|
عدم سؤال طليقي عن ابنه يحيرني !
الحين الي يطلق زوجته وعنده عيال
لازم يسأل عنهم ويتواصل مع ام عياله والا مو مهم واهم شيء النفقه الحين لي فتره وابو طفلي مايسئل عنه ولا فكر يشوفه ماقصر بنفقته يرسل له كل شهر من لمن انفصلنا بس هالولد لمن اطالعه يتقطع قلبي واشيل همه بكل شيء نذرت عمري ومابقى من حياتي له وحرمت جنس الرجال علي علشان مايضيع وتجي عمه ماتخاف الله فيه وتاذيه بس كيف بيعيش بدون اب ودي الي مطلقه وعندها اولاد تواسيني بكره ايش اقوله اذا كبر لان من الواضح ابوه ماراح يلتفت له وهل فيه شيء من المفروض اسويه مثلاً احنن قلب ابوه عليه ارسل له صوره شورو علي وانصحوني جزاكم الله خير . تم تغيير العنوان ليتناسب مع المضمون |
رد : استفسار بسيط !!$
هلا عبير ..
الله يحفظ لك ابنك وتشوفين ما تقر عينك فيه , أنا شخصيا لما كانوا أولادي صغار كنت أتواصل مع ابوهم عشانهم يعني مثلا لما تطيح البنت أرسل له رسالة تعال ودها المستشفى , أكلمه يزيد المصروف , لما يزورونه ويرجعون وفيه شي ناقص لو بسيط , أرسل له .. مع إن ابوهم مو ساكن بنفس المدينة , بس لما يزور .. أي شي يقوي علاقة الأولاد مع والدهم ما أتردد فيه , وأقوي علاقتهم بأهل أبوهم , كنت دائما أوديهم يزورون جدتهم وعماتهم حتى لو ما طلبوا .. ابذلي الي تقدرين عليه عشان ما تنقطع العلاقة .. لان الي يغيب عن العين يغيب عن البال , وحطي ببالك إنك تسوين كذا عشان هذا هو الصح والا الحافظ هو الله , وكلي أمر ابنك لله ولا تشعري للحظة كونك حرمتي نفسك من الزواج معناه ان ابني سيكون مهتديا صالحا .. وكلي أمرك لله وكلي أمرك لله وكلي أمرك لله . |
رد : استفسار بسيط !!$
تسلمين حبيبتي
انا راغبه اتواصل علشان الولد بس مع مين ابوه سوى حظر علشان يريح راسه وعمته زوجة ابوه اذتني بكلامها وتجرحني بطريقه غير مباشره فطلبت منها عدم التواصل لابخير ولا شر عماته وجدته ولا رفعوا السماعه ولا ارسلوا حتى ناس غريبه الله المستعان وكل واحد لاهي ببيته وعياله مو فاضين قفلوا كل الطرق الي توصل لهم فكرت اغير رقمي بس قلت لا ان شاء الله تحن قلوبهم ويسألون لو بالشهر مره بس ولا احد يمي حرمت الزواج على نفسي مع ان عمري 27 لاني ذقت الذل والهوان من الرجال معاد اقدر اغامر او اثق الحمد لله على كل حال |
رد : استفسار بسيط !!$
لا تتواصلين معاه.. لان زوجته ماراح ترضى ويجيك بعدين كلام انت في غنى عنه
وزوجته ارتكيها معروف الغيرة لاعبه في حسبتها واذا ما جا ابوه من نفسه وتغير مع ولده محد يقدر يغيره.. ربي ولدك وياكثر اللي عاشوا بدون آباء وحياتهم احلى حياة.. |
رد : عدم سؤال طليقي عن ابنه يحيرني !
كم عمر ابنك ؟
|
رد : عدم سؤال طليقي عن ابنه يحيرني !
عمر طفلي سنتين
|
رد : عدم سؤال طليقي عن ابنه يحيرني !
لا تتواصلين وولدك بالحفظ والصون
ما بحتاج الطليقه تعلم طليقها عن ولده اذا هو يخاف الله بيجي ويشوفه غيره منتي على ذمته تعلمينه استودعيه الله والله يهدي ابوه له ولا تحرمين جنس الرجال يمكن يجيك واحد خيره لطفلك ويعوضه عن حنان الاب والحمدلله ولدك بحضنك بعضهم ياخذ منها اولادها وفقك الله |
رد : عدم سؤال طليقي عن ابنه يحيرني !
