوي الله يرحمه .. و أصبحت وحيدة فعلاً ، و عوضني ربي بصحباتي و أختي الكبيرة .. - أمي كانت دايما ضدي ، بتحريضات من أختي - شرشبيل - ،، و بعدين انقلبت أمي سبحان الله و صارت تفضلني عليها و تقربت أمي مني كثير .. و أختي - شرشبيل - ، قلبت أخواتي و أخواني علي كلهم ، و الأقارب كلهم .. لدرجة إنها تبلت علي و كذبت في يوم العزاء ، و نشرت كلام عني في وسط أهل زوجها .. - أمي ماتت الله يرحمها ،، و حاليا ، أقارب أبوي اللي أختي هذه قلبتهم علي سنوات .. صرت جدا قريبة منهم و يعاملوني كأني أختهم و يدوروا عني .. و أخوي الكبير صار الحمد لله حاليا ، قريب مني .. لإني وقفت مقابلات مع أختي - شرشبيل - فما صارت تقدر تتقول على لساني أي شي ، و صرت حتى أتجنب التعليق على أي شي في القروبات الي مشتركين بها مع بعض .. علما بإنه أخوي هذا ، ما يتفق مع أختي - شرشبيل - لإنه يقول عقلها صغير ، فهي تستغل أخواتي الثانيين للتأثير عليه .. و أخواتي مازالوا ( بين و بين ) .. لكن خفت أحقادهم عن قبل - نوعا ما - .. لكن يرجعوا مرات و أحس فيه شي بنفوسهم .. و أهل أمي ، قامت أختي هذه - شرشبيل - زرعت فتن بيني و بينهم و قلبتهم علي .. ( كله كلام كذب ما قلته و نميمة ) .. . . مرة حماتها ، بعد العزاء .. قالت لها ( حتى أختك هذه ) ما تكلمك .. يعني أختي فيها غباء .. تروح تتكلم عن أختها - أمام أهل زوجها - فصار الشي هذا حجة لهم عليها .. و قامت صلحت علاقتها معاي بعد العزاء ( مو لله .. اكتشف إنه عشان تبغاني ادخل بيتها و تثبت لزوجها إنه ما بيننا شي ) لإنها بعد العزاء افترت علي ، و إني عاقة و إني و إني .. عشان الكل يكرهني .. لكن زوجها بعدين ، صار يعايرها هي ( إنه حتى أختك مقاطعتك ) .. فكانت تبغى توصل لحماتها إنه شوفينا كويسين مع بعض . . أنا الحمد لله ، فيا طبع .. إني أبداً ما أهتم بكلام الناس .. و لا يهموني .. عكس أخواتي ( إيش يقولوا الناس ؟ ) و يعملوا أي شي عشان يرضوا الناس .. يهموني أخواتي .. مهما صدر منهم .. لكن الإبتعاد مرات يكون هو العلاج الأفضل .. . . و أخويا بعد العزاء قال لي مرة ( بعدي عنهم و اخرجي من البيت .. خليهم ياكلوا في بعض و بعدين يعرفوا كل شي بنفسهم ) .. و بالفعل ، بدأوا يعرفوا نوعاً ما ، حركات أختي ، و ينقرصوا منها .. لكن لما يكون الموضوع ( يختص بيا ) .. يتأثروا و يصدقوها مباشرةً .. . . يمكن لإنه مازالت أثار ( تفضيل أمي الله يرحمها ) موجودة ..؟؟؟ . . افتكر الفترة هذيك ، كانت سلوتي الوحيدة ( سورة يوسف عليه السلام ) .. أحب السورة هذه جداً .. أحسها تشفي قلبي لما أسمعها .. عشت مشاعر سيدنا يوسف بعد وفاة أمي .. و مازلت مجروحة ، و انتظر أقابل أمي و أحكي لها كل اللي صر لي من بعدها ..؟؟؟ . . كتمت كتمت كتمت .. عشان كذا محتاجة أفرغ الآن .. لإنه خلاص فعلاً .. . . أمي قبل لا تموت ، فتحت لي قلبها .. و ما قلت لأحد منهم إيش جلسنا نتكلم .. لإنها اعتبرتني ( صندوق أسرارها ) .. لكن هي أيضاً كانت تعاني من أنانية أخواتي .. فالمفترض إني خلاص ( ما أحزن ) .. |
