|
محطمه
السلام عليكم ورحمة الله وبركاته
ماكتبت موضوعي هاذا الا بعد ماحسيت نفسي بختنق ومافي احد افضفض له اليوم قلت لأبويا انو خلاص ماعاد ابغا استمر بهاذا الزواج وابغا اتطلق بس احس بألم داخلي مو قادره أكل ولا أنام احس نفسي عايشه بصراع احن لزوجي وللذكريات الجميله وبنفس الوقت احقد عليه ومو قادره اسامحه ع اللي سواه فيا وبنفس الوقت احس اني ظلمت ولدي وحرمته من جو العائله احس بمشاعر وافكار متلخبطه .. انا ابغا اللي جربوا مرحلة ماقبل الطلاق كيف قدروا يستمروا بقرارهم بدون ماتاثر عليهم المشاعر والخوف والتردد .. كيف اتجاوز هاذي المرحله اللي احسها اصعب من الطلاق نفسه ؟ انا من الحين مقرره انو الولد مستحيل اخلي ابوه يشوفه حتى لو من بعيد يعني ابغاه ماله وجود كانه ميت |
رد: محطمه
شو سبب رغبتك في الطلاق..
وليش راح تمنعين ابنك من رؤية ابوه وانتي اللي خايفة انه ينحرم من جو العائلة؟؟ اقعدي مع نفسك وحطي على ورقة ايجابيات وسلبيات زواجكم.. وبعدها احكمي |
رد: محطمه
وعليكم السلام
اذا زوجك بيعامل ولده معامله حلوه فياليت تستخرين وتتراجعين عشان ولدك يعيش باستقرار بينكم ..وياليت تعطين زوجك فرصه ثانيه والله يصلح مابينكم ويجبر خاطرك جبرا جميلًا ،،ويكتب لك اللي فيه الخير والسعاده لك ولولدك يارب |
رد: محطمه
اعيش مشاعر مشابهة جدا لمشاعرك مشتته بين احن له وبين مقهوره ومتألمه منه ومشاعر خوفي على ولدي بس بالاخير تاكدي انه مافيه زوج كامل وان كل بيت فيه مشاكل وياليت ماتستعجلين بالقرار وتاخذين فتره تريحين فيها وتستخيرين ربك والله يسعد قلبك سعادة تنسيك كل الامك
|
رد: محطمه
الله يصلح مابينكم اختي
اذا حابه اطرحي شو المشكله بينج وبين زوجج في مشاكل ممكن الوحده تتجاوز عنها وتصبر عليها عشان عيالها يعني اي مشكله غير شي يخص دينه تقدرين تصبرين عشانه واختي مالج حق تمنعين الولد يشوف ابوه حتى هو يقدر يلجأ للاجراءات القانونيه اذا منعتيه ليش حابه تمنعين ابوه يشوفه يعني لا قدر الله اذا الابو زاني سكير فاسق مايصلي يمكن هني تخافين عليه من ابوه بس بعد احس مايجوز انتي تمنعين هالولد من ابوه لانه شوفة ابوه وزيارته يدخل من باب بر الوالدين مستقبلاً لما يكبر الله يحفظه |
رد: محطمه
السلام عليكم ورحمة الله وبركاته ,, الأخت الكريمة ,, أسأل الله أن يربط على قبك ,, سطرك الأخير يبين عمق الألم الذي تحسين به تجاه زوجك ,, وأنه قد قتل كل جميل في حياتكم ,, من الجميل أنك ما زلتِ تدرسين وضع الطلاق وآثاره ,, فهو بلا شك يعتبر من القرارات المصيرية في حياة الإنسان عموما إذا أُجبر عليه أو كانَ خياراً متاحاً يراه ,, ومن الجميل أنك تحفظين كل جميل كان بينكما ,, وتجعلين نصب عينيك مصلحة ابنكما ,, فهذين السببين كفيلين بأن تُعيدي التفكير في طلب الطلاق ,, كلنا نصل بعض الأحيان إلى ما وصلتِ إليه ,, أن تكون شخصاً محطماً ,, ليس بالأمر السهل ,, شعورٌ مؤلمٌ حقاً ,, يجعل من