ماحب ولده
لانه ما حبك!! كلامي قاسي بس هذي الحقيقة عشان كذا ما رح يدوره ولا يسال عنه فلا ترهقين نفسك وتفكرين فيه فيه رب يحاسبه اهم شي ولدك اهتمي فيه |
رد : استفسار بسيط !!$
اقتباس:
الله يتمم علييج ويوفقج |
رد : عدم سؤال طليقي عن ابنه يحيرني !
اقتباس:
كم صارلكم منفصلين؟ من طلب الطلاق ؟ اشكثر صارلكم منفصلين ؟ انا في بداية طلاقي تعبت نفسيا وقطعت حتى عن الاولاد بعدين الحمدلله علاقتي معاهم صارت قويه جدا |
رد : عدم سؤال طليقي عن ابنه يحيرني !
ادعي من قلوب البشر بين اصبعين من اصابعه سبحانه
دايم بسجودك قولي يارب تسخر لابني ابيه كماسخرت الجن لسليمان والن قلبه اه كما النت الحديد لداؤود |
رد : عدم سؤال طليقي عن ابنه يحيرني !
الله يحنن قلبه على ولده
عادي أختي شوفي بنتي اول مولودة عمرها أسبوعين والله طليقي مافكر يجي يشوفها أو يسأل عنها ولا حتى أهل أبوها ماقول غير الله يجعل حوبتي وحوبة البنت ماتتعداه لاهو ولا اهله |
رد : عدم سؤال طليقي عن ابنه يحيرني !
لا حول ولا قوة الا بالله
شاكره ومقدره مروركم وردودكم الدنيا ماتدوم الا لخالقها ليش نجيب اطفال ونضيعهم والله حرام |
رد : عدم سؤال طليقي عن ابنه يحيرني !
شوك ردك قاسي
واهو الواقع بس ليش يوم انه ماحبني كان بيموت ويجيب مني عيال وفرح لمن حملت ولمن ولدت جاب الهدايا والذهب ولمن كنت اجهز للولاده كان يشاركني بكل التجهيزات وفرحان وجهز غرفة البيبي قبل ولادته هذا مو حب ؟؟! |
رد : عدم سؤال طليقي عن ابنه يحيرني !
اتوقع مافيه رجال بالنيا راح يحن على طفل مو من صلبه
ليش اعشم نفسي واكذب واجيب لي بلوه وانا مرتاحه الحمد لله استقرار نفسي احسد عليه اروح اهدم سعادتي برجال مايخاف الله وحقوقه ياخذها بالطيب او الغصب وانا مالي اي شيء .. الزواج هم وغم وقرف احد يبي يطلع من الجنه لنار ماضنتي ! |
رد : عدم سؤال طليقي عن ابنه يحيرني !
رد شوك حقيقي.. وهذا اللي يصير بعد الطلاق
المشاعر السلبية هي سيدة الموقف كثير رجال ما يتحملون اللي يصير لهم بعد الطلاق ويتمنون انهم ما خلفوا عيال وللاسف ماعاد يهتمون في عيالهم هذي حقيقة والله المستعان.. |
رد : عدم سؤال طليقي عن ابنه يحيرني !
كوني أنت أبوه وأمه وإخوته وصديقه ،آبنك صغير راح يكبر على اللي ربتيه وغرستيه فيه
إذا سألك مستقبلا وين بابا أخبريه أنك آنفصلت عن بابا لأنكما لم تتوافقا وحين يكبر يستطيع الذهاب إليه أشبعيه حنان ولن يسأل عن أحد وإن سأل فمن باب الفضول أعانك الله ويسر أمورك |
رد : عدم سؤال طليقي عن ابنه يحيرني !
الله يسخر لك طفلك ويحفظلك ياه وتقري عينك بشوفته من الاطفال الباريين الصالحين
اختي عبير ما بضيع عند ربنا حق اي انسان ان كان طفل او راشد والحمدلله الطفل بحضنك وانتي ما اخطأتي ولا بعدتي الطفل عن والده وعن عائلة ابيه بس سؤال بيطرح نفسه معقول الانسانية انعدمت عند بعض الناس اذا الاهل انفصلوا شو ذنب الطفل ينحرم من وجود وحنية ابوه واقرباؤه الله يعوضك ويعوض طفلك خيرا الله كريم ولن يترككم ان شاءالله احترامي |
رد : عدم سؤال طليقي عن ابنه يحيرني !
اقتباس:
بس يشهد الله ابي اريحك عشان ما تضربين اخماس باسداس زوجي قال لي مرة انه يحب طليقته لكن لما حملت طلب منها تسقطه!! مع انه ماااات لغاية ما حملت والحين احسه يهمه ولده لكن ما يحبه ويشتاق له !! |
رد : عدم سؤال طليقي عن ابنه يحيرني !