رد : *. أرغب بالفضفضة عن شقيقاتي .*
فضفضي روح أكثر كلنا هنا نستمع لك ,
|
رد : *. أرغب بالفضفضة عن شقيقاتي .*
ياحياتي ياروح
إن شاء الله أنك ممن يحبهم الله لأن ماتمرين به من الإبتلاء بإذن المولى أنه اصطفاء ومحبة لإنسانة عانت الكثير وصبرت ابتلاك ياروح ليهذبك وامتحنك ليصطفيك فصبراً على أذاهن قال صلى الله عليه وسلم ( إذا أحب الله قوماً ابتلاهم فمن صبر فله الصبر , ومن جزع فله الجزع ) وهذا من عظيم رحمة الله بنا , فإنا في ذلك تنقية لنا من الذنوب , وتفريغ لقلوبنا من الشغل بالدنيا . فلاتجزعي من قسوة أخوتك وتعاملهم السيء معك بعد وفاة أمك وأدعي لهن بالهداية ولا تتوقفي أو تملي من الدعاء لهن فهن لحمك ودمك ولاتحفلي بمحبتهن كثيراً فلو رأيتِ الكره من جميع الناس وخاصة أخوتك تذكري أن لكِ رب تأملين محبته ولو أحبك الله حفظك وشملك برحمته ورد عنك أذي أعدائك فلا يصلون إليك .يالها من محبة عظيمة , يدبر لك أمرك , فلا تمر بك مشكلة إلا بعث لك حلها , يحفظ سمعك فلا تسمعي إلا ما يرضيه , يحفظ بصرك فلا تري إلا ما يحب , يحفظ عليك جوارحك فلا تصرفيها إلا في طاعته فتسامي عن الدنيا وأهلها ياروح وأطلبي ماعند الله أسأل الله لهن الهداية وأن يسخرهن لكِ |
رد : *. أرغب بالفضفضة عن شقيقاتي .*
يقول الله سبحانه : (( يوم يفر المرء من أخيه ))
قريت تفاسير كثيره لهذه الآية و لماذا الأخ /ت اول من يفر منه/ا المرء من ارض الحساب !!! والجواب كان لانه اكثر الظلمات تستوي بين الاخوان والاخوات والتقصير و سوء الظن والظلم و الشك و الريبة ... فاول من يقتص ف ارض الحساب هو الأخ /ت .... حبيبتي روووووح مش انتي الوحيدة :) في اخوات رمسن ف شرف أختهم .، في اخوات في قلوبهم من السواد ما الله به عليم ... ونحن نسال دائماً ... لماذا ؟! نحن أهل نحن اخوان و خوات بس للأسف الشيطان اول زرعه كان بين اخوين حبيبتي هاي من سلبيات تفضيل الأبناء اللي نهى الشرع عنها تكون هذه احدى نتائجها لا تزعلين .، دنيا عباره عن رحلة .، الا ما تكونين معوضه بأخت لم تلدها أمك .، الله يوفقك دائماً وابدا |
رد : *. أرغب بالفضفضة عن شقيقاتي .*
اخوة يوسف كادوا له بعدما راوا محبة أبيهم وتفضليه
ووصلت بهم الأمور للتخطيط لقتله والتخلص منه لكنهم عدلوا عن قتله ورموه في البئر وعاش اياما صعبة وأُخرج من البئر وبيع كعبد لعزيز مصر . تاركا خلفه أبا يبكيه ليل نهار وكادت له امرأة العزيز وأغرته ففر بدينه وأُدخل السجن على اثر تلك الحادثة وأُخرج بعد سنين رغم ان براءته ظهرت من البداية وبعد خروجه من السجن وبعد تلك الظروف الصعبة أصبح عزيز مصر وجاؤه إخوته يطلبون المساعدة وهم لايعرفون انه هو يوسف وكم كانت مفاجأة عندما عرفوا انه يوسف اخوهم الذي رموه في البئر ندموا كثيرا على فعلتهم تلك وطلبوا السماح والغفران وقال لهم يوسف عليه السلام مقولته " لاتثريب عليكم اليوم يغفر الله لكم " ولكي في قصة يوسف عبرة بدأت بظروف متتالية صعبة وانتهت بالتمكين المادي والمعنوي |