الإنسان المحطم من قبل شخصٍ يعيشُ معه يفكر كثيرا بشكلٍ سلبي ,, أو لأكون صريحا ,, يفكر بالانتقام أو الانطواء والابتعاد ,, أو بهما معاً ,, إذا كان هناك أمل لإبقاء العلاقة ,, وبوادر منكما ,, أتمنى أن تطرحي المشكلة ,, لتسمعي آراء الأعضاء ,, فلربما تجدين بعض الحلول التي تساعدكم على ترميم العلاقة بينكما ,, والبدء من جديد ,, وأنا مع هذا ,, لأجل ابنكما ,, وبما أنك تحتفظين بالجميل بينكما ,, اجعليه مرتكزاً لتصحيح العلاقة ,, لأنه ليس هناك علاقة إلا وتحمل الفرح والحزن ,, الصحة والمرض ,, الخ ,, وإذا كان قرار الطلاق نافذ ,, ولا رجعة فيه ,, فهو كأي قرار مصيري في حياتك ,, يكون هناك تردد وخوف ,, وتوتر ,, فيكون الاستعداد جيداً للمخاطر المتوقعة ,, وما أن تنفذي القرار إلا ويتلاشى كل ذلك ,, وبما أن قرار الطلاق متعلق بكِ وبزوجك وبابنك فمن الأكيد أن له طابع خاص للارتباط ,, فتتضارب المشاعر ,, وهنا عليكِ ترجيح كفة العقل ,, لأن العقل قد يجبركِ على اتخاذ ما لا ترغبين ,, ويجبرك على إيجاد طريقة للحل ,, ولإنجاح الأمور ,, ولأخذ الحقوق ,, أما بخصوص سطرك الأخير ,, ليس من حقك أن تمنعيه لا شرعا ولا عرفا ,, وإذا أردتِ الانتقام فلا تدخلي ابنكما بينكما ,, بل اجعلوه يرى أن العلاقة بينكما ما زالت جيدة وأن الزواج قسمة ونصيب ,, ولا تشعروه بكرهكم لبعض ,, أو بمشاعركم تجاه بعض ,, ما زلت لا أدري عن الجميل الذي بينكم ولا عن الألم الذي سببه لكِ وهل يطغى أحدهما على الآخر ,, أو ينسفه ,, لكني ما زلت متأكداً من أنك امرأة قد أُحسِنَ تربيتها ,, أنتِ قوية ,, وأنا أثق بذلك ,, ,, ,, |
رد: محطمه
اعوذ بالله من عطاك الحق تحرمين اب من ابوه !!!! تنتقمين منه من خلال ولدك !! اتق الله ،،
المفروض تحببين ولدك في ابوه وتخلين مشاكلك مع ابوه بينكم الولد ماله دخل |
رد: محطمه
أنا مابحرم الولد من ابوه الا لمصلحته وحمايه له ..
مشكلتي معاه بختصرها بمواقف عالقه بذهني وأثرت علي نفسيا بشكل كبير : 1- كان يلح علي بالحمل بشكل كبير واول ماحملت كنت فرحانه واهلي واهله يباركولي بعدها بيوم خرب فرحتي بكلامه قالي اول ماتولدين بسوي تحليل للولد اتاكد اذا ولدي او لا انهرت وبكيت بحرقه وقتها 2-لما كنت حامل بالشهر الثالث كنت صايمه ومنسدحه ع السرير فجاه بدا يشد شعري ويسبني بكلام قذر واني فين اروح اذا وداني بيت اهلي جلست الارض عشان الضرب مايوصل لبطني وبدا يرفسني برجوله 3-وانا بالشهر الرابع ضربني بالسلك ضرب جسمي كله صار خطوط خضرا وحمرا كله من الشك ويقذفني ويتهمني بالزنا مع اخوانه 5- بالشهر السابع جابلي ساطور وحشرني بركن يقولي اعترفي الولد اللي ببطنك ولد مين 6- وبنهاية حملي اللي المفروض ارتاح فيه خنقني مع رقبتي ونفس الكلام اني خاينه وان اللي ببطني مو ولده والكارثه انو دائما يفتش جوالي ومخليني احذف البرامج وانا مطنشته عشان ارتاح خاني وراح كلم وحده من صحباتي كلام جنسي قذر بس