اختي عبير ان تخلى الناس عنكي تذكري ان الله مع من يتوكل عليه ويصدق بلجو اليه
|
رد : عدم سؤال طليقي عن ابنه يحيرني !
يارب وش هالقلوب والله ماكسر خاطري غير الطفل
ليه الطلاق صار منتشر ليه مايحسبوا حساب قبل الطلاق كيف بيعيش هالولد حاولي انك ماتخلينه يححس انه فاقد ابووه عوضيه بحنانك بحبك له ويارب يطلع من الصالحين وتشوفينه امام مسجد ويكون بار فيك |
رد : عدم سؤال طليقي عن ابنه يحيرني !
والله يا اخواتي للحين يحز اب خاطري لما اشوف الاولاد يميلون لي اكثر من امهم
وصلوا مرحله ينتقدون او يستغربون تصرفات امهم و عنادها وعصبيتها من اول يوم طلاق كنت احذرها ولا حياة لمن تنادي في اخر 4 زيارات للاولاد لي. ولدي الصغير ( بيكمل 3 سنوات ) ينبش بالإدراج ويطلع صوره انا وأمه واخوه الكبير لما كان بالروضه كان ايبلي اياها ( كل اسبوع ) ويكلمني كلام اليهال المخربط. انفصلنا وعمره سنتين يعني ماكو واعي ويمكن لما شاف الصوره كانت اول مره يشوفنا مع بعض في كل مره اتسافر امه ما كان يقول كلمة " ماما " والولد الوسطي 8 سنوات ما يسأل اصلا والكبير 11 سنه الي يحاول يمسك العصا من النص. الاكيد ان كلهم ودهم يرجعون يعيشون في البيت الي انولدوا وعاشوا فيه. الله يهديها بس |
رد : عدم سؤال طليقي عن ابنه يحيرني !
تتذكري قصة الرجل اللي استغرب لما شاف الرسول صل الله عليه و سلم يقبل احفاده ...
اذا الله نزع الرحمة من قلب طليقك على فلذة كبده و ما اهتم به و هو من صلبه انتي ايش فيك تعملي .اهتمي بولدك و ربيه و طليقك رح يندم لما ما ينفع الندم اعرف بنت كبيرة تقول ابوها طلق امها و هي صغيرة و لا سال عنهن و لا حتى اعطى نفقتها هي و اختها ابتعد و ما عرفته 27 سنة انا و اختي و حتى عماتي و اعمامي ما حد سال لما كبرت و تزوجت هي و اختها صار يحاول يتواصل معهن بس هي رفضت قالتها له بالحرف الواحد انت لا تعني لي شئ و لا تحاول تتواصل معي بكرة يكبر الولد و يعرف لوحده و يعرف يميز مين اللي ضحى لاجله و مين اللي تركه للنسيان الله يحنن قلب ابوه عليه |
رد : عدم سؤال طليقي عن ابنه يحيرني !
الله يجزاكم خير
ويارب مايحتاج له ابدا الحمد لله على كل حال ولا حول ولاقوة الا بالله |
رد : عدم سؤال طليقي عن ابنه يحيرني !
اقتباس:
ومنها العصبية اللي هي فيها والله يقدم اللي فيه الخير ويخليلك عيالك |
رد : عدم سؤال طليقي عن ابنه يحيرني !
الله يكون في عونك حبيبتي و منتي ملزومة ترسلي له صور ولا تحنني قلبه لولده وهذه امانة في رقبته وين بيروح من ربي
حبيبتي انتي ولد واحد انا توأم وما يسأل ولا نفقة ولا شيء كأنهم عيال حرام والمشكلة يا قلبي اني كنت متزوجة قبله واحد رجل بمعنى رجل حبيته من كل قلبي بس عقمه سبب طلاقي منه وتزوجت ذا وجبت الضنى بس ايش الفايدة كرهني اليوم الي طلبت فيه الطلاق من طليقي بس الحمدلله |
رد : عدم سؤال طليقي عن ابنه يحيرني !
كله باجره وصبرنا مابيضيع عند ربي سبحانه
طيب دام تطلقتي منه مافكرتي ترجعين للاول علشان يمكن يكون لاطفالك الاب الحنون بعد ما ربي كتب له العقم دائما كل اقدار الله خير لو صبرنا واعطينا الامور وقتها بنشوف الفرج والتيسير من الي بيده كل شيء سبحانه |
رد : عدم سؤال طليقي عن ابنه يحيرني !