رد : *. أرغب بالفضفضة عن شقيقاتي .*
من المواقف الهبلة الي كنت أتعرض لها من أختي - شرشبيل - .. على أيام أمي الله يرحمها
1. أروح أي مناسبة ، و اتقابل بالصدفة مع زميلات و معارف أختي هذه .. و عادي ابتسم و اتكلم مع الحرمة .. تجي أي مناسبة تانية و ما أكون موجودة ، لإني كنت أدرس في الخارج .. تقوم الحرمة تسأل أختي ( فين اختك روح الطير ؟ و ليه ما جات ؟ ) أختي ترد عليها ( و ليه تسألي عنها و ما سألتي عن البقية ؟ ) الحرمة ترد بحسن نية ( ارتحت لأختك سبحان الله كذا من ربنا ) أختي مباشرة ترد عليها ( و ليش إيش فيهم بقية أخواتي ؟ دمهم ثقيل مثلا و لا مو عاجبينك ؟ ) و تروح تنشر لأخواتي كلام عني ، إني أنا السبب الي خليت الحرمة ما تتقرب منهم و تقول لهم إني أنا قلت عنهم دمهم ثقيل ؟ 2. كانت تسألني أختي مرات .. إيش رايك بفلانة الي قابلتيها هذاك اليوم ؟ و أنا هبلة كنت على نياتي .. على بالي أختي و أتكلم معاها مثل ما أتكلم مع نفسي .. أقول لها رايي بصراحة ،، و أرد ( طيبة فلانة و كويسة .. لكن كلامها كثير مرة ماشاء الله ) أختي ما تصدق .. تروح و تقول للحرمة إني أنا قلت عنها ( كلامها كثير ؟ ) أول مرة أشوف أخت مثل كذا ؟ 3. كنت أحضر أي مناسبة لصحباتي ، و أطلب من أختي هذه تجي معايا عشان أعرفها عليهم و يتعرفوا عليها .. كنت افرح و انبسط و اتفاخر إنه أختي معايا .. اتفاجأ بعد شهوووووووووووووووور إنها شايلة بقلبها من الوقت هذاك .. و تقول ( روح الطير أخدتني بالقصد معاها ، لحفلة صحباتها عشان تقهرني و تبين لي إنه أنا ما عندي صحبات كثيرين مثلها ؟ ) 4. تشوف زوجة أخوي متفقة معاي و تمدح فيا و تتكلم معايا و تسأل عني .. تقول لأخواتي ؟ غريبة إيش السر في علاقتهم ؟ ليش تسأل عن روح الطير و بس ؟ تقوم هي تفسر من راسها .. و تقول لنفسها و لأخواتي ( روح الطير تعطي زوجة أخوكم أسراركم .. عشان كذا هي تحبها و تدور عنها .. و أخواتي يصدقوا ؟؟؟؟؟؟؟؟ ) |
رد : *. أرغب بالفضفضة عن شقيقاتي .*
روح عزيزتي قرأت بعض ماكتبتي
وفهمت مجملا غاليتي اقول لك نصيحة وهي عاملي الله نعم عاملي الله وكوني افضل منهم وتذكري ان الاخوة في الدنيا وتذكري كأنك تسفينهم المل كم قال رسول الله وكلها فترة وننتقل لدار اخرى فكوني الافضل وان المؤمن مبتلى وقد يبتلى بإبتعاد اقرب الناس وقرب البعداء منه لحكمة وفقك الله |
رد : *. أرغب بالفضفضة عن شقيقاتي .*
الماسة لا تتكرر
انا من صغري و اعرف حركات ( اختي هذه ) .. عالاقل هذه تبين لك بالوجه .. لكن ما توقعت انه ( البقية ) انقلبوا كلهم و انه بداخلهم شي علي ( وتخطيطات للأسف ) !؟ انصدمت يوم موت امي الله يرحمها و بعده !!!؟ لانه البقية هادئات .. كتومات .. مبتسمات .. مسالمات ( مثل ما كنت أتصور و اتخيل ) لكن فجاة اكتشف فيه أشياء و أشياء و أشياء .. طيب كنّا نجلس سوا و نضحك سوا و نخرج و نتجمع سوا ؟ ما شفع لهم طيب ( مواقفي الطيبة معاهم !؟ ) كانت هي تجلس معاهم باستمرار .. وقت كنت انا اجلس مع امي .. كنت اروح عند امي الله يرحمها و في يدي اي شي تحبه امي .. لانها ماكانت تقدر تاكل اي شي اسألها فين البقية ! لانه تكون لوحدها في البيت تقول لي / قالوا بيتجمعوا في استراحة .. او راحوا بيت اختك .. او راحوا السوق هناك يتجمعوا و تقول لي امي روحي انت كمان معاهم .. ( لأَنِّي رجعت من الغربة و ماكنت أقابل احد و وقتي بس مع امي .. فكانت امي ملاحظة الشي هذا .. و انعزلت انا وقتها عن العالم .. امي مريضة و انا حامل .. و العضوات عاشوا معايا الفترة هذيك ) ما كنت اروح معاهم .. و كنت اجلس مع امي و نجلس نهرج و ندردش سوا .. اي كلام نهرجه و اغلبه كانت امي تجلس تتكلم و تحكي عن ذكرياتها او اي شي او تفضفض و اسمع لها .. امي لما تشتكي مرات من اخواتي او اخواني .. كنت أهديها و اقول لها ما يقصدوا يمكن و احط لهم اعذار بنفسها كانت امي تقول لي و انا في الغربة و تدق علي من السعودية .. تقول فيه موضوع كذا كذا و ابغى أقوله لك لأَنِّي اعرف اختك تولع البنزين و تشحنني زيادة .. و انا تطفئ عكسها .. للأسف ( كل يرى الناس بعين طبعه ) اختي هذه .. تبلت علي عند اخواتي و تقول لهم انه انا أشحن امي عليهم و ضدهم .. لكن ربي الي شايف و ماني غبية عشان على ايام امي الاخيرة اجلس اعبيها او اشحنها او حتى اخليها تتعب حالها انا الفترة هذيك من كثر ما كانت أمي قاسية و تحملت كثير من تصرفات امي القاسية .. و كنت اروح بعدين بيتي و ابكي لانه امي مرة كانت الفترة هذيك عصبية و قلت لأخواتي انه يتحملوا ( لانه الكيماوي أكيد يأثر عالنفسية ) لكن كانوا يتهربوا الجلوس معها .. و هي كانت من حالها تحس بالشئ هذا .. هي كانت تشتكي لي و كنت اقول لها ما يقصدوا و احط لهم مبررات او اسكت ( قل خيرا او اصمت ) ما عمري حضرتها على احد . . جدا مفتقدة جلسات امي الله يرحمها .. الوحيدة الي كنت لما اجلس أتكلم معاها .. ما تفسر كلامي باي طريقة غلط او تدخل بنيتي و تشكك الآخرين فيا ! و كانت تدافع من ورايا و انا مادري .. لا احد يحسب اني كنت الطفلة المدللة فرضا !؟ كانت كثير تشتمني و تخاصمني و تهزئني و تعصب علي و تنقلب علي فجاة .. لكن كنت أتقبل تصرفاتها بأساليب .. يا اطنش و انا اكل بنفسي من داخلي او أتكلم معاها بصراحة و اسألها ليه كذا تعملي معايا ؟ او اقلب الموضوع مزح و تريقة و أعطي تعليقات مضحكة و أغير الجو يا اعصب مرات - انه خلاص كفاية .. خاصة لما تجرحني قدام الكل و قدام اخواني - لكن ارجع أتكلم و لا كأنه صار شي .. و ما أطول بالزعل .. امي بعد ما تعصب علينا ( بسبب الكيماوي ) كانت تندم بعدين مع نفسها .. |
رد : *. أرغب بالفضفضة عن شقيقاتي .*
( اختي الكبيرة التانية .. الي ميزتها من باب الدعابة شرشبيل ) .. فقط للتمييز