هيا عطته بلوك وصورتلي المحادثه تمنيت الموت وقتها .. الوقت اللي احتجته فيه لما ولدت سحب علي حتى اجرءات المستشفى سواها ابوي وابوه.. في الاربعين نفسيتي سيئه حزينه ع ولدي احس اني ظلمته بعدها جاني واعتذر وسامحته عشان ولدي وانا ليا عشرين يوم رجعت معاه البيت وليتني مارجعت انضربت وانا نفاس كمان المره الاولى كنت شايله الولد انومه ضربني ع وجهي بدون مقدمات يقولي ايش تسوين مع اخوي وانا نايم ، من بكره ضربني كمان اتهمني بكلام ماقلته ، صبح العيد اللي ناس مبسوطه انا العكس رحت لاهلي ببجامه وانا منهاره اخر مره ضربني قبل خمس ايام يتهمني اني احب زوج اخته ويقول انو الولد مو ولده .. هاذا شي بسيط من معاناتي بسنه ونص زواج للاسف اهله ماراعو الله خدعوني من البدايه كنت احس تصرفاته غريبه بس كذبو علي انه مسحور لين اعترفلي هو انه مدمن كبتاجون الادمان اثر عليه عقليا بشكل كبير صار يسمع اصوات يتخيل اشياء يشك بشكل مرضي دائما يقفل علي الباب اذا خرج ومستحيل يعطيني مفتاح للبيت وياليت الشك راح صار يقولي انتي حتى في البيت ينخاف منك .. لكن بحالاته الطبيعه انسان يعشقني مايرفضلي طلب حنون طيب يحاول يسعدني لو ع حساب نفسه كل مره كنت اروح فيها بيت اهلي واطلب الطلاق يترجاني ويبكي ويوعدني انها اخر مره واسامحه وارجع بس للاسف وعوده كلام ، انا بداخلي حب له ومبسوطه معاه لما يكون طبيعي لكن اذا ترك العلاج او رجع للحبوب تنتكس حالته وتجيه نوبات المرض اللي خلتني اخاف منه ع نفسي وع ولدي وماحس معاه بالامان |
رد: محطمه
لاتستعجلين بالطلاق اخذي وقت كافي للراحه ، بعدها ستتغير امور كثيره تبنين عليها قرارك ، ترى الطلاق ليس سهلاً بعض الاحيان على الرجال مابالك بالنساء ...
|
رد: محطمه
كلمت انتي طالق اللي تكسر كل زوجه سمعتها مليون مره .. ترك وظيفته وابوه يعطيه مصروفنا اليومي بس عشان مايرجع للحبوب .. دخل مستشفى الامل اكثر من ثلاث مرات بس انسان ارادته ضعيفه ومو جاد بالعلاج حتى دينيا اوقات يصلي واسابيع يتركها انا وقفت معاه وحاولت اساعده وسامحته ع الاشياء اللي سواها فيا بس ماقدر احسني اتدمرت نفسيا وخايفه ع نفسيتي ولدي اكثر .. مابغا اتراجع عن قراري زي كل مره لما يكلمني احزن عليه واسامحه وهاذا اللي مخوفني من نفسي
معليش ع الاطاله |
رد: محطمه
الله يشافيه ويهديه ويصلحه ، مادام راعي حبوب الله يصلح حاله ، والله المستعان
|
رد: محطمه
الله يعينك أختي
كلمي محامي عشان تعرفين كيف تثبتين إنه مدمن عند القاضي بحيث ماياخذ منك الولد لأنه لو قرر ينتقم منك بولدك احتمال يرتكب أي جريمة وفعلا لو مكانك مابرسله زيارات إلا لو لبيت إجداده ادعي واستخيري كرري دعاء الكرب وذكر (حسبي الله لا إله إلا هو عليه توكلت وهو رب العرش العظيم) 7 مرات الله يتولاك أختي |
رد: محطمه
شوفي لكي محامية تظبط امورك
|
رد: محطمه
اسأل الله أن يعوضك خيرا
|
رد: محطمه