اقتباس:
::PPP حن على ابنك بصغره يعطيك يحن عليك لما يكبر اذا الضمير ميت انت ماتقدري تحييه طليقك مايخاف الله هذا التفسير الوحيد لانه لو كان يخاف الله ويعرف ايش معنى الظلم ماعمل كذا |
رد : عدم سؤال طليقي عن ابنه يحيرني !
أختي عبير يعلم الله إني أحس فيك وفي ولدك ربي يحفظه ﻷني جربته انا نتيجة طلاق شفت القهر والذل و الغبن و الإهانة وانا صغير و لين عمري 19 ترا والله حاجه مالها دواء امي مالها شخصيه كانو إخوانه وخواته يلعبون عليها ويأخذون راتبها أذكر كانو يسموني المطلقه ابوي الله يهديه ماكان مهتم لا نفقه ولا غير نفقه ولا حاجه كنت أشوف أبوي و مرته وعياله يطلعون ويرون للبر و البحر ويطلعون يتمشون لحالهم
وانا يمر علي وانا واقف ويتعداني وروح لبيتنا دمعتي على خدي من القهر كانو يجمعون مناسبات مجتمعي القريب جداً ولا يعلموني ولا شيء وصبرت وتخرجت من الثانوي واشتغلت وظيفتين وحده نهاري تأمينات وحده في الليل بدون تأمينات وجمعت رأس مال ودخلت التجاره وربي بارك لي في أول سنه وقفت محلي ودخلت الجامعه ولله الحمد المستوى الخامس حالياً وابشرك محلي ثاني له 6 شهور فاتحه وعرسي في شهر ثمانيه لذلك ي عزيزتي لا تحزني انا اضرب لك مثال مشابهة لحالة ولدك الي عليك تسوينه صيري 24 ساعه مع ولدك لا انتبهي تخلينه يروح منك مع ولد خال خاله عم عمه احرصي كل الحرص من الناحية هذي ويوم تقولين زوجة أبوه م عليك منها أنا شفت الويل بسببها و الحين الحمدلله لك ي رب ااخواني من أبوي داشرين وصايعين والحين تكلمني أنتبه لهم شف سولنا كذا وأنا حالف م اسوي حاجه لهم ريال واحد والله م عطيتهم وانتبهي على ولدك من إخوانك و خواتك ترا النفوس تتغير لا تقولين أهلي عندك الحين الي بيغنيك عنهم أن شاء الله الله يخليه لك ويبارك فيه ويجعله عبدن من عباده الصالحين موضوعك شدني وذكرني بذكرياتي و كأني أشوف نفسي في ولدك وبدايته على الدنيا |
رد : عدم سؤال طليقي عن ابنه يحيرني !
اه يا عبير كان يترجاني عشان اجلس معه وهو ضعيف ما عنده اهل كلهم متوفين وكان معتبر اهلي اهله
وبعد ما تزوجت الثاني اهلي ما حبو يفرطو فيه وعرضو عليه اختي بس رفض وجلسو يحاولو لين اقتنع وتزوج اختي وما شاء الله حملت من ثاني شهر وجابت ولد قبل فترة رغم ان المستشفيات كانوا يقولو انه عنده عيب خلقي مستحيل ينجب بس سبحان الله قدرة الله فوق كل شيء معليش حبيبتي هههه نقزت عن موضوعك بس حطي نفسك في موقفي والله انا الي من جد محتاجة افضفض الحمدلله الحمدلله الله يهنيهم لبعض |
رد : عدم سؤال طليقي عن ابنه يحيرني !
وكلي الله وانتبهي على أخلاقه واحسني تربيته وثقي بالله واحسني الثقه
االطلاق يصنع الرجال |
رد : عدم سؤال طليقي عن ابنه يحيرني !
اخوي هموم عشريني
ربي يخليك لامك ويسعدك دنيا واخره وتسلم وجزاك الله خير ع النصيحه الي راح اخذ بها وربي اني شايله هم بكره ودراسة ولدي واختلاطه بالناس وكل مرحله من مراحل حياته الدنيا وصخه وتخوف . اختي غداً اجمل ربي يعوضك خير بالنسبه لطليقك الي اخذ اختك بعدك وحملت فيه حالات كذا تكون الحرمه والرجال مايتوافقون مع بعض ولا يحصل التلقيح بس اذا كل واحد تزوج غير يحدث الانجاب احمدي الله وربي يعوضك حبيبتي وفضغضي وقت ماتبين ووين ماتبين حبيبتي . |
رد : عدم سؤال طليقي عن ابنه يحيرني !
اختي استودعيه الله
|
| الساعة الآن 06:11 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©