خلاص عرفت حركاتها بما فيه الكفاية البقية ( هم صدمتي فيهم ) .. يتقصدوا الأذية و منع اي ( خير ) يجيني .. و يكرهوا الخير لي !؟ ما كان أبدا واضح على ايام امي الله يرحمها ! المشكلة اني أحسن اليهم .. و أأثرهم كنت على نفسي و أولادي و زوجي و بيتي !!!!؟ متعجبة .. . . و ابدا انا ما كنت احس حالي المفضلة عند امي .. اخر سنواتها و فترة مرضها بدأت اشعر من تلميحات الجميع !؟ حتى اني كنت دايما اقول عن نفسي ( بنت البطة السوداء ) .. لانه امي كانت تخاصمني و تنتقدني كثير .. بس الحمدلله ما كنت اخلي كلامها يأثر علي كنت أتقبل كلامها ب ( لا ردة فعل .. و أتجاهل الي اسمعه .. و مرات انفجر الصراحة .. قبل لا اتزوج ) لانه كانت اختي تجي تزورنا و تعبي راس امي علي و تعبي راس اخواني الاولاد .. من كثر التطنيش الي كنت اتعامل به مع اي انتقادات تجيني منهم قبل لا اتزوج كانت اختي هذه شرشبيل تنقهر و تقول البنت هذه ( يا ماعندها احساس .. او عندها احساس اللامبالاة .. او تستهبل علينا ) . . فأتعجب من بقية اخواتي .. إِيش شافوا مني عشان قد كذا الاقي منهم التصرفات هذه ! صحيح ما يأذوني البقية .. لكن يمنعوا الخير عني .. و ما يوقفوا الشر عني .. ماعدا اصغر وحدة .. صارت دحين تدافع عني لو احد تكلم من وراء ظهري و تقول ( اختي و ماحد يتكلم عنها ) و مرات بالنادر ترد ( و تقول الي عنده شي يروح يقوله لها قدامها مو من ورآها ) |
رد : *. أرغب بالفضفضة عن شقيقاتي .*
ما اقدر أتقبل ابدا ( المشاعر هذه ) .. و انتبه لحياتي خلاص ..
هذه ماهي وصية امي .. و امي ما كانت تتمنى انه كذا يصير .. عندي امل كبير .. اني راح اقدر ارجع الكل ( قلب واحد ) باْذن الله .. ابتعادي حاليا و رسمي للحدود .. حتى أوصل الهدف هذا باْذن الله .. حتى لو بعد سنوات .. تربية امي مستحيل ( تضيع كذا .. هباء منثورا ) .. |
رد : *. أرغب بالفضفضة عن شقيقاتي .*
مافي بيت خالي من المشاكل
اسمعي وطنشي وعامليهم بما يرضي الله سبحان الله الام عمود البيت بغيابها ينفقد اشياء كثيره ومستحيل ترجع العلاقات زي ماتكون والتقارب زي ماكنتو تحت سقف واحد الحين الكل ينشغل بحياته وعياله وبيته ولعضهم يفتكر ان العلاقه تتنتهي بغياب الوالدين وماهو ملزوم بخواته وخواته الله يجمعكم ولا يفرقكم اختك الي تطلع منها الحركات عامليها بالحسنى وتقربي لخواتك والله الخوات نعمه اتمنى لو خواتي عشر غير الاخوه الاولاد الي تلاقي حريمهم يحشوا راسهم بس يظلوا عزوه الله يهديهم يارب ويعينا على هالدنيا المشكله بلي بخاف الله ويراعيه ويكون عنده اجساس مايرضى بتلحركات الغلط |
رد : *. أرغب بالفضفضة عن شقيقاتي .*
اكتشفت انه امي كانت تغطي عليهم عشان تحافظ على علاقتنا ..
الله يرحم امك ويجمعك بها في جنات النعيم قلبي وجعني من جملتك هذه اسال الله ان يهدي اخواتك ويرزقك الصبر على معاملتهم ويجعلك ممن قال فيهم سبحانه انما يوفى الصابرون اجرهم بغير حساب |
رد : *. أرغب بالفضفضة عن شقيقاتي .*
الله يرحم امك
اجتهدي في وصلها بعد موتها ابنو لها مسجد او بير مويه واعتمري لها |
رد : *. أرغب بالفضفضة عن شقيقاتي .*
روح..