الله يفرج همك يارب بما انه الموضوع وصل للضرب واعطيته فرصه اتوقع اللي عليك سويته،والله يحفظك ويحفظ ولدك
|
رد: محطمه
الله يفرج همك
بقائك معه خطر عليك وخاصة على ولده مادامه يشك في نسبه اليه يمكن يعمل فيه شي لا قدر الله لذلك روحي بيت اهلك وخلي شرط رجوعك انه يتعالج لانه كل حياتك ستكون على هذا المنوال والنتيجة زوجة محطمة واولاد منهارين نفسيا واسرة مفككة تداركي نفسك وبلاش عواطف اكلمك عن تجربة احد الاقارب مصاب بوسواس وزوجته كانت تقول اصبر والوالد كان يقول لها يا ابنتي انفذي بجلدك مادامك بطفل لكنها ارادت البقاء شوفيها اليوم بعد عشرين سنة زواج يقذفها في كل مكان حتى امام الجيران الاولاد تركو كل البلد ولم يظهر عليهم اي خبر واصبحت تجي لبيتنا وتبكي عند ابي يتقول ليتني اخذت بنصيحتك لذلك اختي لا ترجعي حتى يتعالج والله يكتبلك كل خير |
رد: محطمه
مسلسل الضرب .. بس اني اسمعه انووجعت كيف انتي ؟؟
اولا لو كنتي متأكده من قرار الطلاق استخيري مليون مررره وفوضي امرك لله حق التفويض .. واعزمي انه اخير لك اللي بيصير والله بسوقه لك بالنسبه للطلاق مع اطفال عادي اذا كنتي مقتنعه .. البدايه صعبه بس كل شيء يداويه الوقت .. وانتي خليك قويه .. اذا مرك الحزن عادي عطيه وقته .. تبين تبكين ابكي. .. كل شيء عطيه وقته بس حاولي تجتازين المرحله بشيء تحبينه مثلا رسم .. طبخ .. حاولي تسوين اشياء فيها تركيز. صنع مثلا مجسمات انا اكلمك وانا مطبقه هالشي ادخلي مجتمعات جديده .. غير اللي كنتي فيها قبل وانتي متزوجه بس بدون ما تقطعين اللي قبل خلي اصدقاءك من فئه العزاب .. اريح لرااااسك 😂😂 دوري على النكت والاشياء اللي توسع الصدر .. وايضا ذكر الله دايم على لسانك ولك اكيد ورد يومي تسوينه حطي في بالك مرررحله وتعدي .. خليني اختصرها من بدري 😂😂 شوفي سنه بالكثير وانتي اسعد سعيده ❤❤ |
رد: محطمه
الحمدلله انا ولدي مالي عليا حياتي ودائما مشغوله فيه بس احساسي بالفشل وكمان مماطلة زوجي بالطلاق هيا اللي تزيد الالم عندي .. ومتأكده أنها مرحلة وتعدي .. أنا اللي متعبني اني بديت احقد ع اهله كمان لانهم عارفين مشاكل ولدهم وزوجوه وكمان استغفلوني وكذبو علي
|
رد: محطمه
الأخت الكريمة ,, احفظي حقوقك ,, ورتبي أمورك مع محامي ,, فرج الله عنك ,, ,, |
رد: محطمه
الله يعوضك وحسبي الله ونعم الوكيل
|
رد: محطمه
عزيزتي حور ..
الحمد لله انها سنة و نص بس اللي ضاعت من عمرك .. لا تضحكين على نفسك و تتصابرين و لا تتجاهلين و لا تكابرين في موضوعك لأنه ببساطة مو سهل ابدا و لا هو خلاف عائلي بسيط بعدين تقولين انه ما يصلي .. يعني موت و خراب ديار .. و اهله الله يسامحهم ماشين على القاعدة المتخلفة "زوجوه يعقل" كأن الزوجة حبة دواء بس ياخذها ولدهم يطيب و يشفى و ينصلح حاله و ربي يهديه.. |
رد: محطمه
مرحلة ما قبل الطلاق و اثناءه و ما بعده لا يمكن تجاوزها الا عن قناعة تامة بالطلاق نفسه دون اي شك في مصداقية الخطوة التي تقبلين عليها !