هل كانت أمكِ رحمها الله تقسو عليكِ هكذا أمام أخواتكِ؟ |
رد : *. أرغب بالفضفضة عن شقيقاتي .*
روح
فكري بكلامي كويس وانتي عارفه انا صحبتك يعني عمري ما رح اوقف ضدك روح مالاحظتي انه عندك مشكله مع كل اخوانك من دون استثناء الا الكبير احيانا تتحسن العلاقه معاه مافكرتي انه ليش اخواتك واخوانك عصبه مع بعض وانتي اللي خارج الصوره؟! مافكرتي ليش كل اقربائك من دون استثناء ماخذين منك موقف والسبب مبهم؟! مافكرتي انه انتي ممكن فعلا يصدر منك تصرفات ( ما يكون قصدك شر طبعا فيها) ولكن ظاهرها يبين اويلمح الى شيء ؟! لانه شيء غريب انه كل اللي حواليك بطالين وماخذين منك موقف بسبب شرشبيل وعشان تتاكدي من الموضوع لازم لازم لازم تمسكي احد من اقاربك او اخواتك وتسالي ليش فجاه شلتو مني يمكن يوضحولك شيء انتي ما كنتي منتبهه له وبالنسبه لاختك الكبيره اعتقد ياروح انتي فقط مشتاقه لحنان واهتمام الام وقاعده تبحثي عنه عند اختك الكبيره وما وجدتيه عندها وخذلتك فعتبتي عليها وجبتي الماضي والحاضر عنها الله يسخرلك خلقه ويحنن قلب اخواتك عليك |
رد : *. أرغب بالفضفضة عن شقيقاتي .*
عندك قدرة عجيبة علي استحضار الماضي بكل تفاصيله ما اعرف ذاكرتك قوية او تركيزك علي الكلام عالي فما تقدري تنسيه
( يعني التدقيق علي الكلام ) و في كلا الحالتين ما حد تعبان غيرك يااختي انسي لولا النسيان لمات الناس هما راح تقولي مو قادرة انسي , اقولك سامحي عشان تنسي الواحد لما يقع يقول ااخ ما في زي الاخ و الاخت حبيب مع كل قسوتهم |
رد : *. أرغب بالفضفضة عن شقيقاتي .*
ميس
انا وقعت و مالقيت احد منهم وقف معايا .. لا تقولي يوقفوا معايا .. و المواقف اكبر دليل .. و انا اكتب .. حتى أنسى .. . . و القدرة هذه و لله الحمد .. نعمة من الله .. مو عشان اني أشيل في قلبي لا سمح الله لكن افتكر و الحمدلله و الشكر مواقف و عمري اربع سنوات و ذكريات جميلة .. افتكر يوم ولادة اختي و افتكر احداث .. ولدي ورث مني الشي هذا .. يحكي لي دحين عن مواقف حصلت و هو عمره 3 سنوات و بتفاصيلها جدتي الله يرحمها ماتت و عمرها فوق المية و كانت تحكي عن احداث و عمرها صغير و تفتكر ابوها الله يرحمه و هي طفلة و تحكي كانت امي كانت تقول انه ذاكرة جدتي ماشاءالله أقوى من ذاكرة امي لما امي كانت شابة |
رد : *. أرغب بالفضفضة عن شقيقاتي .*
لي عودة ..