|
رد: محطمه
كيف تقولين سمعت كلمة طالق مليون مرة وجالسة معاه ياأختي هذا حدود الله مو لعب عيال يطلقك باستمرار وقاعدة وانت ماتحلين له أصلا كيف مااستفيت في هذا الموضوع ؟
|
رد: محطمه
سألت شيخ وقال انو المريض النفسي والعقلي مغيب عنه الادراك فطلاقه لا يقع
|
رد: محطمه
مرحباً أختي
حاولي أن تتفاعلي مع الأعضاء وتردي على مشاركاتهم حتى تستفيدي أكثر من موضوعك أو تشكريهم على الأقل أنهم شاركوا معك أما بالنسبة لموضوعك فرأيي الشخصي متعاطي الكبتاجون يستطيع التخلص معه إذا عزم على ذلك وأستمر على العلاج لذلك .. أنصحك أن تعملي إجتماع أنتِ ووالدك ووالده .. وأن تشرطي عليهم أنك ستعطيه آخر فرصة أن يتوقف عن الحبوب وأن يتعالج وأن يتوقف عن إتهامك والشك فيك وضربك .. ثم تعطيهم مدة حوالي شهرين أو أكثر أن يثبت أنه تعالج ولو بنسبة كبيرة وظهر ذلك عليه ومستمر في صلاح نفسه بعدها عودي لبيتك وإن شاء الله يكون خير ولو عاد لنفس سلوكه من الإتهام أو الضرب .. فحاولي أن تسجلي كلامه بطريقة خفية وهو يتهمك وكذلك لو ضربك أحصلي فوراً على تقرير من المستشفى .. وعندها تأكدي تماماً أنه لا يصلح لكِ أبداً وسيتعبك لو بقيتي معه . والتسجيل والتقرير للإحتياط في حالة مماطلته أو أفتعل لكم مشكلة والله أعلم |
رد: محطمه
اقتباس:
اعتذر لجميع الاعضاء عن تاخري بالرد ولهم دعواتي بالغيب لمحاولتهم مساعدتي شكرا لهم جميعا .. بخصوص العلاج ذكرت قبل انو دخل اكثر من ثلاث مرات مستشفى الامل لللعلاج وكل مره يرجع للحبوب يعني انسان ضعيف وغير جاد بالعلاج .. هوا الان مريض بالذهان او الفصام بشكل ادق وياخذ علاج مضاد للذهان والاكتئاب يعني الحبوب اثرت عليه عقليا بشكل كبير يسمع اصوات غير موجودة ، يتخيل اشياء ماصارت ، افكار غير منطقيه ، شكاك العلاج يسيطر عليه بشكل كبير لكن اذا رجع للحبوب يصير انسان خطر بمعني الكلمه اعيش برعب مو طبيعي خوفا ع نفسي وع ولدي .. والله ما أبالغ اكثر من سبع مرات وانا اعطيه فرص كلمت ابوه وابوي كلمه ويعتذر ويوعد انو اخر مره يمد يده او يسبني بكلام قذر لكنه دائما يخلف بوعدوه .. آخر مره حطيتله شروط بعلم ابوه وابوي وقلتله بتطلق لو مالتزمت فيها وكالعاده مالتزم ضربني وقذفني بكلام قذر واللي يوجعني اكثر كلامه عن ولده خايفه ولدي يكبر ويسمع هاذا الكلام ويتعقد نفسيا |
رد: محطمه
اقتباس:
|
رد: محطمه
الغريب انك للحين تقولين احبه لو وحده ثانيه كان تدعي عليه وعلى اهله من تصحى لين تنام ! * طييب بما ان الموضوع محسوم اصلاً فمشاعرك هاذي ماهي ابديه مسألة وقت لا اكثر ولا اقل المهم تخلصين امورك بأسرع وقت ممكن + ان التفكير العاطفي المستمر ليش صار لي كذا ، انا احبه ، اللحظات الحلوة ، الذكريات ... الخ الخ كله كلام فاضي لا بيوديك ولا بيجيبك خليك في الواقع اللي لازم تتعاملين معه اشغلي نفسك بشي يفيدك اطلعي اعزمي صاحبتك فليها واستانسي ( الناس نوعين : نوع اذا طاح بموقف صعب يخرج منه افضل مما كان ونوع يقضيها لطم وصياح وما يوصل لشي ف شوفي من اي نوع تبين تكونين ) |
رد: محطمه
مرحباً أختي