كريستالة و مهرة و البقية .. |
رد : *. أرغب بالفضفضة عن شقيقاتي .*
أصعب شي لما نمر بقمة ضعنا ونحصل اقرب الناس لنا ماتوقف معانا
أذا الأخت ماشالت أختها بهمها وضعفها من يشيلها لاحول ولاقوة الا بالله أن شاء الله ربي يصلح الحال |
رد : *. أرغب بالفضفضة عن شقيقاتي .*
روح تكلمي وفضفضي
استحضارك للمواقف الماضيه ليس من باب التدقيق بالكلام كما وصفه البعض انما يعتبر على طهارة النفس وصدمتها من المواقف من الاخرين مواقف لم يكن يتوقع حصولها من احب الناس |
رد : *. أرغب بالفضفضة عن شقيقاتي .*
روح حبيبتي
مشاكلك مع اخواتك بسيطه لا تستحق قطيعه ولا كره كلها دق بالكلام وسوالف عاديه الحمدلله يارب تقربي لخواتك لا تفضي اسرار بيتك لكن استمتعي معهن اذهبي معهم الى مطعم اعملي وليمه واعزميهم ارسلي لهن هدايا والله الاخت فعلا عزوه لا يغرك الي يقول ابتعدي وخلك رسميه معاهم اكسبي خواتك وخلوكم على قلوب بعض مااعتقد ان في اخت تكره اختها ابدا |
رد : *. أرغب بالفضفضة عن شقيقاتي .*
روح حبيبتي
خايفه عليك وعلى نفسيتك لاتفكرين في اي احد يضايقك طنشي صدقيني في الأخير مردهم لك اهم شي حبيبتي قوي علاقتك بالله اكثر واكثر وادعي ربك يهدي سرهم ويصلح الحال الله يشرح صدرك ويوفقك يارب |
رد : *. أرغب بالفضفضة عن شقيقاتي .*
راح أكتفي هنا ( من الفضفضة ) .. حتى انتهي من الردود ..
لإني اختبرت نفسي هذا الأسبوع في مدى علاقتي مع أخواتي ( الحمد لله .. أشعر بأن الفضفضة هنا ، أتت لي بنتيجة ما ) .. نظارتي أصبحت ( مغبشة نوعاً ، و ليست مظلمة كما كانت ) .. . . أبدأ بالرد من الأخير .. ^_^ مرة شكرا عشان أعطيتوني من وقتكم .. |
رد : *. أرغب بالفضفضة عن شقيقاتي .*
اقتباس:
. تسلمي يا قلبي .. لا تخافي علي ، أنا عايشة حياتي و الحمد لله .. و ما جيت هنا غير بعد ما اقتلعت جذور ( تعلقي بأخواتي ) .. حاليا ما صرت أتأثر بغيابهم أو حضورهم .. يعني ماني مثل قبل .. و علاقتنا تحسنت و الحمد لله ، و خاصة بعد ما عرفت طبيعة كل وحدة و شخصيتها .. . . أنا هنا ، حتى ( ادفن روح الطير السابقة و أنساها و أعالج جروحها ، حتى أعيش بروحي الجديدة ^_^ ) |
رد : *. أرغب بالفضفضة عن شقيقاتي .*
اقتباس:
مبتعثة ،، ما قاطعتهم و لا كرهتهم ، و ما اقتصرت عالدق بالكلام .. و سوالف عادية .. كانت كبيرة جداً ، و وصلت للنميمة و الفتن و قطيعة بين الأخوان بسبب كم وحدة .. و ما صغرت و انحلت ، غير لما تعاملت مع المشاكل هذه بالتسامح و التغاضي و التغافل .. لكن ما زلت بداخلي ( مجروحة ) و أكره إني أكون كذا .. و أسرار بيتي ما أقولها لأحد ، و ما صرت أصلا أتكلم .. سكوتي و هدوئي ترى ، من ضمن الأمور الي تزعجهم مرات .. ( يفسروا سكوتي و هدوئي .. إنه مو عاجبني كلامهم ، و حتى نظراتي تتفسر من عندهم ؟ و حتى لو كنت سرحانة و افكر في شي ، يفسروه إنه ما عجبني كلامهم ) و لو مرات جلست اضحك و انكت و اتفاعل معاهم .. ( يفسروه ، إني أبغى أتميز عنهم ، و أجذب الإنتباه أو اسرق الأضواء عنهم ) .. . . رحت معاهم مطاعم ، و عزمتهم كم مرة على حسابي ( هما و أولادهم ) .. اتهموني ( تسويي نفسها طيبة مرة و قلبها أبيض ) ؟؟؟؟؟؟؟ اتهموني ( تمثل علينا ) ؟؟؟؟ . . و جربت الهدايا ، و جربت كل شي .. لكن النتيجة إيش ؟ ( النتيجة .. هو اللي جالي منهم ) .. لكن ( توقفت الآن عن العطاء ) و ارتحت الصراحة .. |
| الساعة الآن 03:12 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©