أشكرك على توضيح بعض الأمور بالنسبة لحبوب الكبتاجون .. فقد سألت واحد أعرفه وأخبرني أن الكثير المنتشر بين المتعاطين هي حبوب سيئة جداً ورديئة وضارة جداً وليست الحبوب الأصلية للكبتاجون .. ولذلك سعرها رخيص جداً ويستطيع حتى الأطفال شراءها من مصروفهم اليومي .. وأخبرني أن إبن أخيه لم يتجاوز 15 سنة أكتشفوا أنه يتعطاها وأصبحت تصرفاته غريبة مثل المجنون .. وعندما ذهبوا به للمستشفى أخبرهم الطبيب أنه من الجيد أنهم أتوا به بدري ويمكن علاجه وإلا سوف يتأثر عقله بدرجة كبيرة المقصود أختي من كلامي السابق بما أن زوجك تأثر عقله .. فربما بدء يصل لمرحلة خطرة يصعب العلاج معها وبما أنك تكلمتي من قبل مع والده ووضعتي شروطك ولكنه لم يلتزم ويعود كما كان فالمعطيات الآن تشير إلى أنه البعد عنه أفضل لكِ ولطفلك وذلك بعد الإستخارة ثم التكلم مع والدك بموضوعك وأخذ رأيه وإنهاء الموضوع أعانك الله |
رد: محطمه
صوري تصرفاته بالجوال
اجعلي الجوال شغال تسجيل كاميرا من بعيد او في يدك واجعلي والده ووالدك يشاهدون هذه المقاطع عشان يعرفوا حقيقة ماتعانين |
رد: محطمه
اقتباس:
مره قالي ابوه لو وحده غيرك ماصبرت ع ولدنا أنا ي أبوه ماقدرت اتحمله .. متخيلين بعد ايش هاذا الكلام بعد ماحملت طيب ليش من البدايه ماصارحتوني بحالة ولدكم وانا لي القرار اقبل او ارفض .. مره بعد ماكل الحبوب راح اتهجم ع اهله بالكلام دقوا ع الشرطه وخلوه بالتوقيف اسبوع خايفين ع انفسهم .. وانا بحريقه اذا رحت بيت اهلي تدق امه ارجعي هو يحبك واصبري ومن الكلام ذا .. اما ابوي يدري بحالتي وكل مره كان يقولي اتطلقي هاذا ماينفع بس انا كنت اسامحه وارجع .. انا ماقلت لابوي كل شي عن حالته النفسيه وادمانه لانو ينقهر ويلوم نفسه انو هوا السبب لان زوجي من طرف احد اصحابه .. وضعي ببيت اهلي جدا ممتاز واهلي داعميني بالقرار ولا فيه اي مشاكل الحمدلله |
رد: محطمه
اقتباس:
عااااادي .. حطي في بالك انك مو اول وحده ولا اااااخر وحده .. وان ما عليه حسووفه وبالعكس. مماطلته بالطلاق حطيها في بالك انه متقطع قلبه عليك وانتي عاايفه وهكذااا احبري خااطرك. وانظري للمواضيع بايجاابيه صح موضوع التعليق مرررره شين .. بس فيه خيره بكل شيء لا تظنين انصحك انا .. وانا مو موجووعه من طلاقي بالعكس لكن خلاص .. لا تلتفتين لورى .. وعدي كل الم. لا توقفين عند شيء لا زواجه ولا سعادته فكري بنفسسسك بس |
رد: محطمه
كلها مسألة وقت وتتلاشي المشاعر هذه طبيعة النفس البشرية
الله يقويك |
رد: محطمه
زوجك خطر عليك هذي اعراض فصام ناتجه من الحبوب او خلقه مادري هو مستمر بالمخدرات مثل زوجي بس زوجي مو مدمن وكان يشك ذبحني بشكه أخاف يقتلني وطلبت الطلاق نفذت بجلدي وانا حامل استخيري وشوفي مصلحتك واستشري طبيب نفسي
|
رد: محطمه
اقتباس:
|
رد: محطمه
وعليكم السلام ورحمة الله وبركاته بعض الناس يغطي جميلهم على سوءهم ويطغى عليه, لكن في بعض الناس من السّوء ما لا يمكن تغطيته وواضح أنّ زوجك في حالة صعبة متعسّرة فقد يؤذيك أو يؤذي الطفل ................. |
| الساعة الآن 01:45 PM. |
Powered by vBulletin® Version 3.8.7
Copyright ©2000 - 2026, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©